[1] بُلُسْ مَجِلِسْوُدَ ࢽِࢽِجٜ تَیِرُو: «کْرَمِیَࢽِ، حَرْ کُرُو کَرْوُࢽِࢽْ سَرِوُ بَوُووَرُو ࢻُوُ اللَّهیٜࢽْ کْرْغَکُّو،» یٜࢽُو؞
[2] رِمَࢽْ کُرَ أَࢽَࢽِیَ أَمْ غْرٜ بُلُسّٜࢽْ دَادَدْرُو ثِࢽْجُ بَکْثَ یٜࢽُو؞
[3] دَجِ بُلُسّٜ تِرُو: «اللَّه ࢽِیَ بَࢽّجِ، ࢽِ غَرُ غَرُدَ بُلَّࢽْ ثِࢽْغَدَدْ! أَتَّوْرَا غَمِلَࢽْ شَرَ سْدّٜرُو ࢽَࢻْکَدَࢽْمْ دُوُوࢽْ، وُوَ بَࢽْسَ ࢽْمٜ أَتَّوْرَ غَ وَیٜمْ!»
[4] أَمْ ࢽَدْࢽْ دَادَدْیٜ تِرُو: «رِمَࢽْ کُرَ اللَّهیٜدَ رَࢽْمِ وَ؟» یٜرَࢽِّیَ،
[5] بُلُسّٜ: «کْرَمِیَࢽِ، تِمَ رِمَࢽْ کُرَ وُورُو ࢽُوکّْࢽِ، کِتَوُلَࢽْ رُوُوَدَ: ‹بَرٜ کْلَ ࢻُوُمَ جَمَࢽْمْبٜࢽْ مَࢽَکُتُّ وُلّْمِّ!›» یٜࢽُو؞
[6] بُلُسْ لَاࢽجَ سَدُسِیَ، لَا یٜ ࢻَرِسَوَرُو أَسُیٜࢽِّیَ، مَجِلِسْلَࢽْ کُواْ سَࢻْثٜ: «کْرَمِیَ، وُ ࢻَرِسَ، تَدَ ࢻَرِسَوَیٜ؞ کْلَ کَرْمُولَࢽْ ثِدُ مبٜجِرُو تْمَکّْࢽَیٜࢽْ وُرُو شَرَ سَدِّ،» یٜࢽُو؞
[7] أَدَ وُلْیٜࢽِّیَ، کَتّٜ ࢻَرِسَوَا سَدُسِیَایٜࢽْ کَمْبِوُ ثِجٜ مَجِلِسْدْ یَکَّدَࢽْ؞
[8] أَوُووَ سَدُسِیَدْ ثِࢽُواْ یٜ بَوُو، مَلَیْیَ سُو، جِࢽِّ سُو یٜ بَوُو ثَࢽِ، أَمَّ ࢻَرِسَوَدْ أَوُو أَࢽِ سَمَّ مٜࢽَّرُو کَسَثَّࢽَ؞
[9] دَجِ کَلَلَ ࢽغْوُ ثِیٜࢽُو؞ مَلْمْبَ أَتَّوْرَیٜ کْوُ ࢻَرِسَوَیٜ لَا ثِجَࢽٜ مَࢽَ جَوْ ثَدٜ: «کَمْ أَدْࢽْ أَوِمَ دِوِ ࢻَࢽْدِیٜࢽْدٜ؞ جِࢽِّ بِ مَلَیْیَ لَا تِرُو جَࢽْدٜجْغْࢽَا، ࢽدَ؟» یٜرَ؞
[10] کَمْبِوُدْ تَیْ دَجٜ جَوْجْࢽَرُو وَلْیٜࢽِّیَ، کَجَلَّدْ بُلُسَّ ࢽجَࢽْجَکْثَیْرُو رِجْࢽَ ࢽَࢽْغَرُو، وَدَ ثٜ کْوُ سُوجِیَیٜ ࢽغَسَوُو تِیَ دَوُࢽْجَࢽْ ثَدَ سُوجِدِدْرُو کَلَکْثَ یٜࢽُو؞
[11] بُࢽٜىٰࢽِّیَ، کْمَ غْرٜࢽْجُࢽْ دَجٜ تِرُو: «کَرْوُࢽْمْ غٜرٜ! جٜرُجَلٜمْࢽِࢽْ کْلَࢽِࢽْ شٜدَࢽْمَّدْ غَیْ، سَیْ بْرْࢽِ رُومْبٜ یٜࢽْ شٜدَࢽْمِیَ!» یٜࢽُو؞
[12] وَیٜࢽِّیَ، یَوْدِیَ لَا ثِ کْلْجَࢽٜ أَوِمَ جَوُیْوَوُو ثَسَیْوَوُورُو کَࢽْسِ جَوُࢽٜ سَیْ بُلُسَّ رُورُو ثٜىٰسِیَ دُوُوࢽْ یٜرَ؞
[13] أَمْ ثِ کْلْدَ أَدَ ثَدْࢽَدْ تَیِ ࢻِدٜوُمَا کُوجْࢽَ؞
[14] دَجِ ࢽَ وُرَوَ رِمَࢽَّیٜیَ أَمْوُرَوَایٜرُو لٜجَࢽٜ تَیِرُو: «أَوِمَ بُیْیٜوَوُو یَیْیٜوَوُورُو کَࢽْسِ جَوْ بُیْیٜࢽَ، سَیْ بُلُسَّ رُورُو یٜجِیٜیَ دُوُوࢽْ!
