[1] دَجِ عِیسَى مَارَدْرُو ࢽغَیٜ بْرْمْدَ ࢻَلْجٜ کُوجٜ بْرْࢽِࢽْجَرُو وَلَّدَ؞
[2] أَمْ لَا کَمْ تِیے ࢽُࢽَا کْلَ بْࢽَرَمْبٜࢽْ ࢽغُوجَࢽٜ ࢽَࢽْجُرُو کٜوُدُو؞ عِیسَى کَمْبْرْسٜࢽْجَدَ کِرُࢽِّیَ، کَمْ تِیࢽْجُ ࢽُࢽَدْرُو: «تَدَࢽِ، بَرٜ تْمَ کُولّْمِّ، بِوُࢽْمْ غَوُرْدْࢽَ،» یٜࢽُو؞
[3] دَجِ مَلْمْبَ أَتَّوْرَیٜ لَا کَرْوُࢽْجَࢽْ: «کَمْ أَتّْ اللَّهَ غَسْکَجْࢽَ، دِیٜ!» یٜرَ؞
[4] أَمَّ عِیسَى أَوُو کَرْوُࢽْجَیٜ أَسُجٜ تَیِرُو: «أَوِرُو کَرْوُࢽْدُوࢽْ ࢽِیَدِوِ دْغَࢽَدْ؟
[5] ࢽدَسُو غْلٜ بُدُ وُو: ‹بِوُࢽْمْ غَوُرْدْࢽَ› وُلْدُمَ رَ ‹ثِࢽٜ لٜࢽٜ!› وُلْدُمَ؟
[6] ࢽُوࢽُواْ، تَدَ کَمْبٜدْ ࢽَࢽْجُࢽْ کْࢽْدُوُو بِوُ أَمْبٜ دُࢽِیَلَࢽْ غَوُرْدُیٜ مبٜجِ!» یٜࢽُو؞ دَجِ کَمْ تِیࢽْجُ ࢽُࢽَدْرُو: «ثِࢽٜ بْࢽَرَمّْمْ ࢽغُوࢽٜ ࢻَࢽّْمْبُو لٜࢽٜ!» یٜࢽُو؞
[7] کَمْدْ ثِجٜ ࢻَࢽّجُرُو لٜىٰࢽُو؞
[8] جَمَ ثَࢻْتَࢽَدْ أَدَ کٜرُࢽِّیَ، رِجَࢽٜ اللَّه کْࢽْدُوُو أَدْ غَیْ أَمْبُو ثِࢽَدَ کٜࢽْغُورُو؞
[9] عِیسَى ࢽَدَ کُولْجِ دُوُوࢽْ، کَمْ لَا تِرُو مَتِیُ ثَࢽِ کِدَرَمْࢽْجُ أَکِّ مُواْیٜࢽْ ࢽَࢻْکَدَا کِرُو؞ عِیسَیٜ تِرُو: «وُوَ سْغَیْ!» یٜࢽِّیَ، ثِجٜ تِیَ غِیَ؞
[10] عِیسَى ࢻَدُو مَتِیُیٜلَࢽْ مَسْࢽَرُو ࢽَࢻْثْࢽَ دُوُوࢽْ، أَکِّ مُواْمَسُووَ بِوُمَ غَدٜسُووَ کَدَ یٜ إِسَࢽٜ تِیَ ࢻُوُرَوَࢽْجُوَ رُوکُّو مَسْࢽَ دِیُورُو ࢽَࢻْکٜرَ؞
[11] ࢻَرِسَوَ أَدَ کٜرُࢽِّیَ، ࢻُوُرَوَࢽْجُرُو: «أَوِرُو مَلْمْࢽْدُو أَکِّ مُواْمَسُووَ بِوُمَ غَدٜسُووَ رُوکُّو مَسْࢽَ ثَدِدْ؟» یٜرَ؞
[12] عِیسَى أَدَ ࢻَࢽْغٜࢽِّیَ، تَیِرُو: «کَمْ دُوࢽْدِ غْࢽِیَ، کَمْ ࢽغَدْ لُواْتُورْ مَجِوَوُو؞
[13] لٜࢽُواْ، مَࢽَ أَدْیٜ مَاࢽَࢽْجُ أَسُࢽُواْ: ‹بُ ࢻِدَ غْࢽِ، کَࢽْجِمَرِمَ رَاکُّو؞› أَوُووَ جِرٜمَسُووَ غْࢽِ، بِوُمَسُووَ بُواْدُرُو کَدِکُّو،» یٜࢽُو؞
