[1] دَجِ مَیْ أَغَرِࢻَیٜ بُلُسُّو: «کْلَࢽْمْࢽِࢽْ مَࢽَ دِیُورُو ࢽِرُو أَمَرْدْغْࢽَ،» یٜࢽِّیَ، بُلُسْ مُکُّو سَࢻْثٜ کْلَࢽْجُ مُواْرُو مَࢽَ بَدِیٜࢽُو:
[2] «بَرْغَࢽْمِّࢽْ، کُ کْلَ أَیَوْ یَوْدِیَ غْࢽَسَاࢽَ سَمَّیٜࢽْ کْلَࢽِ مُواْرُو ࢻُوُࢽْمْلَࢽْ مَࢽَ دِکِّدْ، کْجِ ࢻَکِّ،
[3] تَغْࢽَسُّو أَدَ سُو، کَمْبِوُ سُو یَوْدِیَیٜ ࢽغَا ࢽغْلَمَرُو ࢽُوࢽْمَّدْرُو؞ أَدْ ࢽَࢽْغَرُو لُواْࢽْجْکّْࢽَ، مَرْࢽٜ وُوَ کَࢽَدِلَࢽْ کْرْࢽْسْࢽٜ؞
[4] «یَوْدِیَ سَمَّ تْࢽْ غَࢽَࢽِلَࢽْ دَوُ جَمَࢽْدٜىٰ یٜࢽْ، جٜرُجَلٜمْ یٜࢽْ کْࢽْدْغَیْࢽِ دِکّْࢽَدَ ࢽُوجَࢽَ؞
[5] تُسّْࢽَ وُوَ ࢽُوسَࢽَدْ، ثَرَاࢽَا، وُ کْوُ أَدِࢽّدٜ جَوْ ࢻِتْ ࢻَرِسَوَیٜدَ غَکّْࢽَرُو رَکْثَࢽٜ شٜدَسَیْ؞
[6] کُورُو کْرْمَ وَدُ دُوُوࢽْ اللَّه کَارِیَࢽْدٜرُو ࢽغُوجْغْࢽَدْیٜࢽْ تْمَࢽِیَ ࢽَࢽْغَرُو، شَرَ کَمْسَغَیْ؞
[7] جِرِࢽْدٜ مٜوُࢽْ یِࢽْدِࢽْ یٜ وَدُ أَدْࢽْ تْمَࢽْجَا بُࢽٜیَ کَوْسُوَ دَدُ بَوُورُو اللَّهرُو أَمْبْثَّغَیْ؞ بَرْغَࢽْمِّࢽْ، وَدُ أَدْمَ ࢽَࢽْغَرُو یَوْدِیَ وُرُو أَیَوْ غْࢽَسٜىٰرَ!
[8] أَ! أَوِرُو غْلٜ ࢽَیِیٜ اللَّه أَمْبَ کَرْمُولَࢽْ ثْسَࢽْغِدْرُو تْمَّرُو یُوجِوَوُو ࢽُوِدْ؟
[9] «ثَلَࢽْ وُ کْلَࢽِدْ ثُ عِیسَى کَمْ ࢽَجَرَتّٜیَ بَوُورُو دِیُورُو أَوُو ࢽغْوُ دِکُّورُو ࢽغْلَرُو کِرُکُّو؞
[10] أَدْمَا جٜرُجَلٜمْلَࢽْ دِکُّو؞ ࢽَ وُرَوَ رِمَࢽَّیٜࢽْ أَمَرِ ࢻَࢽْدْکّٜ مُمِࢽَّ کَدَ کُوسُورُو کٜکّْکُّو؞ کُورُو سَ تَیِیَ رُورُو ثٜىٰسْࢽَدْࢽْ، وُ یٜ کَسَدّْکّْࢽَ؞
[11] دَࢽْدَلْ سَمَّࢽْ ࢽغْوُرُو عِیسَىٰ بَسَّرُو تَیِرُو وُواْمْ غْࢽَغْکِّ؞ کَرْوُࢽِ تَیِیَ وُلْ وَجْࢽَ ࢽَࢽْغَرُو، حَرْ بْرْࢽِیَ لَرْدُ غَدٜىٰرُو لٜکّٜ تَیِیَ بَسَرْࢽْکِّ؞
