[1] دَجِ إِوُلِیسْ تِیَ جَرَࢻْثُورُو رُحُ اللَّهیٜ عِیسَىٰ سِمُوجِیٜ کَرَا دْرِرُو کِلُوُو؞
[2] کَوُ ࢻِدٜوُرُو بُࢽٜیَ کَوْسُوَرُو أَسٜمْ کِدَࢽِّیَ، کْࢽَ تِیَ کِدَ؞
[3] دَجِ جَرَࢻْتُمَدْ ࢽَࢽْجُرُو إِسٜ تِرُو: «ࢽِ تَدَ اللَّهیٜیَ، دُوࢽْغُرْ کَوْیٜ أَࢽِرُو وُلْغْࢽٜ کْمْبُورُو وَلْجَ!» یٜࢽُو؞
[4] عِیسَیٜ: «أَعَ، کِتَوُلَࢽْ رُوُوَدَ: ‹کَمْ کْمْبُو بَسْلَࢽْ غْࢽِ، مَࢽَ اللَّه وُلْجْࢽَ سَمَّࢽْ دْغَیْ،›» یٜࢽُو؞
[5] کُورُو إِوُلِیسْ تِیَ بْرْࢽِ تَیِرُّو ثَدٜ لُویْلُویْرَمْ ࢻَدُو اللَّهیٜࢽْ غْࢽَیٜࢽِّیَ،
[6] تِرُو: «ࢽِ تَدَ اللَّهیٜیَ، سْکْتْࢽٜ ثِدِرُو یُکُّرٜ! أَوُووَ کِتَوُلَࢽْ رُوُوَدَ: ‹اللَّه کْلَࢽْمْࢽِࢽْ مَلَیْیَوَࢽْجُرُو وَدَ ثٜ مُکُّوࢽْجَࢽْ کَمْࢽْجَغَیْ بَرٜ سِࢽْمْ کَوْرُو غْمْدْغْࢽِّرُو،›» یٜࢽُو؞
[7] عِیسَیٜ تِرُو: «أَعَ، کِتَوُلَࢽْ رُوُوَدَ: ‹بَرٜ اللَّه کْمَࢽْدٜیَ رِجَمّْمِّ!›» یٜࢽُو؞
[8] کُورُو یَیٜ إِوُلِیسْ تِیَ کْلَ کَوْ کُرُوُ ࢻٜتْ لَایٜرُو ثَدٜ تِرُو لَرْدُوَ دُࢽِیَیٜ سَمَّا دَرَجَࢽْجَآ ࢻْلٜیٜىٰࢽِّیَ،
[9] تِرُو: «ࢽغُࢽْمٜ وُرُو سُجَدَ سْدّْمِیَ، أَࢽِ سَمَّا ࢽِرُو ࢽجِکِّ!» یٜࢽُو؞
[10] دَجِ عِیسَیٜ تِرُو کَلَکْثِیٜ: «ࢽَࢽِ کُولّٜ، إِوُلِیسْ! کِتَوُلَࢽْ رُوُوَدَ: ‹اللَّه کْمَࢽْدٜرُو سُجَدَ یِدّٜ، تِ تِلُوࢽْجُرُو أَمْبْتْکْࢽٜ!›» یٜࢽُو؞
[11] دَجِ إِوُلِیسْ تِیَ کُولْیٜࢽُو، مَلَیْیَوَ یٜ إِسَࢽٜ تِرُو کِسْکٜىٰرَ؞
[12] عِیسَى ࢽَوِ یَحْیـَىٰ کُوسُورُو ثَسَکّْࢽَرُو ࢻَࢽْغٜࢽِّیَ، ثِدِ غَلِلٜىٰرُو وَلَّدَ؞
[13] بْلَ ࢽَجَرَتّٜیَ کُولْجٜ لٜجٜ بْرْࢽِ لَا کَࢻَرْࢽَامْ ثَࢽِلَࢽْ ࢽَࢻْکٜࢽُو، بْرْࢽِ دُوُوࢽْ ثِ بْرْمْبٜࢽْ ثِدِ جَبُلُوࢽّٜیَ ࢽَࢻْتَلِیٜیَلَࢽْ دْغَࢽَدْ؞
[14] أَدْغَیْمَ أَوُو کْمَࢽْدٜ کُرٜࢽْ ثِ ࢽَوِ إِشَیَیٜࢽْ وُلْجْࢽَدْ وَکَّیٜࢽُو؞ تِیٜ:
[15] «ثِدِ جَبُلُوࢽّٜیَ ࢽَࢻْتَلِیٜیَ کَࢽْجِ جَوَلْ بْرْمْبٜ ࢽَ ثِ غَدٜ بْرْمْ جُورْدَࢽِیٜࢽْ تِرُو غَلِلٜ ثِدِ کْرْدِیَیٜ ثَࢽِدْلَࢽْ،
[16] أَمْ ثُرُو دُوُیٜࢽْ دَسَاࢽَدْ ࢽُرْ کُرَ لَا ثَرُࢽَ، کُورُو تَیِ ثُرُو کَوْدِ کَرْمُویٜࢽْ دَسَاࢽَدْ یٜیَ ࢽُرْ وَسّْࢽَ!»
