[1] کُورُو عِیسَى وَلْدٜ مِسَلْࢽِࢽْ تَیِرُو وُلْیٜىٰࢽُو؞ تِیٜ:
[2] «ࢽُودُو بَرْغَا مَیْ سَمٜمَیٜدْ أَلَمَ مَیْ لَا تَدَࢽْجُ ࢽَࢽْغَرُو مَسْࢽَ لَرُسَیٜ دَبَّرْجْࢽَ غَیْ؞
[3] مَیْدْ وُولُودِیَࢽْجُ لَآ أَمْ مَسْࢽَرُو دُوجْࢽَدَ بُواْجَ إِسَرُو ࢽَࢽْجَرُو کِࢽُودْࢽِّیَ، کْࢽْدٜرُو وَیٜرَ؞
[4] کُورُو وَلْدٜ وُولُودِیَ غَدٜیَ ثُࢽُودٜ تَیِرُو: ‹أَمْ دُوکّْࢽَدْرُو وُلُّواْ: أَکُّو مَسْࢽَࢽِدْ دٜیَدَ؞ دَلُووَࢽِ سُو، کْࢽَّوَࢽِ کَیْسُوَ سُو دُوَجَࢽَ، أَوِسُو کْرْمَ دَبَّرْغَدَ؞ أَرُواْ مَسْࢽَ لَرُسَیٜرُو!› یٜࢽُو؞
[5] أَمَّ أَمْ دُوجْࢽَدْ مَࢽَࢽْجُدَ أَوِمَرُو ࢽغُوجَࢽِّ سَࢻْکَدَرَ؞ لَا کُلُوࢽْجَرُو، لَا سَࢽِیَرَمْࢽْجَرُو لٜىٰرَ؞
[6] أَمْ غَࢻْثَࢽَسُودْ یٜ وُولُودِیَدَ ثَدَࢽٜ بَسَرْجَࢽٜ رُورُو کٜىٰسُو؞
[7] مَیْدْ غْرْغَجٜ سُوجِیَࢽْجُ ثُࢽُودٜ کَمْثٜجِ أَࢽِیَ رُورُو ثٜىٰسٜ بْلَࢽْجَ کَࢽُّࢽْ وَرْیٜرَ؞
[8] دَجِ مَیْدْیٜ وُولُودِیَࢽْجُرُو: ‹أَکُّو مَسْࢽَ لَرُسَیٜدْ دَبَّرْغَدَ، أَمَّ أَمْ دُوکّْࢽَدْ مَرْتَوَ تِیَ بُویٜ ثَدَࢽِّ؞
[9] أَدْ ࢽَࢽْغَرُو لٜࢽُواْ لَیْ لَیْسُولَࢽْ أَمْ ࢻَࢽْدُوَّ سَمَّا مَسْࢽَ لَرُسَیٜرُو بُواْࢽُواْ إِسَ!› یٜࢽُو؞
[10] دَجِ وُولُودِیَدْ لٜجَࢽٜ لَیْ لَیْ جَاࢽٜ أَمْ ثَوَࢽْدْࢽَ سَمَّا ࢽغْلَࢽْ دِوِࢽْ ثَࢻْثَࢽٜ إِسَࢽٜ، حَرْ لَرُسَرَمْدْ دَمْغٜࢽُو؞
[11] «مَیْدْ أَمْ دُوجْࢽَدَ کُرُورُو کْرْغَاࢽِّیَ، ثُرُوࢽْجَࢽْ کَمْ لَا کَلْوُ لَرُسَیٜ لُجْࢽِّ کِرُو؞
[12] مَیْدْیٜ تِرُو: ‹سَوَ، أَوِیَوِࢽْ کَلْوُ لَرُسَیٜ بَوُووَ ࢽَ أَدْرُو کْرْغَامْ؟› ثْࢽٜ تِیَ کِوُورْࢽِّیَ، کَمْدْرُو أَوُو وُلْدُیٜ کَتْکٜرُو؞
[13] دَجِ مَیْدْیٜ وُولُودِیَࢽْجُرُو: ‹تِیَ سِیَ مُکُّووَرُو غٜرُواْ دٜیَࢽْ ثُرُو دُوُ ثْلْمْ ࢻْتّٜرُو غْࢻْکْࢽُواْ، ࢽَدْࢽْ سُو یٜ تْدِ، شٜرِ یٜ ࢽَلْدِ،› یٜࢽُو؞
[14] ࢽُوࢽُواْ، أَمْ بُواْجْࢽَدْ ࢽغْوُ، أَمَّ تَیِ کْرٜجْࢽَدْ غَࢽَ،» یٜࢽُو؞
