[1] دَجِ رِمَࢽْ کُرَدْیٜ إِسْتِࢻَࢽُسُّو: «أَوُو کْلَࢽْمْلَࢽْ وُلْجَیْدْ جِرٜ وَ؟» ثْࢽٜ کِوُورُو؞
[2] تِیٜ: «کْرَمِیَࢽِ سُو، بَوَࢽِ سُو، ࢻَࢽُّواْ! کَارِࢽْدٜ ࢽَوِ إِبْرَاهِیمْ ثِدِ مٜسُوࢻُوتَمِیَیٜࢽْ دُوُوࢽْ، کَوُ بْرْࢽِ حَرَࢽّٜࢽْ دْغَیْدْرُو، اللَّه دَرَجَیٜدْ تِرُو ࢻْلٜدِیٜ:
[3] ‹لَرْدُࢽْمْبَ کْرَمِیَࢽْمْبَا کُولّٜ، لَرْدُ ࢽِرُو ࢻْلٜࢽْجْغْکِّدْرُو لٜࢽٜ!› یٜࢽُو؞
[4] أَدْغَیْمَ ࢽَوِ إِبْرَاهِیمْ ثِدِ کَلْدِیَوُیٜیَ کُولْجٜ لٜجٜ حَرَࢽْلَࢽْ ࢽَࢻْکٜࢽُو؞ ࢽغَوُو بَوَࢽْجُ بَوُوجْࢽَیٜࢽْ، اللَّه تِیَ لَرْدُ ࢽَ کُ دْغَوَّ أَدْرُو کِوُدُو؞
[5] أَمَّ اللَّه ثِدِدْࢽْ تِرُو وَرَسَ غُوَتُّ ࢻَلْمَ ثِࢽِّ؞ أَدْ یَیٜ اللَّه تِرُو وَدُ ࢽغُوجِیٜ ثِدِدَ تِیَ کَدُوُࢽْجُوَرُو ثِ ثْࢽَّ؞ سَ أَدْࢽْ تَدَ ࢻِمَا ثَمْبْࢽِّ؞
[6] دَجِ اللَّهیٜ تِرُو: ‹کَدُوُࢽْمْ لَرْدُ غَدٜرُو لٜجَࢽٜ سِکُدُورُو وَلْجَیْ؞ ࢽَدْࢽْ کَرٜیَرُو وَلْجَࢽٜ سَا یٜرْ دٜوُرُو تَیِیَ بَسَرْجَیْ؞
[7] أَمَّ وُدْ جَمَ تَیِیَ کَرٜیَࢽْجَرُو ثَدْࢽَدْرُو وُواْمْ غْࢽَغْکِّ؞ ࢽغَوُو أَدْیٜࢽْ لَرْدُدْࢽْ ثَلُوٜ إِسَࢽٜ ࢽَ أَدْࢽْ وُرُو أَمْبْࢽْسَغَیْ،› یٜࢽُو؞
[8] دَجِ ࢽَوِ إِبْرَاهِیمْبُو أَمَࢽْ کَجَیٜ کَیْࢽُو؞ أَدْغَیْمَ ࢽَوِ إِبْرَاهِیمْ إِسْحَٰࢼُوَ ثَمْبٜ کَوُ وُسْکُوَ کَجَیٜࢽُو، ࢽَوِ إِسْحَٰࢼُ یٜ تَدَࢽْجُ یَعْࢼُوبَا، ࢽَوِ یَعْࢼُوبَ یٜ کَارِیَ مٜوُࢽْ یِࢽْدِࢽْ إِسْرَاءِیلَوُیٜیَ؞
[9] «کَارِیَدْ ࢽَوِ یُوسُࢻُرُو ࢽَࢽْدْرِ ثَدّٜ ثَلَدٜ لَرْدُ مَسَرّٜرُو کٜسَدُو؞ أَمَّ اللَّه تِیَ کُولْجْࢽِّ،
[10] ثُرُو بُوࢽٜࢽْجُ سَمَّیٜࢽْ تِیَ کِتُّلُوُو؞ اللَّه ثَکّٜ جَوْرُو رَشِدُرُو وَلْجٜ ࢻِرَعَوْࢽَ مَیْ مَسَرّٜدْ تِیَ کَسَثّٜ، حَرْ وَجِرِࢽْجُرُو غَلَجٜ مَسَرَّ مَیْرِ سَمَّا ثُࢽُودِرُو وَلْیٜࢽُو؞
