[1] سَ أَدْࢽْ یِمْ تُسْتُیٜیَ عِیسَىٰ ࢻُوُرَوَࢽْجُوَ کُلُو أَلْغَمَیٜ رٜجَࢽٜ کُوجَیْ دُوُوࢽْ، ࢻُوُرَوَدْ کْࢽَ ࢻَࢽْجَیْدْ، کْلَ أَلْغَمَیٜ ࢻِثَّࢽٜ ࢽغْرُو بَدِیٜرَ؞
[2] ࢻَرِسَوَ لَا أَدَ کٜرُࢽِّیَ، تِرُو: «أَکُّو رُیْ، ࢻُوُرَوَࢽْمْ أَوُو یِمْ تُسْتُیٜیَ کْࢽْدُورُو حَرَمْدَ ثَدِ،» یٜرَ؞
[3] عِیسَیٜ تَیِرُو: «سَ ࢽَوِ دَاوُدَا أَمْࢽْجُوَ کْࢽَ ࢻَࢽْجَࢽَدْࢽْ، أَوُو ثْدْࢽَدَ کِتَوُلَࢽْ کْرَࢽُوِّ وَ؟
[4] ثُرُو ࢻَدُو اللَّهیٜرُو ࢽغَیٜ بُرُودِ سَدَایٜ ࢽغُوجٜ غِغْرُو؞ رِمَࢽَّرُو کَجِیَ، تِیَ أَمْࢽْجُوَرُو بُرُودِ سَدَایٜ ࢽغْرُودْ حَرَمْ!
[5] رَ، رِمَࢽَّ ثُرُو ࢻَدُو اللَّهیٜࢽْ أَوُو یِمْ تُسْتُیٜیَ کْࢽْدُورُو حَرَمْ ثَدِسُوࢽْ، بِوُࢽْجَ بَوُودَ أَتَّوْرَلَࢽْ کْرَࢽُوِّ وَ؟
[6] ࢽَیِرُو وُلْࢽْجَغَکِّ، أَوُو لَا ࢻَدُو اللَّهیٜیَ کُوجْࢽَ ࢽَدْࢽْ مبٜجِ؞
[7] اللَّهیٜ: ‹بُ ࢻِدَ غْࢽِ، کَࢽْجِمَرِمَ رَاکُّو،› ثْࢽَّ؞ ثَ مَࢽَ أَدْیٜ مَاࢽَࢽْجُ ࢽُوࢽُوَّا، أَمْ أَیَوْࢽْجَ بَوُورُو أَیَوْ غْࢽَاوِّ؞
[8] أَوُووَ تَدَ کَمْبٜدْ کْمَ یِمْ تُسْتُیٜ، دِیٜ!» یٜࢽُو؞
[9] عِیسَى کْلَ ࢻُوُࢽَّ لٜىٰࢽِّیَ، دَࢽْدَلْࢽْجَرُو کْرْغَوُو؞
[10] ࢽَدْࢽْ کَمْ لَا مُکُّو ثَࢽَا مبٜجِ؞ ࢻَرِسَوَدْ عِیسَرُو أَیَوْ غْࢽَدُوُ ثَرَاࢽَ ࢽَࢽْغَرُو، تِرُو: «یِمْ تُسْتُیٜیَ کَمْ إِسَࢽْغَدُوُدْ حَلَلْ وَ؟» ثَࢽٜ تِیَ کٜوُورُو؞
[11] عِیسَیٜ تَیِرُو: «وُࢽْدُࢽْدُو دِمِࢽْجُ یِمْ تُسْتُیٜیَ بْلَارُو ثُکُّرِیَ، غْرْجٜ ثُتُّلُوِوَوُودْ؟
[12] أَدْغَیْیَ، کَمْ دِمِیَ دَرَجَࢽْ کُوجْࢽَ ࢽَࢽْغَرُو، یِمْ تُسْتُیٜیَ ࢽغْلَ کْࢽْدُو حَلَلْ،» یٜࢽُو؞
[13] دَجِ کَمْدْرُو: «مُکُّوࢽْمْ سَࢽٜ!» یٜࢽُو؞ سَیٜࢽِّیَ، ࢽغَجٜ کْلٜوَ سَلَیْ ࢻَلْدْ غَیْرُو وَلْیٜࢽُو؞
[14] ࢻَرِسَوَدْ دَࢽْدَلْࢽِࢽْ کٜلُوُࢽِّیَ، سَوَرْدَࢽٜ جَوَلْ عِیسَىٰ ࢽجٜجُویٜ مَیٜرَ؞
