[1] ࢽغَوُو تَیِیَ أَلَکْلٜوَࢽِیٜࢽَیٜࢽْ، مَارَرُو ࢽغَیِیٜ ثْکُّو ثُکُ کُوسّٜرُو لٜىٰیْیٜ؞ وَجْࢽَࢽْجُوَ ثُکُ رُدَسّٜرُو کُوࢽِیٜ ࢽَدْࢽْ بْرْࢽِ ࢻَتَرَیٜرُو کَدِیٜ؞
[2] ࢻَتَرَلَࢽْ مَارَ لَرْدُ ࢻٜࢽِسِیٜرُو لٜدُمَ لَا کِوَࢽْدِیٜࢽْدٜیَ، تِرُو ࢽغَیِیٜ سَࢻْکَدَیْیٜ؞
[3] ثُکُ کُوِرُسّٜ رُیْیٜ وَیْلَࢽْدٜࢽْ کُولْیٜیْیٜࢽْدٜیَ، ثِدِ سِرِیٜرُو لٜࢽِیٜ بْرْࢽِ تِرّٜࢽْ جْࢻْکٜیْیٜ، ࢽَدْࢽْ کَرٜ مَارَیٜدَ ثَسَیِ ࢽَࢽْغَرُو؞
[4] ࢻُوُرَوَ لَآ ࢻَࢽْدِیٜ ࢽَࢽْجَࢽْ مَوُرُو ࢽَࢻْکٜیْیٜ، تَیِدْ رُحُ اللَّهیٜࢽْ بُلُسُّو بَرٜ جٜرُجَلٜمْبُو لٜجْࢽِّ یٜرَ؞
[5] أَدْ یَیٜ سَࢽْدٜ ثِدُیٜ کِدْࢽِّیَ، ثِیٜیْیٜ؞ تَیِ سَمَّ کَمُوَࢽْجَا یَلَّࢽْجَا أَࢽْدِیَ حَرْ ࢽغَوُو بْرْࢽِدْیٜرُو سَسَدُّوُو؞ ثِ تٜکُیٜࢽْ تُࢽْغُرُمِّیٜ مُودُوَ کِدِیٜࢽْدٜیَ،
[6] أَلَکْلٜوَدَیْیٜ؞ دَجِ أَࢽْدِ مَارَرُو ࢽغَیِیٜ، تَیِ یٜ ࢻَࢽّجَرُو وَلَّدَرَ؞
[7] بْلَوُرُوࢽْدٜ بْرْࢽِ تِرّٜࢽْ کٜرْࢽِّیَ، بْرْࢽِ تُولٜمَیِسّٜࢽْ جْمِّیٜ کْرَمِیَدَ لٜوَࢽِیٜ کَوُ ࢻَلُّو ࢽَࢽْجَࢽْ ࢽَࢻْکٜیْیٜ؞
[8] وَجْࢽَࢽْجُوَ سَࢻْتِیٜ بْرْࢽِ کَیْسَرِیَیٜرُو کَدِیٜࢽْدٜیَ، ࢻَدُو ࢻِلِبُسْ کَوُرِ کْجِ اللَّهیٜ وُلْدُمَدْیٜࢽْ جْࢻْکٜیْیٜ؞ تِدْ أَمْ تُلُرْدْیٜ ࢻَلْࢽْجَ؞
[9] ࢻٜرُووَࢽْجُ دٜوُ ࢽغَلْتٜمَ کوَ ࢽُوجَࢽِّ ࢽَوِࢽَوِ ثَدِ مبٜجِ؞
[10] کَوُ ࢽغْوُرُو ࢽَمِّیٜࢽَ دُوُوࢽْ، ࢽَوِ لَا تِرُو أَغَبُسْ ثَࢽِ ثِدِ یَحُدِیَیٜࢽْ کَدِیُو؞
[11] ࢽَࢽْدٜرُو إِسٜ ࢽغِرِ بُلُسّٜ ثْمُویٜ تِ کْلَࢽْجُ سِیَ مُکُّووَرُو ثِکّٜرٜ أَࢽْدِرُو: «أَکُّو أَوُو رُحُ اللَّهیٜ وُلْجْࢽَدْ: ‹أَدْغَیْࢽِࢽْ یَوْدِیَ جٜرُجَلٜمْلَࢽْ کْمَ ࢽغِرِ أَدْیٜدَ ثَکّٜرٜ مُکُّو کْرْدِیَیٜرُو سْرْثَّغَیْ،›» یٜࢽُو؞
