[1] «ࢽُودُو بَرْغَا مَیْ سَمٜمَیٜدْ أَلَمَࢽْجُ کَمْ لَا سُوَ لْࢻْ جْرْوُࢽْجُ إِࢽَبّٜرُو کِدَوُ مَدَارُو ثُلُوُࢽَ غَیْ؞
[2] تَیِرُو کِدَࢽْجَ دَبْدُیٜرُو دِࢽَرِیُسْ ࢻَلْ ࢻَلْ بِیَجِ ثْࢽٜ کَسَتْکٜرَࢽِّیَ، تَیِیَ جْرْوُࢽْجُرُو کِࢽُودُو؞
[3] کُورُو بَلْدٜ ثُلُوٜ ثِ کَسُوُیٜࢽْ أَمْ غَدٜ کِدَ بَوُو ࢽَࢻْکَدَ کِرُو؞
[4] تَیِرُو: ‹ࢽَیِ یٜ جْرْوُࢽِرُو لٜࢽُواْ، أَوُو کَلْکَلْدَ ࢽجَدْکِّ،› یٜࢽِّیَ،
[5] ثِجَࢽٜ لٜىٰرَ؞ کَوْسُ دَوُوَ دُوُورَّ یٜ ثُلُوٜ ثَیٜ غَیْ کِدُو؞
[6] کُورُو یَیٜ أَسَرْ کِلُوُࢽِّیَ، ثِ کَسُوُیٜࢽْ أَمْ غَدٜ ࢽَࢻْکَدَ ثُوَࢽْدٜ تَیِرُو: ‹أَوِرُو دَبْدُ سْرَمْبُو ࢽَ أَدْࢽْ بُووُرُو ࢽَمُّوِدْ؟› ثْࢽٜ تَیِیَ کِوُورُو؞
[7] تِرُو: ‹وُࢽْدُمَ کِدَ سَدْࢽِّ ࢽَࢽْغَرُو،› یٜرَ؞ دَجِ تَیِرُو: ‹ࢽَیِ یٜ جْرْوُࢽِرُو لٜࢽُواْ!› یٜࢽُو؞
[8] «دُࢽِیَ کَجِرِیٜࢽِّیَ، کْمَ جْرْوُیٜدْیٜ وَکِّلْࢽْجُرُو: ‹کِدَوُدَ بُواْࢽٜ تَیِرُو بِیَࢽْجَ یٜ، أَمْ دَرْیٜىٰدْࢽْ بَدِࢽْمِیَ بُرْوُویٜدْرُو یَدٜ،› یٜࢽُو؞
[9] أَمْ دُࢽِیَ أَسَرْ کِدَ بَدِجَࢽَدْ کَدِرَࢽِّیَ، دِࢽَرِیُسْ ࢻَلْ ࢻَلْ کٜوَࢽْدُو؞
[10] دَجِ أَمْ بُرْوُوࢽْ کِدَ بَدِجَࢽَدْ کَدِرَࢽِّیَ، أَوُو أَمْ دَرْیٜىٰدْیٜیَ کُوجْࢽَ ثَوَࢽْدِرُو تْمَجَࢽَ دُوُوࢽْ، ࢽدَسُوࢽْجَ یٜ دِࢽَرِیُسْ ࢻَلْ ࢻَلْ کِوَࢽْدُو؞
[11] کٜوَࢽْدْࢽِّیَ، کَرْوُࢽْجَ وَجٜ
[12] تِرُو: ‹أَ! أَمْ دَرْیٜىٰ أَࢽِ سَ ࢻَلُّو کِدَ ثَدْࢽَ یَیٜ، أَࢽْدِیَ کَلْکَلُّو کِدْمْ! أَࢽْدِدْ سُوَ لْࢻْ تَوَࢽِیٜ دَبْدُ سْرَمْبُو کَوْسُ جَوْ ࢻِتْ کْلَࢽْدٜࢽَّ ࢽغْࢽْࢻْتِیٜࢽَ، دِیٜ!› یٜرَ؞
