[1] عِیسَى جَمَ کَدَ کَدَمِ ثَࢻْتَیْرُو کِرُࢽِّیَ، کْلَ کَوْ کُرُوُ لَایٜرُو جُوَࢽٜ ࢽَࢻْکٜࢽُو؞ ࢻُوُرَوَࢽْجُ یٜ ࢽَࢽْجُرُو کَدِرَ؞
[2] دَجِ تَیِیَ أَلَمْدُ بَدِیٜࢽُو؞
[3] «بَرْغَࢽْجَ أَمْ کَرْوُلَࢽْ تَلَاوَدْ، ࢽُودُو بَرْغَا مَیْ سَمٜمَیٜدْ ࢽُوَࢽْجَدْرُو؞
[4] بَرْغَࢽْجَ أَمْ کْرْمَ ثٜسِرِدْ، ࢻُوُࢽْ سِمَلُوࢽْجَ بَوُودْرُو؞
[5] بَرْغَࢽْجَ أَمْ رُوکُرَ بَوُووَدْ، ࢻُوُࢽْ دُࢽِیَ وَرَسَجَیْدْرُو؞
[6] بَرْغَࢽْجَ أَمْ کْرْمَ کْࢽَا ࢽغُدُوَارُو جِرٜ دِیُورُو ࢽغْࢽْࢻْتَیْمَدْ، ࢻُوُࢽْ کُلْجَیْدْرُو؞
[7] بَرْغَࢽْجَ أَمْ کَࢽْجِمَرِمَسُودْ، ࢻُوُࢽْ کَࢽْجِمَرِ ثَوَࢽْدِدْرُو؞
[8] بَرْغَࢽْجَ أَمْ کَرْوُ بُلَّدْ، ࢻُوُࢽْ اللَّهَ ثَرُیْدْرُو؞
[9] بَرْغَࢽْجَ أَمْ کْرْمَ ࢽَࢽْلٜوَ ثَوُدِدْ، ࢻُوُࢽْ تَدَوَ اللَّهیٜلَࢽْ بُواْدَیْدْرُو؞
[10] بَرْغَࢽْجَ أَمْ کْلَ جِرٜ دِیُوࢽْجَیٜࢽْ تَیِیَ بَسَرْجَیْدْ، ࢽُودُو بَرْغَا مَیْ سَمٜمَیٜدْ ࢽُوَࢽْجَدْرُو؞
[11] «أَمْ وُ ࢽَࢽْغَرُو ࢽَیِیَ رَرَࢽْجَࢽٜ بَسَرْࢽْجَࢽٜ دِوِࢽْدُو جِرِ جِرِ وُلْجَیْیَ، بَرْغَࢽْدُو!
[12] کْجِ دَمَ بَوُورُو ࢻَࢽُّواْ، دَلِلْࢽْجُدْ سَمٜلَࢽْ مُکُووَࢽْدُو جَوْرُو ࢽغْوُ ࢽَࢽْغَرُو؞ ࢽُوࢽُواْ، أَدْغَیْمَࢽْ ࢽَوِیَ کُرٜىٰ بُرْوُوࢽْجَࢽَدَ بَسَرْیٜرَ؞
[13] «ࢽَیِمَ مَࢽْدَ دُࢽِیَیٜ وُو؞ أَمَّ مَࢽْدَدْ کْلَمْبُو وَلْیٜࢽُووَ، جِرِ ࢻِࢽْ غْلٜ ثَیٜࢽْجُ غَیْرُو وَلْجِ؟ أَوِمَرُو ࢻَیْدَجِوَوُو، تِیَ دٜیَࢽْ یِرْجَࢽٜ أَمْ غُغُوَثَّیْ؞
[14] ࢽَیِمَ ࢽُرْ دُࢽِیَیٜ وُو؞ بْرْࢽِ کْلَ کَوْ کُرُوُیٜࢽْ دْغَࢽَدْ غْرَدِوَوُو؞
[15] وُࢽْدُمَ ࢻَتْلَ وَسّٜ کْمُوࢽْ تْمْجِوَوُو؞ کَمْ ࢻَتْلَ وَسِّیَ، کْلَ غْࢽَدُرَمْࢽْجُیٜࢽْ غْࢽَجٜ ࢻَدُودْࢽْ وُࢽْدُسُورُو ࢽُرْ ثِ؞
[16] أَدْغَیْمَ ࢽَیِ یٜ کُولُّواْ ࢽُرْࢽْدُو ࢻُوُ أَمْبٜࢽْ وَسُّو، أَوُو ࢽغْلَ دِوِدَ ثَرُو بَوَࢽْدُو مَیْ سَمٜمَرُو دَرَجَ ثَدُورُو!