[11] دَجِ کْࢽَ سُو، بُوࢽٜ کُرَ سُو لَرْدُ مَسَرّٜیَ کَࢽْعَࢽَیٜیَ سَمَّرُو ࢽغَسَیٜ، کَارِیَࢽْدٜرُو أَوُو کْمْبُویٜ ࢻَࢽْدُورُو کَتْکٜرُو؞
[12] ࢽَوِ یَعْࢼُوبَ مَسَرْࢽِࢽْ أَلْغَمَارُو ࢻَࢽْغٜࢽِّیَ، کَارِیَࢽْدٜدَ کِࢽُودُو؞ أَدْ لٜدُࢽْجَ بُرْوُویٜ؞
[13] لٜدُࢽْجَ یِࢽْدِیٜدْࢽْ ࢽَوِ یُوسُࢻُ أَوَاࢽَوَࢽْجُرُو أَسُدِیٜ، ࢻِرَعَوْࢽَ یٜ ࢻْرْدُ یُوسُࢻُیٜ ࢽُویٜࢽُو؞
[14] دَجِ ࢽَوِ یُوسُࢻُ ثُࢽُودٜ بَوَࢽْجُ ࢽَوِ یَعْࢼُوبَا جَمَࢽْجُ سَمَّا بُواْیٜرَ؞ ࢽَࢽّغْوُࢽْجَ أَمْ ࢻِتُلُرْ لُکُّو أُوُࢽْ؞
[15] أَدْغَیْمَ ࢽَوِ یَعْࢼُوبَ مَسَرُّو لٜجٜ تِیَ کَارِیَࢽْدٜیَ ࢽَدْࢽْ بَوُویٜرَ؞
[16] تَیِیَ بْرْࢽِ سِکٜمْبٜرُو ثَوُدٜ کَوْرِ دُوُوࢽْ ࢽَوِ إِبْرَاهِیمْ وُرِࢽْجُࢽْ ࢽَ کَدُوُ حَمُورّٜࢽْ سِکٜمْࢽِࢽْ ثُوْࢽَدْࢽْ سِتّْرَیٜرَ؞
[17] «وَدُ اللَّه ࢽَوِ إِبْرَاهِیمْبُو ࢽغُوجْغْࢽَدْیٜ سَࢽْجُ کَرْࢽْغٜࢽِّیَ، جَمَدْ مَسَرْࢽِࢽْ تَسَرْغَࢽٜ ࢽغْوُجَیْ کَسَرْغَ دُوُوࢽْ،
[18] حَرْ مَیْ غَدٜ ࢽَوِ یُوسُࢻُوَ تِ وُࢽْدُرُو ࢽُوجْࢽِّ مَسَرْࢽِࢽْ کْرْمَیْ کِوَࢽْدُو؞
[19] جَمَࢽْدٜرُو ࢽَࢽْغَ ثْدّٜ کَارِیَࢽْدٜیَ بَسَرْجٜ ثَکّٜ تِمَلَّࢽْجَ کُولْجَࢽٜ کَسُࢽُو؞
[20] جَمَࢽْ أَدْࢽْ ࢽَوِ مُوسَى کَتَمْبُو، تِدْ جَوْرُو شَوَ؞ کْࢽْدَوُ یَکُّرُو ࢻَدُو بَوَࢽْجُیٜࢽْ تِیَ کٜرِوُو؞
[21] کُولْیٜرَࢽِّیَ، ࢻٜرُو ࢻِرَعَوْࢽَیٜ تِیَ ࢽغُوجٜ تَدَࢽْجُ غَیْرُو کِرِوُو؞
[22] ࢽغَیْمَ ࢽَوِ مُوسَىٰ إِلْمُ مَسَرْوُیٜ سَمَّࢽْ أَلَمْجَࢽٜ مَࢽَࢽْجُوَ کْࢽْدُوࢽْجُوَلَࢽْ کْࢽْدُوُووَرُو وَلْیٜࢽُو؞
[23] «کْرْوُࢽْجُ ࢻِدٜوُوَ دُوُوࢽْ، ࢽَوِ مُوسَى أَمْࢽْجُ إِسْرَاءِیلَوُدَ کُرُورُو ࢽِیَ ࢽغُویٜࢽُو؞
[24] کَمْ مَسَرّٜ لَا ࢻَلْࢽْجَا بَسَرْجِ کِرُࢽِّیَ، کَمْ جْکْتْࢽَدَ بَࢽَجِیٜ ࢽغُوُࢽْجُرُو ࢽغَیٜ مَسَرْمَدَ بَکْثٜ کٜجُو؞
[25] أَمْࢽْجُدْ اللَّه تَیِیَ مُکُّوࢽْجُیٜࢽْ ثْکَّیِرُو أَسُجَیْ تْمَیٜࢽُو، أَمَّ أَسُجَࢽِّ؞
