[1] جٜرُجَلٜمْبَ کَرْࢽْجَࢽٜ بْلَ بَیْتْࢻَجٜىٰرُو ࢽَ کَوْ جَیْتُࢽّٜدْرُو کَدِرَࢽِّیَ، عِیسَى ࢻُوُرَوَࢽْجُیٜ یِࢽْدِ ثُࢽُودٜ
[2] تَیِرُو: «بْلَ ࢻُوُࢽْدُویٜدْرُو لٜࢽُواْ! ࢽغَوُوِیَمَ، کُورُو لَا کُتَّࢽْجُوَ تُوَدَ ࢽَغْوِ؞ ࢻْرَࢽْغُواْ کُدُواْ!
[3] کَمْ لَایٜ ࢽَیِرُو أَوُو لَا ثْࢽِیَ، تِرُو: ‹کْمَدْ تَیِلَࢽْ مْرَدُࢽْجُوَ،› وُلْغْࢽُواْ! سَدْمَࢽْ تَیِیَ جُوَجِیے،» یٜࢽُو؞
[4] أَدْغَیْمَ أَوُو کْمَࢽْدٜ کُرٜࢽْ ثِ ࢽَوِیٜࢽْ وُلْجْࢽَدْ وَکَّیٜࢽُو؞
[5] تِیٜ: «ࢻٜرُو سِیُوࢽّٜرُو وُلُّواْ: ‹أَکُّو مَیْࢽْمْ ࢽَࢽْمْبُو کْࢽْدٜ ثْدِ، تِ رُوکُرَ بَوُووَ کْلَ کُورُویٜࢽْ إِسِ، کْلَ کُتَّیٜمَࢽْ،›» ثْࢽَّ؞
[6] ࢻُوُرَوَدْ لٜجَࢽٜ أَوُو عِیسَى تَیِرُو وُلْجْغْࢽَدَ کٜدُو؞
[7] دَجِ کُورُودَ کُتَّࢽْجُوَ ࢽَ عِیسَیٜرُو ثَوُدٜ کَلْوُوَࢽْجَ کْلَدْرُو ࢻٜرْجَغَࢽٜ عِیسَى جُوَࢽٜ ࢽَࢻْکٜࢽُو؞
[8] جَمَ کَدَ یٜ کَلْوُوَࢽْجَ کْلَ جَوَلّٜࢽْ ࢻٜرْیٜرَ، لَا یٜ دْلَمْ کْرِ کْسْکَیٜ کَمْجَࢽٜ کْلَ جَوَلّٜࢽْ سْرٜتْکٜرَ؞
[9] أَمْ ࢻُوُ غْرْجَࢽَ سُو، ࢽغَوُوࢽْجُ جَاࢽَ سُو کُواْ سَࢻْثَࢽٜ: «حُوسَࢽَّ، تَدَ مَیْ دَاوُدَیٜرُو دَرَجَ تِیُو! بَرْغَا تِ ثُ کْمَࢽْدٜىٰࢽْ إِسِمَدْ! حُوسَࢽَّ، مَیْ سَمٜمَرُو دَرَجَ تِیُو!» ثَࢽِ؞
[10] عِیسَى جٜرُجَلٜمْبُو کْرْغَاࢽِّیَ، أَمْ بْلَیٜ سَمَّ حَࢽْغَلْࢽْجَ ثَا ثِجْࢽَ: «وُࢽْدُ کَمْ أَتّْ؟» ثَࢽٜ کٜوُورُو؞
[11] جَمَدْیٜ: «تِمَ ࢽَوِ عِیسَى کَمْ بْلَ ࢽَجَرَتْ ثِدِ غَلِلٜىٰدْ وُو!» یٜرَ؞
[12] دَجِ عِیسَى بَلْبَلَّ ࢻَدُو اللَّهیٜرُو ࢽغَیٜ لَدُومَسُووَ ࢽجُوُومَسُووَ سَمَّا دُجٜ تٜوُرْ وُرِ ثَࢽْجِمَسُویٜیَ ࢽَࢻْتُرَمْ تَتَّوَرْ لَدُومَسُویٜیَا تْمْبَلْیٜࢽُو؞
[13] تَیِرُو: «کِتَوُلَࢽْ رُوُوَدَ: ‹ࢻَࢽِّدَ ࢻَدُو مُودُوَیٜلَࢽْ بُواْجَیْ،› أَمَّ ࢽَیِدْ تِیَ جُوࢽْغُو غْࢽْدٜوُیٜرُو کَلَکّٜوْ!» یٜࢽُو؞
