[1] ࢽغَوُو أَدْیٜࢽْ بُلُسْ بْرْࢽِ أَتِࢽَیٜدَ کُولْجٜ بْرْࢽِ کُورِࢽْتِیٜرُو لٜىٰࢽُو؞
[2] ࢽَدْࢽْ یَوْدِ لَا ثِدِ ࢻَࢽْتُسّٜࢽْ تَمْبْࢽَ أَکِلَ ثَࢽِیَ کَتَّدُو؞ تِیَ کَمُࢽْجُ بِلْکِسُوَ تُسّْࢽِّ لَرْدُ إِتَلِیَیٜࢽْ إِسَࢽَ، کَیْسَرْ کْلُودِیُسْ وَدَ ثٜ یَوْدِیَ سَمَّ بْرْࢽِ رُومْبٜیَ کُولْجَ ثْࢽَّ ࢽَࢽْغَرُو؞ دَجِ بُلُسْ ࢽَࢽْجَرُو لٜجٜ،
[3] تَیِ سَمَّ سَࢽِیَࢽْجَ تِلُو لٜیْمَ تَࢽْدُودْ، تَیِرُو کْلْدِیٜ ࢻَࢽّجَࢽْ ࢽَࢻْثٜ رُوکُّو کِدَ کٜدُو؞
[4] یِمْ تُسْتُیٜ ࢽغُسُوࢽْ بُلُسْ دَࢽْدَلَّࢽْ جَمَا مَࢽَدَیْ، یَوْدِیَا أَمْ غْرٜسّٜیَ عِیسَىٰ غَوُرُو وَلْجَرُو مَجِ؞
[5] دَجِ سِلَسَّ تِمُوتِیَ لَرْدُ مَکِدُوࢽِیَیٜࢽْ کَدِرَࢽِّیَ، بُلُسْ مَࢽَ اللَّهیٜ سَتُّوُرُو کْلَࢽْجُ ثٜ یَوْدِیَرُو عِیسَدْ تِمَ أَلْمَسِیوُ وُو ثْࢽٜ شٜدَجِ کْرْغَ؞
[6] أَمَّ یَوْدِیَدْ تِیَ وَجَࢽٜ رَرَیٜرَࢽِّیَ، کَجْمُࢽْجُ کَغَکْثٜ تَیِرُو: «اللَّه بُࢽْدُو کْلَࢽْدُورُو کَلَکْثُوُو، وُ دَوُࢽْ بَوُو! کُوَ أَدْࢽْ ࢻُوُࢽْ ࢽَ کْرْدِیَیٜرُو لٜکِّ،» یٜࢽُو؞
[7] دَجِ ࢽَدْࢽْ سَࢻْتٜ ࢻَدُو کَمْ لَا اللَّه رِدَمَ تِرُو تِتُسْ جُسْتُسْ ثَࢽِیٜرُو لٜىٰࢽُو؞ ࢻَࢽّجُدْ غْرٜ دَࢽْدَلْدْیٜࢽْ کْرْغَ؞
[8] کْرِࢻُسْ کُرَ دَࢽْدَلْدْیٜیَ أَمْ ࢻَࢽّجُیٜ سَمَّا کْمَا کَسَتْکٜرَ؞ کُورُو کُورِࢽْتِوُ کَدَ یٜ ࢻَࢽْغٜرَࢽِّیَ، کَسَثَّࢽٜ تَیِرُو کَسَلَ کٜدُّو؞
[9] بُࢽٜ لَا وَحَیِلَࢽْ کْمَیٜ بُلُسُّو: «بَرٜ رِࢽْمِّ! مَࢽَࢽٜ، بَرٜ غْمْ دِمِّ!
[10] وُ ࢽِیَ رُوکُّو؞ وُࢽْدُمَ ࢽِیَ لٜࢽْجٜ بَسَرْࢽْجِوَوُو، بْلَ أَدْࢽْ أَمِّ ࢽغْوُ مبٜجِ ࢽَࢽْغَرُو،» یٜࢽُو؞
[11] دَجِ کْرْوُ ࢻَلْ رٜدَارُو ࢽَࢻْثٜ ثُرُوࢽْجَࢽْ مَࢽَ اللَّهیٜیَ أَلَمْجِ کْرْغَ؞
[12] جَمَࢽْ غُومْࢽَ غَلِیُو لَرْدُ أَکَیَیٜ ثُࢽُودِدْࢽْ، یَوْدِیَدْ ثِتِلُو ثَدٜ بُلُسَّ ثَدَࢽٜ شَرَرَمْبُو ثَادٜ
[13] تِرُو: «کَمْ أَدْ جِرِ وُواْمْ أَمَرْجْغْࢽِّࢽْ أَمْبَ اللَّهرُو أَمْبْتُّوُرُو تْمْبَلْجِیے،» یٜرَ؞
[14] بُلُسْ ثِࢽْجُ کَجِ دُوُوࢽْ، غُومْࢽَیٜ یَوْدِیَدْرُو: «ثَ أَیَوْ لَا بِ بِوُ کُرَ لَارُو وَلْیٜࢽُووَ، دَلِلْ ࢽَیِ یَوْدِیَدَ کْرْࢽْدُیٜ مٜࢽَّ؞
[15] أَمَّ لَمَرْ کَلْمَ سُو، ثُ سُو، وَدَࢽْدُو سُو وُجْࢽَدْ، ࢽَیِمَ أَوُوࢽْدُو ࢽُوࢽُوْ! وُدْ أَلْکَلِ أَوُو أَࢽِیٜرُو وَلْدُ وَکّْࢽَ،» ثْࢽٜ