[14] دَجِ ࢻُوُرَوَ ࢽَوِ یَحْیـَیٜ ࢽَ عِیسَیٜرُو إِسَࢽٜ تِرُو: «أَوِرُو أَࢽْدِیَ ࢻَرِسَوَا أَسٜمْ تَیْیٜ، أَمَّ ࢻُوُرَوَࢽْمْ أَسٜمْ ثَدَیْوَوُودْ؟» ثَࢽٜ کٜوُورُو؞
[15] عِیسَیٜ تَیِرُو: «مَیْ لَرُسَیٜ دَوُࢽْجَࢽْ دُوُوࢽْ، ࢽغَلَدِیَ کَرْوُࢽْجَ کُتَّجِ وَ؟ أَعَ، أَمَّ سَ إِسٜ مَیْ لَرُسَیٜدَ دَوُࢽْجَࢽْ ثَتُّلُوِیَ، سَ أَدْࢽْ دُوُوࢽْ أَسٜمْ ثَدَیْ؞
[16] «وُࢽْدُمَ غُࢽْتُ بَتَّ بْرِࢽّٜ إِࢽْغِرُو ثَکّٜ ثَࢻْتْࢽِّ ࢽغُوجٜ کَجْمُ دِࢽَرُو ثُکُّدُدِوَوُو؞ ࢽغَیْ ثْدِیَ، بَتَّ بْرِࢽْدْ ثَࢻْتٜ کَرْدُدْ ثَیٜمَرُو کُرَرُو وَلْجِ؞
[17] کُورُو وُࢽْدُمَ دِبٜࢽْ بْرِࢽْ ࢽغُوجٜ سَتْکِ دِࢽَرُو ࢻِجِیوَوُو؞ ࢽغَیْ ثْدِیَ، سَتْکِدْ ࢻَلْدٜ، دِبٜࢽْ یٜ ثِدِرُو ࢻِدِیٜ، سَتْکِ یٜ بَࢽَّدِ؞ أَعَ، أَمْسُو دِبٜࢽْ بْرِࢽْدَ سَتْکِ بْرِࢽُّو ࢻِجَغَیْ، أَدْغَیْࢽِࢽْ تَیِ یِࢽْدِ سَمَّ کْلٜوَ دَسَیِ،» یٜࢽُو؞
[18] عِیسَى تَیِرُو مَࢽَجِیے ࢽغَیْ دُوُوࢽْ، ࢻُوُمَ دَࢽْدَلّٜ لَا إِسٜ ࢻُوُࢽْجُࢽْ تُࢽْغُرُمْجٜ تِرُو: «کْرْمَمَ ࢻٜرُوࢽِ بَوُویٜࢽُو؞ أَرٜ مُکُّوࢽْمْ تِرُو غْࢽَغْࢽٜ، رُووَرُو وَلْجِ،» یٜࢽُو؞
[19] دَجِ عِیسَى ثِجٜ ࢻُوُرَوَࢽْجُوَ رُوکُّو کَمْدَ غٜیَ؞
[20] کَمُ لَا یٜ ࢽَدْࢽْ مبٜجِ، کْرْوُ مٜوُࢽْ یِࢽْدِࢽُّو بُ ࢻِدُࢽْجُ دَجْࢽِّ؞ دَجِ کَمُدْ إِسٜ ࢽغَوُو عِیسَیٜࢽْ سُسُجٜ ثِ کَلْوُࢽْجُیٜدَ لٜىٰࢽُو،
[21] أَوُووَ کَرْوُࢽْجُࢽْ: «تُو، کَجْمُࢽْجُ بَسْ لٜکِّیَ، ࢽغَکِّ،» ثْࢽِ؞
[22] عِیسَى سُوُورْدٜ تِیَ کِرُࢽِّیَ، تِرُو: «ࢻٜرُوࢽِ، بَرٜ تْمَ کُولّْمِّ! کَمْبْرْسٜࢽْمْ ࢽَࢽْغَرُو ࢽجْکَّوُو ࢻَࢽْدْمَّ!» یٜࢽُو؞ سَدْمَࢽْ کَمُدْ ࢽغَیٜࢽُو؞
[23] عِیسَى ࢻَدُو ࢻُوُمَ دَࢽْدَلّٜدْرُو إِسٜ أَلْغَیْدَوُ لَغَرَࢽّٜیَ جَمَ ثَࢻْتَࢽَ کَلَلَ ࢻِجَیْیَا کِرُࢽِّیَ،
[24] تَیِرُو: «لُوُواْ لٜࢽُواْ! ࢻٜرُودْ بَوُوجْࢽِّ، کْࢽْمْ ثْدِ،» یٜࢽُو؞ أَمَّ تِیَ رُجَࢽٜ تِرُو کَاسُ کٜدُّو؞
