[1] کْلٜوَ سَلَیْࢽِࢽْ کَدِیٜࢽْدٜیَ، ثُکُدْرُو مَلِتَ ثَࢽِ ࢻَࢽْغٜیْیٜ؞
[2] أَمْ ࢽَدْࢽْ دَسَاࢽَدْ أَࢽْدِرُو سٜرْ دَمَ بَوُورُو ࢻْلٜسٜىٰرَ؞ إِࢽْغِ ثُدُرِ کُورُو کَکُوَ ࢽَࢽْغَرُو، کَࢽُّ ࢻُجَࢽٜ أَࢽْدِ سَمَّا سُوسَسٜرَ؞
[3] بُلُسْ کْسْکَ کْلَ ࢻَلْ ثَࢻْثٜ کَࢽُّرُو ࢻِیٜىٰࢽِّیَ، ࢻُسِ لَا کَࢽُّ ࢻَࢽْجٜ ثُلُوٜ مُکُّوࢽْجُوَ ثَلْجٜ تَࢽْغَادَࢽْ؞
[4] أَمْ ࢽَدْیٜدْ کَدِ مُکُّوࢽْجُرُو تَࢽْغَادَ تَلَرْجِ کٜرُࢽِّیَ، کَتّٜࢽْجَࢽْ: «جِرٜمَرُو، کَمْ أَدْ کَمْثٜجِ! تٜکُࢽْ رُوࢽْجُ کَجْࢽَ یَیٜ، شَرَ رُووَ کُولْجِوَوُو!» یٜرَ؞
[5] دَجِ بُلُسْ کَدِدَ سٜثّٜ کَࢽُّرُو غْࢻْثِیٜ کُتُّ ࢻِمَ تِیَ ثُوَࢽْدْࢽِّ؞
[6] ࢻُجِ بِ رُو بَوُووَ بْࢻْ ثُرِرُو تْمَجَࢽَ دُوُوࢽْ، ࢽغْوُرُو غُرٜجَࢽٜ أَوِمَ تِیَ ثُوَࢽْدْࢽِّدْ، کُرُوࢽْجَ ࢻَلْجَࢽٜ تِ سْࢽْمْ ثَࢽِ بَدِیٜرَ؞
[7] کَرْࢽْ ࢽَ أَدْیٜࢽْ ثِدِ لَا لَوَࢽْ ثُکُدْیٜ ࢻَلِیُسْ ثَࢽِیٜ مبٜجِ؞ تِدْ أَࢽْدِیَ کْجِرُو کَمْسَغَࢽٜ ࢻَࢽّجُࢽْ کَوُ یَکُّرُو سُوسَسٜرَ؞
[8] بَوَ ࢻَلِیُسّٜدْ دُوࢽْدِ بُووَدَ، کَࢽْغٜیَ ࢽجَرْوُووَ تِیَ ثَدَࢽَ؞ بُلُسْ ࢽَࢽْجُرُو لٜىٰࢽِّیَ، مُکُّو غْࢽَجِیٜ مُودُوَ ثْدٜ إِسَࢽْغَیٜىٰࢽُو؞
[9] ࢽغَوُو أَدْیٜࢽْ أَمْ دُوࢽْدِ ثُکُدْیٜ غَࢻْثَࢽَ إِسَࢽٜ تَیِ یٜ ࢽغَیٜرَ؞
[10] أَدْ ࢽَࢽْغَرُو أَࢽْدِرُو جَوْرُو بْرْسْمْ سَدٜ حَرْ سَ ثِدُࢽْدٜىٰ کِدْࢽِّیَ، أَوُو مْرَدُࢽْدٜرُو ࢻَیْدَا سَمَّا سٜدُو؞
[11] ࢽغَوُو کْࢽْدَوُ یَکُّیٜࢽْ مَارَ لَا بْرْࢽِ أَلٜکْسَࢽْدَرِیَیٜ ثُکُدْࢽْ ࢽَࢽْغْرِ کُوجْࢽَ کْلَࢽْجُࢽْ أَلَمَ کَوُوَ سْࢽْمْبٜ ثْغَرْࢽَدْرُو ࢽغَیِیٜ سَࢻْکَدَیْیٜ؞