[17] «بَرٜ أَوُو أَتَّوْرَا کِتَوُوَ ࢽَوِیَیٜیَلَࢽْ رُوُوَدَدَ بَوُورُو دِیُورُو کَدِکُّورُو تْمَࢽُوِّ؞ أَعَ، تَیِیَ بَوُورُو دِیُورُو غْࢽِ، تَیِ سَمَّ وَکَّجَرُو کَدِکُّو؞
[18] جِرٜمَرُو ࢽَیِرُو وُلْࢽْجَغَکِّ، کَوُ سَمٜیَ ثِدِیَ بَوُورُو وَلْجَیْمَرُو، أَرَوُ بِ سْکَّلْ ࢻَلْمَ أَتَّوْرَلَࢽْ بَوُورُو وَلْجِوَوُو، سَیْ تَیِ سَمَّ وَکَّجَیْیَ دُوُوࢽْ؞
[19] وُࢽْدُ دُوُوࢽْ وَدَوَ أَࢽِیٜ غَࢽَࢽْجَا غَ وَجٜ أَمْ غَدٜ یٜیَ ࢽغَیْ أَلَمْجِدْ، ثُرُو أَمْ ࢽُودُو بَرْغَا مَیْ سَمٜمَیٜࢽْ تِیَ کَمْ دَرَجَ جَوْرُو غَࢽَالَࢽْ بُواْجَیْ؞ أَمَّ وُࢽْدُ دُوُوࢽْ وَدَوَ أَࢽِیَ جْغَࢽٜ أَمْ غَدٜ یٜیَ جَارُو أَلَمْجِدْ، ثُرُو أَمْ ࢽُودُو بَرْغَا مَیْ سَمٜمَیٜࢽْ تِیَ کَمْ دَرَجَ کُرَالَࢽْ بُواْجَیْ؞
[20] أَدْ ࢽَࢽْغَرُو ࢽَیِرُو وُلْࢽْجَغَکِّ، مَلْمْبَ أَتَّوْرَیٜیَ ࢻَرِسَوَآ جِرٜ دِیُولَࢽْ کُوࢽُوَّوُووَ، تْمَّرُو ࢽُودُو بَرْغَا مَیْ سَمٜمَیٜرُو ࢽغَوُوَّوُو؞
[21] «أَمْوُرَوَࢽْدٜ جَمَࢽْ کُرٜىٰرُو: ‹بَرٜ رُو کَمْبٜ تُلُوُمِّ، وُࢽْدُ دُوُوࢽْ رُو کَمْبٜ ثُتُّلُوُࢽَدَ شَرَرُو ثَادِ،› ثَࢽٜ وُلْجَاࢽَدَ ࢻَࢽُّوَّ؞
[22] أَمَّ وُ ࢽَیِرُو وُلْࢽْجَغَکِّ، کَمْ کَمَࢽْجُرُو غْرْغَجْغْࢽَدَ شَرَرُو ثَادِ؞ کُورُو کَمْ کَمَࢽْجُرُو ‹کَمْ بُووُیٜ!› ثْࢽٜ رَجْࢽَدَ مَجِلِسْ أَدِࢽْوُیٜرُو ثَادِ؞ کُورُو کَمْ دُوُوࢽْ کَمَࢽْجُوَ وَجٜ تِرُو: ‹بَتِّ!› ثْࢽَّدَ کَࢽُّ جَاࢽَمَیٜرُو کُولْجَغَیْ؞
[23] «أَدْ ࢽَࢽْغَرُو ࢽَ لَیَ دُوَدُرَمْبٜࢽْ سَدَا ࢽجْدُّورُو إِسْمَّ دُوُوࢽْ، أَوُو کُتُّ لَا کَمَࢽْمْبُو یِدّْمَّا تَࢽْغْمِیَ،
[24] ࢻُوُ لَیَ دُوَدُرَمْدْیٜࢽْ سَدَاࢽْمْدَ کُولّٜ لٜࢽٜ ࢽِیَ کَمَࢽْمْبَ سُولُودْࢽُواْ دُوُوࢽْ، دَجِ وَلْدْࢽٜ أَرٜ سَدَاࢽْمْ یِدّٜ؞
[25] «شَرَرَمْبُو لَوَلَمَࢽْمْبَ رُوکُّو لٜدُ دِوِ دُوُوࢽْ، کْلَ جَوَلّٜࢽْ دُویْرُو کُواْرِ دٜ تَوَکْتْࢽٜ، بَرٜ ࢽِیَ أَلْکَلِرُو سْرْࢽّجْغْࢽِّرُو؞ أَدْ غْࢽِیَ، أَلْکَلِ ࢽِیَ مُکُّو سُوجِیٜرُو ࢽجَکّٜ، سُوجِ یٜ ࢽِیَ کُوسُولَࢽْ جَࢽّجِیے؞
[26] جِرٜمَرُو ࢽِرُو وُلْࢽْجْغْکِّ، ࢽَدْࢽْ وُرِ ࢽجْغَیْدَ ثُوتُّو رْمْبْمِّیَ، تْمَّرُو لُوُمْبَوُو!
