[1] یِمْ لَا بِتُرُسَّ یَحْیـَىٰ ࢻَدُو اللَّهیٜرُو مُودُوَ سَ یَکُّ کَجِرِیٜرُو لٜجَیْ دُوُوࢽْ،
[2] ࢽغَوُورَمْ ࢻَدُو اللَّهیٜ تِرُو ثِࢽَّ شَوَ ثَࢽِدْࢽْ کَمْ لَا تْࢽْ تَمْبُوࢽْجُیٜࢽْ ࢽغُرْدِیے مبٜجِ؞ أَمْ ࢻَدُو اللَّهیٜرُو ࢽغَسَیِدَ سَدَارُو ثُوُورُورُو یِمْ ࢽغُسُوࢽْ تِیَ ثَوُدٜ ثِࢽَّدْࢽْ غْࢽَجَیْ؞
[3] کَمْدْ بِتُرُسَّ یَحْیـَىٰ ࢻَدُو اللَّهیٜرُو ࢽغَوُو ثَدِ کِرُࢽِّیَ، تَیِیَ سَدَارُو کِوُورُو؞
[4] أَمَّ بِتُرُسَّ یَحْیـَىٰ سِمْࢽِࢽْ تِیَ ثَࢻُّو ثَرُࢽٜ بِتُرُسّٜ تِرُو: «سَرُیْ!» یٜࢽِّیَ،
[5] کَمْدْ تَیِیَ ثْکُّو کِرُو، أَوُو لَا تَیِلَࢽْ تْمَجْࢽَ ࢽَࢽْغَرُو؞
[6] بِتُرُسّٜ: «رِوُلَّ سُو، دِࢽَرْ سُو تَکّْࢽِ، أَمَّ أَوُو تَکّْࢽَدَ ࢽجِکِّ؞ ثُ عِیسَى أَلْمَسِیوُ کَمْ ࢽَجَرَتّٜࢽْ ثِࢽٜ دَدَࢽٜ!» یٜࢽُو؞
[7] دَجِ ࢽغُرْدِیدَ مُکُّو کْمْبُورَمْبٜࢽْ ثْدَࢽٜ کِسَࢽْغْࢽِّیَمَ، سِࢽْجُوَ دَوْ سِࢽْجُیٜیَ دُࢽُووَرُو وَلْجَࢽٜ
[8] وُࢻْ ثِجٜ دَجٜ لٜدُ بَدِیٜࢽُو؞ لٜجِ یٜ، سْکْتِ یٜ، اللَّهَ ثُࢽْغُورِ یٜ ࢽغَیْ دُوُوࢽْ، تَیِیَ رُوکُّو ࢻَدُو اللَّهیٜرُو کَسَرْغَوُو؞
[9] دَجِ جَمَ سَمَّ تِ دَدَجِ یٜ، اللَّهَ ثُࢽْغُورِ یٜدَ کٜرُو؞
[10] تِمَ کَمْ دُوُوࢽْ ثِࢽَّ شَوَدْࢽْ ࢽَࢻْکَدَ لُواْ ثْدِدْرُو أَسُیٜرَࢽِّیَ، أَوُو تِرُو وَکَّجْغْࢽَدَ تَیْ دَجَࢽٜ أَجَࢻْکٜرَ؞
[11] کَمْدْ بِتُرُسَّ یَحْیـَىٰرُو کْرْدْغْࢽَ ࢽغَیْ دُوُوࢽْ، أَجَࢻْکَدَرُو جَمَ سَمَّ ࢽَࢽْجَرُو ثَغَسٜ ࢽَ دُوُوࢽْ ࢽغُرْوُو ࢽَوِ مَیْ سُلَیْمَـٰࢽَیٜ ثَࢽِدْرُو إِسَࢽٜ ثَࢻْکَدَرَ؞
[12] بِتُرُسْ أَدَ کِرُࢽِّیَ، تَیِرُو: «جَمَ إِسْرَاءِیلَیٜ، أَوِرُو کْلَ أَدْیٜࢽْ أَجَمُّوِدْ؟ أَوِرُو کْࢽْدُوُوࢽْدٜࢽْ بِ ࢽَࢽْمُمِࢽّدٜࢽْ کَمْ أَدَ یَکِّیٜ لٜجِرُو تْمَࢽُوٜ أَࢽْدِیَ ࢽِࢽِسَوِدْ؟
[13] اللَّه کَارِیَࢽْدٜىٰ، اللَّه ࢽَوِ إِبْرَاهِیمْبٜیَ ࢽَوِ إِسْحَٰࢼُیٜیَ ࢽَوِ یَعْࢼُوبَیٜیَدْ وَکِّلْࢽْجُ عِیسَرُو دَرَجَ ثِࢽَ، تِ دُوُوࢽْ غُومْࢽَ بِلَتُسْ کُولْدُ ࢽِیَجْࢽَمَ، ࢻُوُ غُومْࢽَدْیٜࢽْ تِیَ وَࢽُوٜ سْرْتْکْوَّدْ؞