[13] أَمَّ کْمَ جْرْوُیٜدْیٜ ࢻَلْࢽْجَرُو: ‹سَوَ، أَوِمَ دِوِ ࢽجْدّْکّْࢽِ؞ دِࢽَرِیُسْ ࢻَلُّو کِدَ دَبْدُیٜ دِیُورُو کَسَدّْمَّ، غْࢽَ؟
[14] أَوُو کَاࢽْمْدَ ࢽغُوࢽٜ لٜࢽٜ، ࢽجِکّْࢽَدْ غَیْرُو کَمْ دَرْیٜىٰ یٜرُو یِکِّیَ، رَاکُّو؞
[15] کْࢽْدَࢽِلَࢽْ رَࢽْغْکّٜ أَوُو رُوࢽِ ثْرَاࢽَ دِکِّوَوُو وَ؟ رَ، کَرْوُࢽِ ࢽغْلَدْرُو، وُوَ سِمْ دِوِࢽْ سُرُمِ؟› یٜࢽُو؞
[16] أَدْغَیْمَ أَمْ دَرْیٜىٰدْ بُرْوُویٜرُو وَلْجَیْ، کُورُو بُرْوُویٜدْ یٜ دَرْیٜىٰرُو وَلْجَیْ،» یٜࢽُو؞
[17] عِیسَى جٜرُجَلٜمْبُو لٜدُ ثْدِ دُوُوࢽْ، کْلَ جَوَلّٜࢽْ ࢻُوُرَوَࢽْجُ مٜوُࢽْ یِࢽْدِࢽْدَ سْغْرِرُو ثُتُّلُوٜ تَیِرُو:
[18] «ࢻَࢽُّواْ، جٜرُجَلٜمْبُو لٜࢽِیٜ، تَدَ کَمْبٜدَ مُکُّو وُرَوَ رِمَࢽَّیٜیَ مَلْمْبَ أَتَّوْرَیٜیَرُو سْرْثَّغَࢽٜ شَرَ رُو تُلُوُویٜ تِرُو ثَدّٜ
[19] مُکُّو کْرْدِیَیٜرُو ثَسَکّٜ، تَیِ یٜ تِیَ رُجَࢽٜ کِرْوُولَࢽْ جَجَرْجَࢽٜ کْسْکَرُو جَجَغَࢽٜ رُورُو ثٜىٰسِ؞ کُورُو کَوُ یَکُّوَ رُووَرُو وَلْجٜ ثِجِ،» یٜࢽُو؞
[20] دَجِ یَ تَدَوَ جَبَدِیٜ تَدَوَࢽْجُ یِࢽْدِیَ کَلُّو ࢽَ عِیسَیٜرُو إِسَࢽٜ ࢻُوُࢽْجُࢽْ تُࢽْغُرُمْجٜ أَوُو لَا ثْرَوُو ثْࢽٜ تِیَ کِوُورُو؞
[21] عِیسَیٜ تِرُو: «أَوِ رَامْ؟» ثْࢽٜ تِیَ کِوُورُو؞ کَمُدْیٜ تِرُو: «مَرْࢽٜ، کْرْمَیْࢽْمْ ࢻَࢽْدْمِیَ، کُولّٜ تَدَوَࢽِ یِࢽْدِ أَࢽِیَ ࢽَࢻْثَ، ࢻَلْ کْمْبُورَمّْمْلَࢽْ، ࢻَلْ یٜ وَیْلَࢽْمْلَࢽْ!» یٜࢽُو؞
[22] عِیسَیٜ تَیِرُو: «أَوُو کُورُوَّدْمَا ࢽُوࢽُوِّ؞ رَࢽْغُوٜ کْࢽْجَرَمْ یَکِّدْࢽْ یَوِ وَ؟» ثْࢽٜ تَیِیَ کِوُورْࢽِّیَ، تِرُو: «آه، رَࢽْغِیٜ!» یٜرَ؞