[27] «کُورُو تَیِرُو: ‹بَرٜ کْࢽْجْࢽَ دِمِّ،› ثَࢽٜ وُلْجَاࢽَدَ ࢻَࢽُّوَّ؞
[28] أَمَّ وُ ࢽَیِرُو وُلْࢽْجَغَکِّ، وُࢽْدُ دُوُوࢽْ کَمُوَ ثُرٜ مَࢽْغَرْجْࢽَدْ، کَرْوُࢽْجُࢽْ کْࢽْجْࢽَ ثْدْࢽَ؞
[29] سِمّْمْ کْمْبُورَمْدْ ࢽجَکّٜ بِوُ دِمِیَ، تِیَ کُلَیْࢽٜ غْمّٜ؞ تِیࢽْمْ سَمَّ کَࢽُّ جَاࢽَمَیٜرُو ࢻِدِیدْرُووَ، سِمْ ࢻَلْ ࢻُدّْمَّدْمَ ࢽِرُو ࢽغَلْوُو؞
[30] کُورُو مُکُّوࢽْمْ کْمْبُورَمْدْ ࢽجَکّٜ بِوُ دِمِیَ، تِیَ کَمّٜ غْمّٜ؞ تِیࢽْمْ سَمَّ کَࢽُّ جَاࢽَمَیٜرُو ࢻِدِیدْرُووَ، مُکُّو ࢻَلْ ࢻُدّْمَّدْمَ ࢽِرُو ࢽغَلْوُو؞
[31] «کُورُو وَلْدَࢽٜ تَیِرُو: ‹کَمْ کَمُࢽْجُوَ دْࢻْثِدْ تِرُو کَکَّدُ کَمُ دْࢻْتَیٜ ثُو،› ثَࢽٜ وُلْجَࢽَ؞
[32] أَمَّ وُ ࢽَیِرُو وُلْࢽْجَغَکِّ، وُࢽْدُ دُوُوࢽْ کَمُࢽْجُوَ کْلَ کْࢽْجْࢽَیٜࢽْ غْࢽِ دْࢻْثْࢽَدْ تِیَ کْࢽْجْࢽَمَرُو ثْدْࢽَ؞ کُورُو وُࢽْدُ دُوُوࢽْ کَمُ دْࢻْکَدَا ࢽِیَجْࢽَدْ، تِ یٜ کْࢽْجْࢽَ ثْدْࢽَ؞
[33] «کُورُو أَمْوُرَوَࢽْدٜ جَمَࢽْ کُرٜىٰرُو: ‹بَرٜ بُووُرُو کَࢽْسِ بُمِّ، کَࢽْسِ کْمَࢽْدٜرُو یِبُّمَّدَ دٜ!› ثَࢽٜ وُلْجَاࢽَدَ ࢻَࢽُّوَّ؞
[34] أَمَّ وُ ࢽَیِرُو وُلْࢽْجَغَکِّ، بَرٜ تْمَّرُو کَࢽْسِ بُوِّ! بَرٜ سَمٜىٰࢽْ کَࢽْسِ بُوِّ، اللَّهیٜ کُرِسْࢽْجُ کْرْمَیْیٜ ࢽَࢽْغَرُو،
[35] بِ ثِدِیٜࢽْ، سِ غْࢽَدُرَمْࢽْجُ ࢽَࢽْغَرُو، بِ جٜرُجَلٜمْبٜࢽْ، بْرْࢽِ مَیْ کُرَیٜ ࢽَࢽْغَرُو؞
[36] کُورُو بَرٜ کْلَࢽْدُویٜࢽْ کَࢽْسِ بُوِّ، رَࢽْغُوٜ کَࢽْدُرِ کْلَࢽْدُویٜ ࢻَلْمَا بُلْ بِ ثْلْمْبُو دِوَّوُو ࢽَࢽْغَرُو؞
[37] ࢽغْلَࢽْجُدْ ‹آه،› بِ ‹أَعَ،› وُلُّواْ؞ أَوِ یَیٜ أَدَ کُوجْࢽَدْ ࢽَ تِ کْلَدُویٜࢽْ کَدِیُو؞