[12] «أَدْغَیْمَ کْࢽْدُوُووَ أَمَرِیَ وُرَوَ رِمَࢽَّیٜیَلَࢽْ بْرْࢽِ دَمَسّٜرُو لٜکِّ دُوُوࢽْ،
[13] بَرْغَࢽْمِّࢽْ، کَوْسُ کْلَ دَوُ غَیْ جَوَلَّࢽْ ࢽُرْ سَمٜىٰ لَا کْࢽْغَلْمَا یِیلْدُࢽْ کُوجْࢽَ وُوَ أَمْ سَسَدُّوِیَا وَسّٜ دِرِسَࢽٜ کْلْسَࢽَ کِرُکُّو؞
[14] أَࢽْدِ سَمَّ ثِدِرُو کِکُّرُیْیٜࢽْدٜیَ، کُواْ لَا تْلَمْ یَوْدِیَوْدِࢽْ وُرُو: ‹شَوُلُ، شَوُلُ، أَوِرُو وُوَ بَسَرْسْمِدْ؟ کَ سَتْرَࢽْ بَکْتُ ࢽِرُو جَوْ،› ثْࢽٜ ࢻَࢽْغٜکُّو؞
[15] ‹کْمَ، ࢽِ وُࢽْدُ؟› ࢽْکّٜ کِوُورْکّْࢽِیَ، کْمَدْیٜ: ‹وُمَ عِیسَى بَسَرْسْمِدْ وُو؞
[16] کُوَ ثِࢽٜ، دَࢽٜ! دَلِلْ ࢽِرُو ࢻْلٜدْغْکّْࢽَیٜدْ، تِمَ کَدُࢽُومَࢽِ یٜ، شٜدَمَࢽِ أَوُو کُ رُمَّا ࢻُوُࢽْ ࢻْلٜࢽْجْغْکِّیَیٜ یٜرُو ࢽجْدْکُّورُو؞
[17] مُکُّو جَمَࢽْمْبَ جَمَ کْرْدِیَیٜیَیٜࢽْ ࢽِیَ ࢽجْمُواْکِّ؞ کْرْدِیَدْیٜرُو جُوَࢽْجْغْکّٜ
[18] سِمْࢽْجَ کَࢽْمِ، تَیِیَ ثُرُو دُوُیٜࢽْ تُلُوُمٜ ࢽُرُّو یَکّْمِ، کُورُو تَیِیَ کْࢽْدُوُو إِوُلِیسّٜࢽْ تُلُوُمٜ اللَّهیٜرُو کَلَکّْمِ؞ أَدْغَیْمَ غَوَرَ بِوُیٜ ثَوَࢽْدِ، کُورُو ثُرُو أَمْ دُوُوࢽْ کَمْبْرْسٜࢽْجَ ࢽَࢽْغَرُو تَیِرُّو وَلْجَࢽَدْیٜࢽْ ࢽُوَࢽْجَ یٜ ثَوَࢽْدِ؞›
[19] «بَرْغَࢽْمِّࢽْ، أَدْ ࢽَࢽْغَرُو وَحَیِ سَمٜىٰ أَدَ غَ وَکّْࢽِ،
[20] أَمَّ بُرْوُوࢽْ أَمْ دَمَسّٜرُو مَࢽَ اللَّهیٜ وُلْیٜىٰکُّو، دَجِ أَمْ جٜرُجَلٜمْبٜیَ ثِدِ یَحُدِیَیٜ سَمَّیٜیَرُو، حَرْ جَمَ کْرْدِیَرُو وُلْیٜىٰکُّو؞ تَیِرُو تْمْجَ، ࢽَ اللَّهیٜرُو وَلْدَ، کُورُو کْࢽْدُو تُوَ جِرٜىٰ ࢻْلٜجِسُووَ ثَدُو یٜکُّو؞
[21] أَدْمَ ࢽَࢽْغَرُو یَوْدِیَ لَا ࢻَدُو اللَّهیٜࢽْ وُوَ سَدَࢽٜ ࢽجٜجُورُو مَسٜرَ؞
