[1] کْࢽْغَیَمْبَدَ کْرَمِیَ ثِدِ یَحُدِیَیٜلَࢽْ دَسَاࢽَدَ کْرْدِیَ یٜ مَࢽَ اللَّهیٜ کَسَثَّࢽَرُو ࢻَࢽْغٜرَ؞
[2] بِتُرُسْ جٜرُجَلٜمْبُو کَدِࢽِّیَ، کْوُ أَمْ کَجَادَیٜدْ تِرُو جَکَّدٜ:
[3] «جْمْبْلْمْبَیٜرُو ࢽغَامٜ، حَرْ تَیِیَ رُوکُّو مَسْࢽَ کِدُوْ!» یٜرَ؞
[4] دَجِ بِتُرُسْ لَمَرْدَ سَوِجٜ تَیِرُو وُلْدُوُ بَدِجٜ:
[5] «وُ بْرْࢽِ یَࢻَیٜلَࢽْ مُودُوَ دِکِّ دُوُوࢽْ، وَحَیِ لَآ کِرُکُّو؞ أَکُّو أَوُو لَا بَتَّ کُرَ غَیْ تَلْغْمُوࢽْجُ دٜوُیٜࢽْ تْدَࢽَ سَمٜࢽْ ࢽَࢽِرُو جْࢻْکٜࢽُو؞
[6] حَࢽْغَلْ غْࢽَادَرُو کِرُکّْࢽِیَ، ثُرُوࢽْجُࢽْ لْمَࢽَّ سِ دٜوُوَ سُو، ࢽغَࢽْجِࢽْ غْرْدَوُ سُو، بُࢽْدِیَ کَرَایٜ سُو، ࢽغُدُووَ سُو مبٜجِ؞
[7] دَجِ کُواْ لَا ࢽُکْثٜ وُرُو: ‹بِتُرُسْ، ثِࢽٜ! دُوَࢽٜ ࢽغْرٜ!› ثْࢽِ ࢻَࢽْغٜکُّو؞
[8] أَمَّ وُیٜ: ‹أَعَ، کْمَ! ࢽغَلْتٜمَ أَوُو حَرَمْ سُو، تَیِرْ غْࢽِ سُو ثِࢽِرُو ࢽغَاࢽِّ!› یٜکُّو؞
[9] کُورُو کُواْدْ وَلْدٜ سَمٜࢽْ ࢽُکْثٜ: ‹أَوُو اللَّه حَلَلُّو ثْدْࢽَدْرُو بَرٜ تَیِرْ غْࢽِ وُلّْمِّ!› یٜࢽُو؞
[10] أَدْ یَکُّرُو وَکَّیٜࢽِّیَ، أَوُو سَمَّ وَلْدٜ کْلَ سَمٜࢽَّرُو ثِیٜࢽُو؞
[11] «سَدْمَࢽْ أَمْ یَکُّ بْرْࢽِ کَیْسَرِیَیٜلَࢽْ ࢽَࢽِرُو ثَࢽُودْࢽَدْ ࢻَدُو دْغَیْیٜࢽَدْرُو کَدِرَ؞
[12] رُحُ اللَّهیٜ وُرُو شٜکُّ بَوُووَرُو تَیِیَ رُوکُّو لٜࢽِیُو یٜࢽُو؞ دَجِ کْرَمِ أَرَکُّ أَࢽِ وُوَ سَسَدُّوٜ ࢻَدُو کَمْدْیٜرُو کْرْغَیِیٜ؞
[13] جِرِ مَلَیْیَ لَا ࢻَࢽّجُࢽْ دَادَ ثُرُࢽَدَ أَࢽْدِرُو وُلْسٜىٰرَ؞ مَلَیْیَدْیٜ تِرُو: ‹أَمْ لَا یَࢻَرُو ࢽُودٜ، سِمَࢽْ تِرُو بِتُرُسْ ثَࢽِدَ بُواْجَ إِسُو!