[14] دَجِ ࢻَدُو اللَّهیٜࢽْ کَمْبُوَا ࢽغُرْدِییَا ࢽَ عِیسَیٜرُو إِسَࢽٜ تَیِیَ إِسَࢽْغَیٜىٰࢽُو؞
[15] وُرَوَ رِمَࢽَّیٜیَ مَلْمْبَ أَتَّوْرَیٜیَ أَوُو أَجَبَّ أَجَبَّ عِیسَى ثْدِدَ ثَرُࢽٜ، کُورُو تَدَوَ سَࢽَࢽَ یٜ ࢻَدُو اللَّهیٜࢽْ یِلْجَࢽٜ: «حُوسَࢽَّ، تَدَ مَیْ دَاوُدَیٜرُو دَرَجَ تِیُو!» ثَࢽِدَ ࢻَࢽْغٜرَࢽِّیَ، جَوْرُو غْرْغَجَࢽٜ
[16] تِرُو: «أَوُو تَدَوَ سَࢽَࢽَ أَࢽِ وُلْجَیْدَ ࢻَࢽّْمَّ وَ؟» یٜرَ؞ عِیسَیٜ تَیِرُو: «آه، ࢻَکّْࢽَ؞ ࢽغَلْتٜمَ أَدَ کِتَوُلَࢽْ کْرَࢽُوِّ وَ؟ ‹تَدَوَ سَࢽَࢽَا تِمَلَّآ یَکّْمٜ ࢽِیَ جَجَࢽّجَیْ!›» یٜࢽُو؞
[17] دَجِ عِیسَى تَیِیَ کُولْجٜ بْرْࢽِدْࢽْ ثُلُوٜ بْلَ بَیْتَࢽِیٜرُو لٜجٜ بُویٜࢽُو؞
[18] وَجْࢽَࢽْجُوَ سُوَ لْࢻْ عِیسَى بْرْࢽِرُو وَلْدِ دُوُوࢽْ، کْࢽَ تِیَ کِدَ؞
[19] ثِ جَوَلّٜࢽْ یَ تَرْمُیٜ کِرُࢽِّیَ، ࢽَࢽْجُرُو کَدِیُو، أَمَّ کَلُ غْࢽِیَ، أَوِمَ ثُوَࢽْدْࢽِّ؞ دَجِ عِیسَیٜ تَرْمُدْرُو: «بَرٜ غَدٜرُو تَدَ یَکّْمِّ!» یٜࢽُو؞ سَدْمَࢽْ تَرْمُدْ ࢽغَوْ ࢽغَمْغٜࢽُو؞
[20] ࢻُوُرَوَدْ أَدَ کٜرُࢽِّیَ، أَجَࢻْثَࢽٜ: «أَوِیَوِࢽْ تَرْمُ أَدْ سَمْدْࢽْ ࢽغَوْ ࢽغَمْغٜࢽُو؟» ثَࢽٜ کٜوُورُو؞
[21] عِیسَیٜ: «جِرٜمَرُو ࢽَیِرُو وُلْࢽْجَغَکِّ، ࢽَیِ شٜکُّ بَوُووَ کَمْبْرْسٜࢽْدُووَا، رَࢽْغُوٜ أَوُو تَرْمُدْرُو یِدّْکّْࢽَدَ دِوِ، کُورُو أَدَ کُوجْࢽَرُو کَوْ کُرُوُ أَدْرُو: ‹ثِࢽٜ بْرْمْبُو ࢻِدْغْࢽٜ!› وُلُّوِیَ، وَکَّجِ؞
[22] کَمْبْرْسٜࢽْدُووَا، أَوِ یَیٜ مُودُوَلَࢽْ کُورُوِیَ، ࢻَࢽْدُوِ،» یٜࢽُو؞
[23] عِیسَى ࢻَدُو اللَّهیٜرُو کْرْغَاࢽِّیَ، جَمَا أَلَمْجِ دُوُوࢽْ، وُرَوَ رِمَࢽَّیٜیَ أَمْوُرَوَ جَمَیٜیَ ࢽَࢽْجُرُو إِسَࢽٜ تِرُو: «کْࢽْدُوُو ࢻِلَࢽْ أَوُو أَࢽِیَ دِمِ؟ وُࢽْدُ ࢽِرُو کْࢽْدُوُو أَدَ ࢽجُو؟» ثَࢽٜ تِیَ کٜوُورُو؞
[24] عِیسَیٜ تَیِرُو: «وُ یٜ ࢽَیِرُو کُورُو ࢻَلْ ࢽجَدّْکِّ؞ جَاوُدَ سِوِیَ، وُ یٜ کْࢽْدُوُو ࢻِلَࢽْ أَوُو أَࢽِیَ دِکِّدَ ࢽَیِرُو وُلْࢽْجَغَکِّ؞
