[1] جَمَࢽْ أَدْࢽْ ࢽَوِ یَحْیـَى کَسَلَمَ ࢻْلٜدِیٜ کَرَا ثِدِ یَحُدِیَیٜࢽْ جَمَرُو کَوُرِ ثْدّٜ:
[2] «تْمُّواْ، ࢽُودُو بَرْغَا مَیْ سَمٜمَیٜ دٜلْ کَرْࢽْجْࢽَ!» ثْࢽِ کْرْغَ؞
[3] تِمَ کَمْ دُوُوࢽْ کْمَࢽْدٜ کُرٜࢽْ ثِ ࢽَوِ إِشَیَیٜࢽْ کْلَࢽْجُࢽْ مَࢽَ ثْدْࢽَدْ وُو؞ تِیٜ: «کَرَاࢽْ کَمْ لَا کُواْ سَࢻْثٜ: ‹کْمَࢽْدٜرُو جَوَلْ دَبَّرْغْࢽُواْ، کُودُرَمْࢽْجُ ثْکُّو دٜوُو!› ثْࢽٜ مَوُوجِ؞»
[4] یَحْیـَیٜ کَجْمُࢽْجُدْ کَࢽْدُرِ کَرِمُویٜࢽْ ثَآدَ، ثَࢽْجَࢽْجُ یٜ ࢽغِرِࢽْ تِکّٜرْࢽَ؞ کْمْبُوࢽْجُ یٜ کَوِیَ کْمَغْࢽَّ؞
[5] دَجِ أَمْ بْرْࢽِ جٜرُجَلٜمْبٜیَ لَرْدُ یَحُدِیَیٜ سَمَّیٜیَ ثِدِ بْرْمْ جُورْدَࢽِیٜ ࢽغَیٜیَ ࢽَࢽْجُرُو إِسَࢽٜ
[6] بِوُࢽْجَ وُلْجَࢽٜ ثُرُو بْرْمْ جُورْدَࢽِیٜࢽْ تَیِرُو کَسَلَ تُوَیٜ کِدُّو؞
[7] یَحْیـَى ࢻَرِسَوَا سَدُسِیَا کَدَ تَیِرُو کَسَلَ تُوَیٜ ثْدُّورُو ࢽَࢽْجُرُو إِسَیْرُو کِرُࢽِّیَ، تَیِرُو: «ࢽَیِ کَدُوُ ࢻُسِیَیٜسُو! وُࢽْدُ ࢽَیِیَ أَجَوُ إِسِدْرُو کَسُواْرُو غَلَࢽْجَ؟
[8] أَوُو تُوَ جِرٜىٰ ࢻْلٜجِسُووَ دٜوُو!
[9] بَرٜ کَرْوُࢽْدُوࢽْ: ‹أَࢽْدِ کَدُوُ ࢽَوِ إِبْرَاهِیمْبٜ،› وُلُّوِّ؞ ࢽَیِرُو وُلْࢽْجَغَکِّ، اللَّهیٜ کْࢽْدُوُوࢽْجُ دُوࢽْغُرْ کَوْیٜ أَࢽِلَࢽْ ࢽَوِ إِبْرَاهِیمْبُو کَدُوُ أَلَکْتُوُیٜ مبٜجِ؞
[10] أَکُّو کْرْمَمَرُو بٜوُودْ ࢻْرْدُ کْسْکَیٜࢽْ غْࢽَادَ؞ کْسْکَ ࢻِ دُوُوࢽْ تَدَ ࢽغْلَ ثَکِّوَوُودَ ثَلْجَࢽٜ کَࢽُّرُو ࢻِجَغَیْ؞
[11] «وُدْ تْمُّوَّ ࢽَࢽْغَرُو إِࢽْغِلَࢽْ ࢽَیِرُو کَسَلَ ࢽغٜدّْکُّو، أَمَّ کَمْ لَا وُوَ کْࢽْدُوُوࢽْ کُوسْࢽَ سُࢽُوࢽْجُ تُلُوُومَ تِکّْࢽِ ࢽغَوُوࢽِࢽْ إِسِ؞ تِدْ رُحُ اللَّهیٜیَ کَࢽُّوَلَࢽْ ࢽَیِرُو کَسَلَ ࢽجَدِّ؞
[12] مُکُّوࢽْجُࢽْ کْمُو لَلَدُرَمْبَ ࢽَ وَسْتُرَمْࢽْجُیٜرُو إِسٜ أَلْغَمَا کَلَرِیَ ࢻِرْجِ؞ أَلْغَمَࢽْجُدَ ثُلُورٜ بْرَلَࢽْ غْࢽَجِ، أَمَّ کَلَرِدَ کَࢽُّ تْمَّرُو ࢽُیْوَوُولَࢽْ وَرْجِ،» یٜࢽُو؞
[13] دَجِ عِیسَى ثِدِ غَلِلٜىٰࢽْ ثِجٜ بْرْمْ جُورْدَࢽِیٜرُو ࢽَوِ یَحْیـَى تِرُو کَسَلَ ثْدُّورُو کَدِیُو؞
[14] یَحْیـَى تِرُو دَࢻْتُوُرُو مَجٜ: «أَ! أَوِرُو غْلٜ ࢽَࢽِرُو إِسْمِدْ؟ ࢽغْلَࢽْجُدْ، ࢽِمَ دِیٜ وُرُو کَسَلَ سْدّْمِ،» یٜࢽُو؞
[15] أَمَّ عِیسَیٜ تِرُو: «کْرْمَدْ کَسَدّٜ، دَلِلْࢽْجُدْ أَوُو جِرٜ سَمَّا دِیُودْ أَࢽْدِرُو جُسّْࢽَ ࢽَࢽْغَرُو،» یٜࢽِّیَ، یَحْیـَى کَسَتْکٜࢽُو؞
[16] تِرُو کَسَلَ ثْدّٜ عِیسَى إِࢽْغِدْلَࢽْ کِلُوُࢽِّیَمَ، سَمٜ ࢻَرَکُّو ࢻْرْمْدٜ رُحُ اللَّهیٜ أَلَمَ بُلَّمْ غَیْ تِرُو جْࢻْثِیے کِرُو؞
[17] کُورُو سَمٜلَࢽْ کُواْ ࢽُکْثٜ: «أَدْمَ تَدَࢽِ وُو، تِیَ رَاکّْࢽَ؞ تِرَمْࢽِࢽْ جَوْرُو کَرْوُࢽِ کْجِجْࢽَ!» یٜࢽُو؞