[1] بْرْࢽِ کَیْسَرِیَیٜلَࢽْ کَمْ لَا ثُࢽْجُ کُورْࢽٜلِیُسْ، تِ سُوجِ کُرَ رُومْبٜ ثُرُو کْوُ إِتَلِیَیٜ ثَࢽِیٜࢽْ کْرْغَ؞
[2] تِیَ أَمْ ࢻَࢽّجُیٜیَ أَدِࢽْوُ یٜ، اللَّه رِدَوُ یٜ؞ سَدَا ࢽغْوُ جَمَرُو ثِ، کُورُو سَوِسُو اللَّهَ لُواْجِ؞
[3] یِمْ لَا کَࢽْجِ سَ یَکُّ کَجِرِیٜࢽْ وَحَیِلَࢽْ مَلَیْیَ اللَّهیٜ لَا ࢽَࢽْجُرُو إِسٜ تِرُو: «کُورْࢽٜلِیُسْ!» ثْࢽِ کِرُو؞
[4] تِیَ رِیَدَرُو سِمْࢽِࢽْ ثَࢻُّو ثُرٜ تِرُو: «کْمَ، أَوِ؟» یٜࢽِّیَ، مَلَیْیَدْیٜ: «مُودُوَࢽْمْبَ سَدَاࢽْمْبَ أَوُو تَکْتُیٜرُو ࢻُوُ اللَّهیٜرُو إِسَࢽَ؞
[5] تُو، کْرْمَ أَمْ بْرْࢽِ یَࢻَیٜرُو جُوَغْࢽٜ، کَمْ لَا سِمَࢽْ تِرُو بِتُرُسْ ثَࢽِدَ بُواْجَ إِسُو!
[6] ࢻَدُو مْࢽْدْلْمَ لَا سِمَࢽْ ثَࢽِیٜࢽْ جْࢻْثْࢽَ؞ ࢻَࢽّجُدْ ثِ تٜکُیٜࢽْ؞»
[7] مَلَیْیَ تِرُو جَࢽْدٜجْغْࢽَدْ سَࢻْکَدَࢽِّیَ، کُورْࢽٜلِیُسْ ثُرُو وُولُودِیَࢽْجُیٜࢽْ یِࢽْدِیَ کُورُو ثُرُو سُوجِیَࢽْجُ تِرُو کِدَ ثَدِّیٜࢽْ مُمِࢽْ ࢻَلَّا بُواْیٜࢽُو؞
[8] تَیِرُو أَوُو وَکَّجْࢽَ سَمَّا وُلْجِیٜ بْرْࢽِ یَࢻَیٜرُو کِࢽُودُو؞
[9] وَجْࢽَࢽْجُوَ دُࢽِیَ کَوْسُ دَوُ غَیْ أَمْ کُورْࢽٜلِیُسْ ثُࢽُودْࢽَدْ کْلَ جَوَلّٜࢽْ بْرْࢽِدَ کَرْࢽْجَࢽَ دُوُوࢽْ، بِتُرُسْ مُودُوَ دِیُورُو کْلَ سُورُودْیٜرُو تَتْکٜࢽُو؞
[10] دَجِ کْࢽَ ࢻَࢽْجٜ مَسْࢽَ دِیُو کِرَوُو؞ کْمْبُو دٜجَیْ دُوُوࢽْ، وَحَیِ لَا تِیَ کِدَ؞
[11] أَکُّو سَمٜ ࢻْرْمْدٜ أَوُو لَا أَلَمَ بَتَّ کُرَا ثَمُࢽْ تَلْغْمُوࢽْجُ دٜوُیٜࢽْ تْدَࢽَ ثِدِیَرُو جْࢻْثِ کِرُو؞
[12] ثُرُوࢽْجُࢽْ لْمَࢽَّ سِ دٜوُوَ سُو، ࢽغَࢽْجِࢽْ غْرْدَوُ سُو، ࢽغُدُووَ سُو جِرِ ࢽغُسُوࢽْ مبٜجِ؞
