[1] ࢽغَوُو کَوُ أُوُیٜࢽْ رِمَࢽْ کُرَ أَࢽَࢽِیَا أَمْوُرَوَ لَآ غُوࢽِࢽْجَ شَرَیٜ تِرُو تَرْتُلُسْ ثَࢽِیَ بْرْࢽِ کَیْسَرِیَیٜرُو إِسَࢽٜ سُوࢽْجَ کْلَ بُلُسّٜࢽْ غُومْࢽَرُو کٜدُّو؞
[2] بُلُسَّ کٜوُدْࢽِّیَ، تَرْتُلُسْ تِرُو أَیَوْ غْࢽَدُوُ بَدِیٜࢽُو؞ غُومْࢽَرُو: «بَرْغَࢽْمِّࢽْ، کْرْمَیْࢽْمْلَࢽْ ࢽَࢻْتُ ࢽَࢽْلٜوَیٜࢽْ کْرْغَیْیٜ؞ ثُرُو ࢽَࢽْرَشِدُࢽْمْبٜࢽْ أَوُووَ بْرِࢽْ ࢽِیَࢽْمٜ جَمَࢽْدٜرُو یِدّْمَّدْ ثَسَکّٜ کْجِرُو لَرْدُ أَدْ تَیْ دَجٜ ࢻُوُ جُوُࢽَ؞
[3] ࢽدَرَࢽْ یَیٜ سَ ࢻِࢽْ یَیٜ، غُومْࢽَ، أَوُووَ دِمَّ أَࢽِ ࢽغَ ࢽَࢽْغَرُو ࢽِیَ جَوْمَرُو وُسٜࢽْجِیٜࢽَ!
[4] بَرْغَࢽْمِّࢽْ، مَࢽَࢽِ کُرُوُجِوَوُو؞ أَدْ ࢽَࢽْغَرُو مَرْࢽٜ لُواْࢽْجْکّْࢽَ، کَࢽَدِࢽْمْبُو کَࢽَدِ یِرْغَیْ، غَࢽَ لَارُو کْرْࢽْسَࢽٜ؞
[5] کَمْ أَدَ ࢻِتْࢽَمَ کُرَرُو کِرُیْیٜ، دُࢽِیَ ࢽغَࢽْ ثُرُو یَوْدِیَیٜࢽْ حَࢽْغَلْسَࢽْغُو ثْسَࢽْغِ، کُورُو تِ کْوُ أَدِࢽْ کَتُّوُیٜ تِرُو ࢽَجَرَتْوُ ثَࢽِدْیٜ ࢻُوُمَ؞
[6] ࢻَدُو اللَّهیٜدْمَا تَیِرْ غْࢽِرُو دِیُو مَجْࢽَ دُوُوࢽْ، تِیَ کِدَیْیٜ؞ [کْلَ وَدَࢽْدٜىٰࢽْ تِرُو شَرَ ࢽجْدُّورُو کِرَیِیٜ،
[7] أَمَّ لِسِیَسْ کَجَلَّدْ إِسٜ دُࢽُو بُلْ ࢻُوکْࢽِࢽْ تِیَ مُکُّوࢽْدٜࢽْ ثْمُویٜ
[8] أَمْ تِرُو أَیَوْ غْࢽَجَاࢽَدْرُو ࢽَࢽْمْبُو إِسَ یٜࢽُو؞] تِیَ کُورْمِیَ، ࢽِ کْلَࢽْمَّ أَوُو کْلَࢽْجُࢽْ وُلِّیٜࢽَ سَمَّا ࢽُوࢽْمِ؞»
[9] یَوْدِیَدْ یٜ أَیَوْدْرُو دُࢽُو ثَدٜ جِرٜرُو تَبَّتْکٜىٰرَ؞
[10] دَجِ غُومْࢽَ تِرُو مَࢽَجُورُو أَلَمَ کٜࢽِّیَ، بُلُسّٜ: «کُ کْرْوُ کَدَ جَمَ أَدْرُو شَرَ یِدّْمِ ࢽُوکّْࢽَدْرُو، کَرْوُ کْجِیَرُو ࢻُوُࢽْمْࢽِࢽْ کْلَࢽِ مُواْکِّ؞
[11] بَرْغَࢽْمِّࢽْ، رَࢽْغْمٜ تَبَّتُّو ࢽُوࢽْمِدْ غَیْ، کُ کَوُ مٜوُࢽْ یِࢽْدِࢽْ کُوجْࢽِّ جٜرُجَلٜمْبُو اللَّهرُو أَمْبْتُّوُرُو لٜکّْࢽَ؞
[12] ࢻَدُو اللَّهیٜࢽْ، بِ ثُرُو دَࢽْدَلَّیٜࢽْ، بِ ثُرُو بْرْࢽِیٜࢽْ کَمْبِوُ وُࢽْدُمَا دِیٜ یٜ سَرُࢽِّ، جَمَا یَکّْکّٜ حَࢽْغَلْسَࢽْغُو ثَدِ یٜ ࢽَسَغَࢽِّ؞
[13] کُورُو أَوُو کْرْمَ کْرْسَاࢽَدَ رَکْثَࢽٜ ࢻُوُࢽْمْࢽِࢽْ تَبَّثَّغَیْوَوُو؞