[15] تُو، کْرْمَ ࢽَیِدْ مَجِلِسْوُوَ رُوکُّو لَمَرْࢽْجُ کَلْکَلُّو کُورُوِ غَیْرُو کَجَلَّدْرُو تِیَ ࢽَࢽْدُورُو ثُوُدُو وُلُّواْ؞ أَࢽْدِ یٜ کَوُ إِسِمَرُو، تِیَ ࢽجٜجُورُو دَبَّرْدِیٜࢽَ،» یٜرَ؞
[16] أَمَّ بُلُسّٜ تَدَࢽْجُ تِرُو رَوَمَ وُو ثِ کْلْدَ أَدَ ࢻَࢽْغٜࢽِّیَ، سُوجِدِدْرُو لٜجٜ ࢽغَیٜ بُلُسُّو وُلْیٜىٰࢽُو؞
[17] دَجِ بُلُسْ سُوجِیَ کُرَیٜ ࢻَلْࢽْجَ بُواْجٜ تِرُو: «جَیْرُو أَدَ کَجَلَّدْیٜرُو یَدٜ، أَوُو لَا تِرُو وُلْدُوُیٜ ثْدَࢽَ،» یٜࢽُو؞
[18] دَجِ سُوجِدْ تِیَ ࢽغُوجٜ ࢽَ کَجَلَّدْیٜرُو ثَدٜ تِرُو: «بُلُسْ کُوسُومَ وُوَ بُواْسٜ جَیْرُو أَدَ ࢽَࢽْمْبُو کُدْکُّو یٜࢽُو، أَوُو لَا ࢽِرُو وُلْࢽْجِیے مبٜجِ ࢽَࢽْغَرُو؞»
[19] کَجَلَّدْ جَیْرُودَ مُکُّویٜࢽْ ثْدَࢽٜ سْغْرِرُو ثُتُّلُوٜ تِرُو: «أَوِ وُرُو وُلْدُوُیٜ تَمْ؟» ثْࢽٜ کِوُورُو؞
[20] تِیٜ: «یَوْدِیَ لَا کْلَ بُلُسّٜࢽْ کَلْکَلُّو ثَوُورِ غَیْرُو بَرِ مَجِلِسُّو یَدٜرُو ࢽجَوُورِ ثَࢽٜ ثِࢽْجَ کْلْجَࢽَ؞
[21] أَمَّ بَرٜ تَیِیَ کَسَدّْمِّ، ثُرُوࢽْجَࢽْ أَمْ ࢻِدٜوُمَا کُوجَࢽَ ثِࢽْجَ کْلْجَࢽٜ تِیَ ثٜىٰسْࢽِّࢽْ أَوِمَ جَوُیْوَوُو ثَسَیْوَوُورُو کَࢽْسِ جَوُࢽَ؞ کْرْمَدْ تَیِ دَبَّرْدَࢽَ، أَمَرِࢽْمْ بَسْ غُرٜجَیْ،» یٜࢽُو؞
[22] دَجِ کَجَلَّدْ جَیْرُودْرُو: «بَرٜ وُࢽْدُمَرُو أَوُو أَࢽِیَ وُلْسْغْمَّرُو وُلْغْمِّ!» ثْࢽٜ تِیَ کُولْجٜ لٜىٰࢽُو؞
[23] کَجَلَّدْ سُوجِ کُرَ یِࢽْدِ بُواْجٜ تَیِرُو: «سُوجِ یٜرْ یِࢽْدِیَ سُوجِ ࢻْرْوُ ࢻِتُلُرَّ سُوجِ کَجَآ یٜرْ یِࢽْدِیَ ثَمُّواْ، سَ لْغَرْ بُࢽٜىٰࢽْ بْرْࢽِ کَیْسَرِیَیٜرُو لٜدُرُو دَبَّرْدْࢽُواْ!