[15] دَجِ ࢻَرِسَوَدْ لٜجَࢽٜ سَوَرْدَࢽٜ جَوَلْ عِیسَرُو ثُرُو مَࢽَࢽْجُیٜࢽْ بْلَا لَدُوُیٜ مَیٜرَ؞
[16] ࢻُوُرَوَࢽْجَا أَمْ مَیْ حِرُدُسَّ جَاࢽَ لَآ ࢽَࢽْجُرُو ثَࢽُودٜ تِرُو: «سَیِࢽَّ، ࢽِ کَمْ جِرٜمَ یٜ، جَوَلْ اللَّهیٜ کَلْکَلُّو یِکّْرَمِ یٜرُو ࢽُوࢽِیٜࢽَ، دَلِلْࢽْجُدْ وُࢽْدُمَا رِࢽْمِّ یٜ، غَیِرْࢽْمِّ یٜ ࢽَࢽْغَرُو؞
[17] تُو، أَوِ تْمَࢽْمْ؟ کَیْسَرُّو أَکِّ ࢽجُودْ حَلَلْ رَ حَرَمْ؟» ثَࢽٜ تِیَ کٜوُورُو؞
[18] أَمَّ عِیسَى ࢽِیَدِوِࢽْجَدَ أَسُجٜ تَیِرُو: «مْࢽَࢻْکَّ، أَوِرُو وُوَ رِجَمْسُوِ؟
[19] وُرِ أَکِّیٜدَ ࢻْلٜسْغْࢽُواْ!» ثْࢽٜ دِࢽَرِیُسْ تِرُو کٜکُّدُو؞
[20] تَیِرُو: «ثُوَ کْلَا وُࢽْدُیٜ تِلَࢽْ دَسَا؟» ثْࢽٜ تَیِیَ کِوُورْࢽِّیَ،
[21] تِرُو: «کَیْسَرّٜ،» یٜرَ؞ عِیسَیٜ تَیِرُو: «دَجِ أَوُو کَیْسَرّٜدَ کَیْسَرُّو یُواْ، کُورُو أَوُو اللَّهیٜدَ اللَّهرُو یُواْ!» یٜࢽُو؞
[22] أَدَ ࢻَࢽْغٜرَࢽِّیَ، تِیَ جَوْرُو أَجَࢻْثَࢽٜ کُولْجَࢽٜ سَࢻْکَدَرَ؞
[23] یِمْ أَدْمَࢽْ سَدُسِیَ لَا، تَیِ ثِࢽُواْ دُࢽِیَیٜ بَوُو وُلْجَیْدْ، ࢽَ عِیسَیٜرُو إِسَࢽٜ تِرُو کُورُو ثَدّٜ:
[24] «سَیِࢽَّ، ࢽَوِ مُوسَیٜ: ‹کَمْ لَا تَدَ بَوُووَ بَوُوجٜ کَمُ کُولْجِیَ، یَࢽْجُغْࢽَ کَمُࢽْجُدَ ࢽِیَجُو تِرُو کَدُوُ مَجُوُو!› ثْࢽَّ؞
[25] أَکُّو ثُرُوࢽْدٜࢽْ یَاࢽَ تُلُرْ مبٜجِ؞ بُرْوُویٜدْ کَمُ ࢽغُوجٜ تَدَ ثُوَࢽْدْࢽِّࢽْ بَوُوجٜ کَمُࢽْجُدَ یَࢽْجُغْࢽَرُو کُولْیٜىٰࢽُو؞
[26] یِࢽْدِیٜدَ یَکُّیٜدَ یٜرُو ࢽغَیْ وَکَّجِیٜ، حَرْ تِ تُلُرّٜدْ کَمُدَ ثْمُویٜ بَوُویٜࢽُو؞
[27] ࢽغَوُو أَدْیٜࢽْ کَمُدْ یٜ بَوُویٜࢽُو؞
[28] تُو، تَیِ تُلُرْسُو تِیَ ثَمُواْࢽَدْ، ثِࢽُواْ دُࢽِیَیٜࢽْ کَمُ وُࢽْدُࢽْجَیٜرُو وَلْجِ؟» ثَࢽٜ تِیَ کٜوُورُو؞
[29] عِیسَیٜ تَیِرُو: «ࢽَیِدْ ࢻَتّْغْوَّ، دَلِلْࢽْجُدْ کِتَوُ بِ کْࢽْدُوُو اللَّهیٜ ࢽُوࢽُوِّ ࢽَࢽْغَرُو؞
