[1] بُلُسَّ سِلَسَّ بْرْࢽِ أَمْࢻِبُولِسَّ أَبُولُوࢽِیَایٜࢽْ رٜجَࢽٜ کُویٜرَࢽِّیَ، تَسَلُوࢽِکَ بْرْࢽِ دُوُوࢽْ ثُرُوࢽْجُࢽْ دَࢽْدَلْ یَوْدِیَیٜ لَا دْغَࢽَدْرُو کَدِرَ؞
[2] کْلَ أَدَࢽْجُیٜࢽْ بُلُسْ ࢽَࢽْجَرُو ࢽغَیٜ یِمْ تُسْتُیٜ غَدٜغَدٜ یَکُّرُو أَوُو کِتَوُلَࢽْ رُوُوَدَدَ تَیِرُو ࢻِسَرْجِیٜ
[3] اللَّه کَدَرْجْࢽَ أَلْمَسِیوُدْ بُوࢽٜ ثَࢽٜ ࢽُࢽٜ کَرْمُولَࢽْ ثِجِ أَدَ بَیِࢽْجٜ تَبَّثِّیٜ تَیِرُو: «عِیسَى کَمْ کْلَࢽْجُࢽْ مَࢽَ ࢽجَدّْکِّدْ، تِمَ أَلْمَسِیوُدْ وُو!» یٜࢽُو؞
[4] یَوْدِیَدْیٜ لَاࢽجَا أَمْ غْرٜسّٜ اللَّه رِدَوُ کَدَا کَمُوَ دَرَجَا غْࢽَغْࢽِیَ مَࢽَࢽْجُدَ کَسَثَّࢽٜ بُلُسَّ سِلَسَّرُو کْلَّادَرَ؞
[5] أَمَّ یَوْدِیَ لَا کَࢽْدُرِجَࢽٜ کْلَدُووَ أَمْ بُووُیٜ ࢻَرْسَمْࢽِࢽْ مَجَࢽٜ تْمْبَلْجَغَࢽٜ حَࢽْغَلْسَࢽْغُو بْرْࢽِدْࢽْ ثَسَࢽْغٜ بُلُسَّ سِلَسَّا ࢻُوُ جَمَیٜرُو کُدُورُو ࢻَدُو جَسُوࢽّٜرُو ثَغَسٜ لٜىٰرَ؞
[6] تَیِیَ ࢽَجَغَࢽِّدْ، جَسُوࢽَّ کْرَمِیَ غَدٜ لَآ ࢻُوُ ࢻُوُوُ بْرْࢽِدْیٜرُو غْرْجَࢽٜ کُواْ سَࢻْثَࢽٜ: «أَمْ دُࢽِیَ ࢽغَࢽْ حَࢽْغَلْسَࢽْغُو ثَدِدْ ࢽَ أَدْ یٜرُو إِسَࢽٜ،
[7] جَسُوࢽْ یٜ تَیِیَ ࢻَࢽّجُࢽْ ثْسَاࢽَ؞ تَیِ سَمَّ وُواْمْ کَیْسَرّٜ غَ وَجَࢽٜ مَیْ غَدٜ عِیسَى ثَࢽِ مٜࢽَّ وُلْجَیْ،» یٜرَ؞
[8] جَمَا ࢻُوُوُدَ أَدَ ࢻَࢽْغٜرَࢽِّیَ، حَࢽْغَلْࢽْجَ ثِیٜࢽُو؞
[9] جَسُوࢽْسُویٜࢽْ بٜلِ کٜمُواْࢽِّیَ، کُولْجَࢽٜ لٜىٰرَ؞
[10] دُࢽِیَ لْمْغٜࢽِّیَمَ، کْرَمِیَدْ بُلُسَّ سِلَسَّا ثَسَکّٜ بْرْࢽِ بِرِیَیٜرُو لٜىٰرَ؞ کَدِرَࢽِّیَ، دَࢽْدَلْ یَوْدِیَیٜرُو کَسَرْغَوُو؞