[17] سَ أَدْࢽْ عِیسَى جَمَرُو کَوُرِ کْجِ وُلْدُوُ بَدِیٜࢽُو؞ تِیٜ: «تْمُّواْ، ࢽُودُو بَرْغَا مَیْ سَمٜمَیٜ دٜلْ کَرْࢽْجْࢽَ!» یٜࢽُو؞
[18] یِمْ لَا عِیسَى ثِ بْرْمْ غَلِلٜىٰیَ جْغَیْ دُوُوࢽْ، یَاࢽَ یِࢽْدِ سِمَࢽْ تِرُو بِتُرُسْ ثَࢽِیَ یَࢽْجُغْࢽَ أَࢽْدَرَوُسَّ بُࢽِ تَرَمْࢽْجَ بْرْمْدْرُو ࢻِجَغَیْ کِرُو؞ تَیِدْ بُࢽِ تَوُ؞
[19] عِیسَیٜ تَیِرُو: «أَرُواْ وُوَ سْغَیْوُو، ࢽَیِیَ کَمْ تَوُرُو ࢽجَدْکِّ!» یٜࢽُو؞
[20] سَدْمَࢽْ بُࢽِ تَرَمْࢽْجَ کُولْجَࢽٜ تِیَ غٜیَ؞
[21] کُورُو ࢽَدْࢽْ ࢻُوُیٜࢽِّیَ، یَاࢽَ یِࢽْدِ غَدٜ یٜ یَعْࢼُوبَ تَدَ جَبَدِیٜیَ یَࢽْجُغْࢽَ یَحْیـَىٰ بَوَࢽْجَࢽْ کُࢽْدٜࢽُّو ثُرُو مَارَیٜࢽْ بُࢽِ تَرَمْࢽْجَ ثَاسَّیْ کِرُو؞ تَیِیَ بُواْیٜࢽِّیَمَ،
[22] ثِجَࢽٜ مَارَدَ بَوَࢽْجَآ کُولْجَࢽٜ تِیَ غٜیَ؞
[23] دَجِ عِیسَى بْلَ بْلَرُو لٜجٜ دَࢽْدَلْࢽْجَࢽْ جَمَا أَلَمْجٜ کَوُرِ کْجِ ࢽُودُو بَرْغَا اللَّهیٜ وُلْجِیے، أَمْ دُوࢽْدِیَ کَسُوَࢽْجَ جِرِ ࢻِ یَیٜࢽْ إِسَࢽْغَجِیے ࢽغَیْ دُوُوࢽْ، ثِدِ غَلِلٜىٰ سَمَّا دِرِیٜࢽُو؞
[24] أَدْغَیْࢽِࢽْ لَوَرْࢽْجُ ثِدِ سِرِیٜ ࢽغَرُو تَتَرْغَادَ؞ کُورُو أَمْ لَرْدُیٜدْ أَمْࢽْجَ کَسُوَآ کْࢽْدُوࢽْدِ جِرِ جِرِیَا کَرُوَآ سٜدَࢽْ کُورُویٜیَا تِیے ثَࢽَآ سَمَّا عِیسَرُو ثَکُّدٜ إِسَࢽْغَیٜىٰࢽُو؞
[25] جَمَ کَدَ تِیَ غٜیَ، لَاࢽجَ ثِدِ غَلِلٜىٰ، لَا ثِدِ بْلَمٜوُیٜ، لَا بْرْࢽِ جٜرُجَلٜمْبٜ، لَا ثِدِ یَحُدِیَیٜ، لَا یٜ ࢽغَوُو بْرْمْ جُورْدَࢽِیٜ؞