[1] یِمْ ࢽغْمْرِ تِرُو ࢻٜࢽْتِکُوسْ ثَࢽِدْ کِدْࢽِّیَ، عِیسَىٰ غَوُدْ سَمَّ ࢽَ تِلُوࢽْ ثَࢻْتَࢽَ دُوُوࢽْ،
[2] سَدْمَࢽْ أَوُو لَا کَرُوَ جَوْرُو ثْغَسِ غَیْ سَمٜلَࢽْ ࢽُکْثٜ ࢻَدُو ࢽَ ࢽَࢻْثَࢽَدْ سَمَّا کِمُواْ؞
[3] أَوُو لَا أَلَمَ تْلَمْبَ کَࢽُّیٜ غَیْ تَیِرُو ࢻْلٜدَغَࢽٜ ࢻَࢻَیْدَࢽٜ کْلَ وُࢽْدُࢽْجَ یَیٜࢽْ ࢽَࢻْکٜࢽُو؞
[4] ࢽغَیْࢽِࢽْ رُحُ اللَّهیٜ تَیِ سَمَّرُو جْࢻْثِیٜ ثَکّٜ تْلَمْبَ غَدٜغَدٜࢽْ مَࢽَدُ بَدِیٜرَ؞
[5] سَ أَدْ یٜࢽْ یَوْدِیَ مُمِࢽَّ لَا لَرْدُوَ دُࢽِیَ سَمَّیٜ جٜرُجَلٜمْبُو إِسَࢽٜ دَسَاࢽَ مبٜجِ؞
[6] ࢽُکْتُ أَدَ ࢻَࢽْغٜرَࢽِّیَ، جَمَ إِسَࢽٜ ثَࢻْتَࢽٜ حَࢽْغَلْࢽْجَ ثِیٜࢽُو، دَلِلْࢽْجُدْ وُࢽْدُࢽْجَ یَیٜ تْلَمْࢽْجُࢽْ جَࢽْدٜجَیْ ࢻَࢽْجْࢽَ ࢽَࢽْغَرُو؞
[7] جَوْمَرُو أَجَࢻْثَࢽٜ کَتّٜࢽْجَࢽْ: «أَمْ جَࢽْدٜجَیْ أَࢽِ سَمَّ أَمْ ثِدِ غَلِلٜىٰ، غْࢽَ؟
[8] تُو، جِرِ ࢻِࢽْ غْلٜ وُࢽْدُࢽْدٜ یَیٜ أَوُو وُلْجَیْدَ تْلَمْࢽْجُ تَمْبُویٜمَࢽْ ࢻَࢽْجِدْ؟
[9] «ثُرُوࢽْدٜࢽْ أَمْ ࢻَرْتِیَیٜیَ مٜدِیَیٜیَ إٜلَمْبٜیَ مبٜجِ؞ لَاࢽدٜ یٜ مٜسُوࢻُوتَمِیَا یَحُدِیَا کَࢻَدُوکِیَا ࢻَࢽْتُسَّ أَسِیَا
[10] ࢻِرِجِیَا بَمْࢻِلِیَا مَسَرَّ کْرْیٜ لِبِیٜ کَࢽْجِ بْلَ کُرَࢽٜىٰࢽَّ بْرْࢽِ رُومْبٜیَلَࢽْ کَسَرْغَ؞
[11] غَدٜࢽْدٜ یَوْدِ یٜࢽْ کَلْ، کْرْدِ دُوُوࢽْ یَوْدِرُو وَلْیٜࢽُو یٜࢽْ کَلْ، کْرٜتَّ أَرَبِیَالَࢽْ کَدِرَ؞ تْلَمْࢽْدٜࢽْ أَوُو أَجَبَّ أَجَبَّ اللَّه ثْدْࢽَدَ أَمْ أَࢽِ وُلْجَیْ ࢻَࢽِّیٜ!»
