[1] دُࢽِیَ وَیٜࢽِّیَ، وُرَوَ رِمَࢽَّیٜیَ أَمْوُرَوَ جَمَیٜیَ سَمَّ ثِࢽْجَ کْلْجَࢽٜ عِیسَىٰ رُورُو ثٜىٰسِ یٜرَ؞
[2] دَجِ عِیسَىٰ ثٜکّٜرٜ ثَادٜ مُکُّو غُومْࢽَ بِلَتُسّٜرُو کٜسَکُّو؞
[3] یَحُسَ سْرْتُّوُمَࢽْجُدْ شَرَ کَرْمُویٜ عِیسَرُو ثَدّْࢽَرُو کِرُࢽِّیَ، تُوَجٜ لٜجٜ ثُࢽْغُو رِوُلَّیٜ ࢻِیَکُّدَ وُرَوَ رِمَࢽَّیٜیَ أَمْوُرَوَارُو ثٜ
[4] تَیِرُو: «بِوُ دِکّْࢽَ، کَمْ بِوُࢽْجُ بَوُووَ سْرْࢽّجَغَکّْࢽَ،» یٜࢽُو؞ تِرُو: «أَوِ أَࢽْدِیَ سَسَکُّو؟ ࢽِمَ أَوُوࢽْمْ ࢽُوࢽْمْ،» یٜرَࢽِّیَ،
[5] یَحُسَ وُرِدَ ࢻَدُو اللَّهیٜرُو غْࢻْثِیٜ ࢽَدَ کُولْجٜ لٜجٜ کْلَࢽْجُ کْسْکَرُو رُوجِیٜ کَࢽُو؞
[6] وُرَوَ رِمَࢽَّیٜسُو وُرِدَ ثَࢻْکٜرَࢽِّیَ، أَمَࢽْجَرُو: «بَیْتْمْبَلْ ࢻَدُو اللَّهیٜرُو ࢻِدُوُࢽْجُدْ حَرَمْ، وُرِ بُیٜ ࢽَࢽْغَرُو،» یٜرَ؞
[7] دَجِ ࢽِیَ ࢽغُوجَࢽٜ وُرِدْࢽْ ثِدِ دُوُرَمَّیٜ ثَسُوٜ کَوْرِلَ کُسُوتُّووَیٜرُو کٜدُو؞
[8] أَدْمَ ࢽَࢽْغَرُو کُ کُࢽْدٜࢽُّو ࢽَدَ کُلُو بُیٜلَࢽْ بُواْجَیْدْ؞
[9] أَدْغَیْمَ أَوُو کْمَࢽْدٜ کُرٜࢽْ ثِ ࢽَوِ إِرِمِیَیٜࢽْ وُلْجْࢽَدْ وَکَّیٜࢽُو؞ تِیٜ: «ثُࢽْغُو رِوُلَّیٜ ࢻِیَکُّ، وُرِ دُوُوࢽْ جَمَ إِسْرَاءِیلَیٜ تَمَࢽْ کْلَࢽْجُࢽْ کَسَثَّࢽَیٜدَ ࢽغُوجَࢽٜ
[10] ثِدِ دُوُرَمَّیٜدَ کٜسِوُو، کْمَࢽْدٜ وُلْسْغْࢽَدْ غَیْ،» ثْࢽَّ؞
[11] عِیسَى ࢻُوُ غُومْࢽَ بِلَتُسّٜࢽْ دَجْࢽَ دُوُوࢽْ، غُومْࢽَدْیٜ تِرُو: «ࢽِمَ وَ مَیْ یَوْدِیَیٜدْ وُو؟» ثْࢽٜ تِیَ کِوُورُو؞ عِیسَیٜ: «ࢽِمَ وُلّْمْ، وُمَ!» یٜࢽُو؞
[12] أَمَّ وُرَوَ رِمَࢽَّیٜیَ أَمْوُرَوَا تِیَ بُرْوُیٜرَࢽِّیَ، أَوِمَ تَیِرُو کَلَکْثْغْࢽِّ؞
[13] دَجِ بِلَتُسّٜ تِرُو: «أَوُو کَدَࢽْ بُرْوُࢽْجَࢽَدَ ࢻَࢽّْمِّ وَ؟» ثْࢽٜ تِیَ کِوُورُو؞
[14] أَمَّ عِیسَى أَوِمَ تِرُو کَلَکْثْغْࢽِّ، حَرْ غُومْࢽَدْ جَوْرُو أَجَࢻْکٜࢽُو؞