[23] عِیسَیٜ تَیِرُو: «جِرٜ، کْࢽْجَرَمِّࢽْ یَوِ؞ أَمَّ کْمْبُورَمِّلَࢽْ سُو، وَیْلَࢽِلَࢽْ سُو ࢽَࢻْتَدْ، وُ غْࢽِ کَمْبُو أَمَرْغْکِّ، بَوَࢽِ أَمْ کْرٜجْࢽَدْرُو تَیِیَ دَبَّرْجْغْࢽَ،» یٜࢽُو؞
[24] ࢻُوُرَوَ مٜوُ غَࢻْثَࢽَدْ أَدَ ࢻَࢽْغٜرَࢽِّیَ، یَاࢽَ یِࢽْدِدْرُو غْرْغَیٜىٰرَ؞
[25] دَجِ عِیسَى تَیِ سَمَّا بُواْجٜ تَیِرُو: «ࢽُوࢽُوَّ، مَیْیَ کْرْدِیَیٜ تَلَاوَࢽْجَا جَوْرُو رَثَّاࢽَ، کُورُو ࢻُوُمَࢽْجَسُو یٜ أَمْࢽْجَرُو کْࢽْدُوُو ࢻْلٜجَغَیْ؞
[26] أَمَّ دَوُࢽْدُوࢽْ ࢽغَیْ غْࢽِ؞ وُࢽْدُ دُوُوࢽْ دَوُࢽْدُوࢽْ کُرَرُو وَلْدُ ثْرَاࢽَمَدْ وُولُودِࢽْدُورُو وَلْجُو!
[27] کُورُو وُࢽْدُ دُوُوࢽْ ࢻُوُمَࢽْدُورُو وَلْدُ ثْرَاࢽَمَدْ کَرٜیَࢽْدُورُو وَلْجُو!
[28] أَدْغَیْمَ تَدَ کَمْبٜدْ تِرُو ࢽَࢽْوُولُودِ ثَدُّورُو غْࢽِ کَدِیُو، تِدْمَ ࢽَࢽْوُولُودِ ثْدُو رُوࢽْجُ ثُو أَمْ ࢽغْوُ مٜرُجُورُو کَدِیُو،» یٜࢽُو؞
[29] عِیسَىٰ ࢻُوُرَوَࢽْجُوَ بْلَ جٜرِکُویٜلَࢽْ کٜلُوُࢽِّیَ، أَمْ کَدَ کَدَمِ تِیَ غٜیَ؞
[30] کَمْبُ یِࢽْدِ ثِ جَوَلّٜࢽْ ࢽَࢻْکَدَ دُوُوࢽْ، عِیسَى کُوجِرُو ࢻَࢽْغٜرَࢽِّیَ، کُواْ سَࢻْثَࢽٜ: «کْمَ، تَدَ مَیْ دَاوُدَیٜ، أَࢽْدِیَ ࢽجُࢽُوسَࢽٜ!» یٜرَ؞
[31] جَمَدْ تَیِرُو جَکَّدٜ مْدْکْ ࢽَࢻْثَ یٜرَ، أَمَّ ثَیٜیَ کُوجْࢽَرُو کُواْ سَࢻْثَࢽٜ: «کْمَ، تَدَ مَیْ دَاوُدَیٜ، أَࢽْدِیَ ࢽجُࢽُوسَࢽٜ!» یٜرَ؞
[32] دَجِ عِیسَى دَجٜ تَیِیَ بُواْجٜ: «أَوِ ࢽَیِرُو ࢽجَدّْکِّیَ، رَوُوْ؟» ثْࢽٜ تَیِیَ کِوُورُو؞
[33] تَیِیٜ: «کْمَ، سِمْ ࢻَࢽْدِیٜیَ، رَیِیٜ!» یٜرَ؞
[34] دَجِ عِیسَى تَیِیَ ࢽجُࢽُوجٜ سِمْࢽْجَ لٜىٰࢽُو؞ سَدْمَࢽْ سِمْ ثَوَࢽْدٜ عِیسَىٰ غٜیَ؞