[12] تَیِ سَمَّ جَوْمَرُو أَجَࢻْثَࢽٜ حَࢽْغَلْࢽْجَ ثِجٜ وُࢽْدُیٜ کَمَࢽْجُرُو: «أَوُو أَتّْ، أَوِ مَاࢽَࢽْجُ وُو؟» ثْࢽِ؞
[13] أَمَّ لَا یٜ تَیِیَ رُجَࢽٜ: «دِبٜࢽْ لٜلٜ دِیٜ ثَسَࢽٜ سَغَرَࢽْدَࢽَ!» ثَࢽِ؞
[14] دَجِ بِتُرُسْ کْࢽْغَیَمْبَ مٜوُࢽْ تِلُوࢽْدَ رُوکُّو ثِجٜ دَجٜ کُواْ سَࢻْثٜ جَمَدْرُو: «أَمْ لَرْدُ یَحُدِیَیٜیَ ࢽَیِ جٜرُجَلٜمْلَࢽْ دْغَوَّ سَمَّا مَࢽَࢽِ ࢻَࢽُّواْ، أَوُو أَدَ أَسُࢽُواْ!
[15] أَمْ أَࢽِ سَغَرَࢽْدَࢽَرُو تْمَࢽُوَّ دُوُوࢽْ، ࢽغَیْ غْࢽِ، کْرْمَدْ سَ لْغَرْ سُوَیٜ؞
[16] أَمَّ أَدْمَ أَوُو اللَّه ثِ ࢽَوِ یُووٜلّٜࢽْ وُلْجْࢽَدْ:
[17] «‹جَمَࢽْ دَرْیٜىٰࢽْ أَدَمْغْࢽَ سَمَّرُو رُحُࢽِدَ ࢻِغْکّٜ تَدَوَࢽْدُووَ ࢻٜرُووَࢽْدُووَ ࢽَوِࢽَوِ ثَدٜ، جَیْرُووَࢽْدُو یٜ وَحَیِ ثَرُیْ، کِیَرِیَࢽْدُو یٜ کْࢽَّسِمْ ثَدِ؞
[18] یِمْ أَࢽِࢽْ حَرْ کَࢽْجِیَࢽِ کوَا کَمُوَرُو رُحُࢽِدَ ࢻِغْکّٜ ࢽَوِࢽَوِ ثَدِ؞
[19] أَوُو أَجَبَّ أَجَبَّ سَمٜلَࢽْ دِکِّ، أَلَمَسُو یٜ ثِدِلَࢽْ دِکِّ: بُوَ کَࢽُّوَ کَࢽْغٜ ثْلْمْ سَمٜرُو ثِرِجِییَ؞
[20] کْࢽْغَلْ یٜ ثْلْمْبُو وَلْجِ، کُمْبَلْ یٜ بُرُو وَلْجِ؞ ࢽغَوُو أَدْیٜࢽْ یِمْ کُرَ دَرَجَا کْمَࢽْدٜىٰدْ إِسِ؞
[21] دَجِ وُࢽْدُ دُوُوࢽْ ثُ کْمَࢽْدٜىٰیَ بُواْجْࢽَمَدْ ࢽجْکَّوُو ثُوَࢽْدِ؞›
[22] «جَمَ إِسْرَاءِیلَیٜ، مَࢽَ أَدَ ࢻَࢽُّواْ! ࢽَیِمَ دَمْ ࢽُوࢽُوَّ، اللَّه عِیسَى کَمْ ࢽَجَرَتّٜدْلَࢽْ کْࢽْدُوُو سُو، أَوُو أَجَبَّ سُو، أَلَمَ سُو دَوُࢽْدُوࢽْ ثْدِیَرُو تِیَ أَرْدِجْࢽَرُو ࢻْلٜىٰࢽُو؞
[23] ࢽُودُࢽْجُࢽْ ثَمَࢽْ تَغْࢽَسُّو کَدَرْجْࢽَدْ غَیْ، تِمَا مُکُّوࢽْدُورُو سْرْثَّغَࢽٜ، ࢽَیِ یٜ مُکُّو أَمْ دِوِیٜلَࢽْ تِیَ کْسْکَرُو جَوُوٜ کٜجُوْ؞