[14] ࢽَیِدْ تِ تَیِرْ یٜ، جِرٜمَ یٜدَ وَࢽُوٜ کَمْثٜجِ ࢽَیِرُو سَلَمْࢽْجَارُو کِوُورُوْ؞
[15] کْمَ رُویٜدَ کٜجُوْ، تِ دُوُوࢽْ اللَّه کَرْمُولَࢽْ ثْسَࢽْغْࢽَدْ؞ کْلَ أَدْیٜࢽْ أَࢽْدِ یٜ شٜدَوُ؞
[16] ثُ عِیسَیٜࢽْ کَمْبْرْسٜࢽْجُوَ ࢽَࢽْغَرُو کَمْ رُوِ یٜ، ࢽُوࢽُوَّ یٜ أَدْ دُࢽُو کِوَࢽْدُو؞ کَمْبْرْسٜ أَدْمَدْ ࢻُوُ ࢽَیِ سَمَّیٜࢽْ ثَکّٜ ࢽغَ ثِرُّو وَلْیٜࢽُو؞
[17] «تُو، کْرَمِیَࢽِ، ࢽَیِیَ وُرَوَࢽْدُووَ ࢽُودُࢽَمْبُلَࢽْ أَدَ دِوَّرُو ࢽُوکّْࢽَ،
[18] أَمَّ ࢽغَیْࢽِࢽْ أَوُو اللَّه کُرٜࢽْ ثِ ࢽَوِیَ سَمَّیٜࢽْ وُلْجْࢽَدْ وَکَّجْࢽَ؞ تِیٜ سَیْ أَلْمَسِیوُࢽْجُ بُوࢽٜ ثَیْیَ، ثْࢽَّ؞
[19] أَدْ ࢽَࢽْغَرُو تْمُّواْ، اللَّهرُو وَلْدْغْࢽُواْ، بِوُوَࢽْدُو ثِࢽْجُورُو،
[20] سَ کَسَمْ ࢻَࢽْدُویٜ یٜ ࢽَ کْمَࢽْدٜىٰࢽْ إِسُورُو، کُورُو عِیسَى کَمْ دُوُوࢽْ أَلْمَسِیوُرُو غَلَࢽْجَاࢽَدْ یٜیَ ࢽَیِرُو جُوَࢽْجَارُو؞
[21] اللَّه کُرٜࢽْ ثِ ࢽَوِیَࢽْجُ تَیِرّٜࢽْ وُلْجْࢽَدْ غَیْ، أَلْمَسِیوُدْ دُولٜرُو سَمٜلَࢽْ ࢽَࢻْثِ، حَرْ سَ أَوُو سَمَّ سَوِیَدَرُو وَلْجِدْرُو؞
[22] ࢽغَیْمَ ࢽَوِ مُوسَیٜ: ‹اللَّه کْمَࢽْدٜ ثُرُو کْرَمِیَࢽْدُویٜࢽْ ࢽَوِ لَا وُ غَیْ ࢽَیِرُو ࢽجَسَࢽْغِ؞ أَوُو ࢽَیِرُو وُلْࢽْجَغَیْ سَمَّࢽْ تِیَ کْرْࢽُّواْ!
[23] وُࢽْدُ دُوُوࢽْ ࢽَوِ أَدَ کْرْࢽْجِوَوُودْ ثُرُو جَمَدْیٜࢽْ سُلَتْ بَوُورُو وَلْجِ،› ثْࢽَّ؞
[24] کُورُو ࢽَوِ سَمَیْلَیٜࢽْ تَمِیَ حَرْ تَیِ ࢽغَوُوࢽْجُ جَاࢽَرُو کُدٜرُو، ࢽَوِیَ مَࢽَجَࢽَ سَمَّ یٜ کَوُ أَࢽِیَ مَوُوجَࢽَ؞
[25] ࢽَیِمَ تَدَوَ ࢽَوِیَدْیٜ، کُورُو وَرَسَوُ أَمَࢽْ دُوُوࢽْ اللَّه کَارِیَࢽْدُووَ ࢽدْࢻْثَࢽَدْیٜ وُو؞ تِیٜ ࢽَوِ إِبْرَاهِیمْبُو: ‹کَدُوُࢽْمْبٜࢽْ جَمَ دُࢽِیَیٜ سَمَّرُو بَرْغَ دْࢻْکْکِّ،› ثْࢽَّ؞
[26] دَجِ تِیَ وَکِّلْࢽْجُرُو غَلَیٜࢽِّیَ، ࢽَیِمَرُو دُوُوࢽْ جُوَࢽْغٜىٰرَ، بَرْغَ دْمْࢽْجَا، وُࢽْدُࢽْدُووَ یَیٜ جَوَلْࢽْجُ دِوِلَࢽْ ثُتُّلُوُورُو،» یٜࢽُو بِتُرُسّٜ؞