[1] أَمْ لَا ثِدِ یَحُدِیَیٜࢽْ بْرْࢽِ أَࢽْتَکِیَیٜرُو إِسَࢽٜ کْرَمِیَدَ أَلَمْدُ بَدِیٜرَ؞ تَیِرُو: «أَدَ ࢽَوِ مُوسَیٜ غَوٜ ࢽَیِیَ کَجَࢽْجَࢽِّیَ، رَࢽْغُوٜ ࢽجْکَّوُو ࢻَࢽْدُوَّوُو،» یٜرَ؞
[2] بُلُسَّ بَرْࢽَبَسَّ مَࢽَࢽْجَدَ کَسَتُّرُو وَجَࢽٜ کَمْبِوُ جَوْ ࢻِتْ کٜدْࢽِّیَ، جَمَ سَوَرْدَࢽٜ بُلُسَّ بَرْࢽَبَسَّ أَمْࢽْجَ غَدٜ لَآ جٜرُجَلٜمْبُو ࢽَ کْࢽْغَیَمْبَا أَمْوُرَوَایٜرُو لٜجَ کْلَ مَࢽَ أَدْیٜࢽْ غَسِࢻْثَ یٜرَ؞
[3] جَمَ عِیسَىٰ غَوُدْ تَیِیَ کٜࢽُودْࢽِّیَ، لَرْدُ ࢻٜࢽِسِیٜیَ سَمَرِیَیٜیَ رٜجَࢽٜ کُوجَیْ دُوُوࢽْ، کْرَمِیَدْرُو لَوَرْ اللَّهرُو وَلْدُ کْرْدِیَیٜدَ وُلْجَغَࢽٜ تَیِ سَمَّ جَوْرُو کْجِ ࢻَࢽْغٜرَ؞
[4] جٜرُجَلٜمْبُو کَدِرَࢽِّیَ، جَمَ عِیسَىٰ غَوُوَ کْࢽْغَیَمْبَا أَمْوُرَوَادْ تَیِیَ مُکُّو یِࢽْدِࢽْ کٜمُواْ؞ دَجِ أَوُو اللَّه تَیِیٜࢽْ ثْدْࢽَ سَمَّا وُلْیٜرَ؞
[5] أَمَّ عِیسَىٰ غَوُ کْوُ ࢻَرِسَوَیٜ لَا ثِجَࢽٜ تَیِرُو: «سَیْ تَیِیَ کَجَجَࢽٜ أَتَّوْرَ ࢽَوِ مُوسَیٜیَ جَارُو تَیِرُو وَدَ ثَدِیَ دُوُوࢽْ،» یٜرَ؞
[6] دَجِ کْࢽْغَیَمْبَدَ أَمْوُرَوَدَ کْلَ لَمَرْ أَدْیٜࢽْ سَوَرِرُو ثَࢻْکَدَرَ؞
[7] ࢽغْوُرُو غَسِࢻْکٜرَࢽِّیَ، بِتُرُسْ ثِجٜ تَیِرُو: «کْرَمِیَ، تُسّْࢽَ اللَّه وُوَ ثُرُوࢽْدُوࢽْ کْرٜسْࢽَ کْرْدِیَسُو ثِࢽِلَࢽْ کَوُرِ کْجِ ࢻَࢽْجَ کَسَثَّرُو ࢽَیِ ࢽُوࢽُوَّ؞
[8] کُورُو اللَّه تِ کَرْوُ ࢽُودُمَدْ رُحُࢽْجُ أَࢽْدِرُو سَدْࢽَدْ غَیْ، تَیِ یٜرُو ثٜ تَیِیَ أَرْدِجْࢽَدَ شٜدَیٜࢽُو؞
[9] أَࢽْدِیَ تَیِیَ غَیِرْسَࢽِّ، کَمْبْرْسٜࢽْجَ ࢽَࢽْغَرُو کَرْوُࢽْجَا تُلْجٜ تَیِرُّو وَلْیٜرَ؞