[24] ࢻْرْ کْمْبَیٜ یٜ دَبَّرْࢽُواْ، بُلُسْ تِرُو جُوَ کْلٜوَ سَلَیْࢽِࢽْ تِیَ ࢽَ غُومْࢽَ ࢻٜلِسّٜرُو یَدُواْ!» ثْࢽٜ
[25] وُوتِیَ ࢽغَیْ رُوُیٜࢽُو:
[26] «بَرْغَࢽْمِّࢽْ غُومْࢽَ ࢻٜلِسْ، ࢽغْوُرُو دْغَیْ! وُمَ کْلُودِیُسْ لِسِیَسْ؞
[27] کَمْ أَدَ یَوْدِیَ ثَدَࢽَ رُورُو ثٜىٰسِ دُوُوࢽْ، تِ کَمْ رُومْبٜرُو ࢻَࢽْغٜکّْࢽِیَ، وُوَ سُوجِیَࢽِیَ إِسِیٜ تِیَ مُکُّوࢽْجَلَࢽْ کِمُواْکُّو؞
[28] أَیَوْ ࢻِ تِرُو غْࢽَجَغَیْدَ ࢽُوکُّورُو تِیَ مَجِلِسْࢽْجَرُو کِیَدْکُّو؞
[29] کْلَ مَࢽَ لَا وَدَࢽْجَیٜࢽْ أَیَوْ غْࢽَجَارُو أَسُیٜکُّو، أَمَّ أَیَوْࢽْجُ ࢻِمَ کَرْمُو بِ کُوسُورُو ࢽجَکُّویٜ وَجِࢻْثْࢽِّ؞
[30] کْلَࢽْجُࢽْ ثِ کْلْدَ مبٜجِرُو ࢻَࢽْغٜکّْࢽِیَ، سَدْمَࢽْ تِیَ جُوَࢽْجْغْکّٜ أَمْ تِرُو أَیَوْ غْࢽَجَاࢽَدْ یٜرُو ࢻُوُࢽْمْࢽِࢽْ سُوࢽْجَ ࢽجَدُّو یٜکُّو؞»
[31] دَجِ سُوجِیَدْ وَدَࢽْجَ جَاࢽٜ بُلُسَّ ࢽغُوجَࢽٜ ثُرُو بُࢽٜىٰࢽْ بْرْࢽِ أَࢽْتِࢻَتِرِسّٜرُو کٜسَدُو؞
[32] وَجْࢽَࢽْجُوَ ࢻْرْوُدْ تِیَ ثَسَدُّوُورُو کُولْجَࢽٜ سُوجِدِدْرُو وَلَّدَرَ؞
[33] سُوجِ ࢻْرْوُدْ بْرْࢽِ کَیْسَرِیَیٜرُو إِسَࢽٜ وُوتِیَدَ غُومْࢽَرُو کٜدْࢽِّیَ، بُلُسْ یٜیَ مُکُّوࢽْجُرُو کٜسَکُّو؞
[34] غُومْࢽَ وُوتِیَدَ کْرَیٜࢽِّیَ، بُلُسُّو تِ لَرْدُ ࢻِیٜ ثْࢽٜ کِوُورُو؞ تِ لَرْدُ کِلِکِیَیٜرُو ࢻَࢽْغٜࢽِّیَ،
[35] تِیٜ: «أَمْ ࢽِرُو أَیَوْ غْࢽَࢽْجَاࢽَدْ إِسَیْیَ، مَࢽَࢽْمْ ࢻَکِّ،» یٜࢽُو؞ دَجِ بُلُسَّ مَیْرِ مَیْ حِرُدُسّٜرُو ثَادُو غُرٜجَ یٜࢽُو؞