[25] کَسَلَ یَحْیـَى جَمَرُو ثْدّْࢽَدْ، سَمٜىٰࢽْ کَدِیُو رَ کَمْبٜࢽْ؟» ثْࢽٜ تَیِیَ کِوُورُو؞ دَجِ کَتّٜࢽْجَࢽْ سَوَرْدَࢽٜ: «‹سَمٜىٰࢽْ› وُلِّیٜیَ، أَࢽْدِرُو: ‹تُو، أَوِرُو غْلٜ تِیَ کَسَدُّوِّدْ؟› ثْࢽٜ سَوُورِ؞
[26] أَمَّ ‹کَمْبٜࢽْ› وُلِّیٜیَ، جَمَدَ رِࢽِیٜࢽَ، دَلِلْࢽْجُدْ أَمْ سَمَّ یَحْیـَىٰ ࢽَوِرُو ࢽغُوجَࢽَ ࢽَࢽْغَرُو؞»
[27] دَجِ عِیسَرُو: «ࢽُوࢽِیٜࢽْدٜ،» یٜرَ؞ عِیسَیٜ تَیِرُو: «وُ یٜ کْࢽْدُوُو ࢻِلَࢽْ أَوُو أَࢽِیَ دِکِّدَ وُلْࢽْجَغَکِّوَوُو،» یٜࢽُو؞
[28] «تُو، أَوِ تْمَࢽُوْ؟ کَمْ لَا تَدَࢽْجُ یِࢽْدِیَ؞ یِمْ لَا ࢽَ تَدَ بُرْوُویٜدْرُو لٜجٜ تِرُو: ‹تَدَࢽِ، کُ لٜࢽٜ جْرْوُࢽِ إِࢽَبّٜࢽْ کِدَ دٜ!› یٜࢽُو؞
[29] تَدَدْیٜ: ‹أَعَ، رَاکّْࢽِ!› یٜࢽُو، أَمَّ ࢽغَوُو أَدْیٜࢽْ تْمْجٜ لٜىٰࢽُو؞
[30] کُورُو بَوَدْ ࢽَ تَدَ یِࢽْدِیٜدْرُو لٜىٰࢽِّیَ، تِ یٜرُو ثَیٜ غَیْ وُلْیٜىٰࢽُو؞ تَدَدْیٜ: ‹تُو، بَوَ، لٜکِّ،› یٜࢽُو، أَمَّ لٜجْࢽِّ؞
[31] کْرْمَ تَیِ یِࢽْدِ أَࢽِیٜࢽْ وُࢽْدُࢽْجَ أَوُو بَوَࢽْجُ ثْرَاࢽَدَ ثْدُو؟» ثْࢽٜ تَیِیَ کِوُورُو؞ تِرُو: «بُرْوُویٜدْمَ،» یٜرَࢽِّیَ، عِیسَیٜ: «جِرٜمَرُو ࢽَیِرُو وُلْࢽْجَغَکِّ، أَکِّ مُواْمَسُووَ جَوَرَّسُووَ ࢽَیِࢽْ بُرْوُوࢽُّو ࢽُودُو بَرْغَا اللَّهیٜرُو ࢽغَسَیِ؞
[32] دَلِلْࢽْجُدْ یَحْیـَى ࢽَࢽْدُورُو إِسٜ جَوَلْ جِرٜىٰ ࢻْلٜࢽْغٜىٰرَࢽِّیَ، تِیَ کَسَدُّوِّ؞ أَکِّ مُواْمَسُووَ جَوَرَّسُووَدْ تِیَ کَسَتْکٜرَ، أَمَّ ࢽَیِدْ، أَدَ کِرُوِّیَ، تْمُّوٜ تِیَ کَسَدُّوِّ؞
[33] «أَکُّو مِسَلْ غَدٜ یٜیَ ࢻَࢽُّواْ! کَمْ لَا کْمَ جْرْوُیٜ مبٜجِ، جْرْوُ إِࢽَبّٜ ثْدٜ غَرْجٜ ثُرُودْࢽْ بْلَا إِࢽْغِ إِࢽَبّٜ تُلُوُویٜ لَجٜ سُورُو کُرُوُ جُوُورُویٜ کِدَࢽْدُو؞ دَجِ جْرْوُدَ جْرْوُوُ لَارُو أَغْرِجِیٜ بْلَوُرُورُو سَࢻْکَدَ؞