[10] تُو، أَوِرُو اللَّهَ رِجَمُّوٜ کُرْوُووُ دُوُوࢽْ بِ کَارِیَࢽْدٜمَ بِ أَࢽْدِمَ رَࢽْغِیٜ ࢽغُوࢽِیٜࢽْدٜدَ ࢻُوُرَوَ أَࢽِرُو غْࢽَغْوِدْ؟
[11] أَعَ! تَیِ سٜرْ کْمَ عِیسَیٜࢽْ ࢽجْکَّوُو ثَوَࢽْدْࢽَدْ غَیْ، أَࢽْدِ یٜ ࢽغَیْمَࢽْ ࢻَࢽْدِیٜࢽَرُو کَسَدِّیٜࢽَ؞»
[12] جَمَ ثَࢻْتَࢽَدْ سَمَّ غْمْ ثَدْࢽَ کْرْࢽْجَیْ دُوُوࢽْ، بَرْࢽَبَسَّ بُلُسَّ أَلَمَ سُو، أَوُو أَجَبَّ سُو اللَّه تَیِیٜࢽْ دَوُ کْرْدِیَیٜࢽْ ثْدْࢽَ سَمَّا تَیِرُو وُلْیٜىٰرَ؞
[13] مَࢽَࢽْجَ ثَدٜ کٜسٜرَࢽِّیَ، یَعْࢼُوبَیٜ تَیِرُو: «کْرَمِیَ، مَࢽَࢽِ ࢻَࢽُّواْ!
[14] سِمَࢽْ جِرِ اللَّه بُرْوُومَࢽْ کْرْدِیَا ࢽجُࢽُوجٜ ثُرُوࢽْجَࢽْ أَمْ جَمَࢽْجُرُو وَلْجَرُو کْرٜجْࢽَدَ وُلْسَاࢽَ؞
[15] کُورُو مَࢽَ ࢽَوِیَیٜ یٜ أَدَ تَبَّثَّاࢽَ، أَکُّو أَوُو کِتَوُلَࢽْ رُوُوَدَدْ:
[16] ‹اللَّهیٜ: ࢽغَوُو أَدْیٜࢽْ إِسْکّٜ لٜیْمَ دَاوُدَیٜ ثُرْࢽَدَ وَلْدْکّٜ تَࢽْدْکِّ؞ أَوُو وُرْدْࢽَدَ بْرِࢽُّو سْغَࢻْکْکّٜ تَࢽْدْکِّ؞
[17] أَدْغَیْمَ أَدَمْغْࢽَ غَࢻْثَࢽَدْ، حَرْ کْرْدِیَ سَمَّ دُوُوࢽْ تَیِیَ ثُࢽِلَࢽْ بُواْجَیْدْ، وُ کْمَࢽْجَا مَسَیْ، یٜࢽُو کْمَࢽْدٜ أَوُو أَࢽِیَ ثْدٜ
[18] تْࢽْ کُرٜࢽْ أَمْبُو إِسَࢽُوجْغْࢽَدْ؞›
[19] «أَدْمَ ࢽَࢽْغَرُو، کْرَمِیَࢽِ، وُیٜࢽَّ، بَرٜ أَمْ جَمَ کْرْدِیَیٜ اللَّهَ غَوُرُو وَلْدُ ثَدِدَ سُوُولِّیٜࢽْدٜ،
[20] أَمَّ سَیْ دَ سْࢽْمْبُو تِࢽَ ࢽغْرُو سُو، کْࢽْجْࢽَ دِیُو سُو، لْمَࢽْ دُوَدْࢽِّ ࢽغْرُو سُو، بُ ࢽجَ سُووَ وَجَرُو تَیِرُو رُوُࢽِیُو؞