[13] کُواْ لَا ࢽُکْثٜ تِرُو: «بِتُرُسْ، ثِࢽٜ! دُوَࢽٜ ࢽغْرٜ!» یٜࢽُو؞
[14] أَمَّ بِتُرُسّٜ: «أَعَ، کْمَ! ࢽغَلْتٜمَ أَوُو حَرَمْ سُو، تَیِرْ غْࢽِ سُو بُکّْࢽِ،» یٜࢽُو؞
[15] کُورُو کُواْدْ وَلْدٜ تِرُو: «أَوُو اللَّه حَلَلُّو ثْدْࢽَدْرُو بَرٜ تَیِرْ غْࢽِ وُلّْمِّ!» یٜࢽُو؞
[16] أَدْ یَکُّرُو وَکَّیٜࢽِّیَ، سَدْمَࢽْ بَتَّدْ کْلَ سَمٜࢽَّرُو ثِیٜࢽُو؞
[17] بِتُرُسْ کْلَ مَاࢽَ وَحَیِدْیٜࢽْ حَࢽْغَلْࢽْجُ ثَا ثِجْࢽَ دُوُوࢽْ، أَکُّو أَمْ کُورْࢽٜلِیُسْ ثُࢽُودْࢽَدْ ࢻَدُو سِمَࢽّٜ ثَوُورٜ ثَوَࢽْدٜ ثِࢽَّدْࢽْ دَجَࢽٜ
[18] کُواْ سَࢻْثَࢽٜ: «سِمَࢽْ کَمْ تِرُو بِتُرُسْ ثَࢽِدْ ࢽَ أَدْࢽْ وَ کْرْغَ؟» ثَࢽٜ کٜوُورُو؞
[19] بِتُرُسْ کُوَ یَیٜ کْلَ وَحَیِدْیٜࢽْ جُوُلَ ثْدِ دُوُوࢽْ، رُحُ اللَّهیٜ تِرُو: «أَکُّو أَمْ یَکُّ ࢽِیَ مَࢽْجَیْ؞
[20] ثِࢽٜ جْمّٜ شٜکُّ بَوُووَرُو تَیِیَ رُوکُّو لٜࢽُواْ، وُ کْلَࢽِ تَیِیَ ࢽُودْکّْࢽَ ࢽَࢽْغَرُو،» یٜࢽُو؞
[21] دَجِ بِتُرُسْ جْࢻْثٜ تَیِرُو: «وُمَ کَمْ مَࢽُوِدْ وُو؞ أَوِ ࢽجَوُدُو؟» ثْࢽٜ کِوُورْࢽِّیَ،
[22] تَیِیٜ: «سُوجِ کُرَ رُومْبٜ ثُࢽْجُ کُورْࢽٜلِیُسْ کَمْ دُوُوࢽْ جِرٜمَ یٜ، اللَّه رِدَمَ یٜ، کُورُو ࢽَ جَمَ یَوْدِیَ سَمَّیٜࢽْ دَرَجَادْ، مَلَیْیَ اللَّهیٜ لَا تِرُو ࢽِیَ ࢻَࢽّجُرُو ࢽجُوُدُو مَࢽَࢽْمْ ࢻَࢽْجُو یٜࢽُو؞»
[23] دَجِ بِتُرُسْ تَیِیَ ࢻَدُودْࢽْ ثْسَیٜ سُوسَیٜࢽُو؞ وَیٜࢽِّیَ، ثِجٜ کَلُّو لٜىٰرَ؞ کُورُو کْرَمِیَ بْرْࢽِ یَࢻَیٜ لَا یٜ تِیَ کٜسَدُّوُو؞
[24] وَجْࢽَࢽْجُوَ بْرْࢽِ کَیْسَرِیَیٜرُو کَدِیُو؞ کُورْࢽٜلِیُسْدْ ثَلَࢽْ أَمْ ࢻَࢽّجُیٜیَ سَوَوَࢽْجُوَا بُواْجٜ ثَࢻْتَࢽَ تَیِیَ غُرٜجَیْ؞