[15] عِیسَى أَدَ أَسُیٜࢽِّیَ، ࢽَدَ کُولْیٜࢽُو؞ جَمَ کَدَ یٜ تِیَ غٜیَ؞ تَیِ سَمَّا إِسَࢽْغَجِیٜ
[16] بَرٜ تِیَ إِسَࢽُوجَغَࢽِّرُو سْمُوࢽْجَ کَسْکٜࢽُو؞
[17] أَدْغَیْمَ أَوُو کْمَࢽْدٜ کُرٜࢽْ ثِ ࢽَوِ إِشَیَیٜࢽْ وُلْجْࢽَدْ وَکَّیٜࢽُو؞ تِیٜ:
[18] «أَکُّو وَکِّلْࢽِ کْرٜࢽْکّْࢽَدْ، تِیَ رَاکّْࢽَ، تِمَ کَرْوُࢽِ جَوْرُو کْجِجْغْࢽَ وُو؞ رُحُࢽِ تِرُو یَکّْکّٜ جِرٜدَ جَمَ دُࢽِیَیٜ سَمَّرُو إِسَࢽُوجِیے؞
[19] کَمْبِوُ ثْدِوَوُو، یِلْجِوَوُو، کُواْࢽْجُ ࢻَرْسَمْلَࢽْ ࢻَࢽْدِوَوُو؞
[20] ثَثَّوْ رِمْجْࢽَا ࢽَمْجِوَوُو، ࢻَتْلَ ࢽُو ثْدِ یٜیَ ثٜجِوَوُو، حَرْ جِرٜدَ کْࢽَّسَرُّو ثُوُدِرُو؞
[21] کُورُو جَمَ دُࢽِیَیٜ سَمَّ ثُࢽْجُرُو تْمَࢽْجَ ثَسَکِّ،» ثْࢽَّ؞
[22] دَجِ کَرُوَمَ لَا کَمْبُ یٜ، مُوَ یٜ کٜوُدْࢽِّیَ، عِیسَى تِیَ إِسَࢽْغَجِیٜ ثَیٜ غَیْ ثُرُیْ یٜ مَࢽَجِ یٜرُو وَلْیٜࢽُو؞
[23] جَمَ سَمَّ أَجَࢻْثَࢽٜ: «کَمْ أَدْ، تِمَ غْࢽِ تَدَ مَیْ دَاوُدَیٜدْ وُو؟» یٜرَ؞
[24] ࢻَرِسَوَدْ أَدَ ࢻَࢽْغٜرَࢽِّیَ، تَیِیٜ: «کْࢽْدُوُو بٜلْجَبُلْ مَیْ سٜدَࢽَّیٜ بَسْلَࢽْ سٜدَࢽَّا دُجِ،» یٜرَ؞
[25] أَمَّ عِیسَى أَوُو کَرْوُࢽْجَیٜ أَسُجٜ تَیِرُو: «کْرْمَیْ ࢻِ یَیٜ کْلَࢽْجُرُو یَکْتْغْࢽَدْ دْغَیْوَوُو، کُورُو بْلَ بِ ࢻَدُو ࢻِ یَیٜ کْلَࢽْجُرُو یَکْتْغْࢽَدْ یٜ دْغَیْوَوُو؞
[26] تُو، إِوُلِیسْ سٜدَࢽَّࢽْجُوَ دُجِیَ، کْلَࢽْجُرُو یَکْتْغْࢽَ؞ ࢽدَیِلَࢽْ غْلٜ کْرْمَیْࢽْجُدْ دْغَیْ؟
[27] کُورُو وُدْ کْࢽْدُوُو بٜلْجَبُلّٜࢽْ سٜدَࢽَّا دُکِّیَ، ࢻُوُرَوَࢽْدُو کْࢽْدُوُو وُࢽْدُیٜࢽْ غْلٜ سٜدَࢽَّا دُجَیْ؟ أَدْمَرُو تَیِ شَرَوُࢽْدُورُو وَلْجَیْ؞
[28] أَمَّ کْࢽْدُوُو رُحُ اللَّهیٜمَࢽْ سٜدَࢽَّا دُکِّیَ، دَجِ ࢽُودُو بَرْغَا اللَّهیٜ ࢽَࢽْدُورُو إِسْࢽَ، دِیٜ!