[15] ثَمَࢽْ کْرْوُ ࢽغُسُوࢽْ سَلَ أَدْلَࢽْ غُومْࢽَدْ أَدَࢽْجُ جْغَࢽٜ کُوسُومَ ࢻَلْ جَمَ ثَرَاࢽَدَ تَیِرُو سَلَمْجِیے؞
[16] سَ أَدْࢽْ کُوسُومَ لَا جَوْرُو ࢽُووَدَ مبٜجِ، ثُࢽْجُ بَرَبَّسْ؞
[17] دَجِ جَمَ ثَࢻْکَدَرَࢽِّیَ، بِلَتُسّٜ تَیِرُو: «وُࢽْدُوَ ࢽَیِرُو سَلَمْࢽْجَغَکِّیَ، رَوُوْ؟ بَرَبَّسَّ رَ عِیسَى کَمْ تِیَ أَلْمَسِیوُلَࢽْ بُواْجَیْدَ؟»
[18] أَوُووَ ࢽَࢽْدْرِࢽْجَ ࢽَࢽْغَرُو عِیسَىٰ مُکُّوࢽْجُرُو سْرْتْکٜىٰرَرُو ࢽُوجْࢽَ؞
[19] ࢽغَیْمَ بِلَتُسْ کْلَ کُرِسْࢽْجُ شَرَیٜࢽْ ࢽَࢻْکَدَ دُوُوࢽْ، کَمُࢽْجُ کَمْ لَآ ثُࢽُودٜ تِرُو: «بَرٜ کَمْ جِرٜمَ أَدْرُو أَوِمَ یِدّْمِّ، کْلَ تِیٜࢽْ کُ کْࢽَّسِمْلَࢽْ جَوْرُو بُوࢽٜ یَکّْࢽَ ࢽَࢽْغَرُو،» یٜࢽُو؞
[20] أَمَّ وُرَوَ رِمَࢽَّیٜیَ أَمْوُرَوَا جَمَدَ ثَسَکّٜ بَرَبَّسَّ تَیِرُو سَلَمْجُوُو عِیسَىٰ رُورُو ثٜجُو یٜرَ؞
[21] کُورُو غُومْࢽَدْ وَلْدٜ تَیِرُو: «تَیِ یِࢽْدِ أَࢽِلَࢽْ وُࢽْدُࢽْجَا ࢽَیِرُو سَلَمْࢽْجَغَکِّیَ، رَوُوْ؟» ثْࢽٜ تَیِیَ کِوُورُو؞ تِرُو: «بَرَبَّسْ!» یٜرَ؞
[22] بِلَتُسّٜ تَیِرُو: «أَوِ غْلٜ عِیسَى کَمْ تِیَ أَلْمَسِیوُلَࢽْ بُواْجَیْدْرُو یِدّْکِّ؟» ثْࢽٜ تَیِیَ کِوُورُو؞ تَیِ سَمَّیٜ: «کْسْکَرُو تِیَ جَغْࢽٜ ࢽُو!» یٜرَ؞
[23] بِلَتُسّٜ: «أَوِرُو؟ أَیَوْ أَوِیٜ ثْدُو؟» یٜࢽِّیَ، ثَیٜ بَوُورُو کُواْ سَࢻْثَࢽٜ: «کْسْکَرُو تِیَ جَغْࢽٜ ࢽُو!» یٜرَ؞
[24] بِلَتُسْ ثُرُو لَمَرْ أَدْیٜࢽْ أَوِمَ رَکْثٜ ثْدِوَوُو یٜ، کَلَلَ ࢽغْوُجِ یٜرُو کِرُࢽِّیَ، إِࢽْغِ ࢽغُوجٜ ࢻُوُࢽْجَࢽْ مُکُّوࢽْجُ تُلْجٜ تَیِرُو: «بُ کَمْ أَدْیٜࢽْ مُکُّوࢽِ بَوُو، ࢽَیِمَ أَوُوࢽْدُو ࢽُوࢽُوْ!» یٜࢽُو؞
[25] أَمَّ جَمَ سَمَّیٜ: «بُࢽْجُ کْلَ أَࢽْدِیَ کَدُوُࢽْدٜیَیٜࢽْ دْغَ!» یٜرَ؞
