[1] شَوُلُ إِسْتِࢻَࢽُسّٜ رُو تُلُوُو أَرْدِیٜࢽُو؞ یِمْ أَدْࢽْ بَسَرِ کُرَ کْلَ جَمَ عِیسَىٰ غَوُ جٜرُجَلٜمْلَࢽْ دَسَاࢽَدْیٜࢽْ ثِیٜࢽُو؞ کْࢽْغَیَمْبَدْرُو کَجِیَ، تَیِ سَمَّ ثِدِ یَحُدِیَیٜیَ سَمَرِیَیٜیَرُو تَتَرْغَادَرَ؞
[2] مُمِࢽَّ لَا إِسْتِࢻَࢽُسَّ سِتّْرَجَࢽٜ تَیْ دَجَࢽٜ تِ ࢽَࢽْغَرُو کٜسِرُو؞
[3] أَمَّ شَوُلُدْ جَمَ عِیسَىٰ غَوُدَ بَوُورُو دِیُو مَجِیَلَࢽْ، ࢻَدُو ࢻَدُورُو لٜجٜ تَیِیَ کوَࢽْ کَمُࢽْ ثْدَࢽٜ کُوسُورُو ثَکِّ؞
[4] ࢽغَیْ دُوُوࢽْ أَمْ تَتَرْدَࢽَدْ بْلَ بْلَرُو لٜجَࢽٜ کَوُرِدَ وُلْجَیْ،
[5] ࢻِلِبُسْ یٜ بْرْࢽِ لَا ثِدِ سَمَرِیَیٜرُو لٜجٜ أَلْمَسِیوُدَ تَیِرُو مَࢽَدُوُ بَدِیٜࢽُو؞
[6] جَمَدْ سَمَّ أَوُو ࢻِلِبُسْ وُلْجِدَ ࢻَࢽْجَࢽٜ أَلَمَ أَجَبَّ أَجَبَّ ثْدِدَ کٜرُࢽِّیَ، کَرْوُ تِلُووَرُو حَࢽْغَلْࢽْجَ غْࢽَادَ تِیَ کْرْࢽْجَیْ؞
[7] سٜدَࢽْسُو بُرْوُ دُࢽُووَرُو ثَسَکِّیَرُو کَرُوَمَ کَدَࢽْ ثَلُوِ، أَمْ تِیے ࢽُࢽَا سُو، ࢽغُرْدِیے سُو کَدَ یٜ ࢽغَجَࢽَ؞
[8] أَدْغَیْمَ بْرْࢽِدْࢽْ کَرْوُࢽْجَ جَوْرُو کْجِیٜࢽُو؞
[9] کَمْ لَا تِرُو سِمَࢽْ ثَࢽِ مبٜجِ؞ ثَلَࢽْ بْلَدْࢽْ سَغَوُ ثْدٜ أَمْ ثِدِ سَمَرِیَیٜ تِیَ أَجَࢻْثَیْ، کُورُو کْلَࢽْجُوَ کَمْ کُرَرُو ࢽغُوجِ؞
[10] تَیِ سَمَّ کُرَࢽْ غَࢽَࢽْ حَࢽْغَلْ غْࢽَادَارُو تِیَ کْرْࢽْجَࢽٜ: «تِمَ کْࢽْدُوُو اللَّهیٜ تِرُو کُرَ ثَࢽِدْ وُو!» ثَࢽِ؞
[11] تُسّْࢽَ کْلَ سَغَوُࢽْجُیٜࢽْ تِیَ أَجَࢻْثَࢽَ ࢽَࢽْغَرُو، حَࢽْغَلْࢽْجَ سَمَّ کَࢽْجِࢽْجُلَࢽْ؞
[12] أَمَّ کَوُرِ کْجِ دُوُوࢽْ ࢻِلِبُسْ تَیِرُو کْلَ ࢽُودُو بَرْغَا اللَّهیٜیَ ثُ عِیسَى أَلْمَسِیوُیٜیَیٜࢽْ وُلْجْغْࢽَدَ کَسَتْکٜرَࢽِّیَ، ࢻِلِبُسْ کوَࢽْ کَمُࢽُّو تَیِرُو کَسَلَ کِدُّو؞
[13] سِمَࢽْ کْلَࢽْجُمَ کَوُرِ کْجِدَ کَسَثّٜ تِرُو کَسَلَ کٜدّْࢽِّیَ، ࢻِلِبُسُّو کْلْدِیٜ أَلَمَ سُو، أَوُو أَجَبَّ سُو تْدِدَ أَجَࢻْکٜࢽُو؞
