[1] «کْرَمِیَ سُو، بَوَࢽِ سُو، أَوُو کْلَࢽِ مُواْرُو کْرْمَ وُلْࢽْجَغَکِّدَ ࢻَࢽُّواْ!» یٜࢽُو؞
[2] تْلَمْ یَوْدِیَوْدِࢽْ تَیِرُو جَࢽْدٜجِیرُو ࢻَࢽْغٜرَࢽِّیَ، ثَیٜمَا کُوجْࢽَرُو غْمْ کٜدُو؞ دَجِ بُلُسّٜ تَیِرُو:
[3] «وُ یَوْدِ، بْرْࢽِ تَرْسُسْ ثِدِ کِلِکِیَیٜࢽْ کَتَمْبْکُّو، أَمَّ بْرْࢽِ أَدْࢽْ وُرَیٜکُّو؞ ࢻُوُرَ غَمَلِیٜلّٜرُو وَلّْکّٜ وَدَوَ کَارِیَࢽْدٜىٰ سَمَّا تَلْدُ بَوُووَرُو غَ کِرْکُّو؞ ثَمَࢽْ وُیٜ اللَّهَ کَسَتُّࢽِ دَمَ بَوُو، کُ ࢽَیِ دِوِدْ غَیْ؞
[4] أَمْ جَوَلْ عِیسَیٜیَ جَغَیْدَ بَسَرْࢽْکّٜ حَرْ لَا سَࢽُࢽَ، لَا یٜیَ کوَࢽْ کَمُࢽْ غٜرْکّٜ کُوسُورُو کٜکّْکُّو،
[5] رِمَࢽْ کُرَا مَجِلِسْوُ سَمَّا یٜ کْلَࢽِࢽْ شٜدَجَیْدْ غَیْ؞ ࢽَࢽْجَࢽْ وُوتِیَوَ کْرَمِیَ یَوْدِیَرُو رُوُوَدَ کِمُواْکّْࢽِیَ، تَیِ بْرْࢽِ دَمَسّٜࢽْ دَسَاࢽَ یٜیَ جٜرُجَلٜمْبُو تِکّٜرْࢽَ کُدْکّٜ أَجَوُ تَیِرُو غْࢽَجَغَیْ ࢽْکّٜ جَوَلْ کِدَکُّو؞
[6] «کَوْسُ دَوُ غَیْ لٜدُ دِکِّ دُوُوࢽْ، دَمَسَّ کَرْࢽْغٜکّْࢽِیَ، سَدْمَࢽْ ࢽُرْ کُرَ سَمٜىٰ لَا یِیلْجٜ وُوَ دِرِسٜ کْلْسٜࢽُو؞
[7] ثِدِرُو بْࢻْ یُرُکّٜ کُواْ لَا ࢽُکْثٜ وُرُو: ‹شَوُلُ، شَوُلُ، أَوِرُو وُوَ بَسَرْسْمِدْ؟› ثْࢽٜ ࢻَࢽْغٜکُّو؞
[8] وُیٜ: ‹کْمَ، ࢽِ وُࢽْدُ؟› ࢽْکّٜ کِوُورْکّْࢽِیَ، تِیٜ: ‹وُمَ عِیسَى کَمْ ࢽَجَرَتّٜ بَسَرْسْمِدْ وُو،› یٜࢽُو؞
[9] أَمْ وُوَ سَسَدُّوِدْ ࢽُرْدَ ثَرُࢽَ، أَمَّ کُواْ تِ وُرُو جَࢽْدٜسِیدْیٜدَ ࢻَࢽْجَࢽِّ؞
[10] دَجِ وُیٜ: ‹أَوِ غْلٜ دِکِّ، کْمَ؟› ࢽْکّٜ کِوُورْکّْࢽِیَ، کْمَدْیٜ وُرُو: ‹ثِࢽٜ دَمَسُّو لٜࢽٜ، ࢽَ تُودْࢽْ أَوُو اللَّه ࢽِرُو کَدَرْࢽْجْغْࢽَ دِمِ سَمَّا وُلْࢽْجَغَیْ،› یٜࢽُو؞
[11] ࢽُرْ کُرَدْ ثَکّٜ حَرْ رُکِّوَوُورُو وَلّْکّْࢽَ ࢽَࢽْغَرُو، أَمْ وُوَ سَسَدُّوِدْ مُکُّویٜࢽْ جٜسَࢽٜ دَمَسُّو کَدِکُّو؞
[12] «دَمَسْلَࢽْ کَمْ لَا تِرُو أَࢽَࢽِیَ ثَࢽِ مبٜجِ؞ تِدْ أَتَّوْرَ ࢽَوِ مُوسَیٜلَࢽْ مُمِࢽْ، کُورُو یَوْدِیَ بْرْࢽِدْࢽْ دَسَاࢽَ سَمَّ ࢽغْلَࢽْجُ وُلْجَیْ؞
[13] دَجِ ࢽَࢽِرُو إِسٜ دَجٜ: ‹کْرَمِࢽِ شَوُلُ، سِمْ ࢻَࢽْدٜ!› یٜࢽُو؞ سَدْمَࢽْ سِمْ ࢻَࢽْدْکّٜ تِیَ کِرُکُّو؞
[14] کُورُو وَلْدٜ وُرُو: ‹اللَّه کَارِیَࢽْدٜىٰدْ رَوُوࢽْجُوَ ࢽُوࢽٜ، جِرٜمَدَ رُیْ، کُورُو کُواْ ثِࢽْجُیٜدَ ࢻَࢽّٜرُو ࢽِیَ کْرٜࢽْجْࢽَ،