[14] مَࢽَ دُوُوࢽْ تِلَࢽْ ࢽِیَ أَمْ ࢻَࢽّْمْبٜ سَمَّا ࢽجْکَّوُو ࢻَࢽْدُوِدَ ࢽِرُو وُلْࢽْجِیے،› ثْࢽَّ؞
[15] ࢽغَیْمَ مَࢽَ دِیُو ࢽغْسّْکّْࢽَ دُوُوࢽْ، رُحُ اللَّهیٜ أَࢽْدِرُو بُرْوُوࢽْ جْمْسَاࢽَدْ غَیْ، تَیِرُو جْࢻْکٜىٰࢽُو؞
[16] دَجِ مَࢽَ کْمَیٜ أَدَ تَکّٜکُّو: ‹یَحْیـَى إِࢽْغِلَࢽْ أَمْبُو کَسَلَ کِدُّو، أَمَّ رُحُ اللَّهیٜلَࢽْ ࢽَیِرُو کَسَلَ ࢽجَدِّ،› ثْࢽَّ؞
[17] تُو، اللَّه کْࢽْجُو دُوُوࢽْ أَࢽْدِ کْمَ عِیسَى أَلْمَسِیوُوَ کَسَدِّیٜࢽَدْرُو سَدْࢽَدْ غَیْرُو تَیِ یٜرُو کَلْکَلُّو ثِࢽَدْ، وُ وُࢽْدُ دُوُوࢽْ رَࢽْغْکّٜ اللَّهرُو دَࢻْکْکِّدْ؟»
[18] أَدَ ࢻَࢽْغٜرَࢽِّیَ، کَرْوُࢽْجَ ࢻَسّٜ اللَّهَ ثُوࢽْغُورْࢽٜ: «اللَّه کْرْدِیَ یٜرُو أَمَرْجِیٜ تُوَ ثَدٜ رُو ثَوَࢽْدِ، دِیٜ!» یٜرَ؞
[19] تَیِ دُوُوࢽْ کْلَ بَسَرِ إِسْتِࢻَࢽُسْ ࢽَࢽْغَرُو ثِجْࢽَیٜࢽْ تَتَرْدَࢽَدْ حَرْ لَرْدُ ࢻٜࢽِسِیٜیَ ثُکُ کُوِرُسّٜیَ بْرْࢽِ أَࢽْتَکِیَیٜیَرُو لٜىٰرَ؞ یَوْدِیَرُو کَجِیَ، کَمْ غَدٜرُو مَࢽَ اللَّهیٜ وُلْجَغَࢽِّ؞
[20] أَدْ یَیٜ أَمْࢽْجَ لَا ثُکُ کُوِرُسّٜیَ بْلَ کُرَࢽٜىٰیَدْ بْرْࢽِ أَࢽْتَکِیَیٜرُو لٜىٰرَࢽِّیَ، أَمْ تْلَمْ غْرٜسّٜ مَࢽَجَیْدْ یٜرُو کَوُرِ کْجِ کْلَ کْمَ عِیسَیٜࢽْ وُلْیٜىٰرَ؞
[21] کْࢽْدُوُو اللَّهیٜ تَیِلَࢽْ کْرْغَ ࢽَࢽْغَرُو، أَمْ کَدَ کَسَثَّࢽَدْ کْمَا غَوُرُو وَلْیٜرَ؞
[22] جَمَ عِیسَىٰ غَوُدْ جٜرُجَلٜمْلَࢽْ لَمَرْ أَدَ ࢻَࢽْغٜرَࢽِّیَ، بَرْࢽَبَسَّ بْرْࢽِ أَࢽْتَکِیَیٜرُو کٜࢽُودُو؞
[23] بْرْࢽِدْرُو إِسٜ سٜرْ اللَّه تَیِرُو ثْدّْࢽَدَ کِرُࢽِّیَ، کَرْوُࢽْجُ کْجِجٜ تَیِ سَمَّرُو کُواْرِ ثٜ کَرْوُ تِلُووَرُو کْمَا جَا یٜࢽُو؞
[24] بَرْࢽَبَسْدْ کَمْ ࢽغْلَمَ، رُحُ اللَّهیٜیَ کَمْبْرْسٜیَ تِلَࢽْ کَسَرْغَ؞ کُورُو أَمْ غْࢽَغْࢽِ کْمَرُو کْلَّادَرَ؞
[25] ࢽغَوُو أَدْیٜࢽْ بَرْࢽَبَسْ شَوُلُوَ مَدَرُو بْرْࢽِ تَرْسُسّٜرُو لٜىٰࢽُو؞
[26] ࢽَیٜىٰࢽِّیَ، تِیَ بْرْࢽِ أَࢽْتَکِیَیٜرُو کِوُدُو؞ سَا ࢻَلْ لَتُّو جَمَ عِیسَىٰ غَوُدْرُو کْلْدَغَࢽٜ أَمْ کَدَا أَلَمْغٜرَ؞ بْرْࢽِ أَࢽْتَکِیَیٜلَمَࢽْ ࢻُوُرَوَدَ کْرِسْتَلَࢽْ بُواْدُ بَدِیٜرَ؞
[27] یِمْ أَࢽِࢽْ ࢽَوِیَ لَا جٜرُجَلٜمْلَࢽْ بْرْࢽِ أَࢽْتَکِیَیٜرُو کَدِرَ؞
[28] ࢻَلْࢽْجَ أَغَبُسْ ثَࢽِ ثِجٜ رُحُ اللَّهیٜ تِیَ ثَکّٜ کْࢽَ کُرَ لَا دُࢽِیَ ࢽغَرُو ࢽغَیِ یٜࢽُو؞ کْࢽَدْ جَمَࢽْ کَیْسَرْ کْلُودِیُسّٜࢽْ وَکَّیٜࢽُو؞
[29] ࢻُوُرَوَدْ ࢽِیَ ࢽغُوجَࢽٜ وُࢽْدُࢽْجَ یَیٜ کْلَ رَکْتُࢽْجُیٜࢽْ بَࢽَ لَآ کْرَمِیَ ثِدِ یَحُدِیَیٜࢽْ دَسَاࢽَدْرُو جُوَجِیے یٜرَ؞
[30] ࢽغَیْࢽِࢽْ کْࢽْجُوࢽْجَ مُکُّو بَرْࢽَبَسّٜیَ شَوُلُیٜیَرُو ثَسَکّٜ أَمْوُرَوَدْرُو جُوَیٜىٰرَ؞