[1] دَجِ عِیسَیٜ جَمَدَ ࢻُوُرَوَࢽْجُوَرُو:
[2] «مَلْمْبَ أَتَّوْرَیٜیَ ࢻَرِسَوَادْ ࢽَࢻْتُرَمْ ࢽَوِ مُوسَیٜࢽْ ࢽَࢻْکَدَ؞
[3] أَدْ ࢽَࢽْغَرُو أَوُو ࢽَیِرُو وُلْࢽْجَغَیْ سَمَّا دٜوُو غَیْوُو؞ أَمَّ بَرٜ کْࢽْدُوࢽْجَدَ دِوِّ، دَلِلْࢽْجُدْ أَوُو وُلْجَࢽَدَ ثَدِوَوُو ࢽَࢽْغَرُو؞
[4] کَتْکُࢽْ کُرْوُووُ دَمَ بَوُو ثَکّٜرٜ ࢽغَوَࢽَ أَمْبٜرُو غْࢽَجَغَیْ، أَمَّ تَیِ کْلَࢽْجَ ࢽغُلُوࢽْدُوࢽْجَمَ ثَسَࢽْغٜ تَیِیَ بَࢽَجَغَیْوَوُو؞
[5] کْࢽْدُوࢽْجَ سَمَّا أَمْ تَیِیَ ثَرُورُو ثَدِ؞ لَیَࢽْجَ مَࢽَ اللَّهیٜ یٜ ࢻَتَتَلُّو ثَدِ، غْسْرْ کَلْوُࢽْجَیٜ یٜ کُرُوُرُو ثَدِ؞
[6] مَسْࢽَ کُرَلَࢽْ ࢽَ دَرَجَآ دَࢽْدَلَّࢽْ ࢽَࢻْتُرَمْ ࢻُوُیٜیَ ثَرَاࢽَ،
[7] کُورُو کَسُوُلَࢽْ أَمْ تَیِرُو لٜوَ دَرَجَیٜ ثَدّٜ تَیِیَ سَیِࢽَّلَࢽْ بُواْجَیْیَ، جَوْمَرُو ثَرَاࢽَ؞
[8] «أَمَّ ࢽَیِدْ، بَرٜ سَیِࢽَّلَࢽْ بُواْࢽْجَࢽِّ، دَلِلْࢽْجُدْ مَلْمْࢽْدُو ࢻَلْ، ࢽَیِ سَمَّ یٜ کْرَمِیَ ࢽَࢽْغَرُو؞
[9] کُورُو دُࢽِیَ أَدْࢽْ بَرٜ وُࢽْدُمَا بَوَلَࢽْ بُواْࢽُوِّ، دَلِلْࢽْجُدْ بَوَࢽْدُو ࢻَلْ، تِ سَمٜلَࢽْ دْغَࢽَدْ؞
[10] کُورُو بَرٜ ࢻُوُمَلَࢽْ بُواْࢽْجَࢽِّ، دَلِلْࢽْجُدْ ࢻُوُمَࢽْدُو ࢻَلْ، تِ أَلْمَسِیوُدْ؞
[11] کَمْ ثُرُوࢽْدُوࢽْ کُرَمَدْ وُولُودِࢽْدُورُو وَلْجِ؞
[12] ࢽُوࢽُواْ، وُࢽْدُ دُوُوࢽْ کْلَࢽْجُوَ جَجَکْثْࢽَمَدْ، تِیَ أَوِمَرُو ࢽغُوجَیْوَوُو؞ کُورُو وُࢽْدُ دُوُوࢽْ کْلَࢽْجُوَ أَوِمَرُو ࢽغُوجْࢽِّمَدْ، تِیَ جَجَکْثَیْ؞
[13] «کُتُّࢽْدُو مَلْمْبَ أَتَّوْرَیٜیَ ࢻَرِسَوَا، ࢽَیِ مْࢽَࢻْکَّسُو! ثِࢽَّ ࢽُودُو بَرْغَا مَیْ سَمٜمَیٜرُو ࢽغَوُویٜدَ أَمْبُو جَکّْوَّ؞ ࢽَیِ کْلَࢽْدُو یٜ ࢽغَوُوِّ، کُورُو أَمْ تِیٜࢽْ ࢽغَوُورُو مَجَیْدْ یٜرُو دَࢻْکْوَّ؞
[14] [کُتُّࢽْدُو مَلْمْبَ أَتَّوْرَیٜیَ ࢻَرِسَوَا، ࢽَیِ مْࢽَࢻْکَّسُو! کَمُ کوَ ࢻَثّْغْࢽَاسُویٜ کْࢽْدَࢽْجَ سَمَّا بُوِ یٜ، حَلْࢽْدُو غْرَدُرُو ࢻُوُ جَمَیٜࢽْ مُودُوَ کُرُوُرُو غْرْࢽُوِ یٜ؞ أَدْ ࢽَࢽْغَرُو أَجَوُࢽْدُو لٜیْرَࢽْ جَوْرُو کُرَ!]