[25] بِتُرُسْ کَدِࢽِّیَمَ، کُورْࢽٜلِیُسْ تِیَ کَࢻْثِیٜ ࢻُوُࢽْجُࢽْ ࢽغُجٜ تِرُو سُجَدَ کِدُّو؞
[26] أَمَّ بِتُرُسْ تِیَ ثْسَࢽْغٜ: «ثِࢽٜ! وُ یٜ أَدَمْغْࢽَ، دِیٜ!» یٜࢽُو؞
[27] جَࢽْدٜجِییَرُو ࢻَدُودْرُو ࢽغَیٜ أَمْ کَدَ ثَࢻْکَدَ ࢽَیٜىٰࢽُو؞
[28] تَیِرُو: «یَوْدِرُو کَمْ جِرِ غَدٜرُو کْلْدُوُوَ ࢻَࢽّجُرُو ࢽغَوُووَ حَرَمْدْ ࢽَیِ کْلَࢽْدُو ࢽُوࢽُوَّ، أَمَّ اللَّه وُرُو بَرٜ وُࢽْدُمَا تَیِرْ غْࢽِ بِ حَرَمْبُو ࢽغُوکّْࢽِرُو إِسَࢽُوسْغْࢽَ؞
[29] أَدْ ࢽَࢽْغَرُو سَ وُوَ بُواْسُوَّدْمَࢽْ غَرْدَ بَوُووَرُو کَدِکُّو؞ تُو، ࢽَیِیَ ࢽجَوُورْکِّ، أَوِ دْلْوُ بُواْدُࢽْدُویٜ وُو؟» ثْࢽٜ کِوُورُو؞
[30] کُورْࢽٜلِیُسّٜ تِرُو: «کُ کَوُ دٜوُ سَ أَدْ غَیْ ࢻَࢽِّࢽْ مُودُوَ سَ یَکُّیٜ دِکِّ دُوُوࢽْ، کَمْ لَا کَجْمُ یِیلْجِیَ ࢻُوُࢽِࢽْ ࢻْلٜدْࢽٜ
[31] وُرُو: ‹کُورْࢽٜلِیُسْ، اللَّه مُودُوَࢽْمْ یٜ ࢻَࢽْجْࢽَ، سَدَاࢽْمْ یٜ تَکْثْࢽَ؞
[32] بْرْࢽِ یَࢻَیٜرُو أَمْ ࢽُودٜ، سِمَࢽْ تِرُو بِتُرُسْ ثَࢽِدَ بُواْجَ إِسُو! ثِ تٜکُیٜࢽْ ࢻَدُو سِمَࢽْ مْࢽْدْلْمَیٜࢽْ جْࢻْکٜࢽُو،› یٜࢽُو؞
[33] سَدْمَࢽْ ࢽِرُو أَمْ ࢽجُکُّࢽُودْکُّو، ࢽِ یٜ کَسَدّْمٜ إِسْمَّدْ، جَوْرُو ࢽغْلَ؞ أَدْ ࢽَࢽْغَرُو کْرْمَ أَࢽْدِ سَمَّ ࢻُوُ اللَّهیٜࢽْ أَوُو کْمَࢽْدٜ وُلْسَغَࢽٜ ثْࢽَّ سَمَّا ࢻَࢽْدُرُو ثَࢻْتِیٜࢽَ،» یٜࢽُو؞
[34] دَجِ بِتُرُسْ ثِࢽْجُ کَجٜ تَیِرُو: «جِرٜمَرُو اللَّه أَمْبَ غَیِرْدُمَ غْࢽِ،
[35] ثُرُو جَمَ ࢻِیٜ یَیٜࢽْ کَمْ دُوُوࢽْ تِیَ رِجٜ جِرٜ ثْدِدَ أَرْدِجِرُو أَسُࢽْکّْࢽَ؞
[36] اللَّه مَࢽَࢽْجُ جَمَ إِسْرَاءِیلَیٜرُو ثْدّٜ عِیسَى أَلْمَسِیوُیٜࢽْ کَوُرِ کْجِ ࢽَࢽْلٜوَیٜ تَیِرُو وُلْیٜىٰࢽُو؞ عِیسَمَ کْمَ أَمْ سَمَّیٜ وُو!