[12] أَدَ ࢻَࢽْغٜیْیٜࢽْدٜیَ، أَࢽْدِیَ أَمْ ࢽَدْیٜیَ بُلُسَّ بَرٜ جٜرُجَلٜمْبُو لٜجْࢽِّرُو لُواْیٜیْیٜ؞
[13] دَجِ بُلُسّٜ أَࢽْدِرُو: «أَتّْ أَوِ دِوِدْ؟ سُوࢽْدُولَࢽْ دَوْࢽِ ࢽَمْدُ وَ رَوُوْ؟ ثُ کْمَ عِیسَیٜ ࢽَࢽْغَرُو، وُدْ کُوسُو رُࢽْجُ غْࢽِ، کَرْمُومَ جٜرُجَلٜمْࢽِࢽْ کَسَدّْکّْࢽَ،» یٜࢽُو؞
[14] رَࢽْغِیٜ تِیَ جَوَلْࢽْدٜرُو یَکِّیٜوَوُورُو کِرُیْیٜࢽْدٜیَ، مَࢽَدَ کُولِّیٜ: «أَوُو کْمَ ثْرَاࢽَدْ تْدُو!» یٜیْیٜ؞
[15] ࢽغَوُو کَوُ أَࢽِیٜࢽْ دَبَّرْدِیٜ جٜرُجَلٜمْبُو لٜىٰیْیٜ؞
[16] ࢻُوُرَوَ بْرْࢽِ کَیْسَرِیَیٜ لَا یٜ أَࢽْدِیَ سَسَدُّوٜ ࢻَدُو مَࢽَسُوࢽْ کَمْ ثُکُ کُوِرُسّٜلَࢽْ جْمِّیُورُو ࢽَࢽْجُرُو سٜیَدُو؞ مَࢽَسُوࢽْدْ ࢻُوُرَوَ بُرْوُویٜدْیٜ ࢻَلْࢽْجَ؞
[17] جٜرُجَلٜمْبُو کَدِیٜࢽْدٜیَ، کْرَمِیَدْ أَࢽْدِیَ کَرْوُ کْجِیَرُو سٜمُواْ؞
[18] وَجْࢽَࢽْجُوَ بُلُسْ أَࢽْدِیَ رُوکُّو ࢽَ یَعْࢼُوبَیٜرُو لٜىٰیْیٜ، أَمْوُرَوَ سَمَّ یٜ ثَࢻْکَدَرَ؞
[19] بُلُسْ تَیِیَ لٜوَیٜࢽِّیَ، أَوُو اللَّه کِدَࢽْجُیٜࢽْ دَوُ کْرْدِیَیٜࢽْ ثْدْࢽَدَ ࢻَلْ ࢻَلّٜࢽْ تَیِرُو وُلْیٜىٰࢽُو؞
[20] أَدَ ࢻَࢽْغٜرَࢽِّیَ، اللَّهَ کٜࢽْغُورُو؞ دَجِ بُلُسُّو: «کْرَمِ، یَوْدِیَ کَدَ کَدَمِ عِیسَىٰ کَسَثَّࢽَرُو رُمَّ، کُورُو تَیِ سَمَّ کَرْوُ تِلُووَࢽْ أَتَّوْرَا جَاࢽَ؞
[21] أَمَّ ࢽِدْ یَوْدِیَ لَرْدُوَ کْرْدِیَیٜࢽْ دَسَاࢽَ سَمَّا أَلَمّْمٜ وَدَ ࢽَوِ مُوسَیٜ غَ کُولْجَ، بَرٜ تَدَوَࢽْجَا کَجَجَࢽِّ بِ أَدَدَ جَاࢽِّ ࢽْمِرُو ࢻَࢽْغٜرَ؞