[24] أَمَّ اللَّه تِیَ أَجَوُ کَرْمُویٜرُو ثْکَّیٜ رُووَرُو کِسَࢽْغُو، کَرْمُودْ تْمَّرُو رَکْثٜ تِیَ رُوجِوَوُو ࢽَࢽْغَرُو؞
[25] أَوُووَ ࢽَوِ دَاوُدَ کْلَ تِیٜࢽْ أَدَ وُلْیٜࢽُو: «‹کُلُّمْ کْمَࢽْدٜیَ ࢻُوُࢽِࢽْ رُکِّ، تِ کْمْبُورَمِّࢽْ دْغَࢽَ ࢽَࢽْغَرُو أَوِمَ لُولُودُرُو سَکِّوَوُو؞
[26] أَدْمَ ࢽَࢽْغَرُو کَرْوُࢽِ کْجِجِ، ثِࢽِ یٜلَࢽْ أَیْیَ یٜکِّ؞ تِیࢽِ یٜ تْمَا دْغَیْ،
[27] دَلِلْࢽْجُدْ رُوࢽِ کَࢽُّلَࢽْ کُولّْمْبَوُو، تِ تَیِرْࢽْمْدَ یَکّْمٜ ࢽجْࢻْثِوَوُو ࢽَࢽْغَرُو؞
[28] جَوَلْ رُو ࢻَࢽْدُویٜ إِسَࢽُوسْغْمَّ، کُورُو ࢻُوُࢽْمْࢽِࢽْ کَرْوُکْجِ دَدُ بَوُو سِمِ؞›
[29] «کْرَمِیَࢽِ، کْلَ کَارِࢽْدٜ ࢽَوِ دَاوُدَیٜࢽْ ࢽَیِرُو ࢻَرَکُّو وُلْࢽْجَغَکِّ، بَوُوجٜ تِیَ سِتّْرَیٜرَ، کَوْرِࢽْجُ یٜ کُمَرُو ࢽَࢽْدٜࢽْ کْرْغَ؞
[30] تُو، تِ ࢽَوِ دُوُوࢽْ، کُورُو اللَّه تِرُو کَدُوُࢽْجُ ࢻَلْ مَیْرُو غَلَجِرُو کَࢽْسِ جْبُّࢽَدَ ࢽُوجْࢽَدْ،
[31] ثَمَࢽْ کَرْمُولَࢽْ ثِدُ أَلْمَسِیوُیٜدَ ثُرٜ کْلَدْࢽْ تِیٜ کَࢽُّلَࢽْ تِیَ کُولْجْࢽِّ، تِیࢽْجُ یٜ ࢽجْࢻْثْࢽِّ ثْࢽَّ؞
[32] تِ عِیسَى أَدْمَا اللَّه رُووَرُو کَلَکْثُو، کْلَ أَدْیٜࢽْ أَࢽْدِ سَمَّ شٜدَوُ؞
[33] تِیَ کْمْبُورَمْ اللَّهیٜرُو سَࢻْثَࢽٜ، رُحُ اللَّهیٜ دُوُوࢽْ بَوَدْ ثِ ثْࢽٜ وَدُ ࢽغُوجْࢽَدَ ثْمُواْࢽَ أَدْ، أَوُو رُوَّا ࢻَࢽُّوَّادَ ࢻِیٜىٰࢽُو؞
[34] أَوُووَ ࢽَوِ دَاوُدَ سَمٜرُو لٜجْࢽِّ، أَمَّ تِ کْلَࢽْجُیٜ: ‹کْمَࢽْدٜىٰ کْمَࢽِرُو: ࢽَمّٜ کْمْبُورَمِّلَࢽْ دُوُوࢽْ،
[35] کْلَدُووَࢽْمْبَ سِ غْࢽَدُرَمّْمْبُو دِکِّ! ثْࢽَّ؞›
[36] أَدْ ࢽَࢽْغَرُو جَمَ إِسْرَاءِیلَیٜ سَمَّ أَدَ ࢻَغَتُّو ࢽُوجَ: عِیسَى کَمْ کْسْکَرُو جَجَغْوَّدْ، اللَّه تِمَا کْمَ یٜ، أَلْمَسِیوُ یٜرُو ثْدُو!» یٜࢽُو بِتُرُسّٜ؞