[26] دَجِ بِلَتُسْ تَیِرُو بَرَبَّسَّ سَلَمْغٜىٰࢽُو؞ أَمَّ سُوجِیَࢽْجُدَ ثَکّٜ عِیسَىٰ کِرْوُولَࢽْ جَجَرْیٜرَࢽِّیَ، تِیَ کْسْکَرُو جَجَارُو مُکُّوࢽْجَرُو کٜکُّو؞
[27] دَجِ سُوجِیَ غُومْࢽَدْیٜدْ عِیسَىٰ ثُرُو غُومْࢽَرِیٜرُو ثَادٜ کْوُࢽْجَ سُوجِیَیٜ سَمَّا ࢻُوُࢽْجُࢽْ ثَࢻْکٜرَ؞
[28] تِیَ رِࢽْغٜرَࢽِّیَ، کَلْوُ کِمٜ تِرُو لُجَغَࢽٜ
[29] أَرِیَوُ کَرِییٜ کْلٜجَࢽٜ کْلَࢽْجُرُو غْࢽَجَغَࢽٜ مُکُّوࢽْجُ کْمْبُورَمْبُو کَ کٜسَکُّو؞ دَجِ ࢻُوُࢽْجُࢽْ تُࢽْغُرُمْجَࢽٜ تِیَ رُجَࢽٜ: «اللَّه ࢽغْوُرُو، مَیْ یَوْدِیَیٜ!» یٜرَ؞
[30] کُورُو لَلَّرِ تِرُو تْوَجَغَࢽٜ کَدَ ثَمُویٜ تِلَࢽْ کْلَࢽْجُ بَبَکّٜرَ؞
[31] تِرُو رُدُ غْࢽَجَغَࢽٜ کٜرْࢽِّیَ، کَلْوُ کِمٜدَ رِࢽْجَࢽٜ کَجْمُࢽْجُ ثَیٜدَ لُجَغَࢽٜ تِیَ کْسْکَرُو جَدُوُرُو کٜسَدُو؞
[32] ثَلُوُࢽَ لٜجَیْ دُوُوࢽْ، کَمْ لَا بْلَ کُرَࢽٜىٰ ثُࢽْجُ سِمَࢽَّ کْلَ کْلْیٜرَ؞ سُوجِیَدْ دُࢽُودُࢽُوࢽْ تِیَ ثَسَکّٜ کْسْکَ عِیسَیٜدَ ࢽغُوجٜ
[33] ࢽَ تِرُو غُولْغُوتَ ثَࢽِدْرُو لٜىٰرَ، غُولْغُوتَیٜ مَاࢽَࢽْجُدْ ࢽَ بُوُو کْلَیٜ؞
[34] عِیسَرُو دِبٜࢽْ ثُرُوࢽْجُࢽْ أَوُو لَا ثْمْ ࢻُوکْ دِیَدَا ثَرُو کٜدُو، أَمَّ ثَدٜ کِدَمْبْࢽِّیَ، کْࢽْجَرُو وَیٜࢽُو؞
[35] تِیَ کْسْکَرُو جَیٜىٰرَࢽِّیَ، کَجْمُࢽْجُ ࢽغُوجَࢽٜ وَلَوَلَ ثَدٜ کَتّٜࢽْجَࢽْ دَغَرْیٜرَ؞
[36] دَجِ ࢽَدْࢽْ تِیَ کُرُورُو ࢽَࢻْکٜرَ؞
[37] کْلَکَجِࢽْجُدْرُو أَلُّو أَیَوْࢽْجُ کْلَࢽْ رُوُوَدَدَ رُویٜىٰرَ: تِ أَدْمَ عِیسَى مَیْ یَوْدِیَیٜدْ وُو؞
[38] غْࢽْدٜوُ یِࢽْدِ یٜیَ تِیَ رُوکُّو جَیٜىٰرَ، ࢻَلْدْ کْمْبُورَمْࢽْجُلَࢽْ، ࢻَلْدْ یٜ وَیْلَࢽْجُلَࢽْ؞
[39] أَمْ کَمْجَࢽَ کُوجَیْسُودْ تِرُو رُدُ غْࢽَجَغَࢽٜ کْلَࢽْجَ کَلَکَلَکْثَࢽٜ