[26] وَجْࢽَࢽْجُوَ إِسْرَاءِیلَوُ یِࢽْدِ لَوَلَ ثَدِ ࢽَیٜىٰࢽِّیَ، تَیِیَ سُولُودُرُو مَجٜ: ‹کْرَمِیَࢽِ، ࢽَیِدْ جِرِࢽْدُو تِلُو؞ أَوِرُو غْلٜ کَتّٜࢽْدُوࢽْ بَسَرْدُوِدْ؟› یٜࢽُو؞
[27] أَمَّ کَمْ کَمَࢽْجُوَ بَسَرْجِدْ ࢽَوِ مُوسَىٰ تْمْبَلْجٜ تِرُو: ‹وُࢽْدُ ࢽِیَ ࢻُوُمَࢽْدٜیَ أَلْکَلِࢽْدٜیَرُو غَلَࢽْجُو؟
[28] رَ، بِکَّ کَمْ مَسَرّٜدَ یٜجْمَّدْ غَیْ، وُ یٜیَ رُورُو ࢽجٜجُورُو مَسْمِ؟›
[29] کْلَ مَࢽَ أَدْیٜࢽْ ࢽَوِ مُوسَى ثْغَسٜ لٜجٜ ثِدِ مِدِیَࢽّٜࢽْ سِکُدُورُو وَلْجٜ ࢽَࢻْکٜࢽُو؞ ࢽَدْࢽْ تَدَ یِࢽْدِ کٜمْبُو؞
[30] «کْرْوُ ࢻِدٜوُ کُوجْࢽَیٜ ࢽغَوُوࢽْ، مَلَیْیَ لَا کَرَا دْرِ کَوْ کُرُوُ سِࢽَیْیٜࢽْ دَوُ کَࢽُّ ثُوثُّورِ ثَمْبِیٜدْࢽْ تِرُو ࢻْلٜیَادَࢽْ؞
[31] ࢽَوِ مُوسَى أَدَ کِرُࢽِّیَ، أَجَࢻْکٜࢽُو؞ کُرُورُو کَرْࢽْجِ دُوُوࢽْ، کُواْ کْمَࢽْدٜىٰ ࢽُکْثٜ:
[32] ‹وُمَ اللَّه کَارِیَࢽْمْبٜ، اللَّه إِبْرَاهِیمْبٜیَ إِسْحَٰࢼُیٜیَ یَعْࢼُوبَیٜیَدْ وُو،› یٜࢽُو؞ ࢽَوِ مُوسَى لُولُوجٜ رِدُرُو ثُرُࢽِّ؞
[33] دَجِ کْمَࢽْدٜىٰ تِرُو: ‹سُࢽُوࢽْمْ سِࢽْمْلَࢽْ ࢻِدّٜ، ࢽَ دَࢽْمَّدْ ثِدِ تَیِرْ ࢽَࢽْغَرُو؞
[34] أَجَوُ جَمَࢽِ مَسَرْࢽِࢽْ ثَسَیْدَ ࢻَغَتْ رُکّْࢽَ، ࢽجْمْدُࢽْجَ یٜ ࢻَکّْࢽَ؞ تَیِیَ ࢽجْکَّوُورُو جْࢻْکٜکُّو؞ کْرْمَ أَرٜ، ࢽِیَ مَسَرُّو ࢽجُࢽُودْکّٜ!›
[35] «ࢽَوِ مُوسَى أَدْ، کَمْ دُوُوࢽْ إِسْرَاءِیلَوُ وَجَࢽٜ تِرُو: ‹وُࢽْدُ ࢽِیَ ࢻُوُمَا أَلْکَلِیَرُو غَلَࢽْجُو؟› وُلْجَاࢽَدْ، تِدْمَا اللَّه مُکُّو مَلَیْیَ دَوُ ثُوثُّورِیٜࢽْ تِرُو ࢻْلٜدْغْࢽَدْیٜࢽْ ࢻُوُمَا مٜرُدُمَا غَیْرُو ثُࢽُودُو؞
[36] تِمَ لَرْدُ مَسَرّٜیَ بْرْمْ مَلِیَیٜیَ کَرَا دْرِیَلَࢽْ کْرْوُ ࢻِدٜوُرُو أَوُو أَجَبَّ سُو، أَلَمَ سُو ثْدِیَرُو تَیِیَ ثُتُّلُوُو؞
[37] کُورُو تِ ࢽَوِ مُوسَى أَدْمَ جَمَ إِسْرَاءِیلَیٜرُو: ‹اللَّه ثُرُو کْرَمِیَࢽْدُویٜࢽْ ࢽَوِ لَا وُ غَیْ ࢽَیِرُو ࢽجَسَࢽْغِ،› ثْࢽٜ وُلْجُوُو؞