[16] شَرَرَمْدْلَࢽْ تَیِیَ دُیٜࢽُو؞
[17] دَجِ تَیِ سَمَّ سَسْتَࢽِسُ ࢻُوُمَ دَࢽْدَلّٜدَ ثَدَࢽٜ ࢻُوُ شَرَرَمْدْیٜمَࢽْ بَبَکّٜرَ، أَمَّ غُومْࢽَیٜ کِسْتُوُࢽْجُمَ ثُوُدْࢽِّ؞
[18] بُلُسْ کَوُ کَدَرُو بْرْࢽِ کُورِࢽْتِیٜلَࢽْ ࢽَࢻْکٜࢽِّیَ، ثِجٜ کْرَمِیَدَ أَلَکْلٜوَجٜ یَ بِلْکِسُوَ أَکِلَا رُوکُّو ثِدِ سِرِیٜرُو لٜدُرُو مَارَرُو کَسَرْغَوُو؞ بْلَ کَࢽْکَرِیَیٜࢽْ بُلُسْ کَࢽْسِ جُوُࢽَ ࢽَࢽْغَرُو کْلَࢽْجُ کِلَرُو؞
[19] بْرْࢽِ أَࢻِسَیٜرُو کَدِرَࢽِّیَ، بُلُسْ تَیِیَ ࢽَدْࢽْ کُولْجٜ تِ کْلَࢽْجُ دَࢽْدَلُّو ࢽغَیٜ یَوْدِیَا کْلَ مَࢽَ اللَّهیٜࢽْ مَࢽَادَرَ؞
[20] تِیَ کَوُ کَدَرُو ࢽَࢻْثُورُو لُواْیٜرَࢽِّیَ، وَجٜ
[21] تَیِرُو: «اللَّهیٜ ثْدِیَ، ࢽَࢽْدُورُو وَلْدْکّٜ إِسْکِّ،» ثْࢽٜ مَارَرُو ࢽغَیٜ بْرْࢽِ أَࢻِسَیٜدَ کُولْیٜࢽُو؞
[22] بْرْࢽِ کَیْسَرِیَیٜࢽْ جْࢻْثٜ جٜرُجَلٜمْبُو لٜجٜ جَمَ عِیسَىٰ غَوُوَ لٜوَیٜࢽِّیَ، بْرْࢽِ أَࢽْتَکِیَیٜرُو کُویٜࢽُو؞
[23] أَࢽْتَکِیَࢽِࢽْ کَوُ غَࢽَرُو ࢽَࢻْکٜࢽِّیَ، ثِجٜ بْلَ بْلَسُو لَرْدُ غَلَتِیَیٜیَ ࢻِرِجِیَیٜیَ جْغَࢽٜ ࢻُوُرَوَدْیٜ کَرْوُࢽْجَرُو دُࢽُو کٜکُّو؞
[24] أَدْغَیْمَ یَوْدِ لَا بْرْࢽِ أَلٜکْسَࢽْدَرِیَیٜلَࢽْ تَمْبْࢽَ تِرُو أَࢻُولُسْ ثَࢽِ بْرْࢽِ أَࢻِسَیٜرُو کَدِیُو؞ تِدْ مَࢽَمَ کُرَ، کُورُو کِتَوُوَ اللَّهیٜدَ ࢽغْلَرُو ࢽُوجْࢽَ؞
[25] جَوَلْ کْمَیٜ غَ ثْرْࢽَ، کُورُو جَوْرُو کَرْوُ کْجِیَرُو کَلْکَلُّو کْلَ أَوُووَ عِیسَىٰ وُجَࢽَیٜࢽْ أَمْبَ أَلَمْجِ، أَمَّ کَسَلَ ࢽَوِ یَحْیـَیٜ رُࢽْجُمَ ࢽُوجُو؞
[26] دَجِ رِدُ بَوُووَرُو دَࢽْدَلَّࢽْ مَࢽَ بَدِیٜࢽُو؞ یَ بِلْکِسُوَ أَکِلَا تِیَ ࢻَࢽْغٜرَࢽِّیَ، تِیَ ࢽغُوجَࢽٜ ثَیٜیَ کُوجْࢽَرُو کَلْکَلُّو جَوَلْ اللَّهیٜیَ بَیِࢽْغٜىٰرَ؞
[27] أَࢻُولُسْ لَرْدُ أَکَیَیٜرُو لٜدُ مَیٜࢽِّیَ، کْرَمِیَدْ تِرُو کُواْرِ ثَدٜ ࢻُوُرَوَ ثِدِدْیٜرُو وُوتِیَ رُوُجَغَࢽٜ تِیَ ࢽغْلَرُو سُوسَجَ یٜرَ؞ کَدِࢽِّیَ، أَمْ دُوُوࢽْ سٜرْ اللَّهیٜࢽْ عِیسَىٰ غَوُرُو وَلْجَࢽَدَ جَوْرُو بَࢽَیٜىٰࢽُو،
[28] أَوُووَ عِیسَمَ أَلْمَسِیوُدْ وُورُو کِتَوُیٜࢽْ تَبَّثِّیٜ ࢻُوُ جَمَیٜࢽْ یَوْدِیَدَ کْࢽْدُوُووَرُو مَࢽَࢽْ یَࢻْکٜىٰࢽُو؞