[1] جَمَࢽْ عِیسَى بْلَ بَیْتَلَمِ ثِدِ یَحُدِیَیٜࢽْ تَمْبْࢽَدْࢽْ، حِرُدُسْ تِ مَیْ دُوُوࢽْ، إِلْمُوُ لَا ثِدِ أَدِࢽَّمْبٜ ثِجَࢽٜ جٜرُجَلٜمْبُو إِسَࢽٜ:
[2] «ࢽدَ تِ مَیْ یَوْدِیَیٜ تَمْبْࢽَدْ؟ سِلُّووُࢽْجُ أَدِࢽَّمْلَࢽْ ثُلُوُࢽَ رُیْیٜ تِرُو أَمْبْتُّوُرُو کَدِیٜ،» ثَࢽٜ کٜوُورُو؞
[3] مَیْ حِرُدُسْ أَدَ ࢻَࢽْغٜࢽِّیَ، حَࢽْغَلْࢽْجُ ثَا ثِیٜࢽُو، أَمْ جٜرُجَلٜمْبٜ سَمَّ یٜ ࢽغَیْ؞
[4] دَجِ وُرَوَ رِمَࢽَّیٜیَ مَلْمْبَ أَتَّوْرَیٜیَ سَمَّا بُواْجٜ ࢽدَرَࢽْ أَلْمَسِیوُ تَمْبِرُو کِوُورْࢽِّیَ،
[5] تِرُو: «بْلَ بَیْتَلَمِ ثِدِ یَحُدِیَیٜࢽْ، أَکُّو أَوُو ࢽَوِ کُرٜࢽْ رُوُجْࢽَدْ:
[6] «‹ࢽِ بَیْتَلَمِ ثِدِ یَحُدَیٜ، ثُرُو بْلَوَ یَحُدَیٜدْࢽْ دَرَجَࢽْمْ غَࢽَ غْࢽِ، دَلِلْࢽْجُدْ ثُرُوࢽْمْلَمَࢽْ مَیْ ثُلُوِ، مَیْ دُوُوࢽْ جَمَࢽِ إِسْرَاءِیلَیٜیَ ثُࢽُودِدْ؞›»
[7] دَجِ مَیْ حِرُدُسْ أَسْرْلَࢽْ إِلْمُوُدَ بُواْجٜ سَ سِلُّووُدْ تَیِرُو ࢻْلٜدْغْࢽَدَ ثُوُورٜ تَبَّتْکٜىٰرَࢽِّیَ،
[8] تَیِیَ بَیْتَلَمِرُو ثُࢽُودٜ تَیِرُو: «لٜࢽُواْ حَࢽْغَلَّیٜࢽْ تَدَدَ مَࢽُواْ! تِیَ ࢻَࢽْدُوِیَ، لَوَرْ سُکُّدُواْ، وُ یٜ لٜکُّو تِرُو أَمْبْتْکْکُّو!» یٜࢽُو؞
[9] مَࢽَ مَیْدْیٜدَ ࢻَࢽْغٜرَࢽِّیَ، إِلْمُوُدْ جَوَلْ ࢽغُوجَࢽٜ لٜىٰرَ؞ لٜدُ ثَدِ دُوُوࢽْ، أَکُّو سِلُّووُ أَدِࢽَّمْلَࢽْ ثُلُوٜ ثَرُࢽَدْ ࢻُوُࢽْجَرُو کُوجٜ لٜجٜ، حَرْ ࢽَ تَدَدْ دْغَࢽَدَ ࢽَیٜىٰࢽِّیَ، تَکْ دَیٜࢽُو؞
[10] سِلُّووُدَ کٜرُࢽِّیَ، کَرْوُࢽْجَ تَیْ دَجٜ کْجِیٜࢽُو!