[15] دَلِلْࢽْجُدْ شٜدَمَࢽْجُرُو وَلّْمٜ أَدَمْغْࢽَ سَمَّرُو أَوُو رُمَّا ࢻَࢽّْمَّآ وُلْغْمِ ࢽَࢽْغَرُو؞
[16] کْرْمَ، أَوِ غُرٜࢽْمِ؟ ثِࢽٜ، ثُࢽْجُ بُواْࢽْمِیَرُو کَسَلَ ࢽجَدُّو، بِوُوَࢽْمْ تُلْجَ!› یٜࢽُو؞
[17] «جٜرُجَلٜمْبُو وَلَّدَکّْࢽِیَ، ࢻَدُو اللَّهیٜࢽْ مُودُوَ دِکِّ دُوُوࢽْ، وَحَیِ لَا وُوَ سْدَࢽٜ
[18] کْمَیٜ وُرُو: ‹جْکْتْغْࢽٜ، دُوَدُوَࢽْ جٜرُجَلٜمْلَࢽْ لُوٜ، شٜدَࢽْمْ کْلَ وُیٜࢽْ ࢽغُوجَیْوَوُو ࢽَࢽْغَرُو،› ثْࢽِ کِرُکُّو؞
[19] وُیٜ: ‹کْمَ، ثَلَࢽْ وُدْ دَࢽْدَلْ دَࢽْدَلْࢽِࢽْ أَمْ ࢽِیَ کَسَࢽّجَࢽَا کُوسُورُو یَکّْکّٜ کُواْࢽْکِّدَ تَیِ کْلَࢽْجَمَ ࢽُوجَࢽَ؞
[20] کُورُو سَ إِسْتِࢻَࢽُسْ شٜدَمَࢽْمْدْیٜ بُࢽْجُ ࢻِجَࢽَدْࢽْ، وُ یٜ ࢽَࢽْجَࢽْ دَࢽْکّٜ کَسَدّْکّٜ، حَرْ کَلْوُ أَمْ تِیَ ثٜىٰسِیٜدَ غُرٜىٰکُّو؞›
[21] دَجِ کْمَیٜ وُرُو: ‹لٜࢽٜ، کُرُوُرُو ࢽَ کْرْدِیَیٜرُو ࢽجُࢽُودْکِّ!› یٜࢽُو؞»
[22] جَمَدْ بُلُسَّ کْرْࢽْجَیْ ࢽغَیْ دُوُوࢽْ، مَࢽَ کْلَ کْرْدِیَیٜࢽْ وُلْیٜࢽِّیَ، کُواْ سَࢻْثَࢽٜ یِلْجَࢽٜ: «یٜجٜ، تِیَ دُࢽِیَࢽْ سِغْࢽٜ! تِیَ رُووَ کُولْدُ جُسّْࢽِّ!» یٜرَ؞
[23] یِلْجَࢽٜ کَلْوُࢽْجَ غْࢻْثَࢽٜ کَتِّ سَمٜرُو یِیرْجَغَیْ ࢽغَیْ دُوُوࢽْ،
[24] دَلِلْ جَمَدْ کْلَࢽْجُࢽْ یِلْجَیْدَ ࢽُودُ ثْرَاࢽَ ࢽَࢽْغَرُو، کَجَلَّدْ وَدَ ثٜ سُوجِیَدْ تِیَ ثَدَ سُوجِدِدْرُو ثَسَکُّو کُواْجَ یٜࢽُو؞
[25] تِیَ کُواْجَرُو کٜکّٜرْࢽِّیَ، بُلُسْ سُوجِ کُرَ ࢻُوُࢽْجُࢽْ دَادَدْرُو: «وُواْمْ رُومْبٜ أَمَرْࢽْجَغَࢽٜ شَرَ یِدُّوِّلَࢽْ کَمْ رُومْبٜیَ کُواْࢽُوِ وَ؟» ثْࢽٜ کِوُورُو؞
[26] سُوجِ کُرَدْ أَدَ ࢻَࢽْغٜࢽِّیَ، لٜجٜ کَجَلَّدْرُو: «أَوِ دِیُو مَࢽْمِ؟ کَمْ أَدْ کَمْ رُومْبٜ، دِیٜ!»
[27] دَجِ کَجَلَّدْ ࢽَ بُلُسّٜرُو إِسٜ تِرُو: «وُلْسْغْࢽٜ، ࢽِ کَمْ رُومْبٜ وَ؟» ثْࢽٜ کِوُورْࢽِّیَ، تِرُو: «آه،» یٜࢽُو؞
[28] کَجَلَّدْیٜ: «وُ وُرِ کَدَࢽْ کَمْ رُومْبٜرُو وَلْیٜکُّو،» یٜࢽِّیَ، بُلُسّٜ: «وُدْ، کَمْ رُومْبٜ کَتَمْبْکُّو!» یٜࢽُو؞
[29] سَدْمَࢽْ أَمْ تِیَ کُورُورُو دَبَّرْدَࢽَدْ کُولْجَࢽٜ سَࢻْکَدَرَ؞ کَجَلَّدْ یٜ رِیٜࢽُو، دَلِلْࢽْجُدْ تِ کَمْ رُومْبٜ، کُورُو تِیَ ثِکّٜرْࢽَ ࢽَࢽْغَرُو؞
[30] وَیٜࢽِّیَ، کَجَلَّ رُومْبٜدْ دَلِلْ یَوْدِیَ بُلُسُّو أَیَوْ غْࢽَجَاࢽَدْیٜیَ تَبَّتُّو ࢽُودُرُو مَجِ ࢽَࢽْغَرُو، وُرَوَ رِمَࢽَّیٜیَ مَجِلِسْوُ سَمَّارُو وَدَ ثَࢻْتُیٜ ثٜ بُلُسَّ وُیْجٜ ثَادٜ ࢻُوُࢽْجَࢽْ دَیٜࢽُو؞