[1] غُومْࢽَ ࢻٜسْتُسْ لَرْدُدْرُو إِسْࢽَیٜ کَوُ یَکُّوَ، بْرْࢽِ کَیْسَرِیَیٜࢽْ ثِجٜ جٜرُجَلٜمْبُو لٜىٰࢽُو؞
[2] وُرَوَ رِمَࢽَّیٜیَ ࢻُوُوُ یَوْدِیَیٜیَ ࢽَࢽْجُرُو إِسَࢽٜ بُلُسُّو أَیَوْ غْࢽَجَغَࢽٜ لُواْجَࢽٜ
[3] تَیِرُو سٜرْ لَا ثْدُّو بُلُسَّ جٜرُجَلٜمْبُو کَلَکْثُورُو کٜوُورُو، تِیَ جَوَلَّࢽْ کَࢻْکْغْمٜ ࢽجٜجُویٜ ࢽِیَ ࢽغُوجَࢽَ ࢽَࢽْغَرُو؞
[4] أَمَّ غُومْࢽَیٜ تَیِرُو: «بُلُسَّ بْرْࢽِ کَیْسَرِیَیٜࢽْ رُوجَیْ، کُورُو وُ کْلَࢽِ تُسّْکِّوَوُو بْرْࢽِدْرُو وَلْدْکِّ؞
[5] ࢻُوُوُࢽْدُو لَا وُوَ سَا لٜࢽِیُو، کَمْدْࢽْ أَوُو لَا دِوِ مٜࢽَّا، تِیَ بُرْوُجَ!» یٜࢽُو؞
[6] غُومْࢽَ دَوُࢽْجَࢽْ کَوُ وُسْکُ بِ مٜوُوَ کُوجْࢽِّرُو ࢽَࢻْکٜࢽِّیَ، بْرْࢽِ کَیْسَرِیَیٜرُو وَلَّدَࢽْ؞ وَجْࢽَࢽْجُوَ شَرَرَمْبُو لٜجٜ ࢽَࢻْثٜ بُلُسَّ ثَوُدُو یٜࢽُو؞
[7] کٜوُدْࢽِّیَ، یَوْدِیَ جٜرُجَلٜمْلَࢽْ إِسَࢽَدْ تِیَ دِرِجَࢽٜ کْلْجَࢽٜ أَیَوْ کَدَ جَوْ ࢻِتْ غْࢽَیٜىٰرَ، أَمَّ تَیِرُو تَبَّتُّوُ کَتْکٜرُو؞
[8] بُلُسّٜ کْلَࢽْجُ مُواْرُو: «وَدَ یَوْدِیَیٜرُو، بِ ࢻَدُو اللَّهیٜرُو، بِ کَیْسَرُّو بِوُ ࢻِمَا یِدّْکّْࢽِ!» یٜࢽُو؞
[9] غُومْࢽَ یَوْدِیَرُو سٜرْ ࢽجْدُّو ثْرَاࢽَ ࢽَࢽْغَرُو، بُلُسُّو: «جٜرُجَلٜمْبُو لٜࢽْمٜ ࢽَ تُودْࢽْ کْلَ أَوُو أَدْیٜࢽْ شَرَ ࢽجْدّْکِّ رَامَّ وَ؟» ثْࢽٜ تِیَ کِوُورُو؞
[10] بُلُسّٜ: «أَکُّوࢽِ شَرَرَمْ کَیْسَرّٜࢽْ دَادَ، ࢽَ أَدْمَࢽْ شَرَࢽِ کَمْدُمَ جُسّْࢽَ وُو؞ أَوِمَ دِوِ یَوْدِیَرُو یِدّْکّْࢽِرُو ࢽِ کْلَࢽْمْ دَمْ ࢽُوࢽْمَّ؞
[11] جِرٜࢽِ بَوُووَ، بِ أَوُو لَا دِوِ شَرَ کَرْمُویٜ دِکّْࢽَا، کَرْمُورُو کَدْکِّوَوُو؞ أَمَّ أَیَوْ أَمْ أَࢽِ وُرُو غْࢽَسَاࢽَدْ جِرٜ غْࢽِیَ، وُࢽْدُمَرُو وُوَ مُکُّوࢽْجَرُو ࢽجَکُّو أَمَرْدْغْࢽِّ؞ کَیْسَرْ وُرُو شَرَ سْدُّو!» یٜࢽُو؞
[12] دَجِ غُومْࢽَ ࢻٜسْتُسْ غَلَوُࢽْجُوَ سَوَرْغَدَرَࢽِّیَ، تِرُو: «کَیْسَرْ ࢽِرُو شَرَ ࢽجْدِّیَ، رَامْ؟ تُو، ࢽَ کَیْسَرّٜرُو لٜࢽْمِ!» یٜࢽُو؞
[13] کَوُ غَࢽَ کُویٜࢽِّیَ، مَیْ أَغَرِࢻَا مَیْرَمْ بَࢽِیَتُوَ لٜوَ غُومْࢽَ ࢻٜسْتُسّٜرُو بْرْࢽِ کَیْسَرِیَیٜرُو کَدِرَ؞
[14] بْرْࢽِدْࢽْ کَوُ کَدَرُو ࢽَࢻْثَࢽَ دُوُوࢽْ، غُومْࢽَ ࢻٜسْتُسْ أَوُو بُلُسَّ وُجْࢽَا مَیْدْرُو وُلْجِیٜ تِرُو: «ࢽَ أَدْࢽْ ثُرُو کُوسُویٜࢽْ کَمْ لَا غُومْࢽَ ࢻٜلِسْ کُولْجْࢽَ مبٜجِ؞