[12] بْرْࢽِ سِرَکُسّٜرُو کَدِیٜࢽْدٜیَ، کَوُ یَکُّرُو ࢽَࢻْکٜیْیٜ؞
[13] ࢽَدْࢽْ جَرَرَدَ غَیْیٜ دُوُوࢽْ، تٜکُدَ ࢻَلِّیٜ بْرْࢽِ رِغِیُمْبٜرُو کَدِیٜ؞ وَجْࢽَࢽْجُوَ کَرُوَ أَࢽْمْبٜ ࢻُدُ بَدِیٜࢽِّیَ، کْلَ ࢻُوُࢽَّ ثِࢽِیٜ کَوُ یِࢽْدِࢽْ دُوُوࢽْ بْرْࢽِ ࢻُتِیُولِ ثَࢽِدْرُو إِسِیٜ جْࢻْکٜیْیٜ؞
[14] ࢽَدْࢽْ کْرَمِیَ لَآ ࢽَیٜىٰیْیٜ؞ أَࢽْدِیَ دُوسَࢽٜ دَوُࢽْجَࢽْ مَوُرُو ࢽَࢻْکٜیْیٜ؞ أَدْغَیْࢽِࢽْ بْرْࢽِ رُومْبٜرُو لٜىٰیْیٜ؞
[15] کْرَمِیَ رُومْبٜدْ إِسِیٜرُو ࢻَࢽْغٜرَࢽِّیَ، أَࢽْدِیَ کَࢻْتُوُرُو حَرْ کَسُوُ أَࢻِیُسّٜیَ کُسُوتُّورَمْ یَکُّوَرُو کَدِرَ؞ بُلُسْ تَیِیَ کِرُࢽِّیَ، اللَّهرُو أَرْدِجٜ کَرْوُࢽْجُࢽْ دُࢽُو کِوَࢽْدُو؞
[16] رُومْبُو کَدِیٜࢽْدٜیَ، کُولْجَࢽٜ بُلُسْ رُࢽْجُ سُوجِ غَدِمَࢽْجُوَ رُوکُّو ࢽَࢻْکٜࢽُو؞
[17] ࢽغَوُو کَوُ یَکُّیٜࢽْ بُلُسْ ࢻُوُوُ یَوْدِیَیٜیَ بُواْجٜ ثَࢻْکَدَرَࢽِّیَ، تَیِرُو: «کْرَمِیَ، أَوِمَ دِوِ جَمَࢽْدٜیَ أَدَ کَارِیَࢽْدٜىٰیَرُو یِدّْکّْࢽِ یَیٜ، جٜرُجَلٜمْلَࢽْ کُوسُومَ غَیْ وُوَ سَدَࢽٜ مُکُّو أَمْ رُومْبٜرُو سْرْࢽْسٜىٰرَ؞
[18] کُورُو سٜدّْرَࢽِّیَ، أَیَوْ ࢻِمَ ࢽجٜجُویٜ وُلَࢽْ بَوُو ࢽَࢽْغَرُو وُوَ کُولْدُ کٜرَوُو؞
[19] أَمَّ یَوْدِیَدْ وَجَࢽَدْرُو، أَیَوْ جَمَࢽِرُو غْࢽَدُوُیٜ تَکّْࢽِ یَیٜ، دُولٜࢽِرُو سَیْ کَیْسَرْ وُرُو شَرَ سْدِّیَ یٜکُّو؞
[20] أَدْمَرُو ࢽَیِیَ ࢽجَرُکّٜ مَࢽَ ࢽجَدّْکّٜ ࢽْکّٜ بُواْࢽْغٜرَکُّو؞ ࢽُوࢽُواْ، تْمَ إِسْرَاءِیلَوُیٜ ࢽَࢽْغَرُو وُ سَرْغَ أَدْلَࢽْ تِکّٜرْکّْࢽَدْ!»