[21] أَوُووَ تْࢽْ جَمَࢽْ کُرٜىٰࢽْ یِمْ تُسْتُیٜ ࢽغُسُوࢽْ بْرْࢽِ ࢻِࢽْ یَیٜ دَࢽْدَلْࢽِࢽْ أَتَّوْرَ ࢽَوِ مُوسَیٜدَ جَمَرُو کْرَجَغَࢽٜ أَلَمْجَیْ؞»
[22] دَجِ کْࢽْغَیَمْبَا أَمْوُرَوَا جَمَ عِیسَىٰ غَوُ سَمَّا أَمْ ثُرُوࢽْجَࢽْ کْرٜࢽْمٜ بُلُسَّ بَرْࢽَبَسَّرُو کْلْغْمٜ بْرْࢽِ أَࢽْتَکِیَیٜرُو جُوَدُوُرُو ࢽغْلَرُو کٜرُو؞ أَمْ جَمَدْلَࢽْ دَرَجَا یَحُسَ تِرُو بَرْسَبَسْ ثَࢽِیَ سِلَسَّا کْرٜجَࢽٜ
[23] وُوتِیَ ࢽغَیْ رُوُوَدَ مُکُّوࢽْجَرُو کٜسَکُّو: «أَࢽْدِ کْرَمِیَ کْࢽْغَیَمْبَا أَمْوُرَوَا ࢽَیِ کْرَمِیَࢽْدٜ ࢻْرْدُࢽْدُو کْرْدِ بْرْࢽِ أَࢽْتَکِیَیٜیَ ثِدِ سِرِیٜیَ کِلِکِیَیٜیَرُو، سَلَمْ!
[24] أَمْ لَا أَمَرِ یِیٜࢽْدٜ دُوُوࢽْ ثُرُوࢽْدٜࢽْ ثَلُوٜ أَلَمْدُࢽْجَࢽْ ࢽَیِیَ سُوُولْࢽْجَࢽٜ حَࢽْغَلْࢽْدُو ثَسَࢽْغْࢽَدَ ࢻَࢽِّیٜࢽَ ࢽَࢽْغَرُو،
[25] أَࢽْدِ سَمَّ ثِ تِلُووَرُو أَمْ لَآ کْرٜࢽْمٜ سَوَوَࢽْدٜ بَرْࢽَبَسَّ بُلُسَّ جَوْرُو رَیِیٜࢽَدْرُو کْلْغْمٜ ࢽَࢽْدُورُو جُوَدُوُرُو ࢽغْلَرُو کِرُیْیٜ،
[26] تَیِ دُوُوࢽْ ثُ کْمَࢽْدٜ عِیسَى أَلْمَسِیوُیٜ ࢽَࢽْغَرُو رُوࢽْجَ ثَلَدْࢽَدْ؞
[27] أَدْ ࢽَࢽْغَرُو یَحُسَا سِلَسَّا کِࢽُودِیٜ، تَیِ یٜ أَوُو رُوُࢽِیٜࢽَدَ ثِࢽْجَلَࢽْ وُلْࢽْجَغَیْ؞
[28] رُحُ اللَّهیٜیَ أَࢽْدِیَ کُرْوُووُ غَدٜ ࢽَیِرُو غْࢽَࢽْجَغَیْیٜوَوُورُو ࢽغْلَرُو رُیْیٜࢽَ، سَیْ أَوُو ࢽَیِرُو وَجِࢻْ أَࢽِ، تَیِمَ
[29] دَ سْࢽْمْبُو تِࢽَ ࢽغْرُو سُو، بُ ࢽجَ سُو، لْمَࢽْ دُوَدْࢽِّ ࢽغْرُو سُو، کْࢽْجْࢽَ دِیُو سُو وَࢽُواْ! أَوُو أَࢽِرُو کَࢽُوِیَ، ࢽغْلَ دِوَّ؞ کْلٜوَࢽْ دْغَیْوُو!»