[14] کْࢽْغَیَمْبَدْ جٜرُجَلٜمْࢽِࢽْ دُوُوࢽْ، أَمْ ثِدِ سَمَرِیَیٜ مَࢽَ اللَّهیٜیَ کَسَثَّࢽَرُو ࢻَࢽْغٜرَࢽِّیَ، تَیِرُو بِتُرُسَّ یَحْیـَأٓ جُوَیٜىٰرَ؞
[15] کَدِرَࢽِّیَ، رُحُ اللَّهیٜ ثَوَࢽْدُورُو تَیِرُو مُودُوَ کٜدُّو،
[16] دَلِلْࢽْجُدْ تَیِرُو ثُ کْمَ عِیسَیٜࢽْ کَسَلَ ثَدّْࢽَ یَیٜ، رُحُ اللَّهیٜ وُࢽْدُࢽْجَمَرُو کُورُومَ جْࢻْثْغْࢽِّ؞
[17] دَجِ تَیِرُو مُکُّو غْࢽَجَغَࢽٜ رُحُ اللَّهیٜ کٜوَࢽْدُو؞
[18] سِمَࢽْدْ رُحُ اللَّهیٜ مُکُّو غْࢽَدَ کْࢽْغَیَمْبَیٜࢽْ تِࢽَدَ کِرُࢽِّیَ، وُرِ ثِ ثْࢽٜ
[19] تَیِرُو: «کْࢽْدُوُو أَدَ وُ یٜرُو سٜوُو، وُࢽْدُ دُوُوࢽْ تِرُو مُکُّو غْࢽَغْکّْࢽَدْ رُحُ اللَّهیٜیَ ثُوَࢽْدُو!» یٜࢽُو؞
[20] أَمَّ بِتُرُسّٜ تِرُو: «کْࢽْجُو اللَّهیٜ کُࢽْغُࢽَلَࢽْ مُواْرُو تْمَࢽْمَّ ࢽَࢽْغَرُو، ࢽِیَ وُرِࢽْمْبَ کَࢽُّیٜ ࢽجَوُو!
[21] لَمَرْ أَدْࢽْ ࢽُوَࢽْمْ یٜ بَوُو، لَمْبُوࢽْمْ یٜ بَوُو، کَرْوُࢽْمْ ࢽَ اللَّهیٜࢽْ کَلْکَلْ غْࢽِ ࢽَࢽْغَرُو؞
[22] تْمّٜ ࢽِیَدِوِࢽْمْ أَدَ کُولّٜ کْمَࢽْدٜیَ لُواْࢽٜ، وَࢽٜىٰ أَوُو کَرْوُࢽْمْبٜ غَوُرْࢽْجِیے؞
[23] ࢽِدْ، کَرْوُࢽْمْ ثْلْمْ ࢻْدْکْ، کُورُو بِوُࢽْ تِکّٜرْمَّرُو ࢽغِرُکُّو،» یٜࢽُو؞
[24] کُورُو سِمَࢽْ وَلْدٜ تَیِرُو: «اللَّهَ وُرُو سُکُّورُواْ، بَرٜ أَوُو وُلُّوَّ أَدْیٜ ࢻَلْمَ وُوَ سُوَࢽْدْࢽِّ!» یٜࢽُو؞
[25] دَجِ شٜدَ ثَدٜ مَࢽَ کْمَیٜ أَمْبُو سَتْکٜىٰرَࢽِّیَ، بِتُرُسَّ یَحْیـَىٰ کَوُرِ کْجِدَ بْلَ کَدَ سَمَرِیَوُیٜࢽْ وُلْجَیْیَرُو جٜرُجَلٜمْبُو وَلَّدَرَ؞
[26] مَلَیْیَ کْمَࢽْدٜىٰ لَا ࢻِلِبُسُّو: «ثِࢽٜ کْلَ أَࢽْمْࢽِࢽَّ لٜࢽٜ جَوَلْ جٜرُجَلٜمْلَࢽْ ثُلُوٜ بْرْࢽِ غَجَیٜرُو لٜجِدَ غَیْ!» یٜࢽُو؞ جَوَلْ أَدْ کَرَا دْرِ؞
[27] دَجِ ثِجٜ جَوَلْ کِدَࢽِّیَ، أَکُّو أَدِمْ لَا لَرْدُ حَبَشَیٜ؞ تِدْ کُواْࢽَ کُرَ کَࢽْدَتُ مَیْ کَمُیٜ حَبَشَوُیٜ یٜ، بَیْتْمْبَلْمَࢽْجُ یٜ؞ جٜرُجَلٜمْبُو اللَّهرُو أَمْبْتُّوُرُو إِسْࢽَ دُوُوࢽْ،