[38] «کُورُو تَیِرُو: ‹کَمْ لَا سِمْ بِ تِمِ کَمَࢽْجُیٜ ࢻَلْ کِتُّلُوُووَ، سِمْࢽْجُ بِ تِمِࢽْجُ ࢻَلْ یٜ ثَتُّلُوُو!› ثَࢽٜ وُلْجَاࢽَدَ ࢻَࢽُّوَّ؞
[39] أَمَّ وُ ࢽَیِرُو وُلْࢽْجَغَکِّ، بَرٜ کَمْ کْلَدُو وَࢽُوِّ؞ کَمْ لَا ࢻٜرِࢽْمْ کْمْبُورَمْ مَرِࢽْ بَکْثِیَ، وَیْلَدْ یٜیَ تِرُو کَلَکّْࢽٜ؞
[40] کُورُو کَمْ لَا غْمَجٜࢽْمْ مُواْرُو ࢽِیَ شَرَرُو ࢽجَدِ ثْࢽِیَ، کُولّٜ غَرِࢽْمْدْ یٜیَ ࢽغُوجُو؞
[41] کَمْ لَا دُࢽُودُࢽُوࢽْ ࢽجَکّٜ ࢽَ کِلُومٜتْرْ ࢻَلَّرُو لٜࢽْمِیَ، ࢽَ کِلُومٜتْرْ یِࢽْدِیَرُو تِیَ رُوکُّو لٜࢽُواْ؞
[42] کَمْ ࢽجُوُورْࢽَمَدْرُو یٜ، کُورُو کَمْ ࢽَࢽْمْࢽِࢽْ تَغَرِ ثْرَاࢽَدْرُو بَرٜ دَࢻْکْمِّ؞
[43] «کُورُو تَیِرُو: ‹کْمَسْکِࢽْمْبَ رَیٜ، کْلَدُوࢽْمْبَ وَࢽٜ،› ثَࢽٜ وُلْجَاࢽَدَ ࢻَࢽُّوَّ؞
[44] أَمَّ وُ ࢽَیِرُو وُلْࢽْجَغَکِّ، کْلَدُووَࢽْدُووَ رَوُواْ، کُورُو أَمْ ࢽَیِیَ بَسَرْࢽْجَࢽَدْ یٜرُو اللَّهَ یُکُّورُواْ،
[45] ࢽغَیْࢽِࢽْ تَدَوَ بَوَࢽْدُو مَیْ سَمٜمَیٜرُو وَلُّوِ؞ دَلِلْࢽْجُدْ اللَّه ثَکّٜ کْࢽْغَلْ أَمْ ࢽغْلَا دِوِیَا وَسِّ، کُورُو إِࢽْغِ سَمٜىٰ یٜ جِرٜوُوَ جِرٜࢽَمْبُوُوَرُو ثُدُّرِ ࢽَࢽْغَرُو؞
[46] أَمْ ࢽَیِیَ ࢽجَرَاࢽَا رَاوِیَ، أَوِ مُکُووَیٜ دِوْ؟ أَکِّ مُواْمَسُو یٜ ࢽغَیْ غْࢽَ ثَدِ؟
[47] کُورُو کْرَمِیَࢽْدُو رُࢽْجَا لٜوَࢽُوِیَ، أَوِ غْلٜ أَمْ غَدٜسُویٜیَ کُوجْࢽَ دِوْ؟ کْرْدِیَ یٜ ࢽغَیْ غْࢽَ ثَدِ؟
[48] أَدْ ࢽَࢽْغَرُو بَوَࢽْدُو مَیْ سَمٜمَدْ کَلْکَلُّو دِیُومَدْ غَیْ، ࢽَیِ یٜ کَلْکَلُّو دِیُووُرُو وَلُّواْ!