[14] أَمَّ أَدَ ࢻٜدٜرُو وُلْࢽْجْغْکِّ، اللَّه کَارِیَࢽْدٜىٰرُو أَمْبْتْکْکّٜ جَوَلْ دُوُوࢽْ تَیِ أَدِࢽْ جِرٜىٰ غْࢽِ ثَࢽِدَ غَکِّ؞ أَوُو أَتَّوْرَا کِتَوُوَ ࢽَوِیَیٜیَلَࢽْ رُوُوَدَ سَمَّا کَسَدّْکّْࢽَ؞
[15] کُورُو ثِࢽُواْ جِرٜوُوَ جِرٜࢽَمْبُوُوَ سَمَّیٜ مبٜجِرُو اللَّهلَࢽْ تْمَࢽِیَ، تْمَ دُوُوࢽْ تَیِ کْلَࢽْجَ کَسَثَّࢽَدْ؞
[16] أَدْ ࢽَࢽْغَرُو سَوِ یَیٜ کُواْرِࢽْکّٜ کَرْوُࢽِࢽْ سَرِوُ بَوُووَرُو ࢻُوُ اللَّهَ جَمَایٜࢽْ کْرْغَکُّو؞
[17] «ࢽغَوُو کْرْوُ کَدَیٜࢽْ وُرِ سَدَایٜ جَمَࢽْدٜرُو کُدْمٜ بُ ࢻِدَ اللَّهرُو ࢽجْدُّورُو وَلْدْکّٜ کَدِکُّو؞
[18] ࢽغَیْمَ دُوُوࢽْ، ࢻَدُو اللَّهیٜࢽْ لَمَرْ تَیِرُّو وَلْدُیٜ دِکّْࢽَیٜ ࢽغَوُوࢽْ ࢽَسٜىٰرَ؞ ࢽَࢽِلَࢽْ جَمَ یٜ بَوُو، حَࢽْغَلْسَࢽْغُو یٜ بَوُو؞
[19] أَمَّ یَوْدِیَ لَا ثِدِ أَسِیَیٜ مبٜجِ؞ أَوُو لَا وُرُو کْرْدُوُیٜ ثَدَࢽَا، ࢽغْلَࢽْجُدْ تَیِمَ ࢽَࢽْمْبُو إِسَ وُرُو کْرْسَا؞
[20] بِ أَمْ أَࢽِمَ سَ ࢻُوُ مَجِلِسّٜࢽْ دَکّْࢽَدْࢽْ أَیَوْ وُلَࢽْ ثَوَࢽْدْࢽَدَ وُلْجَ؞
[21] رَ، ࢻُوُࢽْجَࢽْ دَࢽْکّٜ کُواْ دُࢽُووَرُو سَمّْکّٜ مَࢽَ ࢻَلْ أَدَ دِکّٜ: ‹کْلَ ثِࢽُواْ أَمْ سَࢽُࢽَیٜࢽْ کُ شَرَسُوِ،› وُلّْکّْࢽَدْ؟»
[22] دَجِ غُومْࢽَ ࢻٜلِسْ جَوَلْدَ ࢽغْلَرُو ࢽُوجْࢽَدْ، مَࢽَدَ ࢻُوُرُو غْرْجٜ تَیِرُو: «یِمْ لِسِیَسْ کَجَلَّدْ إِسِیَ، شَرَ ࢽجَدّْکِّ،» ثْࢽٜ
[23] سُوجِ کُرَ لَارُو وَدَ ثٜ بُلُسَّ کُوسُورَمْلَࢽْ رُوجَ، أَمَّ تِرُو کَسَمْ ثَدُو کُورُو بَرٜ أَمْࢽْجُرُو إِسْمٜ مٜرَدُࢽْجُ غَلْدُ دَࢻْثَغَࢽِّ یٜࢽُو؞
[24] ࢽغَوُو کَوُ غَࢽَیٜࢽْ غُومْࢽَ ࢻٜلِسْ کَمُࢽْجُ یَوْدِ تِرُو دُرُسِلَ ثَࢽِیَ رُوکُّو کَدِࢽِّیَ، ثُࢽُودٜ بُلُسَّ ثَوُدٜ تِیَ کْلَ عِیسَى أَلْمَسِیوُوَ کَسَتُّیٜࢽْ مَࢽَجٜ کْرْࢽْغٜࢽُو؞
[25] کْلَ جِرٜ دِیُو سُو، کْلَ رِوُو سُو، شَرَ اللَّهیٜ ࢻُوُࢽْ إِسِ سُویٜࢽْ جَࢽْدٜجِیے ࢽغَیْ دُوُوࢽْ، غُومْࢽَ رِجٜ تِرُو: «کْرْمَ کُولّٜ لٜࢽٜ، دَمَ ࢻَࢽْدْکِّیَ، بُواْࢽْجْکِّ،» یٜࢽُو؞
[26] سَ أَدْ یٜࢽْ بُلُسْ تِرُو وُرِ ثِرُو تْمَجْࢽَ ࢽَࢽْغَرُو، ࢽغْوُرُو تِیَ بُواْجٜ جَࢽْدٜجَیْ؞
[27] کْرْوُ یِࢽْدِ کِدْࢽِّیَ، غُومْࢽَ ࢻٜلِسْ جْࢻْثٜ ثُجُࢽْجُرُو ࢻُوکِیُسْ ࢻٜسْتُسْ غِوَ؞ یَوْدِیَدْرُو سٜرْ ࢽجْدُّو ثْرَاࢽَ ࢽَࢽْغَرُو، غُومْࢽَ ࢻٜلِسْ بُلُسَّ ثُرُو کُوسُویٜࢽْ کُولْیٜࢽُو؞