[11] یَوْدِیَ أَࢽِ أَمْ بْرْࢽِ تَسَلُوࢽِکَیٜدْرُو کْلَ ࢻْرْمْغَدَا وُو؞ کَوُرِدَ مُکُّو یِࢽْدِࢽْ ثَمُویٜ، حَرْ أَوُو أَࢽِ جِرٜ وَرُو ࢽُودُرُو یِمْ ࢽغُسُوࢽْ کِتَوُدَ ࢻْسَࢽْجَࢽٜ ثَرُیْ؞
[12] أَدْ ࢽَࢽْغَرُو أَمْࢽْجَ ࢽغْوُ عِیسَىٰ کَسَتْکٜرَ، کُورُو ثُرُو أَمْ غْرٜسّٜدْࢽْ کَمُوَ دَرَجَآ کُوࢽغوَوَا غْࢽَغْࢽِ یٜ کَسَتْکٜرَ؞
[13] أَمَّ یَوْدِیَ تَسَلُوࢽِکَیٜدْ بُلُسْ بِرِیَ یٜلَࢽْ مَࢽَ اللَّهیٜ وُلْجِدَ ࢻَࢽْغٜرَࢽِّیَ، ࢽَ أَدْ یٜرُو إِسَࢽٜ جَمَا تْمْبَلْجَغَࢽٜ ࢻِتْࢽَ کٜوُدُو؞
[14] سَدْمَࢽْ کْرَمِیَدْ بُلُسُّو ثِ تٜکُیٜدْرُو لٜجُو ثَࢽٜ سَࢻْکَدَࢽْ، أَمَّ سِلَسَّ تِمُوتِیَ ࢽَدْࢽْ ࢽَࢻْکٜرَ؞
[15] أَمْ بُلُسَّ ثَسَدُّوُࢽَدْ تِیَ حَرْ بْرْࢽِ أَتِࢽَیٜرُو کٜسَدُو؞ دَجِ بُلُسْ تَیِرُو وَدَ ثٜ سِلَسَّ تِمُوتِیَ ࢽَࢽْجُرُو دُوَدُوَࢽْ إِسَ یٜࢽِّیَ، سَࢻْکَدَرَ؞
[16] بُلُسْ بْرْࢽِ أَتِࢽَیٜࢽْ سِلَسَّ تِمُوتِیَا غُرٜدُ ثْدِ دُوُوࢽْ، بْلَدْࢽْ ࢽدَرَࢽْ یَیٜ غُمْکِیَارُو ثُرُࢽَدْ، کَرْوُࢽْجُ کُتَّیٜࢽُو؞
[17] أَدْ ࢽَࢽْغَرُو بُلُسْ ثُرُو دَࢽْدَلّٜ یٜࢽْ یَوْدِیَا اللَّه رِدَوُوَ مَࢽَدَیْ، ࢻَرْسَمْ یٜࢽْ یِمْ ࢽغُسُوࢽْ أَمْ تَدِدَ ࢽغَیْ ثَدِ؞
[18] کُورُو إِلْمُوُ لَا کْوُ أَبِکُرِیَیٜیَ سِتُوکِیَیٜیَ یٜ تِیَ جَࢽْدٜدُ بَدِیٜرَ؞ لَاࢽجَیٜ: «کَمْ کَلَلَ ࢽغْوُوَ أَدْ، أَوِ غْلٜ وُلْجِ؟» ثَࢽِ، لَا یٜ: «أَلَمَࢽْجُ سْࢽْمْبَ لَرْدُ غَدٜىٰ مَوُودُمَ،» ثَࢽِ؞ أَدَ وُلْدُࢽْجَدْ، بُلُسْ کَوُرِ کْجِ کْلَ عِیسَىٰ کَرْمُولَࢽْ ثِدُوَیٜࢽْ وُلْجِ ࢽَࢽْغَرُو؞
[19] دَجِ تِیَ ࢽغُوجَࢽٜ ࢻُوُ مَجِلِسْ ࢽَ دُوُوࢽْ تِرُو کْرِ أَرَسَیٜ ثَࢽِیٜدْرُو ثَادٜ تِرُو: «ࢽدَ أَوُو بْرِࢽْ أَلَمّْمِدَ أَࢽْدِرُو وُلْسَغَࢽٜ، ࢽغْلَرُو ࢻَࢽِّیُو!