[22] أَمَّ حَرْ کُمَرُو بَࢽَ اللَّهیٜ ࢻَࢽْدْکّْࢽَ، ࢽَدْࢽْ دَࢽْکّٜ أَمْ کُرَࢽْ غَࢽَࢽْ سَمَّرُو شٜدَغْکِّ؞ أَوِمَ غَدٜ وُلّْکِّوَوُو، سَیْ أَوُو ࢽَوِ مُوسَىٰ ࢽَوِیَ غَدٜیَ وَکَّجِ ثَࢽَّدْ:
[23] أَلْمَسِیوُ بُوࢽٜ ثَیْ، تِمَ بُرْوُوࢽْ کَرْمُولَࢽْ ثِجِ، کُورُو أَمْࢽْدٜیَ جَمَ کْرْدِیَارُو ࢽُرْ مَوُوجِیے؞»
[24] بُلُسْ أَوُو أَࢽِیَ کْلَࢽْجُ مُواْرُو وُلْدُ ثْدِ ࢽغَیْ دُوُوࢽْ، غُومْࢽَ ࢻٜسْتُسْ کُواْ سَࢻْثٜ تِرُو: «بُلُسْ، ࢽِ جُورِ! کْرَࢽْمْ ࢽغْوُ ࢽِیَ ࢽجَکّٜ جُورِࢽْمَّ!» یٜࢽِّیَ،
[25] بُلُسّٜ تِرُو: «بَرْغَࢽْمِّࢽْ غُومْࢽَ ࢻٜسْتُسْ، وُ جُورِ غْࢽِ؞ حَࢽْغَلْࢽِیَ ثُورْ جِرٜ بَسْ مَکِّ؞
[26] مَیْ أَغَرِࢻَ أَوُو أَࢽِ سَمَّا ࢽُوجْࢽَ، کُورُو تِرُو رِدُ بَوُووَرُو جَࢽْدٜغْکِّ؞ أَسْرَّمْبٜࢽْ غْࢽِ وَکَّجَࢽَدْرُو، أَوُو مَیْدْ ࢽُوجْࢽِّ ࢻَلْمَ بَوُورُو ࢽُوکّْࢽَ؞
[27] بَرْغَࢽْمِّࢽْ مَیْ أَغَرِࢻَ، ࢽَوِیَدَ کَسَدّْمَّ وَ؟ کَسَدّْمَّرُو ࢽُوکّْࢽَ!»
[28] دَجِ مَیْدْیٜ بُلُسُّو: «أَ! سَمْ ࢻَلْࢽِࢽْ وَ وُوَ کْرِسْتَرُو سْدْمِ تْمَࢽْمْ؟» یٜࢽِّیَ،
[29] بُلُسّٜ تِرُو: «سَمْ ࢻَلْࢽِࢽْ یَیٜ، ࢽغْوُࢽْ یَیٜ، ࢽِ رُࢽْمْ غْࢽِ، أَمْ کُ وُوَ کْرْࢽْسَیْ سَمَّ سَرْغَ أَࢽِرُو کَجِیَ، وُ غَیْرُو وَلْجَرُو اللَّهَ کُورْکِّ؞»
[30] دَجِ مَیْدَ غُومْࢽَدَ مَیْرَمْ بَࢽِیَتُوَ أَمْ تَیِیَ رُوکُّو ࢽَࢻْکَدَا ثِجَࢽٜ
[31] کٜلُوُࢽِّیَ، کَتّٜࢽْجَࢽْ: «کَمْ أَدْ أَوِمَ کَرْمُو بِ کُوسُورُو ࢽجَکُّویٜ وَجِࢻْثْࢽَ ثْدِ بَوُو،» ثَࢽِ؞
[32] دَجِ مَیْ أَغَرِࢻَیٜ غُومْࢽَ ࢻٜسْتُسُّو: «ثَ کَیْسَرْ تِرُو شَرَ ثْدُّو ثْࢽِّیَ، رَࢽْغِیٜ تِیَ کُولِّیٜ،» یٜࢽُو؞