[38] سَ جَمَ کَرَاࢽْ ثَࢻْتَࢽَدْࢽْ، تِمَ کَارِیَࢽْدٜیَ مَلَیْیَ کْلَ کَوْ سِࢽَیْیٜࢽْ تِرُو مَࢽَجْغْࢽَدَ رُوکُّو دَسَاࢽَدْ وُو؞ کُورُو کَوُرِ رُو ࢻَࢽْدُویٜ أَࢽْدِرُو إِسَࢽُوسَارُو کِوَࢽْدُو؞
[39] «أَمَّ کَارِیَࢽْدٜسُو تِیَ ࢻَࢽْدُ وَجَࢽٜ تْمْبَلْجَࢽٜ کَرْوُࢽْجَࢽْ مَسَرُّو وَلْجَࢽٜ
[40] ࢽَوِ هَـٰرُوࢽَرُو: ‹أَࢽْدِرُو سْࢽْمْبَ ࢻُوُࢽْدٜ غْرْجَیْ سَتَّࢽْدٜ! مُوسَى أَࢽْدِیَ لَرْدُ مَسَرّٜࢽْ سَتُّلُوُࢽَ أَدْ، أَوُو تِیَ ثُوَࢽْدْࢽَ ࢽُوࢽِیٜࢽْدٜ،› یٜرَ؞
[41] «یِمْ أَࢽِࢽْ کْࢽَّ لَا غُمْکِرُو ثَغَرٜ تِرُو بُ ࢻِدَ ثَدّٜ کْࢽْدُو مُکُّوࢽْجَیٜ کْجِࢽْجُ ࢻَࢽْغٜرَ؞
[42] دَجِ اللَّه تَیِرُو ࢽغَوُو ثٜ سِلُّووُسُورُو أَمْبْثَّارُو تَیِیَ سَلَمْغٜࢽُو، کِتَوُوَ ࢽَوِیَیٜࢽْ رُوُوَدَدْ غَیْ: ‹جَمَ إِسْرَاءِیلَیٜ، وُ ࢽَࢽْغَرُو وَ سَا ࢻِدٜوُرُو ثُرُو کَرَا دْرِیٜࢽْ بُ ࢻِدَ سُو، سَدَا سُو کِدُوْ؟
[43] أَعَ، لٜیْمَ مُولٜکّٜیَ سِلُّووُ سْࢽْمْ تِرُو رٜࢻَࢽْ ثَࢽِیٜیَا ࢽغُوࢽُوٜ کَلُّو دَدَیٜوْ، سْࢽْمْبَ دُوُوࢽْ ࢽَیِمَ تَیِرُو أَمْبْتُّوُرُو تَࢽْدُوَّدْ؞ أَدْ ࢽَࢽْغَرُو وُ یٜ ࢽَیِیَ ࢽغَوُو بْرْࢽِ بَبِلَیٜرُو دُࢽْجَغَکِّ!›
[44] «کَارِیَࢽْدٜ کَرَاࢽْ لٜیْمَ شٜدَیٜ ثَدَࢽَ، جِرِ اللَّه ࢽَوِ مُوسَرُو وَدَ ثٜ تِیَ کْلَ ࢻَسَلْࢽْجُ ثُرُࢽَیٜࢽْ کَلْکَلُّو ثْدَࢽْدْࢽَرُو وُلْجْغْࢽَدْ غَیْ؞
[45] جَمَࢽْ ࢽَوِ یُوشُوَیٜࢽْ سَ دُوُوࢽْ اللَّه ࢻُوُࢽْجَࢽْ جَمَسُووَ دُجٜ لَرْدُࢽْجَ ثَمُواْࢽَدْࢽْ، کَارِیَࢽْدٜ یٜ لٜیْمَدَ ࢽغُوجَࢽٜ ࢽَ أَدْرُو کٜوُدُو، حَرْ جَمَࢽْ ࢽَوِ مَیْ دَاوُدَیٜرُو کُدٜرُو؞
[46] ࢽَوِ مَیْ دَاوُدَدْ أَرْدِیَ اللَّهیٜ ثُوَࢽْدٜ أَمَرِ کْࢽْدْغَیْرَمْ اللَّه کْمَ جَمَ إِسْرَاءِیلَیٜرُو یِتَّࢽْدُویٜ ثُوُورْࢽَ،
[47] أَمَّ ࢽَوِ مَیْ سُلَیْمَـٰࢽَمَ ࢻَدُودَ اللَّهرُو ثْتَّࢽْدُو؞