[28] أَمَلٜࢽْکٜࢽْجُ کْمْبَیٜࢽْ ࢽَࢻْکَدَ وَلْدُ ثْدِ، کُورُو کِتَوُ ࢽَوِ إِشَیَیٜ کْرَجِ؞
[29] دَجِ رُحُ اللَّهیٜ ࢻِلِبُسُّو: «لٜࢽٜ أَمَلٜࢽْکٜدَ ࢽَغْࢽٜ!» یٜࢽُو؞
[30] ࢻِلِبُسْ ثْغَسٜ تِیَ ࢽَیٜىٰࢽِّیَ، کِتَوُ ࢽَوِ إِشَیَیٜ کْرَجِ ࢻَࢽْجٜ تِرُو: «أَوُو کْرَࢽْمِدَ أَسُࢽْمِ وَ؟» ثْࢽٜ تِیَ کِوُورُو؞
[31] تِیٜ: «کَمْ لَا غْࢽِ بَیِࢽْسُوُووَ، أَوِیَوِࢽْ رَࢽْغْکِّ؟» ثْࢽٜ ࢻِلِبُسَّ جُوَ رُوکُّو ࢽَࢻْثَرُو دُویٜࢽُو؞
[32] ثُرُو کِتَوُیٜࢽْ ࢽَ کْرَجِدْ تِمَ: «دِمِ دُوَرَمْبُو ثَادِ غَیْ، کُورُو تَمَ ࢻُوُ غْرْࢻْتَوُࢽْجُیٜࢽْ ࢽُکْثِوَوُو غَیْ، تِدْ یٜ مْدْکْ ثِࢽْجُ کَجْࢽِّ؞
[33] ࢽَࢽْغُرُو ثَسَکّٜ جِرٜࢽْجُ دَࢻْکٜىٰرَ؞ وُࢽْدُ رَکْثٜ کَدُوُࢽْجُیٜ مَࢽَ ثْدِ؟ أَوُووَ رُوࢽْجُ دُࢽِیَࢽْ ثَتُّلُوُࢽَ؞»
[34] أَدِمْ حَبَشَیٜدْ ࢻِلِبُسُّو: «مَرْࢽٜ، وُلْسْغْࢽٜ کْلَ وُࢽْدُیٜࢽْ ࢽَوِدْ مَࢽَ أَدَ ثْدِ؟ کْلَࢽْجُࢽْ رَ کْلَ کَمْ غَدٜىٰࢽْ؟»
[35] دَجِ ࢻِلِبُسْ ثِࢽْجُ کَجٜ أَوُو کِتَوُلَࢽْ رُوُوَدَ أَدْࢽْ تِرُو کَوُرِ کْجِ عِیسَیٜ وُلْدُوُ بَدِیٜࢽُو؞
[36] لٜدُ ثَدِ دُوُوࢽْ، ࢽَ لَا إِࢽْغِیَرُو کَدِرَࢽِّیَ، أَدِمْدْ ࢻِلِبُسُّو: «أَکُّو إِࢽْغِ! أَوِ وُرُو کَسَلَ ࢽجْدُّورُو دَمْسِیے؟» یٜࢽُو؞
[37] [ࢻِلِبُسّٜ: «کَرْوُࢽْمْࢽِࢽْ کَسَدّْمَّا، یُوجِ،» یٜࢽِّیَ، تِیٜ: «عِیسَى أَلْمَسِیوُمَ تَدَ اللَّهیٜدْ وُورُو کَسَدّْکّْࢽَ،» یٜࢽُو؞]
[38] دَجِ وَدَ ثٜ أَمَلٜࢽْکٜ دَجُو یٜࢽِّیَ، ࢻِلِبُسَّ أَدِمْدَ تَیِ یِࢽْدِ سَمَّ جْࢻْثَࢽٜ إِࢽْغِرُو ࢽغَسَیٜ ࢻِلِبُسْ تِرُو کَسَلَ کِدُّو؞
[39] إِࢽْغِلَࢽْ کٜلُوُࢽِّیَ، رُحُ کْمَࢽْدٜىٰ ࢻِلِبُسَّ ࢽَ غَدٜرُو کِیَدُو؞ أَدِمْدْ غَدٜرُو تِیَ ثُرُࢽِّ، أَمَّ کَرْوُ کْجِیَرُو جَوَلْࢽْجُ جْغَࢽٜ لٜىٰࢽُو؞
[40] ࢻِلِبُسْدْ بْرْࢽِ أَجُوتُسّٜࢽْ دُوُوࢽْ بْلَ بْلَرُو لٜجٜ کَوُرِ کْجِ وُلْجِ، حَرْ بْرْࢽِ کَیْسَرِیَیٜرُو کَدِیُو؞