[40] تِرُو: «أَࢻْ! ࢽِ ࢻَدُو اللَّهیٜیَ وُرْࢽْمٜ ثُرُو کَوُ یَکُّیٜࢽْ تَࢽْدْمِدْ، ࢽدَ کْلَࢽْمْ مُویٜ! ࢽِ تَدَ اللَّهیٜیَ، کْسْکَدْࢽْ جْمّٜ!» ثَࢽِ؞
[41] وُرَوَ رِمَࢽَّیٜ یٜ مَلْمْبَ أَتَّوْرَیٜیَ أَمْوُرَوَا رُوکُّو أَدْغَیْ تِرُو رُدُ غْࢽَجَغَࢽٜ أَمَࢽْجَرُو:
[42] «أَمْ غَدٜیَ ثْکَّاࢽَ، أَمَّ رَکْثٜ کْلَࢽْجُ ثْمُویِوَوُو! تِمَ مَیْ إِسْرَاءِیلَوُیٜدْ وُووَ، کْسْکَدْࢽْ کْرْمَمَ جْࢻْثُو، تِیَ کَسَدِّیٜ؞
[43] اللَّهَ مْرْسَجْࢽَ؞ تُو، اللَّه تِیَ ثْرَاࢽَا، کْرْمَمَ تِیَ ثْمُواْ، تِیٜ: ‹وُ تَدَ اللَّهیٜ،› ثْࢽَّ ࢽَࢽْغَرُو،» ثَࢽِ؞
[44] جِرِ أَدْغَیْࢽِࢽْ غْࢽْدٜوُ یِࢽْدِ تِیَ رُوکُّو جَجَاࢽَدْ یٜ عِیسَىٰ رَرَیٜرَ؞
[45] کَوْسُ کْلَ دَوُ دُوُوࢽْ، دُࢽِیَ ࢽغَ تْمْجٜ ثْلْمْبُو وَلْجٜ، حَرْ سَ یَکُّ کَجِرِیٜرُو کِیَدُو؞
[46] سَ یَکُّ کَجِرِیٜدْ عِیسَى کُواْ دُࢽُووَرُو سَࢻْثٜ: «إٜلُویْ، إٜلُویْ، لَمَ سَبَکْتَࢽِ؟» یٜࢽُو، مَاࢽَࢽْجُدْ «اللَّهࢽِ، اللَّهࢽِ، أَوِرُو وُوَ کُولْسٜمْ؟»
[47] أَمْ ࢽَدْࢽْ دَجَࢽَدْ أَدَ ࢻَࢽْغٜرَࢽِّیَ، لَاࢽجَیٜ: «ࢽَوِ إِلْیَا بُواْجِ!» یٜرَ؞
[48] سَدْمَࢽْ ࢻَلْࢽْجَ ثْغَسٜ لٜجٜ سُوسُو ࢽغُوجٜ دِبٜࢽْ ثُومْثُومْبُو لْࢻْثِیٜ ثُتُّلُوٜ کَرُو لَسِّیٜ عِیسَرُو سَیٜىٰࢽُو؞
[49] أَمَّ أَمْ غَࢻْثَࢽَدْیٜ: «ࢽدَ کُولُّواْ، ࢽَوِ إِلْیَ إِسٜ تِیَ ثْکَّیِیَ، رُیْیُو!» یٜرَ؞
[50] دَجِ عِیسَى وَلْدٜ کُواْ دُࢽُووَرُو سَࢻْثٜ رُو کِرْمْبُو؞
[51] سَ أَدْࢽْ جُوَ ثُرُو ࢻَدُو اللَّهیٜࢽْ دْغَࢽَدْ سَمٜࢽْ تَمِیَ کْلَ ثِدِیَࢽَّرُو کُدٜرُو ࢻَرَکْ یِࢽْدِرُو کَرْغَدَࢽْ؞ ثِدِ یٜ لُولُویٜࢽُو، کَوْوَ یٜ ࢻَࢻَلَّدَرَ،
[52] کَوْرِیَ یٜ ࢻْرْمْدَࢽٜ کَمِࢽْ مُمِࢽَّیٜ رُو ثَرْمْبْࢽَ کَدَ کَرْمُولَࢽْ ثِیٜرَ؞
[53] عِیسَى کَرْمُولَࢽْ ثِیٜࢽِّیَ، کَوْرِلَࢽْ ثَلُوٜ بْرْࢽِ تَیِرُّو ࢽغَسَیٜ ࢽَدْࢽْ أَمْ کَدَرُو ࢻْلٜیَادَرَ؞