[22] تُو، أَوِ غْلٜ دِیٜ؟ ࢽِ ࢽَ أَدْرُو إِسْمَّدَ ࢻَغَتُّو ࢻَࢽْجَیْ؞
[23] ࢽغُو أَوُو وُلْࢽْجْغْیْیٜ أَدَ دٜ؞ ثُرُوࢽْدٜࢽْ أَمْ دٜوُ اللَّهرُو کَࢽْسِ جَبُّࢽَ مبٜجِ؞
[24] أَمْ أَࢽِیَ ࢽغُوࢽٜ لَمَرْ تَیِرُّو وَلْدُیٜدَ تَیِیَ رُوکُّو دٜوُو، وُرِࢽْجَدَ بِیَࢽٜ کْلَࢽْجَ ثَلَرُورُو؞ أَدْغَیْࢽِࢽْ تَیِ سَمَّ أَوُو کْلَࢽْمْلَࢽْ وُلْدِدْ أَوِمَ غْࢽِ، ࢽِ یٜیَ أَتَّوْرَا غَمَرُو ࢽُوࢽْجَیْ؞
[25] أَمَّ کْرْدِیَ عِیسَىٰ کَسَثَّࢽَدْ، ࢽِیَ ࢽغُوࢽِیٜ تَیِرُو دَ سْࢽْمْبُو تِࢽَ ࢽغْرُو سُو، بُ ࢽجَ سُو، لْمَࢽْ دُوَدْࢽِّ ࢽغْرُو سُو، کْࢽْجْࢽَ دِیُو سُو وَجَرُو وُوتِیَ رُوُغْیْیٜࢽَ؞»
[26] وَیٜࢽِّیَ، بُلُسْ أَمْ دٜوُدَ ࢽغُوجٜ لٜجَࢽٜ لَمَرْ تَیِرُّو وَلْدُیٜدَ کَلُّو کٜدُو؞ دَجِ ࢻَدُو اللَّهیٜرُو ࢽغَیٜ سَرْدُ یِمْࢽْجَ تَیِرُّو وَلْجَیْ یٜ، سَدَا وُࢽْدُࢽْجَ یَیٜرُو ثَدِّدْ یٜیَ إِسَࢽُویٜىٰࢽُو؞
[27] کَوُ تُلُرْدْ ࢽجٜرُوࢽْجُ دٜلْ کَرْࢽْجْࢽَ دُوُوࢽْ، یَوْدِیَ لَا ثِدِ أَسِیَیٜ بُلُسَّ ࢻَدُو اللَّهیٜࢽْ کٜرُࢽِّیَ، جَمَ سَمَّا ثَسَࢽْغٜ تِیَ ثَدَࢽٜ
[28] یِلْجَࢽٜ: «جَمَ إِسْرَاءِیلَیٜ، بَࢽَسَغَࢽُواْ! أَکُّو کَمْ دُوُوࢽْ أَلَمْدُࢽْجُࢽْ ࢽدَرَࢽْ یَیٜ جَمَࢽْدٜیَ أَتَّوْرَا ࢽَ أَدَ سَمَّرُو رُدُ غْࢽَجِیٜ، حَرْ کْرْدِیَمَا ࢻَدُو اللَّهیٜرُو ثُوُدٜ ࢽَدَ تَیِرْ غْࢽِرُو ثْدْࢽَدْ!» یٜرَ؞
[29] أَوُووَ تَرُوࢻِمُسْ کَمْ أَࢻِسَیٜ تِیَ کَلُّو بْرْࢽِدْࢽْ ثَرُࢽٜ بُلُسْ تِیَ ࢻَدُو اللَّهیٜرُو ثُوُدْࢽَرُو تْمَیٜرَ؞