[20] إِلْمُ یِکّْرَمِ کَاࢽدٜیَ غَدٜ أَدْیٜ مَاࢽَࢽْجُ ࢽُودُرُو مَࢽِیٜ،» یٜرَ؞
[21] أَوُووَ أَمْ بْرْࢽِ أَتِࢽَیٜ سَمَّا کُسُوتُّووَ بْرْࢽِدْࢽْ دَسَاࢽَادْ إِلْمُ بْرِࢽْ وُلْدُوَ ࢻَࢽْدُوَ غْࢽِیَ، أَوِمَ غَدٜ ثَدِوَوُو؞
[22] دَجِ بُلُسْ ثِجٜ دَوُ مَجِلِسْدْیٜࢽْ دَجٜ تَیِرُو: «أَمْ بْرْࢽِ أَتِࢽَیٜ، ࢽَیِ جِرِ ࢻِࢽْ یَیٜ جَوْرُو أَدِࢽْوُرُو رُکّْࢽَ؞
[23] بْرْࢽِࢽْدُوࢽْ دَدَࢽْکّٜ غُمْکِیَࢽْدُو رُکِّ دُوُوࢽْ، ثُرُوࢽْجَࢽْ حَرْ لَیَ دُوَدُرَمْ لَا کْلَࢽْجُࢽْ أَدْ کُرْغَدَا کِرُکُّو: ‹اللَّه لَا ࢽُودْࢽِّیٜ؞› أَوُو ࢽُوࢽُوِّلَࢽْ أَمْبْتْکْوِ أَدْ، تِمَا إِسَࢽُوࢽْجَغَکِّ؞
[24] اللَّه دُوُوࢽْ دُࢽِیَا أَوُووَ ثُرُوࢽْجُࢽْ دَسَاࢽَ سَمَّآ أَلَکْثْࢽَدْ، تِ کْمَ سَمٜیَ ثِدِیَیٜ ࢽَࢽْغَرُو، ثُرُو ࢻَدُووَ کَمْ ثْدَࢽْدْࢽَیٜࢽْ غْࢽِ کْرْغَ؞
[25] کُورُو مْرَدُࢽْجُ بَوُو ࢽَࢽْغَرُو، مُکُّو أَدَمْغْࢽَیٜࢽْ غْࢽِ کِسْتِیے، تِمَ وُࢽْدُ یَیٜرُو رُووَ سِࢽْدُوَ أَوُو غَدٜ سَمَّآ ࢽجُومَ وُو؞
[26] کَمْ ࢻَلْࢽِࢽْ جَمَ غَدٜغَدٜ سَمَّا أَلَکّٜࢽُو، دُࢽِیَیٜ ࢽدَرَࢽْجُࢽْ یَیٜ دَسَارُو؞ جَمَ سَمَّرُو جَمَࢽْ کْࢽْدْغَیْࢽْجَیٜ کَمْجِیٜ کُورُو ثِدِࢽْجَرُو کَرَࢽْغِ کِدُّو؞
[27] أَدَ دِیُوࢽْجُدْ، ࢻَرَࢻَرَجَ تِیَ مَجَ، یُویٜࢽُووَ، ثَوَࢽْدُورُو؞ جِرٜمَرُو کَتّٜ تِیَ وُࢽْدُࢽْدٜىٰیَ کُرُوُ غْࢽِ؞
[28] مَࢽَوُࢽْدُو لَاسُومَیٜ ثَࢽَّدْ غَیْ: ‹تِیٜࢽْ رُو کِوَࢽْدِیٜ، دَدَࢽِیٜ، کْرْغَیْیٜ،› کُورُو: ‹أَࢽْدِ یٜ کَدُوُࢽْجُ؞›
[29] «تُو، أَࢽْدِ کَدُوُࢽْجُدْ، بَرٜ تِیَ غُمْکِ دِࢽَرّٜ سُو، رِوُلَّیٜ سُو، کَوْیٜ سُو أَوُو دُوُوࢽْ أَمْسُو إِلْمُࢽْجَا ࢽَࢽْغُوࢽِࢽْجَاࢽِࢽْ ثَدَࢽْدْࢽَدْیٜ ثَمُࢽُّو ࢽغُوࢽِیٜࢽْدٜ؞
[30] جَمَࢽْ ࢽُودُࢽَمْبُیٜࢽْ اللَّه وُواْمْ غْࢽَدُوُ وَجْࢽَ یَیٜ، کْرْمَدْ أَمْ سَمَّ ࢽدَرَࢽْ کَسَرْغَ یَیٜ تُوَ ثَدُو یٜࢽُو،
[31] دَلِلْࢽْجُدْ کَمْ شَرَ دِیُومَرُو غَلَجْࢽَیٜࢽْ دُࢽِیَرُو یِمْ ࢻَلْࢽِࢽْ شَرَ جِرٜىٰ ثْدِّ ثْࢽٜ سَرْدُ کَمْجْغْࢽَ؞ ࢽِیَࢽْجُ أَدَ وُࢽْدُ یَیٜرُو تَبَّتُّوُرُو کَمْدَ کَرْمُولَࢽْ کِسَࢽْغُو؞»
[32] مَࢽَ کْلَ کَرْمُولَࢽْ ثِدُیٜدْࢽْ ࢻَࢽْغٜرَࢽِّیَ، لَاࢽجَ رُدُ غْࢽَیٜرَ، أَمَّ لَا یٜ: «غَدٜمِࢽُّو کْلَ أَدْیٜࢽْ ࢽِیَ کْرْࢽّجِیٜ،» یٜرَ؞
[33] دَجِ بُلُسْ ࢽَࢽْجَࢽْ سَࢻْکَدَࢽْ؞
[34] أَمَّ أَمْ لَا تِرُو کْلْدَغَࢽٜ عِیسَىٰ کَسَتْکٜرَ؞ ثُرُوࢽْجَࢽْ دِیُوࢽِسِیَسْ تِمَ مَجِلِسْمَا کَمُ لَا دَمَرِسْ ثَࢽِیَ أَمْ غَدٜیَ؞