[34] سَ ࢻْرْدُویٜ کَرْࢽْغٜࢽِّیَ، ࢽُوَࢽْجُ ثُوَࢽْدُورُو کَرٜیَوَࢽْجُ لَآ ࢽَ جْرْوُوُدْیٜرُو کِࢽُودُو؞
[35] أَمَّ جْرْوُوُدْ کَرٜیَوَࢽْجُدَ کٜدَ؞ ࢻَلْدَ بَکّٜرَ، ࢻَلْدْ یٜیَ رُورُو کٜىٰسُو، ࢻَلْدْ یٜرُو دُوࢽْغُرْ کَوْیٜ غْغْࢻْثَغَࢽٜ کَࢽُو؞
[36] کُورُو وَلْدٜ ثَیٜمَا کُوجْࢽَرُو کَرٜیَوَ غَدٜ کِࢽُودْࢽِّیَ، ثَیٜ غَیْ تَیِ یٜرُو کٜدُّو؞
[37] دَرْیٜ کْمَ جْرْوُدْیٜ: ‹تَدَࢽِرُو دَرَجَ ثَدِ،› ثْࢽٜ تَدَࢽْجُ ࢽَࢽْجَرُو کِࢽُودُو؞
[38] أَمَّ جْرْوُوُدْ تَدَࢽْجُدَ کٜرُࢽِّیَ، کَتّٜࢽْجَࢽْ: ‹أَدْمَ وَرَسَمَدْ وُو! أَرُواْ تِیَ یٜجِیُو، وَرَسَࢽْجُدَ ࢽغُوࢽِیُو!› یٜرَ؞
[39] دَجِ تِیَ ثَدَࢽٜ جْرْوُدْلَࢽْ ثَتُّلُوٜ رُورُو کٜىٰسُو؞
[40] تُو، کْمَ جْرْوُیٜدْ إِسِیَ، أَوِ جْرْوُوُ أَࢽِرُو ثْدِّ؟» ثْࢽٜ تَیِیَ کِوُورْࢽِّیَ،
[41] تِرُو: «أَمْ جَوْرُو کْلَدُو أَࢽِرُو أَجَوُ جَوْ ࢻْلٜجِیٜ رُورُو ثٜىٰسِ، کُورُو أَمْ غَدٜ سَ ࢻْرْدُویٜࢽْ تِرُو ࢽٜمَࢽْجُ ثَدِمَدْرُو جْرْوُࢽْجُدَ أَغْرِجِیے،» یٜرَ؞
[42] دَجِ عِیسَیٜ تَیِرُو: «ࢽغَلْتٜمَ أَوُو کِتَوُلَࢽْ رُوُوَدَ أَدَ کْرَࢽُوِّ وَ؟ «‹کَوْ دُوُوࢽْ ࢻَدُو تَࢽْدُومَسُو وَجَࢽَمَدْ، تِمَ کَوْ تَࢽْدُویٜ سَمَّرُو ࢻَیْدَارُو وَلْجْࢽَدْ وُو؞ أَدْ کْࢽْدُو کْمَࢽْدٜىٰ، أَࢽْدِرُو جَوْرُو أَجَبَّ!›
[43] «أَدْ ࢽَࢽْغَرُو ࢽَیِرُو وُلْࢽْجَغَکِّ، اللَّه ࢽُودُوࢽْجُ بَرْغَا مُکُّوࢽْدُوࢽْ ثْمُویٜ مُکُّو جَمَ غَدٜ أَوُو تِ ثْرَاࢽَ ثَدِمَدْیٜرُو ثَکِّ؞
[44] [ࢽُوࢽُواْ، کَمْ کْلَ کَوْ أَدْیٜرُو ثُکُّرْࢽَمَدْ ࢽَࢽَمْدِ، کُورُو کَوْدْ کَمْبُو ثُکُّرِیَ، کْلُوُرُو کَلَکْثِ،» یٜࢽُو؞]
[45] وُرَوَ رِمَࢽَّیٜیَ ࢻَرِسَوَا مِسَلَّࢽْجُ ࢻَࢽْغٜرَࢽِّیَ، کْلَࢽْجَمَࢽْ مَࢽَ کِدُورُو أَسُیٜرَ؞
[46] دَجِ جَوَلْ تِیَ تَیٜ مَجَیْ دُوُوࢽْ، جَمَدَ رِیٜرَ، دَلِلْࢽْجُدْ أَمْدْ سَمَّ تِیَ ࢽَوِرُو ࢽغُوجَࢽَ ࢽَࢽْغَرُو؞