[1] بِتُرُسَّ یَحْیـَىٰ جَمَدْرُو مَࢽَجَیْ ࢽغَیْ دُوُوࢽْ، رِمَࢽَّا کُرَ ࢻَدُو اللَّهیٜ غُرٜدُوُیٜیَ سَدُسِیَا ࢽَࢽْجَرُو إِسَࢽٜ
[2] جَوْرُو غْرْغَجَࢽَ، دَلِلْࢽْجُدْ بِتُرُسَّ یَحْیـَىٰ جَمَدَ أَلَمْجَیْ یٜ، عِیسَى ثِجْࢽَدْ غَیْ کَرْمُولَࢽْ ثِدُ مبٜجِ مَوُوجَیْ یٜ ࢽَࢽْغَرُو؞
[3] کَدِرَࢽِّیَ، تَیِیَ ثَدَࢽٜ دُࢽِیَ لْمْجْࢽَ ࢽَࢽْغَرُو کُوسُورُو ثَسَکّٜ کُولْجَࢽٜ وَیٜرَ؞
[4] أَدْ یَیٜ أَمْ مَࢽَدَ ࢻَࢽْجَࢽَدْیٜ ࢽغْوُࢽْجَ کَسَثَّࢽٜ، أَمْ عِیسَىٰ غَوُدْ أَلَمَ دْوُ أُوُ غَیْرُو وَلْیٜرَ؞
[5] وَجْࢽَࢽْجُوَ ࢻُوُوُوَ أَمْوُرَوَا مَلْمْبَ أَتَّوْرَیٜیَ جٜرُجَلٜمْࢽِࢽْ ثَࢻْکَدَرَ؞
[6] ثُرُوࢽْجَࢽْ أَࢽَّسْ رِمَࢽْ کُرَا کَیْࢻَسَّ یَحْیـَىٰ أَلٜکْسَࢽْدَا أَمْ غَدٜ ࢻَدُو رِمَࢽْ کُرَیٜ سَمَّا مبٜجِ؞
[7] بِتُرُسَّ یَحْیـَأٓ ثَسَکّٜ دَوُࢽْجَࢽْ دَیٜرَࢽِّیَ، تَیِرُو: «کْࢽْدُوُو ࢻِࢽْ بِ ثُ وُࢽْدُیٜࢽْ أَوُو أَدَ کِدُوْ؟» ثَࢽٜ کٜوُورُو؞
[8] دَجِ رُحُ اللَّهیٜ بِتُرُسَّ ثَکّٜ تَیِرُو: «ࢽَیِ ࢻُوُوُ جَمَیٜیَ أَمْوُرَوَا،
[9] کُ سٜرْ ࢽغُرْدِیرُو ࢽجْدُّووَ جِرِ ࢻِࢽْ کَمْ أَدْ ࢽغَجْࢽَایٜ کْلَࢽْ أَࢽْدِیَ سَوُورُوِیَ،
[10] ࢽَیِیَ جَمَ إِسْرَاءِیلَیٜ سَمَّا ࢽغْلَرُو ࢽُوࢽُواْ، ثُ عِیسَى أَلْمَسِیوُ کَمْ ࢽَجَرَتّٜ، کَمْ دُوُوࢽْ ࢽَیِ کْسْکَرُو جَاوٜ اللَّه یٜ تِیَ کَرْمُولَࢽْ ثْسَࢽْغْࢽَدْ، تِ ࢽَࢽْغَرُو کَمْ أَدْ کْلٜوَ سَلَیْ ࢻُوُࢽْدُوࢽْ دَادَ؞
[11] عِیسَدْ تِمَ کَوْ دُوُوࢽْ ࢽَیِ ࢻَدُو تَࢽْدُومَسُو وَࢽُوٜ کَوْ تَࢽْدُویٜ سَمَّرُو ࢻَیْدَارُو وَلْجْࢽَدْ وُو؞
[12] تِلَࢽْ غْࢽِیَ، ࢽَ وُࢽْدُمَ غَدٜىٰࢽْ ࢽجْکَّوُو ࢻَࢽْدُو بَوُو! دُࢽِیَ ࢽغَمَࢽْ ثُ غَدٜ أَمْبُو أَمَرْدْغْࢽَ تِلَࢽْ ࢽجْکَّوُو ࢻَࢽْدِیٜدْ بَوُو!» یٜࢽُو؞