[21] دَجِ تَیِیٜ تِرُو: «أَࢽْدِدْ، وُوتِیَ ࢻَلْمَ لَرْدُ یَحُدِیَیٜ کْلَࢽْمْلَࢽْ ࢻَࢽْدِیٜࢽْدٜ، کُورُو ثُرُو کْرَمِیَࢽْدٜ ࢽَ تُودْࢽْ إِسَࢽَیٜࢽْ وُࢽْدُمَ دِوِࢽْمْ وُلْجِ ࢻَࢽِّیٜࢽْدٜ؞
[22] أَمَّ ࢽِیٜࢽْ أَوُو تْمَࢽْمَّ ࢻَࢽْدُرُو رَیِیٜࢽَ، دَلِلْࢽْجُدْ ࢽدَرَࢽْ یَیٜ کْوُ أَدَ وَجَࢽَرُو ࢽُوࢽِیٜࢽَ،» یٜرَ؞
[23] دَجِ بُلُسُّو سَرْدُ کَمْغٜىٰرَࢽِّیَ، تَیِ ࢽَࢽّغْوُࢽْ ثَیٜمَا کُوجْࢽَرُو ࢽَࢽْجُرُو کَدِرَ؞ سُوَࢽْ تَیْ حَرْ کَجِرِرُو کُدٜ، بُلُسْ ࢽُودُو بَرْغَا اللَّهیٜیَ شٜدَجٜ أَتَّوْرَ ࢽَوِ مُوسَیٜیَ کِتَوُوَ ࢽَوِیَیٜیَلَࢽْ ࢽجُتِّیٜ أَوُو عِیسَىٰ وُجْࢽَا کَسَثَّرُو تَیِرُو کَوُرِ کِدُّو؞
[24] أَوُو وُلْجْࢽَدَ لَاࢽجَ کَسَتْکٜرَ، لَا یٜ کَسَتُّ وَیٜرَ؞
[25] ࢻَࢽْدَࢽِّࢽْ دُوُوࢽْ، کَوُ لٜجَیْدْرُو بُلُسّٜ تَیِرُو مَࢽَ ࢻَلْ ثْدّٜ: «أَوُو رُحُ اللَّهیٜ ثِ ࢽَوِ إِشَیَیٜࢽْ کَارِیَࢽْدُورُو وُلْجْغْࢽَدْ جِرٜ؞
[26] تِیٜ: «‹لٜࢽٜ، جَمَ أَدْرُو وُلّٜ: ࢽغْلَرُو ࢻَࢽُّوِ دُوُوࢽْ، کْلَࢽْدُورُو تْمَّرُو ࢽغَیِوَوُو؞ کُورُو ࢽغْلَرُو رُوِ دُوُوࢽْ، تْمَّرُو أَسُࢽُوَّوُو؞
[27] أَوُووَ کَرْوُ جَمَ أَدْیٜدْ کِبَّجْࢽَ، کِیَدِّࢽْ سْمُوࢽْجَ ࢻَࢽْجَیْ، سِمْࢽْجَ یٜیَ جَکْثَࢽَ، بَرٜ سِمْࢽْجَࢽْ ثَرُࢽِّ، سْمُوࢽْجَࢽْ ࢻَࢽْجَࢽِّ، کُورُو کَرْوُࢽْجَࢽْ أَسُجَࢽِّرُو؞ ࢽغَیْ غْࢽِیَ، ࢽَࢽِرُو وَلْدَࢽٜ تُوَ ثَدٜ تَیِیَ إِسَࢽْغَغْکِّ؞›
[28] «تُو، ࢻَࢽُّواْ، لَوَرْ ࢽجْکَّوُو اللَّهیٜ أَدْ جَمَ کْرْدِیَیٜرُو جُوَدْغْࢽَ؞ تَیِدْ ࢻَࢽْجَیْ!»
[29] [أَدَ وُلْیٜࢽِّیَ، یَوْدِیَ کَتّٜࢽْجَࢽْ کَمْبِوُ ثَدِیَرُو سَࢻْکَدَرَ؞]
[30] کْرْوُ یِࢽْدِ لَتُّو بُلُسْ ࢻَࢽّجُ أَغْرِیٜࢽْ ࢽَࢻْثٜ، أَمْ تِیَ کُرُورُو إِسَیْ سَمَّا مُکُّو یِࢽْدِࢽْ کَࢻْثِیٜ،
[31] وُࢽْدُمَ تِرُو دَࢻْثْغْࢽِّࢽْ تَیِرُو ࢻٜدٜرُو کَوُرِ ࢽُودُو بَرْغَا اللَّهیٜ ثْدّٜ أَوُو کْمَ عِیسَى أَلْمَسِیوُوَ وُجْࢽَا أَلَمْجِ کْرْغَ؞