[48] «أَدْ یَیٜ اللَّه مَیْ سَمٜمَ ࢻَدُووَ مُکُّوࢽْ تَدَࢽْدْࢽَلَࢽْ غْࢽِ کْرْغَ؞ ࢽَوِ وُلْجْࢽَدْ غَیْ:
[49] «‹کْمَࢽْدٜىٰ: سَمٜدْ کُرِسْࢽِ کْرْمَیْیٜ، ثِدِدْ یٜ سِ غْࢽَدُرَمِّ؞ ࢻَدُو جِرِ ࢻِ غْلٜ وُرُو سْتَّࢽْدُوِ؟ ࢽدَرَ غْلٜ ࢽَࢽِ تُسْتُیٜرُو وَلْجِ؟
[50] وُمَ غْࢽَ مُکُّوࢽِیٜࢽْ أَوُو أَࢽِ سَمَّا أَلَࢽْغْکُّو؟› ثْࢽَّ؞
[51] «ࢽَیِ غَرْدَوُسُو کَرْوُࢽْدُو یٜ، سْمُوࢽْدُو یٜ کَجَدَࢽِّدْ، کُلُّمْ رُحُ اللَّهیٜیَ مْلْدُوِ! ࢽَیِدْ کَارِیَࢽْدُوسُو غَیْ!
[52] ࢽَوِیَدْیٜࢽْ ࢻِࢽْجَا کَارِیَࢽْدُو بَسَرْجَࢽِّ وُو؟ کُورُو أَمْ کُرٜࢽْ کْلَ کْࢽْدٜ تِ جِرٜمَیٜࢽْ مَࢽَجَࢽَدْ یٜیَ رُورُو کٜىٰسُو؞ کْرْمَ ࢽَیِ یٜ تِ جِرٜمَدْیٜ سْرْتُّوُمَࢽْجُسُو یٜ، کَمْثٜجِࢽْجُسُو یٜرُو وَلْیٜوْ،
[53] ࢽَیِ دُوُوࢽْ مَلَیْیَوَیٜࢽْ أَتَّوْرَا ࢻَࢽْدُوَّ، أَمَّ کَسَتُّرُو وَࢽُوَّدْ!»
[54] مَجِلِسْوُدْ أَوُو أَࢽِیَ ࢻَࢽْغٜرَࢽِّیَ، کَرْوُࢽْجَࢽْ إِسْتِࢻَࢽُسُّو ࢻُمْ غْرْغَجَࢽٜ شٜرِࢽْجَ غٜغَرُو؞
[55] أَمَّ إِسْتِࢻَࢽُسْ، رُحُ اللَّهیٜ تِیَ سِمُوجِیے دُوُوࢽْ، سِمْࢽْجُ سَمٜرُو ࢻِجِیٜ دَرَجَ اللَّهیٜیَ عِیسَى کْمْبُورَمْࢽْجُࢽْ دَادَا کِرُࢽِّیَ،
[56] تِیٜ: «أَکُّو سَمٜ کَادَا تَدَ کَمْبٜ کْمْبُورَمْ اللَّهیٜࢽْ دَادَآ رُکِّ!» یٜࢽُو؞
[57] أَمَّ کُواْ دُࢽُووَرُو سَࢻْثَࢽٜ سْمُوࢽْجَ جَکْثَࢽٜ تَیِ سَمَّ کْلَ تِلُوࢽَّ تِرُو ࢻِدَغَࢽٜ
[58] ࢽغَوُو بْلَیٜرُو ثَتُّلُوٜ تِیَ ࢽجٜجُورُو کَوْلَࢽْ غْغْࢻْتُ بَدِیٜرَ؞ شٜدَوُدْ کَلْوُوَࢽْجَا ࢽَ جَیْرُو لَا تِرُو شَوُلُ ثَࢽِدْیٜࢽْ غْࢽَیٜرَ؞
[59] تِرُو کَوْ غْغْࢻْثَغَیْ دُوُوࢽْ، إِسْتِࢻَࢽُسْ مُودُوَ ثْدٜ: «کْمَ عِیسَى، رُوࢽِ مُویٜ!» یٜࢽُو؞
[60] دَجِ تُࢽْغُرُمْجٜ کُواْ دُࢽُووَرُو سَࢻْثٜ: «کْمَ، کْلَ بِوُ أَدْیٜࢽْ بَرٜ تَیِیَ کُورْمِّ!» یٜࢽُو؞ أَدَ وُلْیٜࢽِّیَ، رُو کِرْمْبُو؞