[15] جٜرُجَلٜمْبُو لٜىٰکّْࢽِیَ، وُرَوَ رِمَࢽَّیٜیَ أَمْوُرَوَ یَوْدِیَیٜیَ کْلَࢽْجُࢽْ سُوࢽْجَ سَکُّدٜ تِرُو شَرَ کَرْمُویٜ کٜکُّورُو؞
[16] وُیٜ تَیِرُو کَمْ بُرْوُجَࢽَدْ ࢻُوُ أَمْ تِیَ بُرْوُجَࢽَیٜࢽْ کْلَࢽْجُ مُواْرُو سُوࢽْجَیٜ کْلَࢽْ دَمَ مَࢽَ دِیُویٜ ثُوَࢽْدْࢽِّࢽْ شَرَࢽْجُ کَمْدُدْ أَدَ أَمْ رُومْبٜ غْࢽِ یٜکُّو؞
[17] «دَجِ بْرْࢽِ أَدْرُو کَدِرَࢽِّیَ، وَجْࢽَࢽْجُوَ دْغَلّْکّٜ شَرَرَمْبُو لٜکّٜ ࢽَمّْکّٜ کَمْدَ ثَوُدُو یٜکُّو؞
[18] أَمْ بُرْوُجَࢽَدْ مَࢽَ دِیُورُو دَیٜرَࢽِّیَ، أَیَوْ جَوْ تْمَکّْࢽَدَ غْࢽِ غْࢽَجَا،
[19] بِیَ کْلَ أَدِࢽّجَا کَمْ لَا ثُࢽْجُ عِیسَى ࢽُࢽَ دُوُوࢽْ بُلُسّٜ تِ رُووَ ثْࢽِیَیٜࢽْ کَمْبِوُدَیْ؞
[20] وُ یٜ جِرِ دِکّٜ أَوُو أَࢽِیَ کُوکُورْکِّرُو ࢽُوکّْࢽِدْ، بُلُسُّو جٜرُجَلٜمْبُو لٜجٜ ࢽَ تُودْࢽْ تِرُو شَرَ یِدّْکِّ ثْرَاࢽَ وَ ࢽْکّٜ تِیَ کِوُورْکُّو؞
[21] أَمَّ وَجٜ بَرْغَاࢽجُ کَیْسَرْ شَرَࢽْجُ ثْدُّورُو تِیَ رُوجَ یٜࢽِّیَ، حَرْ کَوُ ࢽَ کَیْسَرّٜرُو جُوَغْکِّرُو تِیَ کُوسُولَࢽْ رُوجَ یٜکُّو؞»
[22] مَیْ أَغَرِࢻَیٜ: «وُ یٜ کَمْ أَدَ کْرْࢽّْکِّیَ، رَاکُّو،» یٜࢽِّیَ، غُومْࢽَ ࢻٜسْتُسّٜ تِرُو: «بَرِ تِیَ کْرْࢽّْمِ،» یٜࢽُو؞
[23] وَجْࢽَࢽْجُوَ مَیْ أَغَرِࢻَا مَیْرَمْ بَࢽِیَتُوَ ࢽغَوُومَیْلَ جَوْرُو دَرَجَالَࢽْ إِسَࢽٜ تَیِیَ کَجَلَّوَا ࢻُوُوُ بْرْࢽِدْیٜیَ سُورُو کُرَ مَجِلِسّٜرُو کَسَرْغَوُو؞ غُومْࢽَ ࢻٜسْتُسْ وَدَ کٜࢽِّیَ، بُلُسْ یٜیَ کٜوُدُو؞
[24] دَجِ غُومْࢽَیٜ: «مَیْ أَغَرِࢻَا ࢽَیِ ثَࢻْتُوَّ سَمَّا، أَکُّو کَمْ کْلَࢽْجُࢽْ جَمَ یَوْدِیَ سَمَّ جٜرُجَلٜمْࢽِࢽْ کَلْ، بْرْࢽِ أَدْࢽْ کَلْ لُواْسَࢽٜ دُࢽُووَرُو کُواْ سَࢻْثَࢽٜ دُࢽِیَࢽْ بَوُورُو وَلْجِیَ، جُسُّو ثَࢽَّدَ رُوِ؞
[25] وُدْ، أَوِمَ تِیَ رُورُو ࢽجٜجُویٜ ثْدْࢽِّرُو أَسُࢽْکّْࢽَ؞ أَمَّ بَرْغَاࢽجُ کَیْسَرْ تِرُو شَرَ ثْدِّیَ ثْرَوُو ثْࢽَّدْرُو، ࢽِیَ ࢽغُوکّٜ تِیَ ࢽَࢽْجُرُو جُوَغْکِّ یٜکُّو؞
[26] مَࢽَ کِبُّ کْلَࢽْجُࢽْ کْمَࢽِرُو رُوُدُوُیٜ تَکّْࢽِ؞ أَدْمَ ࢽَࢽْغَرُو تِیَ ࢻُوُࢽْدُورُو کِوُدْکُّو، تَغْࢽَسُّو ࢻُوُࢽْمْبُو، مَیْ أَغَرِࢻَ، تِیَ کُوکُورِیٜیَ، أَوُو رُوُدُیٜ ࢻَࢽْدْکُّورُو،
[27] دَلِلْࢽْجُدْ کُوسُومَ أَیَوْࢽْجُ رُوُدْࢽِّ دُوُوࢽْ جُوَدُوُدْ جُسّْࢽِّرُو کِرُکُّو؞»