[11] دَجِ ࢻَدُودْرُو ࢽغَسَیٜ تَدَدَ یَࢽْجُ مَرْیَمْبَا ثَرُࢽٜ تُࢽْغُرُمْجَࢽٜ تَدَدْرُو أَمْبْتْکٜىٰرَ؞ أَجَࢽْجَ کَجَࢽٜ تِرُو دِࢽَرْ سُو، کَاجِ سُو، مِرْ سُو کٜدُو؞
[12] دَجِ کْمَࢽْدٜ کْࢽَّسِمْلَࢽْ تَیِیَ غَلَجٜ بَرٜ ࢽَ مَیْ حِرُدُسّٜرُو وَلْدَࢽِّ یٜࢽِّیَ، جَوَلْ غَدٜ ࢽغُوجَࢽٜ لَرْدُࢽْجَرُو وَلَّدَرَ؞
[13] ࢽغَوُو إِلْمُوُدْ سَࢻْتَࢽَیٜࢽْ، مَلَیْیَ کْمَࢽْدٜىٰ لَا کْࢽَّسِمْلَࢽْ یُوسُࢻُرُو ࢻْلٜدِیٜ: «ثِࢽٜ تَدَدَ یَࢽْجُوَا ࢽغُوࢽٜ مَسَرُّو کَسُواْ لٜࢽُواْ، ࢽَدْࢽْ حَرْ کَوُ مَࢽَ ࢽجَدّْکِّرُو ࢽَمُّواْ، دَلِلْࢽْجُدْ مَیْ حِرُدُسْ تَدَدَ ࢽجٜجُورُو مَجِ ࢽَࢽْغَرُو،» یٜࢽُو؞
[14] دَجِ یُوسُࢻُ ثِجٜ بُࢽٜمَࢽْ تَدَدَ یَࢽْجُوَا ࢽغُوجٜ مَسَرُّو لٜجَࢽٜ،
[15] ࢽَدْࢽْ حَرْ کَرْمُو مَیْ حِرُدُسّٜرُو ࢽَࢻْکٜرَ؞ أَدْغَیْمَ أَوُو کْمَࢽْدٜ کُرٜࢽْ ثِ ࢽَوِیٜࢽْ وُلْجْࢽَدْ وَکَّیٜࢽُو؞ تِیٜ: «تَدَࢽِیَ مَسَرْࢽِࢽْ ثُلُوُورُو بُواْکّْࢽَ،» ثْࢽَّ؞
[16] مَیْ حِرُدُسْ إِلْمُوُدْ تِیَ جَمْبَجَࢽَرُو أَسُیٜࢽِّیَ، ࢻُمْ غْرْغَجٜ وَدَ ثٜ کْلَ سَ إِلْمُوُدْ تِرُو تَبَّثَّاࢽَیٜࢽْ تَدَوَ کُوࢽغوَ کْرْوُ یِࢽْدِیَا یِࢽْدِ ثَدْࢽِّیَ بْلَ بَیْتَلَمِیٜیَ بْلَدٜیَࢽْجُوَلَࢽْ دَسَاࢽَ سَمَّا رُورُو کٜىٰسُو؞
[17] أَدْغَیْمَ أَوُو کْمَࢽْدٜ کُرٜࢽْ ثِ ࢽَوِ إِرِمِیَیٜࢽْ وُلْجْࢽَدْ وَکَّیٜࢽُو؞ تِیٜ:
[18] «بْرْࢽِ رَمَیٜلَࢽْ سُو لَغَرَࢽّٜ جَوْرُو ࢻَࢽْدِ، رَحِلَ دِیٜ یَلَّࢽْجُرُو ثِکِّرِ؞ کَࢽَدِ تَ وَجْࢽَ، بَوُو بَوُوجَࢽَ ࢽَࢽْغَرُو،» ثْࢽَّ؞
[19] ࢽغَوُو مَیْ حِرُدُسْ بَوُوجْࢽَیٜࢽْ، مَسَرْࢽِࢽْ مَلَیْیَ کْمَࢽْدٜىٰ لَا کْࢽَّسِمْلَࢽْ یُوسُࢻُرُو ࢻْلٜدِیٜ:
[20] «ثِࢽٜ تَدَدَ یَࢽْجُوَا ࢽغُوࢽٜ لَرْدُ إِسْرَاءِیلَوُیٜرُو وَلْدْࢽُواْ، أَمْ دُوُوࢽْ تَدَدَ رُورُو ࢽجٜجُورُو مَجَیْدْ سَࢽُࢽَ ࢽَࢽْغَرُو،» یٜࢽُو؞
[21] دَجِ یُوسُࢻُ ثِجٜ تَدَدَ یَࢽْجُوَا ࢽغُوجٜ لَرْدُ إِسْرَاءِیلَوُیٜرُو وَلَّدَرَ؞
[22] أَمَّ مَیْ أَرْکِلَوُسْ ثُجُ بَوَࢽْجُ مَیْ حِرُدُسّٜرُو ثِدِ یَحُدِیَیٜیَ ثُࢽُودِدْرُو ࢻَࢽْغٜࢽِّیَ، یُوسُࢻُ ࢽَدْرُو ࢽغَوُورُو رِیٜࢽُو؞ دَجِ کْمَࢽْدٜ کْࢽَّسِمْلَࢽْ تِیَ غَلَیٜࢽِّیَ، ثِدِ غَلِلٜىٰرُو لٜجٜ
[23] بْلَ لَا ࢽَجَرَتْ ثَࢽِدْࢽْ ࢽَࢻْکٜࢽُو؞ أَدْغَیْمَ أَوُو کْمَࢽْدٜ کُرٜࢽْ ثِ ࢽَوِیَیٜࢽْ وُلْجْࢽَدْ وَکَّیٜࢽُو؞ تَیِیٜ: «تِیَ کَمْ ࢽَجَرَتّٜلَࢽْ بُواْجَیْ،» ثَࢽَّ؞