[30] ثِࢽُواْ دُࢽِیَیٜࢽْ أَمْ لَرُسَ سُو، ࢽِیَ سُو ثَدِوَوُو، تَیِ أَلَمَ مَلَیْیَوَ سَمٜلَࢽْ دَسَاࢽَدْ غَیْرُو وَلْجَیْ؞
[31] کُورُو کَرْمُولَࢽْ ثِدُدْ، أَوُو اللَّه کِتَوُلَࢽْ ࢽَیِرُو وُلْࢽْجَاࢽَدَ کْرَࢽُوِّ وَ؟
[32] تِیٜ: ‹وُمَ اللَّه إِبْرَاهِیمْبٜیَ إِسْحَٰࢼُیٜیَ یَعْࢼُوبَیٜیَ وُو،› ثْࢽَّ؞ تِ اللَّه أَمْ سَࢽُࢽَیٜ غْࢽِ، أَمْ رُووَیٜ، دِیٜ!» یٜࢽُو؞
[33] جَمَدْ أَدَ ࢻَࢽْغٜرَࢽِّیَ، تَیْ دَجَࢽٜ أَلَمْدُࢽْجُدَ أَجَࢻْکٜرَ؞
[34] ࢻَرِسَوَدْ عِیسَى سَدُسِیَدَ مَࢽَࢽْ یَࢻْثْغْࢽَرُو ࢻَࢽْغٜرَࢽِّیَ، ثَࢻْتَࢽٜ ࢽَࢽْجُرُو کَدِرَ؞
[35] ثُرُوࢽْجَࢽْ مَلْمْ أَتَّوْرَیٜ لَا تِیَ رِجَࢻْتُرُو تِرُو:
[36] «سَیِࢽَّ، وَدَوَ ثُرُو أَتَّوْرَ ࢽَوِ مُوسَیٜدْࢽْ ࢻِࢽْجَ کُرَ وُو؟» ثْࢽٜ تِیَ کِوُورُو؞
[37] عِیسَیٜ تِرُو: «‹اللَّه کْمَࢽْمْبَ کَرْوُࢽْمْ ࢽغَࢽْ، رُوࢽْمْ ࢽغَࢽْ، حَࢽْغَلْࢽْمْ ࢽغَࢽْ رَیٜ!›
[38] أَدْمَ وَدَ کُرَ بُرْوُویٜ وُو!
[39] کُورُو یِࢽْدِیٜدْ یٜ تِ غَیْ: ‹کْمَسْکِࢽْمْ یٜیَ کْلَࢽْمْ غَیْرُو رَیٜ!›
[40] وَدَ یِࢽْدِ أَࢽِمَ ࢻْرْدُ أَتَّوْرَ ࢽَوِ مُوسَیٜیَ کِتَوُوَ ࢽَوِیَیٜیَ سَمَّیٜ!» یٜࢽُو؞
[41] ࢻَرِسَوَدْ ࢽَدْࢽْ ثَࢻْتَࢽَ دُوُوࢽْ، عِیسَیٜ تَیِرُو:
[42] «أَوِ کْلَ أَلْمَسِیوُدْیٜࢽْ تْمَࢽُوْ؟ تِ تَدَ وُࢽْدُیٜ؟» ثْࢽٜ تَیِیَ کِوُورُو؞ تِرُو: «تَدَ مَیْ دَاوُدَیٜ!» یٜرَ؞
[43] دَجِ عِیسَیٜ تَیِرُو: «أَدْغَیْمَا، ࢽدَیِلَࢽْ غْلٜ مَیْ دَاوُدَ رُحُ اللَّهیٜࢽْ تِیَ کْمَلَࢽْ بُواْیٜࢽُو؟ تِیٜ:
[44] ‹کْمَࢽْدٜىٰ کْمَࢽِرُو: ࢽَمّٜ کْمْبُورَمِّلَࢽْ دُوُوࢽْ، کْلَدُووَࢽْمْبَ ثِدِیَ سِࢽْمْبٜرُو یَکّْکُّو! ثْࢽَّ؞›
[45] مَیْ دَاوُدَیٜ تِیَ کْمَلَࢽْ بُواْجْࢽَدْ، ࢽدَیِلَࢽْ غْلٜ أَلْمَسِیوُدْ تَدَࢽْجُرُو وَلْجِ؟» یٜࢽِّیَ،
[46] وُࢽْدُࢽْجَمَ رَکْثٜ تِرُو جَاوُ ثِࢽِّ؞ کُورُو أَدْࢽْ ࢻُوُࢽْ وُࢽْدُمَ غَدٜرُو ثِࢽْجُ مُدُ کَجٜ تِرُو کُورُو ثْدّْࢽِّ؞