[29] «وُࢽْدُمَ رَکْثٜ ࢻَدُو کَمْ دُࢽُووَیٜرُو ࢽغَیٜ کْࢽْدَࢽْجُ ثْمُویِوَوُو، سَیْ کَمْ دُࢽُووَدَ ثِکّٜرِیَ دُوُوࢽْ؞ ثِکّٜرِیَ، کْࢽْدَࢽْجُ ثْمُویِ؞
[30] ࢽُوࢽُواْ، کَمْ وُرُو کْلْدْغْࢽِّدْ لَوَلَمَࢽِ، کُورُو کَمْ وُوَ بَࢽَسِیٜ رُوکُّو ثَمِّیٜوَوُودْ تَرْدُمَ؞
[31] أَدْ ࢽَࢽْغَرُو ࢽَیِرُو وُلْࢽْجَغَکِّ، بِوُ سُو، مَࢽَ بَسْتُیٜ سُو سَمَّ کَمْبُو غَوُرْدِیے، أَمَّ رُحُ اللَّهیٜیَ بَسْتُدْ غَوُرْدِوَوُو؞
[32] وُࢽْدُ دُوُوࢽْ کْلَ تَدَ کَمْبٜدْیٜࢽْ مَࢽَکُتُّ وُلْجِدْ، تِرُو غَوُرْدِیے؞ أَمَّ وُࢽْدُ دُوُوࢽْ کْلَ رُحُ اللَّهیٜࢽْ مَࢽَکُتُّ وُلْجِدْ، دُࢽِیَ یٜࢽْ کَلْ، لٜیْرَ یٜࢽْ کَلْ، حَرْ أَبَدَرُو غَوُرْدِوَوُو؞
[33] «کْسْکَدْ ࢽغْلَا، تَدَࢽْجُ یٜ ࢽغْلَ؞ کْسْکَدْ دِوِیَ، تَدَࢽْجُ یٜ دِوِ؞ کْسْکَدْ تَدَࢽْجُلَࢽْ أَسُدِ؞
[34] ࢽَیِ کَدُوُ ࢻُسِیَیٜسُو! ࢽَیِ جَوْرُو دِوِدْ، أَوِیَوِࢽْ غْلٜ رَࢽْغُوٜ أَوُو ࢽغْلَ مَࢽَࢽُوِ؟ دَلِلْࢽْجُدْ أَوُو کَرْوُلَࢽْ دْغَࢽَدْمَا ثِدْ مَࢽَجِ ࢽَࢽْغَرُو؞
[35] کَمْ ࢽغْلَدْ أَوُو ࢽغْلَ کَرْوُࢽْجُلَࢽْ دْغَࢽَدْیٜࢽْ ࢽغْلَ ثْدِ، کُورُو کَمْ دِوِدْ یٜ أَوُو دِوِ کَرْوُࢽْجُلَࢽْ دْغَࢽَدْیٜࢽْ دِوِ ثْدِ؞
[36] ࢽَیِرُو وُلْࢽْجَغَکِّ، کِیَمَ وَکَّجِیَ، اللَّه کْلَ مَࢽَ ࢻَیْدَ بَوُووَ کَمْ مَࢽَجْࢽَ سَمَّیٜࢽْ تِیَ ثُوُورِ؞
[37] أَوُووَ مَࢽَࢽْمْلَࢽْ جِرٜمَرُو وَلّْمِ بِ مَࢽَࢽْمْلَࢽْ جِرٜࢽَمْبُمَرُو وَلّْمِ،» یٜࢽُو؞
[38] دَجِ مَلْمْبَ أَتَّوْرَیٜیَ ࢻَرِسَوَا لَایٜ عِیسَرُو: «سَیِࢽَّ، أَلَمَ لَا سَمٜىٰ ࢻْلٜسَغَمٜ رُیْیٜیَ، رَیِیٜࢽَ،» ثَࢽٜ تِیَ کٜوُورُو؞
[39] عِیسَیٜ تَیِرُو: «أَمْ أَࢽْسِیَ اللَّهیٜ جَمَࢽْ دِوِ أَدْیٜسُو أَلَمَ مَجَیْ، أَمَّ أَلَمَ ࢽَوِ یُونُسّٜ غْࢽِیَ، أَلَمَ ࢻِمَ تَیِرُو ࢻْلٜدِیوَوُو؞
