[1] أَکُّو کِتَوُ کَارِیَ عِیسَى أَلْمَسِیوُ تَدَ مَیْ دَاوُدَیٜ، تِ یٜ تَدَ ࢽَوِ إِبْرَاهِیمْبٜدْیٜدْ:
[2] إِبْرَاهِیمْ إِسْحَٰࢼُوَ کٜمْبُو، إِسْحَٰࢼُ یٜ یَعْࢼُوبَا کٜمْبُو، یَعْࢼُوبَ یٜ یَحُدَا أَوَاࢽَوَࢽْجُوَا کٜمْبُو،
[3] یَحُدَ یٜ ࢻٜرٜسَّ جٜرَآ کٜمْبُو، یَࢽْجَ تَمَرْ، ࢻٜرٜسْ یٜ حٜسْرُوࢽَّ کٜمْبُو، حٜسْرُوࢽْ یٜ أَرَمْبَ کٜمْبُو،
[4] أَرَمْ یٜ أَمِࢽَدَبَّ کٜمْبُو، أَمِࢽَدَبْ یٜ ࢽَشُوࢽَّ کٜمْبُو، ࢽَشُوࢽْ یٜ سَلْمُوࢽَّ کٜمْبُو،
[5] سَلْمُوࢽْ یٜ بُواْسَّ کٜمْبُو، یَ بُواْسّٜ رَحَبْ، بُواْسْ یٜ أَبِدَا کٜمْبُو، یَ أَبِدَیٜ رُتْ، أَبِدَ یٜ یِسَیْیَ کٜمْبُو،
[6] یِسَیْ یٜ مَیْ دَاوُدَا کٜمْبُو؞ مَیْ دَاوُدَ سُلَیْمَـٰࢽَا کٜمْبُو، ثَلَࢽْ یَ سُلَیْمَـٰࢽَیٜدْ کَمُ أُرِیَیٜ،
[7] سُلَیْمَـٰࢽَ یٜ رٜحُوبُووَمْبَ کٜمْبُو، رٜحُوبُووَمْ یٜ أَبِیَا کٜمْبُو، أَبِیَ یٜ أَسَا کٜمْبُو،
[8] أَسَ یٜ یُوسَࢻَتَّ کٜمْبُو، یُوسَࢻَتْ یٜ یُورَمْبَ کٜمْبُو، یُورَمْ یٜ وُوجِیَسَّ کٜمْبُو،
[9] وُوجِیَسْ یٜ یُوتَمْبَ کٜمْبُو، یُوتَمْ یٜ أَحَجُوَ کٜمْبُو، أَحَجُ یٜ حٜجٜکِیَسَّ کٜمْبُو،
[10] حٜجٜکِیَسْ یٜ مَࢽَسٜیَ کٜمْبُو، مَࢽَسٜ یٜ أَمُوࢽَّ کٜمْبُو، أَمُوࢽْ یٜ جُوسِیَسَّ کٜمْبُو،
[11] جُوسِیَسْ یٜ جَمَࢽْ یَوْدِیَا دُࢽُوࢽْ ثَدَࢽٜ ثِدِ بَبِلَیٜرُو ثَادْࢽَدْࢽْ یٜکُوࢽِیَسَّ أَوَاࢽَوَࢽْجُوَا کٜمْبُو؞
[12] ࢽغَوُو ثِدِ بَبِلَیٜرُو ثَادْࢽَیٜدْلَࢽْ، یٜکُوࢽِیَسْ شٜیَلْتِیٜلَّ کٜمْبُو، شٜیَلْتِیٜلْ یٜ جٜرُبَبٜلَّ کٜمْبُو،
[13] جٜرُبَبٜلْ یٜ أَبِحُدَّ کٜمْبُو، أَبِحُدْ یٜ أَلِیَکِمْبَ کٜمْبُو، أَلِیَکِمْ یٜ أَجُورَّ کٜمْبُو،
[14] أَجُورْ یٜ جَدُوکَّ کٜمْبُو، جَدُوکْ یٜ أَکِمْبَ کٜمْبُو، أَکِمْ یٜ أَلِحُدَّ کٜمْبُو،
[15] أَلِحُدْ یٜ أَلِیَسَرَّ کٜمْبُو، أَلِیَسَرْ یٜ مَتَࢽَّ کٜمْبُو، مَتَࢽْ یٜ یَعْࢼُوبَا کٜمْبُو،