[37] ࢽغَوُو ࢽَوِ یَحْیـَى کَوُرِ کْلَ کَسَلَ تُوَیٜࢽْ جَمَرُو ثْدّْࢽَیٜࢽْ، أَوُو دُوُوࢽْ ثِدِ غَلِلٜىٰࢽْ بَدِجٜ ثِدِ یَحُدِیَیٜ ࢽغَرُو تَتَرْدْغْࢽَدَ ࢽَیِ کْلَࢽْدُو ࢽُوࢽُوَّ:
[38] اللَّه عِیسَى کَمْ ࢽَجَرَتّٜیَ غَلَجٜ تِرُو رُحُࢽْجُوَ کْࢽْدُوُووَ کٜکُّو؞ اللَّه تِیَ رُوکُّو ࢽَࢽْغَرُو دَدَجٜ سٜرْ ثْدٜ أَمْ دُوࢽْدِ کْࢽْدُوُو إِوُلِیسّٜࢽْ دَسَاࢽَ سَمَّا إِسَࢽْغَیٜىٰࢽُو؞
[39] أَوُو ثِدِ یَوْدِیَیٜࢽَّ جٜرُجَلٜمْࢽِࢽَّ ثْدْࢽَ سَمَّیٜ أَࢽْدِمَ شٜدَوُ وُو؞ کْسْکَرُو جَجَغَࢽٜ کٜىٰسُو یَیٜ،
[40] کَوُ یَکُّوَ اللَّه تِیَ ثْسَࢽْغٜ ثَکّٜ ࢻْلٜیَادَࢽْ،
[41] أَمَّ جَمَ سَمَّرُو غْࢽِ، أَࢽْدِ اللَّه ثَلَࢽْ شٜدَوُرُو کْرٜسَࢽَدْرُو، أَࢽْدِ دُوُوࢽْ ࢽغَوُو اللَّه تِیَ کَرْمُولَࢽْ ثْسَࢽْغْࢽَیٜࢽْ تِیَ رُوکُّو بُیْیٜࢽَ یٜ، یَیْیٜࢽَ یٜدْ؞
[42] عِیسَیٜ أَࢽْدِرُو وَدَ سَدٜ جَمَرُو کَوُرِࢽْجُ یِدِّیُو، تَیِرُو تِمَا دِیٜ اللَّه شَرَمَ أَمْ رُووَیٜیَ سَࢽُࢽَیٜیَرُو غَلَجْࢽَدْ وُودَ سَتْکْیْیُو یٜࢽُو؞
[43] ثَمَࢽْ ࢽَوِیَ سَمَّ کْلَࢽْجُࢽْ شٜدَجَࢽٜ وُࢽْدُ دُوُوࢽْ تِیَ کَسَثّْࢽَمَدْ ثُࢽْجُلَࢽْ غَوَرَ بِوُوَࢽْجُیٜ ثُوَࢽْدِ ثَࢽَّ؞»
[44] بِتُرُسْ مَࢽَ أَࢽِیَ وُلْجِ ࢽغَیْ دُوُوࢽْ، رُحُ اللَّهیٜ أَمْ کَوُرِدَ ࢻَࢽْجَیْ سَمَّرُو جْࢻْکٜىٰࢽُو؞
[45] یَوْدِیَ عِیسَىٰ غَوُ کَجَࢽْجَا بِتُرُسَّ کَلُّو إِسَࢽَدْ أَجَࢻْکٜرَ، دَلِلْࢽْجُدْ اللَّه رُحُࢽْجُدَ کْرْدِیَ یٜرُو ثِࢽَ ࢽَࢽْغَرُو؞
[46] أَوُووَ تْلَمْ غَدٜغَدٜࢽْ مَࢽَ ثَدٜ اللَّهَ ثُوࢽْغُورِدَ ࢻَࢽْغٜرَ؞ دَجِ بِتُرُسّٜ:
[47] «أَمْ أَࢽِ یٜ أَࢽْدِ غَیْ رُحُ اللَّهیٜ ثَوَࢽْدْࢽَدْ، وُࢽْدُ غْلٜ تَیِرُو کَسَلَ إِࢽْغِلَࢽْ ࢽجْدُّو دَࢻْثِیے؟» ثْࢽٜ
[48] وَدَ ثٜ ثُ عِیسَى أَلْمَسِیوُیٜࢽْ تَیِرُو کَسَلَ کٜدُّو؞ دَجِ بِتُرُسَّ کَوُ غَࢽَرُو دَوُࢽْجَࢽْ ࢽَࢻْثُورُو لُواْیٜرَ؞