[15] «کُتُّࢽْدُو مَلْمْبَ أَتَّوْرَیٜیَ ࢻَرِسَوَا، ࢽَیِ مْࢽَࢻْکَّسُو! کْرْدِ ࢻَلَّ أَدِࢽّدُورُو کَلَکْتُرُو بْرْمْ کُرَ کُرَ کُوࢽُوٜ لَرْدُ لَرْدُ غَوِ؞ تْمْجِیَ، تِیَ کَࢽُّمَ ࢽَیِمَا جَوْرُو کُوࢽْجَࢽَرُو کَلَࢽْغُوِ؞
[16] کُتُّࢽْدُو سِمُودُوُ کَمْبُوَسُو! ࢽَیِیٜ: ‹وُࢽْدُ دُوُوࢽْ کْلَ ࢻَدُو اللَّهیٜلَࢽْ کَࢽْسِ جُوُیْدْ، أَوِمَ غْࢽِ؞ أَمَّ کَمْ کْلَ دِࢽَرْ ࢻَدُو اللَّهیٜࢽْ دْغَࢽَدْیٜلَࢽْ کَࢽْسِ جُوُیْیَ، کَࢽْسِࢽْجُ تِیَ ثْدَیْ!› ࢽُوِ؞
[17] ࢽَیِ کَمْبُوَ حَࢽْغَلْ بَوُووَسُو! ࢽدَسُوࢽْجَ غْلٜ کُرَ وُو، دِࢽَرْدْ رَ ࢻَدُو اللَّهیٜ دِࢽَرْدَ تَیِرُّو کَلَکْثِدْ؟
[18] کُورُو ࢽَیِیٜ: ‹وُࢽْدُ دُوُوࢽْ کْلَ لَیَ دُوَدُرَمْبٜلَࢽْ کَࢽْسِ جُوُیْدْ، أَوِمَ غْࢽِ؞ أَمَّ کَمْ کْلَ سَدَا لَیَ دُوَدُرَمْدْࢽْ غْࢽَادَدْیٜࢽْ کَࢽْسِ جُوُیْیَ، کَࢽْسِࢽْجُ تِیَ ثْدَیْ!› ࢽُوِ؞
[19] ࢽَیِ کَمْبُوَسُو! ࢽدَسُوࢽْجَ غْلٜ کُرَ وُو، سَدَادْ رَ لَیَ دُوَدُرَمْ سَدَادَ تَیِرُّو کَلَکْثِدْ؟
[20] أَدْ ࢽَࢽْغَرُو کَمْ کْلَ لَیَ دُوَدُرَمْبٜࢽْ کَࢽْسِ جُوُࢽَمَدْ کْلَ لَیَ دُوَدُرَمْبٜیَ أَوُو کْلَࢽْجُࢽْ غْࢽَادَ سَمَّایٜࢽْ کَࢽْسِ غِوُو؞
[21] کُورُو کَمْ کْلَ ࢻَدُو اللَّهیٜࢽْ کَࢽْسِ جُوُࢽَمَدْ کْلَ ࢻَدُو اللَّهیٜیَ تِ ثُرُوࢽْجُࢽْ دْغَࢽَمَایٜࢽْ کَࢽْسِ غِوُو؞
[22] کُورُو کَمْ کْلَ سَمٜىٰࢽْ کَࢽْسِ جُوُࢽَمَدْ کْلَ کُرِسْ کْرْمَیْیٜ اللَّهیٜیَ تِ کْلَدْࢽْ ࢽَࢻْثْࢽَمَایٜࢽْ کَࢽْسِ غِوُو؞