[37] جَمَدْ أَدَ ࢻَࢽْغٜرَࢽِّیَ، کَرْوُࢽْجَ کَمْدٜ بِتُرُسَّ کْࢽْغَیَمْبَ غَدٜدَرُو: «کْرَمِیَࢽْدٜسُو، أَوِ غْلٜ دِیٜ؟» ثَࢽٜ کٜوُورُو؞
[38] بِتُرُسّٜ تَیِرُو: «تْمُّواْ، بِوُࢽْدُو ثِࢽْدُورُو وُࢽْدُࢽْدُو یَیٜرُو ثُ عِیسَى أَلْمَسِیوُیٜࢽْ کَسَلَ ثَدُّو، ࢽغَیْࢽِࢽْ اللَّه رُحُࢽْجُدَ ࢽجَدِ؞
[39] أَوُووَ وَدُ أَدْمَدْ کَاࢽدُو یٜ، کَدُوُࢽْدُویٜ یٜ، أَمْ کُرُوُࢽْ دَسَاࢽَ سَمَّیٜ یٜ، وُوتّٜ وُࢽْدُ دُوُوࢽْ اللَّه کْمَࢽْدٜ بُواْجِدْیٜ؞»
[40] بِتُرُسْ مَࢽَ غَدٜ ࢽغْوُلَࢽْ سْمُوࢽْجَ کَسّٜ غَلَ ثْدّٜ: «جَمَࢽْ دِوِ أَدْلَࢽْ کْلَࢽْدُووَ یْکَّوُواْ!» ثْࢽِ؞
[41] دَجِ أَمْ مَࢽَࢽْجُ ࢽغُوجَࢽَدْرُو کَسَلَ کٜدُّو؞ یِمْ أَدْࢽْ أَلَمَ أَمْ دْوُ یَکُّ غَیْ عِیسَىٰ غَوُدْرُو کْلَّادَرَ؞
[42] سَوِسُو کَرْوُ تِلُووَرُو عِیسَىٰ غَوُدْ أَلَمْدُ کْࢽْغَیَمْبَیٜدَ کْرْࢽْجَیْ، ࢽَࢻْتُ ࢽَࢽْیَاࢽَیٜ ثَدِ، بُرُودِ ࢻْسَکْثَࢽٜ کَلُّو جَغَرِ، مُودُوَ یٜ رُوکُّو ثَدِ کَسَرْغَ؞
[43] مُکُّو کْࢽْغَیَمْبَدْیٜࢽْ أَوُو أَجَبَّ سُو، أَلَمَ سُو کَدَ تَدِ ࢽَࢽْغَرُو، أَمْ سَمَّ رِیٜرَ؞
[44] عِیسَىٰ غَوُ سَمَّ ࢽَ تِلُوࢽْ دَسَاࢽَ، أَوُوࢽْجَ سَمَّا کَلُّو ثَدَیْ،
[45] کُورُو کْࢽْدَࢽْجَ ثَلَدٜ وُرِدَ دَغَرْجَࢽٜ مْرَدُ وُࢽْدُیٜ یَیٜ غَلْجَیْ؞
[46] یِمْبِ یَیٜ کَرْوُ تِلُووَرُو ࢻَدُو اللَّهیٜࢽْ ثَࢻْتَیْ، ࢻَدُو ࢻَدُولَࢽْ بُرُودِ ࢻْسَکْثَࢽٜ کَرْوُ کْجِیَرُو رُوکُرَ بَوُووَلَࢽْ کْمْبُوࢽْجَدَ کَلُّو جَوُیْ،
[47] اللَّهَ ثُوࢽْغُورِ، کُورُو ࢽَ جَمَ سَمَّیٜࢽْ أَرْدِیَ ثَوَࢽْدِ کَسَرْغَ؞ یِمْ ࢽغُسُوࢽْ کْمَࢽْدٜ أَمْ ࢽجْکَّوُو ثَوَࢽْدِدَ تَیِرُو کْلْجِیے؞