[30] دَجِ جَمَ تَیِیَ سَلَمْغٜرَࢽِّیَ، بْرْࢽِ أَࢽْتَکِیَیٜرُو لٜجَࢽٜ جَمَ عِیسَىٰ غَوُدَ ثَࢻْثَࢽٜ تَیِرُو وُوتِیَدَ کٜدُو؞
[31] کْرَیٜرَࢽِّیَ، کُواْرِ ࢽجُودْرُو کْجِ ࢻَࢽْغٜرَ؞
[32] یَحُسَا سِلَسَّ تَیِ کْلَࢽْجَمَ ࢽَوِیَدْ کْرَمِیَدْرُو کُواْرِ ثَدٜ مَࢽَ کَدَࢽْ کَرْوُࢽْجَرُو دُࢽُو کٜسَکُّو؞
[33] کَوُ غَࢽَرُو بْرْࢽِدْࢽْ ࢽَࢻْکٜرَࢽِّیَ، کْرَمِیَدْ ࢽَ جَمَ تَیِیَ جُوَجَاࢽَیٜدْرُو وَلْدَرُو تَیِیَ أَلَکْلٜوَیٜرَ؞
[34] [أَمَّ سِلَسْ ࢽَدْࢽْ ࢽَࢻْثِ یٜࢽُو، یَحُسَ رُࢽْجُ جٜرُجَلٜمْبُو وَلَّدَࢽْ؞]
[35] بُلُسَّ بَرْࢽَبَسَّ بْرْࢽِ أَࢽْتَکِیَیٜلَࢽْ ࢽَࢻْثَࢽٜ أَمْ غَدٜ ࢽغْوُوَ رُوکُّو کَوُرِ کْجِ کْلَ مَࢽَ کْمَࢽْدٜىٰࢽْ أَلَمْجَࢽٜ وُلْجَیْ کَسَرْغَ؞
[36] ࢽغَوُو کَوُ غَࢽَیٜࢽْ بُلُسّٜ بَرْࢽَبَسُّو: «وَلْدِیُو، کْرَمِیَ بْلَوَ ࢽَ مَࢽَ کْمَࢽْدٜىٰ وُلِّیٜࢽَ سَمَّیٜدَ دَلِّیُو، ࢽَࢻْتُࢽْجَ رُیْیُو!» یٜࢽُو؞
[37] بَرْࢽَبَسْدْ یَحْیـَى تِرُو مَرْکُسْ ثَࢽِدْ یٜیَ ࢽغُوجَࢽٜ رُوکُّو لٜجَیْیَ، ثْرَاࢽَ،
[38] أَمَّ بُلُسّٜ کَمْ تَیِیَ رُوکُّو کِدَرُو لٜجَیْ دُوُوࢽْ ثِدِ بَمْࢻِلِیَیٜࢽْ تَیِیَ کُولْجْࢽَدَ بَرٜ ࢽغُوجَࢽِّ یٜࢽُو؞
[39] کَمْبِوُ جَوْ ࢻِتْ ثَدٜ، حَرْ ࢻِرْغَدَرَ؞ بَرْࢽَبَسْ مَرْکُسَّ ࢽغُوجٜ مَارَرُو ࢽغَسَیٜ ثُکُ کُوِرُسّٜرُو لٜىٰرَ؞
[40] بُلُسْ یٜ سِلَسَّ کْرٜجٜ کْرَمِیَدْ کْمَࢽْدٜىٰࢽْ تَیِرُو سٜرْ ثَکُّورْࢽٜ أَلَکْلٜوَجَࢽٜ لٜىٰرَ؞
[41] دَجِ بُلُسْ لَرْدُوَ سِرِیٜیَ کِلِکِیَیٜیَا جْغَࢽٜ جَمَ عِیسَىٰ غَوُدْیٜ کَرْوُࢽْجَرُو دُࢽُو ثَکِّ کْرْغَ؞