[23] «کُتُّࢽْدُو مَلْمْبَ أَتَّوْرَیٜیَ ࢻَرِسَوَا، ࢽَیِ مْࢽَࢻْکَّسُو! کَرَسُ سُو، بُلُ کَسْکَسِ سُو، ࢽَࢽَ سُومَࢽْ جَکَّ تُلُوُوِ، أَمَّ أَوُو أَتَّوْرَلَࢽْ أَدَ ࢽَࢽْکُرَࢽْ کُوجْࢽَدَ کُولُّوَّ: جِرٜ دِیُو سُو، کَࢽْجِمَرِ ࢻْلٜدُ سُو، أَمَࢽْ رُودَ سُو؞ أَدَ کُولُّوِّࢽْ أَوُو أَࢽِ یٜیَ دِیُو وَجِمْࢽْجَاࢽَ؞
[24] ࢽَیِ سِمُودُوُ کَمْبُوَسُو! کَࢽْدَࢽَ ثٜجٜࢽُوِ، أَمَّ کَرِمُو یُࢽْدُوِ!
[25] «کُتُّࢽْدُو مَلْمْبَ أَتَّوْرَیٜیَ ࢻَرِسَوَا، ࢽَیِ مْࢽَࢻْکَّسُو! ࢽَیِ ࢽغَوُو تَسَیٜیَ غْمْدُواْلُومْبٜیَدَ تُلُّوٜ تَیِرُّو کَلَࢽْغُوِ، أَمَّ ثُرُوࢽْجُدْ کْࢽْدَ أَمْ غَدٜىٰ لُوَࢻْتُ سُو، کْلَ رَوُو سُولَࢽْ ثْمْبْرْࢽَ؞
[26] ࢻَرِسَ کَمْبُ، بُرْوُوࢽْ ثُرُو تَسَیٜیَ غْمْدُواْلُومْبٜیَدَ تُلّٜ دُوُوࢽْ، ࢽغَوُودْ یٜ تَیِرُّو وَلْجُو!
[27] «کُتُّࢽْدُو مَلْمْبَ أَتَّوْرَیٜیَ ࢻَرِسَوَا، ࢽَیِ مْࢽَࢻْکَّسُو! ࢽَیِ أَلَمَ کَوْرِ غَرُدَ بُلَّࢽْ ثِࢽْغَدَ غَیْ، تِ ࢽغَوُویٜࢽْ کُرُورُو شَوَ، أَمَّ ثُرُوࢽْ سِلَّ أَمْ سَࢽُࢽَیٜیَ أَوُو تَیِرْࢽَمْبُیٜ جِرِ جِرِیَࢽْ ثْمْبْرْࢽَ؞
[28] ࢽغَیْمَ ࢽَیِدْ، أَمْ ࢽغَوُوࢽْدُو ثَرُࢽٜ جِرٜوُرُو ࢽغُوࢽْجَیْ، أَمَّ ثُرُوࢽْدُودْ ࢽَࢽْمْࢽَࢻْکَّ ࢽَࢽْدِوِیَࢽْ ثْمْبْرْࢽَ؞
[29] «کُتُّࢽْدُو مَلْمْبَ أَتَّوْرَیٜیَ ࢻَرِسَوَا، ࢽَیِ مْࢽَࢻْکَّسُو! کَوْرِیَ ࢽَوِیَ کُرٜىٰ تَࢽْدُوِ، تَکْتُوُرَمْ جِرٜوُیٜ یٜ جَࢽٜࢽُوِ؞
[30] ࢽَیِیٜ: ‹ثَ جَمَࢽْ کَارِیَࢽْدٜسُویٜࢽْ کْرْغَیْیٜیَ، تَیِرُو کْلْدْغْیْیٜ بُ ࢽَوِیَیٜدَ ࢻِࢽِیٜࢽْدٜ،› ࢽُوِ؞
[31] ࢽغَیْࢽِࢽْ ࢽَیِمَ کَدُوُ أَمْ ࢽَوِیَدَ ثٜىٰسْࢽَیٜ ࢽُوٜ شٜدَࢽُوِ؞
[32] تُو، کْࢽْدُو دِوِ أَمْوُرَوَࢽْدُویٜدَ تُمُوغْࢽُواْ!