[13] بِتُرُسَّ یَحْیـَىٰیٜ کَرْوُکِبَّࢽْجَدَ ثَرُࢽٜ تَیِدْ إِلْمُوُ غْࢽِ، تَلَاوَرُو أَسُیٜرَࢽِّیَ، أَجَࢻْکٜرَ؞ کُورُو تَیِ عِیسَىٰ رُوکُّورُو أَسُیٜرَ؞
[14] أَمَّ کَمْ ࢽغَجْࢽَدْ غْرٜ بِتُرُسَّ یَحْیـَىٰیٜࢽْ دَادَا ثَرُیْ ࢽَࢽْغَرُو، أَوُو کَلَکْتُوُیٜ تَیِرُو کَتْکٜرُو؞
[15] دَجِ مَجِلِسْدْࢽْ تَیِرُو ثَلُوُو ثَࢽٜ سَوَرْدَࢽٜ کَتّٜࢽْجَࢽْ:
[16] «أَوِ غْلٜ أَمْ أَࢽِرُو یِدِّیٜ؟ تَبَّتْ، أَمْ جٜرُجَلٜمْࢽِࢽْ دَسَاࢽَ سَمَّ أَلَمَ أَجَبَّ تَیِیٜࢽْ تْدْࢽَدَ دَمْ ࢽُوجَࢽَ، أَࢽْدِ یٜ رَࢽْغِیٜ کَتُّوُ ࢽِیٜوَوُو؞
[17] بَرٜ لَوَرْ أَدْ جَمَ سَمَّرُو تَتَرْدْغْࢽِّرُو تَیِیَ وُسَࢽِیُو، کُوَ أَدْࢽْ ࢻُوُࢽْ بَرٜ وُࢽْدُمَرُو ثُ أَدْیٜࢽْ مَࢽَ ثَدْࢽِّ،» یٜرَ؞
[18] دَجِ تَیِیَ بُواْجَࢽٜ بَرٜ جَࢽْدٜ بِ أَلَمْدُ ࢻِمَا ثُ عِیسَیٜࢽْ ثَدْࢽِّ یٜرَ؞
[19] أَمَّ بِتُرُسَّ یَحْیـَىٰیٜ تَیِرُو کَلَکْثَغَࢽٜ: «اللَّهیٜدْࢽَّ، ࢽَیِیَ غَ رَ اللَّهَ غَدْمَ کَلْکَلْ وُورُو شَرَࢽُواْ!
[20] أَࢽْدِدْ کْلَ أَوُو رُیْیٜࢽَا ࢻَࢽِّیٜࢽَایٜࢽْ رَࢽْغِیٜ ࢽْمِّیٜوَوُو،» یٜرَ؞
[21] کُورُو ࢽَࢽْغَدٜمْبُو مَجِلِسْوُدْ تَیِیَ وُسَیٜرَࢽِّیَ، کُولْیٜرَ؞ جَوَلْ تَیِرُو وُواْمْ غْࢽَدُوُیٜ ثَوَࢽْدْࢽِّ، دَلِلْࢽْجُدْ جَمَ سَمَّ کْلَ أَوُو وَکَّجْࢽَدْیٜࢽْ اللَّهَ ثُوࢽْغُورِ ࢽَࢽْغَرُو؞
[22] کَمْ تِرُو أَلَمَ أَدْ تْدّٜ ࢽغَجْࢽَدْ کْرْوُࢽْجُ ࢻِدٜوُمَا کُوجْࢽَ؞
[23] بِتُرُسَّ یَحْیـَأٓ کُولْیٜرَࢽِّیَ، لٜجَࢽٜ أَمْࢽْجَرُو أَوُو وُرَوَ رِمَࢽَّیٜیَ أَمْوُرَوَا تَیِرُو وُلْجَاࢽَ سَمَّا وُلْیٜىٰرَ؞
[24] أَدَ ࢻَࢽْغٜرَࢽِّیَ، کْلَ تِلُوࢽَّ کُواْ سَࢻْثَࢽٜ اللَّهرُو: «کْمَ، ࢽِمَ سَمٜیَ ثِدِیَ تٜکُوَ أَوُو ثُرُوࢽْجَࢽْ دَسَاࢽَ سَمَّآ أَلَࢽْغْمْ!