[30] حَࢽْغَلْ بْرْࢽِ سَمَّیٜ ثَا ثِجٜ، جَمَ ثَغَسِیَرُو إِسَࢽٜ بُلُسَّ ثَدَࢽٜ غْرْجَࢽٜ ࢻَدُو اللَّهیٜࢽْ کٜتُّلُوُࢽِّیَمَ، ثِࢽَّدَ جَکّٜرَ؞
[31] تِیَ ࢽجٜجُورُو مَجَیْ دُوُوࢽْ، کَجَلَّ سُوجِیَ رُومْبٜ لَوَرْ حَࢽْغَلْسَࢽْغُو جٜرُجَلٜمْ ࢽغَࢽْ ثِجْࢽَیٜدَ ࢻَࢽْغٜࢽُو؞
[32] سَدْمَࢽْ کْوُوَ سُوجِیَیٜیَ کُرَࢽْجَآ ࢽغُوجٜ جَمَدْیٜرُو ࢽغْرْمْبَرُو کَدِرَ؞ جَمَدْ تَیِیَ کٜرُࢽِّیَ، بُلُسَّ بَکْتُ کُولْیٜرَ؞
[33] دَجِ کَجَلَّدْ کَرْࢽْجٜ تِیَ ثْدَࢽٜ وَدَ ثٜ تِیَ سَرْغَ یِࢽْدِࢽْ ثَکّٜرُو یٜࢽُو؞ تِ وُࢽْدُ، کُورُو أَوِ ثْدُو ثْࢽٜ کِوُورُو؞
[34] ثُرُو جَمَدْیٜࢽْ لَاࢽجَ أَوُو لَا یِلْجَࢽٜ وُلْجَیْ، لَا یٜ أَوُو غَدٜ یِلْجَࢽٜ وُلْجَیْ؞ حَࢽْغَلْسَࢽْغُودْرُو أَوِمَ رَکْثٜ أَسُجِوَوُودْ، وَدَ ثٜ بُلُسَّ سُوجِدِرُو ثَادُو یٜࢽُو؞
[35] بُلُسْ کْمْبَرَمْدْرُو کَدِࢽِّیَ، غْرْغَدُ جَمَدْیٜ ࢽَࢽْغَرُو سُوجِیَدْ تِیَ سَمٜرُو ࢽغُویٜرَ؞
[36] جَمَ سَمَّ یِلْجَیْیَرُو: «یٜجٜ تِیَ!» ثَࢽٜ تَیِیَ غٜیَ؞
[37] سَ بُلُسَّ سُوجِدِرُو ثَسَکِّدْࢽْ، کَجَلَّدْرُو: «أَمَرْسْغْࢽٜ، أَوُو لَا وُلْࢽْجْغْکّٜ،» یٜࢽُو؞ تِرُو: «أَسٜ، تْلَمْ غْرٜسّٜ ࢽُوࢽْمَّ وَ؟
[38] ࢽِ غْࢽِ وَ کَمْ مَسَرّٜ تُسّْࢽِّ تُرُ ثْدٜ کَرَارُو کَمْثٜجِ دْوُ دٜوُ ثَدْࢽَدْ؟» ثْࢽٜ کِوُورُو؞
[39] بُلُسّٜ: «وُ یَوْدِ بْرْࢽِ تَرْسُسْ ثِدِ کِلِکِیَیٜ، کَمْ بْلَدٜیَیٜ غْࢽِ؞ لُواْࢽْجْکّْࢽَ، کُولْسْࢽٜ جَمَرُو جَࢽْدٜغْکُّو،» یٜࢽُو؞
[40] أَمَرِ کٜࢽِّیَ، بُلُسْ کْمْبَرَمْدْلَࢽْ دَجٜ جَمَرُو مُکُّو سَࢻْکٜىٰࢽُو؞ تَیِ سَمَّ غْمْ کٜدْࢽِّیَ، تْلَمْ یَوْدِیَوْدِࢽْ تَیِرُو: