[1] «حَࢽْغَلْ غْࢽَࢽُواْ، بَرٜ کْࢽْدُوࢽْدُو جِرٜىٰ ࢻٜدٜرُو جَمَ ࢽَیِیَ ࢽجَرُورُو دِوِّ؞ أَدْ غْࢽِیَ، مُکُووَ ࢽَ بَوَࢽْدُو مَیْ سَمٜمَیٜࢽْ ࢻَࢽْدُوَّوُو؞
[2] أَدْ ࢽَࢽْغَرُو سَدَا تَلَاوَرُو یِدّْمِیَ، بَرٜ مْࢽَࢻْکَّسُو غَیْ أَمْ غَدٜرُو أَوُو دِمَّدَ وُلْغْمِّ؞ تَیِدْ دَࢽْدَلْ سُو، ࢻَرْسَمْ سُولَࢽْ أَمْ تَیِیَ ثَرُو دَرَجَ ثَدُورُو سَدَا ثَدِ؞ جِرٜمَرُو ࢽَیِرُو وُلْࢽْجَغَکِّ، ࢽُوَࢽْجَ ثَوَࢽْدْࢽَ؞
[3] أَمَّ ࢽِدْ سَدَا تَلَاوَرُو یِدّْمِیَ، بَرٜ مُکُّوࢽْمْ وَیْلَ أَوُو مُکُّوࢽْمْ کْمْبُورَمْ ثْدِدَ ࢽُوجْࢽِّ،
[4] سَدَاࢽْمْدْ أَسْرْلَࢽْ تْدُو؞ دَجِ بَوَࢽْمْ أَسْرْلَࢽْ ثُرُیْدْ ࢽِرُو مُکُووَ ࢽجِ؞
[5] «مُودُوَ دِمِیَ، بَرٜ مْࢽَࢻْکَّسُو ثَدِدْ غَیْ دِمِّ؞ تَیِدْ دَࢽْدَلْ سُو، ࢻَرْسَمْ سُولَࢽْ دَادَ أَمْ تَیِیَ ثَرُورُو مُودُوَ ثَدِیَ، ثَرَاࢽَ؞ جِرٜمَرُو ࢽَیِرُو وُلْࢽْجَغَکِّ، ࢽُوَࢽْجَ ثَوَࢽْدْࢽَ؞
[6] أَمَّ ࢽِدْ مُودُوَ دِمِیَ، ࢽغِمّْمْبُو ࢽغَیٜ ثِࢽَّدَ جَࢽْغٜ بَوَࢽْمْ تُرُیْوَوُودَ کُورٜ؞ دَجِ بَوَࢽْمْ أَسْرْلَࢽْ ثُرُیْدْ ࢽِرُو مُکُووَ ࢽجِ؞
[7] کُورُو مُودُوَ دِوِیَ، بَرٜ کْرْدِیَدْ غَیْ أَوُو ࢻَلَّ ࢽغْوُرُو وُوُلُّوِّ؞ مَࢽَࢽْجَ ࢽغْوُ ࢽَࢽْغَرُو اللَّه تَیِیَ ࢻَࢽْجِرُو تْمَجَیْ؞
[8] بَرٜ تَیِ غَیْرُو وَلُّوِّ، دَلِلْࢽْجُدْ کَوُ تِیَ کُورُوِدْمَرُو بَوَࢽْدُو مْرَدُࢽْدُوسُودَ ࢽُوجْࢽَ ࢽَࢽْغَرُو؞
[9] أَکُّو ࢽغَیْࢽِࢽْ مُودُوَ دٜوُو: «‹بَوَࢽْدٜ مَیْ سَمٜمَ، ثُࢽْمْبُو دَرَجَ تِیُو!
[10] ࢽُودُوࢽْمْ بَرْغَا إِسُو! أَوُو رَامَّ دُࢽِیَࢽْ تْدُو، جِرِ سَمٜ یٜࢽْ تْدِدْ غَیْ!
[11] أَࢽْدِرُو کْمْبُوࢽْدٜ کُیٜ سَدٜ؞
[12] بِوُࢽْدٜ غَوُرْسَغَࢽٜ، أَࢽْدِ یٜ أَمْ بِوُ سَدّْࢽَدَ غَوُرْࢽِیٜࢽَدْ غَیْرُو؞
[13] بَرٜ کُولْسَمٜ جَرَࢻْتِیٜࢽْدٜ، کْلَدُودْرُو کَسَࢽٜ؞ ࢽُودُووَ کْࢽْدُوُووَ دَرَجَا حَرْ أَبَدَرُو کَاࢽْمْدْمَ؞ أَمِࢽْ؞›
[14] «ࢽُوࢽُواْ، أَمْ بِوُ ࢽجَدّْࢽَدَ غَوُرْࢽُوِیَ، بَوَࢽْدُو مَیْ سَمٜمَ ࢽَیِ یٜیَ غَوُرْࢽْجَیْ؞
[15] أَمَّ تَیِیَ غَوُرْࢽُوَّوُووَ، بَوَࢽْدُو یٜ بِوُࢽْدُو غَوُرْجِوَوُو؞
[16] «أَسٜمْ دِوِیَ، بَرٜ مْࢽَࢻْکَّ ثَدِدْ غَیْ ࢻْکَّࢽْدُو دِࢽُوِّ! تَیِدْ أَمْ أَسٜمْࢽْجَ ثَرُورُو ࢻْکَّࢽْجَ ࢻَلْجَیْ؞ جِرٜمَرُو ࢽَیِرُو وُلْࢽْجَغَکِّ، ࢽُوَࢽْجَ ثَوَࢽْدْࢽَ؞
[17] أَمَّ ࢽِدْ أَسٜمْ دِمِیَ، کْلَࢽْمْ یٜ کْࢽْدَوُلَࢽْ سَمّٜ، ࢻْکَّࢽْمْ یٜ لَمّٜ،
[18] بَوَࢽْمْ تُرُیْوَوُورُو کَجِیَ، بَرٜ وُࢽْدُمَ أَسٜمْ دِمِرُو ࢽُوجْࢽِّرُو؞ دَجِ بَوَࢽْمْ أَسْرْلَࢽْ ثُرُیْدْ ࢽِرُو مُکُووَ ࢽجِ؞
[19] «بَرٜ کْلَࢽْدُورُو أَرْسِیے دُࢽِیَلَࢽْ ثَمُّوِّ، ࢽَ دُوُوࢽْ کَࢽَمْبَ دِوُرَمْبَ بَࢽَّجَیْ، بَرْوُسُو یٜ ࢻَلْجَࢽٜ ࢽغَسَیٜ ࢽغُوجَیْدْ؞
[20] کْلَࢽْدُورُو أَرْسِیے سَمٜلَࢽْ ثَمُّواْ، ࢽَ دُوُوࢽْ کَࢽَمْبَ دِوُرَمْبَ بَࢽَّجَیْوَوُو، بَرْوُسُو یٜ ࢻَلْجَࢽٜ ࢽغَسَیٜ ࢽغُوجَیْوَوُودْ؞
[21] ࢽُوࢽُواْ، ࢽَ أَرْسِیࢽْدُو دْغَࢽَدْمَࢽْ کَرْوُࢽْدُو یٜ کْرْغَ؞
[22] «سِمْدْ تِمَ ࢻَتْلَ تِییٜ وُو؞ سِمّْمْ ࢽغَا، تِیࢽْمْ سَمَّ یٜ ࢽُرَّرُو وَلْجِ؞
[23] أَمَّ سِمّْمْ جَوْجِیَ، تِیࢽْمْ سَمَّ یٜ دُوُوَرُو وَلْجِ؞ تُو، ࢽُرْ ࢽِلَࢽْ دْغَࢽَدْ دُوُوَ، دُوُ أَدْ جَوْمَرُو کُرَ، دِیٜ!