[40] جِرِ ࢽَوِ یُونُسْ کُرٜࢽْ ثُرُو بُࢽِ مَࢻْࢽْدِیٜࢽْ بُࢽٜیَ کَوْسُوَرُو کَوُ یَکُّرُو دْغَࢽَدْ غَیْ، تَدَ کَمْبٜدْ یٜ ثُرُو ثِدِیٜࢽْ بُࢽٜیَ کَوْسُوَرُو کَوُ یَکُّرُو دْغَیْ؞
[41] کِیَمَ وَکَّجِیَ، أَمْ بْرْࢽِ ࢽِࢽِوٜىٰ ثِجَࢽٜ أَمْ جَمَࢽْ أَدْیٜدَ جِرٜࢽَمْبُوُرُو شٜدَجَیْ، دَلِلْࢽْجُدْ تَیِ مَࢽَ ࢽَوِ یُونُسّٜ ࢽغُوجَࢽٜ تُوَ ثَدْࢽَ ࢽَࢽْغَرُو؞ أَکُّو أَوُو لَا ࢽَوِ یُونُسَّ کُوجْࢽَ ࢽَدْࢽْ مبٜجِ؞
[42] کِیَمَ وَکَّجِیَ، مَیْ کَمُیٜ لَرْدُ أَࢽْمْبٜدْ یٜ ثِجٜ أَمْ جَمَࢽْ أَدْیٜدَ جِرٜࢽَمْبُوُرُو شٜدَجِ، دَلِلْࢽْجُدْ تِ ثِ دُࢽِیَیٜࢽْ ثِجٜ ࢽَ مَیْ سُلَیْمَـٰࢽَیٜرُو ࢽَࢽْرَشِدُࢽْجُ ࢻَࢽْدُرُو إِسْࢽَ ࢽَࢽْغَرُو؞ أَکُّو أَوُو لَا مَیْ سُلَیْمَـٰࢽَا کُوجْࢽَ ࢽَدْࢽْ مبٜجِ؞
[43] «سٜدَࢽْ کَمْلَࢽْ ثُلُوِیَ، لٜجٜ ثُرُو کَرَا دْرِیٜࢽْ ࢽَ ࢽَࢻْتُیٜ مَجِ، أَمَّ ثُوَࢽْدِوَوُو؞
[44] دَجِ کْلَࢽْجُرُو: ‹ࢽدَ ࢻَࢽِّ کُولّْکّْࢽَدْرُو وَلْدْکّٜ،› ثْࢽِ؞ وَلْدِیَ، ࢻَدُودَ بُووُ ࢻَتْ یٜ، تَسْ ࢻْرَادَ یٜ، تَسَّࢽَ یٜ ࢽَجِیے؞
[45] دَجِ لٜجٜ سٜدَࢽْ تُلُرْ غَدٜ تِیَ ࢽَࢽْدِوِࢽْ کُوجَࢽَ ثَࢻْثٜ ثُوُدٜ ࢽغَسَیٜ ࢽَࢻْثَیْ؞ أَدْ ࢽَࢽْغَرُو ࢽَࢻْتُ کَمْ أَدْیٜدْ ثَیٜمَا کُوجْࢽَرُو کُتَّجِ؞ أَمْ جَمَࢽْ دِوِ أَدْیٜ یٜرُو أَدْغَیْ وَکَّجِیے،» یٜࢽُو؞
[46] عِیسَى جَمَدْرُو مَࢽَ ثْدِّ دُوُوࢽْ، یَࢽْجُوَ یَࢽْجُغْࢽَسُووَ إِسَࢽٜ ثِ ࢻَدُویٜࢽْ دَجَࢽٜ تِرُو مَࢽَ ثَدُّو ثَࢽٜ کٜوُورُو؞
[47] [کَمْ لَایٜ تِرُو: «أَکُّو یَࢽْمْبَ یَࢽْمْغْࢽَسُووَ دٜیَࢽْ دَادَ ࢽِرُو مَࢽَ ࢽجْدُّورُو مَجَیْ،» یٜࢽِّیَ،]
[48] عِیسَیٜ کَمْدْرُو: «وُࢽْدُ یَࢽِدْ وُو؟ کُورُو وُࢽْدُسُو یَࢽِغْࢽَسُودْ وُو؟» یٜࢽُو؞
[49] دَجِ ࢻُوُرَوَࢽْجُوَ مُکُّوࢽْ ࢻْلٜجٜ: «أَکُّو یَࢽِیَ یَࢽِغْࢽَسُووَدْ!
[50] وُࢽْدُ دُوُوࢽْ أَوُو بَوَࢽِ مَیْ سَمٜمَ ثْرَاࢽَا ثْدِمَدْ، تِمَ یَࢽِیَ یَࢽِغْࢽَسُووَ وُو!» یٜࢽُو؞