[16] یَعْࢼُوبَ یٜ یُوسُࢻُوَ کٜمْبُو، یُوسُࢻُدْ کوَ مَرْیَمْبٜ، مَرْیَمْ یٜ عِیسَى تِیَ أَلْمَسِیوُلَࢽْ بُواْجَیْدَ کٜمْبُو؞
[17] أَدْغَیْمَ ࢽَوِ إِبْرَاهِیمْلَࢽْ تَیْ حَرْ مَیْ دَاوُدَرُو یَدٜرُو أَمْ جَمَࢽّجَ تِلُووَ غَدٜغَدٜ مٜوُ دٜرِ دَسَا، کُورُو مَیْ دَاوُدَلَࢽْ تَیْ حَرْ جَمَࢽْ یَوْدِیَا ثِدِ بَبِلَیٜرُو ثَادْࢽَرُو یَدٜرُو مٜوُ دٜرِ دَسَا، کُورُو جَمَࢽْ أَدْࢽْ تَیْ حَرْ تَمْبُو أَلْمَسِیوُیٜرُو یَدٜرُو مٜوُ دٜرِ دَسَا؞
[18] أَکُّو لَوَرْ تَمْبُو عِیسَى أَلْمَسِیوُیٜ؞ یَࢽْجُ مَرْیَمْدْ تْمَجِ یُوسُࢻُیٜ، أَمَّ کَوُ لَرُسَ ثَدٜ رُوکُّو دَسَیِرُو، رُحُ اللَّهیٜ ثَکّٜ ثُرُووَرُو وَلْیٜࢽُو؞
[19] یُوسُࢻُ تْمَجِࢽْجُدْ کَمْ جِرٜمَ، ࢻُوُ جَمَیٜࢽْ تِیَ ࢽَࢽْغُرُو ࢽجَکُّو ثْرَاࢽِّدْرُو، أَسْرْلَࢽْ تِیَ کُولْدُرُو ࢽِیَ ࢽغُویٜࢽُو؞
[20] أَدْ کَرْوُࢽْجُࢽْ دُوُوࢽْ، مَلَیْیَ کْمَࢽْدٜىٰ لَا کْࢽَّسِمْلَࢽْ تِرُو ࢻْلٜدِیٜ: «یُوسُࢻُ کَدُوُ مَیْ دَاوُدَیٜ، بَرٜ مَرْیَمْبَ کَمُرُو ࢽغُودُرُو رِࢽْمِّ، رُحُ اللَّهیٜمَࢽْ ثُرُووَرُو وَلْیٜࢽُو؞
[21] تَدَ کُوࢽغوَ ثَمْبِ، ࢽِ یٜ تِرُو ثُ عِیسَى یَکّٜ، دَلِلْࢽْجُدْ جَمَࢽْجُوَ بِوُࢽْجَلَࢽْ ثْکَّیِ ࢽَࢽْغَرُو،» یٜࢽُو؞
[22] أَدْغَیْمَ أَوُو کْمَࢽْدٜ کُرٜࢽْ ثِ ࢽَوِیٜࢽْ وُلْجْࢽَدْ وَکَّیٜࢽُو؞
[23] تِیٜ: «أَکُّو ࢻٜرُو کْلَیَکُّ کوَ ࢽُوجْࢽِّ ثُرُو ࢽغُوجٜ تَدَ کُوࢽغوَ ثَمْبٜ تِیَ إِمَࢽُوٜلَّࢽْ بُواْجَیْ،» ثْࢽَّ، مَاࢽَ إِمَࢽُوٜلّٜدْ اللَّه أَࢽْدِیَ رُوکُّو؞
[24] کْࢽْمْلَࢽْ ࢻَیٜࢽِّیَ، یُوسُࢻُ أَوُو مَلَیْیَ کْمَࢽْدٜىٰ تِرُو وُلْجْغْࢽَدَ ثْدٜ مَرْیَمْبَ کَمُرُو ࢽغُویٜࢽُو؞
[25] أَمَّ تِیَ کَمُرُو ࢽُوجْࢽِّ دُوُوࢽْ، حَرْ تَدَ کُوࢽغوَ ثَمْبٜ یُوسُࢻُ تِرُو ثُ عِیسَى کٜکُّو؞