[25] ࢽِمَ رُحُࢽْمْلَࢽْ ثِ وَکِّلْࢽْمْ کَارِࢽْدٜ ࢽَوِ دَاوُدَیٜࢽْ وُلْیٜمْ: «‹أَوِرُو جَمَ کْرْدِیَسُو حَࢽْغَلْسَࢽْغُو ثَدْࢽَ، جَمَ دُࢽِیَیٜ یٜ بُووُرُو سَوَرْدَࢽَدْ؟
[26] مَیْیَ دُࢽِیَیٜ دَبَّرْغَدَرَ، ࢻُوُوُسُو یٜ ثَࢻْکَدَرَ، کْمَࢽْدٜیَ أَلْمَسِیوُࢽْجُوَرُو تُرُ ثَدِّ یٜرَ؞›
[27] «جِرٜمَرُو ثُرُو بْرْࢽِ أَدْیٜࢽْ مَیْ حِرُدُسَّ غُومْࢽَ بُࢽْتُسْ بِلَتُسَّ أَمْ لَرْدُوَ غَدٜسُویٜیَ جَمَ إِسْرَاءِیلَیٜیَ عِیسَى وَکِّلْࢽْمْ تَیِرْ غَلَࢽْمَّدْرُو تُرُ ثَدِّ ثَࢽٜ ثَࢻْکَدَرَ؞
[28] ࢽغَیْمَ أَوُو ثَلَࢽْ کْࢽْدُوُوࢽْمْࢽِࢽْ کَدَرْࢽْمَّ سَمَّا کٜدُو؞
[29] کْرْمَ کْمَࢽْدٜ، مَرْمَرٜیَࢽْجَدَ رُیْ، أَࢽْدِ کَرٜیَوَࢽْمْدْرُو مَࢽَࢽْمْ کَرْوُکِبُّوَرُو وُلْدُرُو سَدٜ!
[30] مُکُّوࢽْمْ یٜ سَࢽٜ، ثُ وَکِّلْࢽْمْ تَیِرْ عِیسَیٜࢽْ أَمْ إِسَࢽْغَدُوُ سُو، أَلَمَ سُو، أَوُو أَجَبَّ سُو وَکَّجَ!» یٜرَ؞
[31] اللَّهَ لُواْجَࢽٜ کٜسٜرْࢽِّیَ، ࢽَ ثَࢻْتَࢽَدْ لُولُوجٜ رُحُ اللَّهیٜ تَیِ سَمَّرُو جْࢻْثِیٜ کَرْوُکِبُّوَرُو مَࢽَ اللَّهیٜدَ وُلْدُ بَدِیٜرَ؞
[32] جَمَ عِیسَىٰ غَوُدْ سَمَّ کَرْوُࢽْجَ یٜ تِلُو، حَࢽْغَلْࢽْجَ یٜ تِلُو؞ وُࢽْدُمَ کْࢽْدَࢽْجُ تِ رُࢽْجُیٜ ثْࢽِوَوُو، أَمَّ أَوُوࢽْجَ سَمَّا کَلُّو ثَدَیْ؞
[33] کْࢽْغَیَمْبَدْ کْࢽْدُوُو دَمَ بَوُووَرُو شٜدَ کْلَ کَرْمُولَࢽْ ثِدُ کْمَ عِیسَیٜࢽْ ثَدِ، کُورُو سٜرْ کُرَ تَیِ سَمَّلَࢽْ دْغَیْ؞
[34] ࢽغَیْمَ ثُرُوࢽْجَࢽْ کَمْ ثُرُو لَمْبِیٜࢽْ دْغَࢽَ ࢻَلْمَ بَوُو؞ أَمْ سَمَّ کُلُوسُو بِ ࢻَدُوسُو ثَدَࢽَدْ ثَلَدٜ وُرِدَ ثَوُدٜ
[35] مُکُّو کْࢽْغَیَمْبَیٜرُو ثَسَکِّ، تَیِ یٜ وُࢽْدُ یَیٜرُو کْلَ مْرَدُࢽْجُیٜࢽْ دَغَرْجَغَیْ؞
[36] أَدْغَیْمَ کَمْ لَا کَدُوُ لٜوِیٜ ثُکُ کُوِرُسّٜࢽْ تَمْبْࢽَ تِرُو یُوسُࢻُ ثَࢽِ مبٜجِ؞ کْࢽْغَیَمْبَدْ تِیَ بَرْࢽَبَسْلَࢽْ بُواْجَیْ، مَاࢽَࢽْجُدْ کُواْرِ ࢽجُومَ؞
[37] کُلُو ثْدَࢽَ لَآ ثْلَدٜ وُرِدَ ثُوُدٜ مُکُّو کْࢽْغَیَمْبَیٜرُو کٜکُّو؞