[25] جَمَدَ دٜیَرُو کٜتُّلُوُࢽِّیَ، ࢽغَیٜ ࢻٜرُودَ مُکُّویٜࢽْ ثْدَࢽٜ ثِیٜࢽُو؞
[26] لَوَرْ أَدْ ثِدِدْ ࢽغَرُو تَتَرْغَادَ؞
[27] عِیسَى ࢽَدَ کُولْجٜ لٜدُ ثْدِ دُوُوࢽْ، کَمْبُ یِࢽْدِ تِیَ جَاࢽٜ کُواْ سَࢻْثَࢽٜ: «عِیسَى تَدَ مَیْ دَاوُدَیٜ، أَࢽْدِیَ ࢽجُࢽُوسَࢽٜ!» ثَࢽِ؞
[28] ࢻَدُو لَارُو کْرْغَاࢽِّیَ، کَمْبُوَدْ ࢽَࢽْجُرُو کَدِرَ؞ عِیسَیٜ تَیِرُو: «رَࢽْغْکّٜ أَدَ ࢽجَدّْکِّرُو مْرْسَسُوَّ وَ؟» ثْࢽٜ کِوُورُو؞ کَمْبُوَدْیٜ: «آه، کْمَ!» یٜرَ؞
[29] دَجِ عِیسَى سِمْࢽْجَ لٜجٜ تَیِرُو: «کَمْبْرْسٜࢽْدُو ࢽَࢽْغَرُو، ࢽَیِرُو وَکَّࢽْجَا!» یٜࢽِّیَ،
[30] سِمْ کٜوَࢽْدُو؞ عِیسَى تَیِرُو وَدَ ثٜ: «ࢻَࢽُّواْ، بَرٜ وُࢽْدُمَ أَدَ ࢽُوجْࢽِّ!» یٜࢽُو؞
[31] أَمَّ لٜجَࢽٜ لَوَرْ عِیسَیٜدَ ثِدِدْ ࢽغَرُو تَتَرْیٜىٰرَ؞
[32] تَیِ سِمْ ثَوَࢽْدْࢽَدْ سَࢻْکَدَرَࢽِّیَ، أَمْ غَدٜ کَرُوَمَ لَا رَکْثٜ مَࢽَجِوَوُووَ ࢽغُوجَࢽٜ ࢽَ عِیسَیٜرُو کٜوُدُو؞
[33] عِیسَى سٜدَࢽْدَ دُیٜࢽِّیَ، کَمْدْ مَࢽَدُ بَدِیٜࢽُو؞ دَجِ جَمَدْ أَجَࢻْثَࢽٜ: «ࢽغَلْتٜمَ أَوُو أَدْ غَیْ لَرْدُ إِسْرَاءِیلَیٜلَࢽْ تُرُࢽِّ!» یٜرَ؞
[34] أَمَّ ࢻَرِسَوَدْیٜ: «کْࢽْدُوُو مَیْ سٜدَࢽَّیٜࢽْ سٜدَࢽَّا دُجِ،» یٜرَ؞
[35] دَجِ عِیسَى لٜجٜ دَࢽْدَلْࢽْجَࢽْ جَمَا أَلَمْجٜ کَوُرِ کْجِ ࢽُودُو بَرْغَا مَیْ سَمٜمَیٜ وُلْجِیٜ أَمْ دُوࢽْدِیَ کَسُوَࢽْجَ ࢽغَࢽْ إِسَࢽْغَجِیے ࢽغَیْ دُوُوࢽْ، بْلَا بْلَدٜیَا سَمَّا غِیَ؞
[36] جَمَ کَدَ ثَࢻْتَࢽَدَ کِرُࢽِّیَ، تَیِیَ ࢽجُࢽُویٜࢽُو، دَلِلْࢽْجُدْ جْکْتَࢽٜ حَࢽْغَلْࢽْجَ ثَا ثِجْࢽَ أَلَمَ دِمِیَ سْࢽِ بَوُووَ غَیْ ࢽَࢽْغَرُو؞
[37] دَجِ ࢻُوُرَوَࢽْجُرُو: «کَلَدْ ࢽغْوُ، أَمَّ کِدَوُدْ غَࢽَ؞
[38] أَدْ ࢽَࢽْغَرُو کْمَ کَلَیٜدَ لُواْࢽُواْ، کِدَوُ غَدٜ یٜیَ تِرُو کَلَ ࢽجْدُّورُو ثُࢽُودُو!» یٜࢽُو؞