[33] ࢽَیِ کَدِیَ، کَدُوُ ࢻُسِیَیٜسُو، ࢽدَیِلَࢽْ غْلٜ رَࢽْغُوٜ أَجَوُ کَࢽُّ جَاࢽَمَیٜرُو کَࢽُوِ؟
[34] أَدْ ࢽَࢽْغَرُو وُدْ ࢽَوِیَا رَشِدُوَا مَلْمْبَ أَتَّوْرَیٜیَ ࢽَیِرُو جُوَࢽْجَغَکِّ؞ لَاࢽجَا کْسْکَرُو جَغْوٜ رُورُو یٜجُوِ، لَاࢽجَ یٜیَ دَࢽْدَلَّࢽْدُوࢽْ کِرْوُولَࢽْ کُواْࢽُوٜ بْلَ بْلَࢽْ تَیِیَ بَسَرْࢽُوِ؞
[35] أَدْمَ ࢽَࢽْغَرُو جِرٜوُیٜ دُࢽِیَ أَدْیٜ بُࢽْجَ سَمَّ کْلَࢽْدُورُو ثُکُّرِ، بُ دُوُوࢽْ جَمَࢽْ ࢽَوِ حَابِلَ جِرٜمَدْیٜࢽْ تَمِیَ حَرْ جَمَࢽْ ࢽَوِ جَکَرِیَّ تَدَ بَرَکَیٜ کَتّٜ ࢻَدُو اللَّهیٜیَ لَیَ دُوَدُرَمْبٜیَیٜࢽْ رُوࢽْجُ تُلُوُوَّدْیٜرُو کُدٜرُو سَمَّ ࢻِدْࢽَدْ؞
[36] جِرٜمَرُو ࢽَیِرُو وُلْࢽْجَغَکِّ، أَوُو أَࢽِ سَمَّ أَمْ جَمَࢽْ أَدْیٜمَرُو وَکَّجِیے؞
[37] «جٜرُجَلٜمْ، جٜرُجَلٜمْ، ࢽَیِ دُوُوࢽْ ࢽَوِیَدَ رُورُو یٜجُوٜ أَمْ جُوَࢽْجَاࢽَدْرُو دُوࢽْغُرْ کَوْیٜ غْغْࢻْکْوٜ سَࢽُیْدْ! أَلَمَ کُوُیْ تَدَوَࢽْجُ ࢻٜࢻٜدُووَࢽْجُࢽْ جَکْثِدْ غَیْ، ࢽغْوُرُو ࢽَیِیَ ࢽَࢽِࢽْ ثَࢻْتُرُو رَاکّْࢽَ، أَمَّ وَیٜوْ؞
[38] أَکُّو ࢻَࢽّدُو دٜ سُلْ کُولْࢽْجَاࢽَ؞
[39] ࢽَیِرُو وُلْࢽْجَغَکِّ، غَدٜرُو وُوَ سُرُوَّوُو، حَرْ ࢽَیِیٜ: ‹بَرْغَا تِ ثُ کْمَࢽْدٜىٰࢽْ إِسِمَدْ!› وُلُّوِرُو؞»