[54] کَجَلَّدْ سُوجِیَࢽْجُ عِیسَىٰ غُرٜجَیْمَدَ رُوکُّو ثِدِ لُولُوجٜ أَوُو وَکَّجْࢽَا کٜرُࢽِّیَ، کَرْوُࢽْجَ کَمْدٜ: «جِرٜمَرُو تِ تَدَ اللَّهیٜدْمَ!» یٜرَ؞
[55] کَمُوَ کَدَ یٜ کُرُوُࢽِࢽْ أَوُو أَࢽِیَ لَوَرْجَیْ مبٜجِ؞ ثِدِ غَلِلٜىٰࢽْ عِیسَىٰ جَاࢽٜ بَࢽَجَغَیْ؞
[56] ثُرُوࢽْجَࢽْ مَرْیَمْ مَغْدَلَ سُو، مَرْیَمْ یَعْࢼُوبَا یُوسُࢻُوَیٜ یَࢽْجَ سُو، تَدَوَ جَبَدِیٜ یَࢽْجَ سُو مبٜجِ؞
[57] دُࢽِیَ کَجِرِیٜࢽِّیَ، غَرِوُ لَا کَمْ أَرِمَتِیَیٜ ثُࢽْجُ یُوسُࢻُ کَدِیُو، تِ یٜ ࢻُوُرَ عِیسَیٜ؞
[58] ࢽَ بِلَتُسّٜرُو لٜجٜ کَمِࢽْ عِیسَیٜدَ تِرُو ثَدُورُو کِوُورْࢽِّیَ، بِلَتُسْ وَدَ ثٜ کَمِࢽْدَ تِرُو کَیْࢽُو؞
[59] دَجِ یُوسُࢻُ لٜجٜ کَمِࢽْدَ ࢽغُوجٜ لُووُواْࢽْ بَتَّ لِࢽّٜࢽْ کْکْرْجٜ
[60] کَوْرِࢽْجُ بْرِࢽْ ثُرُو کَوْیٜࢽْ لَجْࢽَدْرُو ثَکّٜ سْࢽَجٜ ثِ کَوْرِدْیٜرُو کَوْ کُرَ تْمْبَلْجِیٜ لٜىٰࢽُو؞
[61] مَرْیَمْ مَغْدَلَا مَرْیَمْ ࢻَلْدَ یٜ ࢻُوُ کَوْرِیٜدْࢽْ ࢽَࢻْثَࢽَ مبٜجِ؞
[62] یِمْ دَبَّرْدُیٜ کُوجْࢽَیٜ وَجْࢽَࢽْجُوَ وُرَوَ رِمَࢽَّیٜیَ ࢻَرِسَوَا ࢽَ بِلَتُسّٜࢽْ ثَࢻْتَࢽٜ
[63] تِرُو: «بَرْغَࢽْمِّࢽْ، جَمْبَمَ أَدْ رُوࢽْجُوَلَࢽْ: ‹ࢽغَوُو کَوُ یَکُّیٜࢽْ رُووَرُو وَلّْکّٜ ثِکِّ!› ثْࢽَّدَ کْلَࢽْ تَیْیٜࢽَ؞
[64] أَدْ ࢽَࢽْغَرُو وَدَ یٜ سُوجِیَࢽْمْ کَوْرِدَ کَوُ یَکُّرُو غُرٜجَ، بَرٜ ࢻُوُرَوَࢽْجُسُو إِسَࢽٜ کَمِࢽّجُدَ ࢽدَلْجَࢽٜ أَمْبُو: ‹کَرْمُولَࢽْ ثِجْࢽَ!› وُلْجَࢽِّرُو؞ جَمْبَ دَرْیٜىٰدْ بُرْوُویٜدَ کُوجِ،» یٜرَ؞
[65] بِلَتُسّٜ تَیِرُو: «سُوجِیَا ࢽغُوࢽُواْ لٜࢽُواْ، جِرِ ࢽُوࢽُوَّدْ غَیْرُو کَوْرِدَ غُرٜجَ!» یٜࢽُو؞
[66] دَجِ کَوْرِدْرُو لٜجَࢽٜ کَوْ کُرَ ثِ کَوْرِیٜدْرُو تَوَا بَکْثَغَࢽٜ سُوجِیَدَ غَدِرُو غْࢽَیٜرَ؞