[24] «وُࢽْدُمَ رَکْثٜ وُولُودِ کَمْ یِࢽْدِیٜرُو وَلْجِوَوُو؞ بِ ࢻَلْ وَجٜ ࢻَلْ ثْرَیِ، بِ ࢻَلْ بْرْسْمْجٜ ࢻَلْ رُجِ؞ ࢽَیِ یٜ رَࢽْغُوٜ وُولُودِ اللَّهَ وُرِیَیٜرُو وَلُّوَّوُو؞
[25] «أَدْ ࢽَࢽْغَرُو ࢽَیِرُو وُلْࢽْجَغَکِّ، بَرٜ کْلَ أَوُو رُوࢽْدُورُو بُوِیَ یَوِیَیٜࢽْ بِ کْلَ أَوُو تِیࢽْدُورُو یَکُّوِیٜࢽْ کَرْوُࢽْغَیْ دِوِّ؞ رُودْ کْمْبُووَ کُوجْࢽَ، کُورُو تِیدْ یٜ کَجْمُوَ کُوجْࢽَ، غْࢽَ؟
[26] ࢽغُدُووَ سَمٜىٰیَ رُیْوُو، کُلُو یٜ ثَࢽَدِوَوُو، کَلَ یٜ ثَدِوَوُو، کُورُو ࢽٜمَ یٜ جَوُلَࢽْ ثَࢻْثَیْوَوُو یَیٜ، بَوَࢽْدُو مَیْ سَمٜمَ تَیِیَ أَمْبَجِ؞ ࢽَیِدْ جَوْرُو ࢽغُدُووَا دَرَجَࢽْ کُوࢽُوَّ، غْࢽَ؟
[27] وُࢽْدُࢽْدُو غْلٜ رَکْثٜ کَرْوُࢽْغَیْࢽْجُلَࢽْ سَ ࢻَلْ کَوُࢽْجُرُو ثْرْغَیْ؟
[28] «کُورُو أَوِرُو کْلَ کَجْمُیٜࢽْ کَرْوُࢽْغَیْ دِوِ؟ ࢻْرٜسُو کَرَایٜ جِرِ رِجَیْدَ رُیْوُو، ࢽغْࢽْࢻْثَیْوَوُو، کُورُو ثَا ثَدِوَوُو؞
[29] أَمَّ ࢽَیِرُو وُلْࢽْجَغَکِّ، مَیْ سُلَیْمَـٰࢽَ جَوْرُو دَرَجَا یَیٜ، ࢽغَلْتٜمَ کَجْمُ ࢻْرٜ أَࢽِیٜ ࢻَلْࢽْجَا ࢽَࢽْشَوَࢽْ ࢽَجْغْࢽَ ثَکّْࢽِّ؞
[30] اللَّه ࢻْرٜسُو کُ کَرَاࢽْ رِجَیْ بَرِ کَࢽُّرُو ࢻِجَغَیْ أَࢽِیَ ࢽغَیْ جَکْثِدْ، ࢻَغَتُّو ࢽَیِ یٜیَ جَࢽّجَیْ، ࢽَیِ کَمْبْرْسٜ غَࢽَادْ!
[31] «أَدْ ࢽَࢽْغَرُو بَرٜ کْلَ أَوُو أَࢽِیٜࢽْ کَرْوُࢽْغَیْ دِوِّ، بَرٜ کْلَࢽْدُورُو: ‹أَوِ غْلٜ بُیْیٜ؟› بِ ‹أَوِ غْلٜ یَیْیٜ؟› بِ ‹أَوِلَࢽْ غْلٜ تِیࢽْدٜ جَࢽْغِیٜ؟› وُلُّوِّ؞
[32] کْرْدِیَسُو أَوُو أَࢽِیَ مَجَیْ، أَمَّ بَوَࢽْدُو مَیْ سَمٜمَ ࢽَیِ یٜ أَوُو أَࢽِ سَمَّࢽْ مْرَدُࢽْدُووَرُو ࢽُوجْࢽَ؞
[33] أَتّْرُووَ، ࢽُودُو بَرْغَا اللَّهیٜیَ جِرٜࢽْجُوَ مَࢽُواْ دُوُوࢽْ، أَوُو أَࢽِ سَمَّ یٜیَ ࢽَیِرُو ࢽجَدِ؞
[34] أَدْ ࢽَࢽْغَرُو بَرٜ کَرْوُࢽْغَیْ بَرِیٜ دِوِّ، کَرْوُࢽْغَیْ بَرِیٜدْ کُیٜ غْࢽِ؞ کُ ࢽغُسُوࢽْ سُوُولْ کَاࢽجُوَ؞