[1] ࢽغَوُو حَࢽْغَلْسَࢽْغُودْ ثٜرْࢽَیٜࢽْ، بُلُسْ ࢻُوُرَوَدَ بُواْجٜ کَرْوُࢽْجَرُو کُواْرِ ثٜ تَیِیَ أَلَکْلٜوَیٜࢽِّیَ، لَرْدُ مَکِدُوࢽِیَیٜرُو لٜدُرُو سَࢻْکَدَࢽْ؞
[2] لَرْدُدَ جْغَࢽٜ مَࢽَ کَدَࢽْ تَیِ یٜرُو کُواْرِ کٜࢽِّیَ، لَرْدُ غْرٜسّٜرُو لٜجٜ
[3] کْࢽْدَوُ یَکُّرُو ࢽَࢻْکٜࢽُو؞ ثِدِ سِرِیٜرُو مَارَلَࢽْ لٜدُ مَجِ دُوُوࢽْ، یَوْدِیَ لَا تِرُو ࢽِیَدِوِ ثَدِّ ثَࢽٜ ثِ کْلْیٜرَ؞ دَجِ لَرْدُ مَکِدُوࢽِیَیٜࢽْ رٜࢽْمٜ کُودُرُو ࢽِیَ ࢽغُویٜࢽُو؞
[4] أَمْ تِیَ ثَسَدُّوُࢽَدْ تَیِمَ سُوࢻَتَ تَدَ ࢻِرُسّٜ کَمْ بْرْࢽِ بِرِیَیٜ، أَرِسْتَرْکُسَّ سَکُࢽْدُسَّ بْرْࢽِ تَسَلُوࢽِکَیٜ، غَیُسْ کَمْ بْرْࢽِ دَرْبٜىٰ، تِمُوتِ، کُورُو تِکِکُسَّ تَرُوࢻِمُسَّ ثِدِ أَسِیَیٜ؞
[5] تَیِ أَࢽِ أَࢽْدِࢽْ ࢻُوُࢽُّو لٜجَࢽٜ بْرْࢽِ تَرُوَسّٜلَࢽْ غُرٜسٜرَ؞
[6] أَࢽْدِدْ یٜ ࢽغَوُو سَلَ بُرُودِ یِسْ بَوُووَیٜࢽْ بْرْࢽِ ࢻِلِبِیٜࢽْ مَارَرُو ࢽغَیِیٜ سَࢻْکَدَیْیٜ؞ ࢽغَوُو کَوُ أُوُیٜࢽْ تَیِیَ تَرُوَسْࢽِࢽْ ࢽَغْیْیٜ مَوُرُو ࢽَࢻْکٜیْیٜ؞
[7] مَوُیٜ یِمْ بُرْوُویٜیَ بُرُودِ ࢻْسَکْتُرُو ثَࢻْکَدَیْیٜࢽْدٜیَ، حَرْ دْرْدُ بُلُسْ جَمَدْرُو کُرُوُرُو جَࢽْدٜیٜىٰࢽُو، دَلِلْࢽْجُدْ وَجِیَ لٜجِ ثْࢽَّ ࢽَࢽْغَرُو؞
[8] سُورُو سَمٜىٰ ࢽَ ثَࢻْتِیٜࢽَدْࢽْ ࢻَتْلَ کَدَ وَسْکَدَ دُوُوࢽْ،
[9] جَیْرُو لَا ثُࢽْجُ یُتِکُسْ کْلَ تَکَیٜࢽْ ࢽَࢻْکَدَ کْࢽْمْ دِیُو بَدِیٜࢽُو؞ بُلُسْ مَࢽَجِ مَࢽَجِ دُوُوࢽْ، کْࢽْمْ جَیْرُودَ ثُوتُّو ࢽغُوجٜ سُورُو سَمٜىٰ کْࢽْیَکُّیٜࢽْ ثِدِرُو کِکُّرُو؞ کٜسَࢽْغْرَࢽِّیَ، رُو بَوُو ࢽُࢽَ؞
[10] دَجِ بُلُسْ جْࢻْثٜ ࢽغُجِیٜ تِیَ ࢽغُوجٜ ࢽغَࢽْجِرُو ࢻَکْثِیٜ تَیِرُو: «بَرٜ حَࢽْغَلْࢽْدُو ثِجْࢽِّ، رُوࢽْجُوَ، دِیٜ!» یٜࢽُو؞
[11] بُلُسْ وَلْدٜ تَثّٜ بُرُودِ ࢻْسَکْثٜ غِغْرْࢽِّیَ، ࢽغْوُرُو مَࢽَجِیے دُوُوࢽْ، حَرْ دُࢽِیَ وَجٜ سَࢻْکَدَࢽْ؞
[12] جَیْرُودَ رُوࢽْجُوَ ثَادٜ کَرْوُࢽْجَ جَوْرُو کْجِیٜࢽُو؞
[13] أَࢽْدِدْ ࢻُوُࢽِیٜ بْلَ أَسُّوسّٜرُو لٜدُرُو مَارَرُو کْرْغَیِیٜ؞ بُلُسْ ثَلَࢽْ وُلْجْࢽَدْ غَیْ، ࢽَدْࢽْ تِیَ ࢽغُوࢽِیٜ ࢽِیٜ، تِ سِلَࢽْ لٜجِ ثْࢽَّ ࢽَࢽْغَرُو؞
[14] أَࢽْدِیَ أَسُّوسْلَࢽْ ࢽَسٜىٰرَࢽِّیَ، تِیَ مَارَدْࢽْ ࢽغُوࢽِیٜ بْرْࢽِ مِتِلٜىٰرُو لٜىٰیْیٜ؞
[15] ࢽَدْࢽْ ثِیٜیْیٜࢽْدٜیَ، وَجْࢽَࢽْجُوَ غْرٜ ثُکُ کِیُوسّٜرُو کَدِیٜ؞ وَارٜࢽْجُوَ ثُکُ سَمُوسّٜࢽْ کُوࢽِیٜ، وَارٜࢽْدُوࢽْجُوَ دُوُوࢽْ بْرْࢽِ مِلِتُسّٜرُو إِسِیٜ جْࢻْکٜیْیٜ؞
[16] بَرٜ ثِدِ أَسِیَیٜࢽْ تُسّْࢽِّرُو بُلُسْ ثَمَࢽْ بْرْࢽِ أَࢻِسَیٜلَࢽْ دَجْࢽِّࢽْ کُوجِ ثْࢽٜ ࢽِیَ ࢽغُوجْࢽَ؞ غَࢽْدُࢽْجُ أَدْ، یُوجِیَ، ࢽغْمْرِ ࢻٜࢽْتِکُوسّٜ تِیَ جٜرُجَلٜمْلَࢽْ ࢽَجِیے ثْرَوُو؞
[17] بُلُسْ بْرْࢽِ مِلِتُسّٜلَࢽْ دُوُوࢽْ، أَمْ ثُࢽُودٜ أَمْوُرَوَ جَمَ عِیسَىٰ غَوُ بْرْࢽِ أَࢻِسَیٜدَ بُواْجَ إِسَ یٜࢽُو؞
[18] کَدِرَࢽِّیَ، تَیِرُو: «تْࢽْ یِمْ بُرْوُویٜࢽْ ثِدِ أَسِیَیٜرُو إِسْکّْࢽَدْࢽْ ࢽَࢻْتُ ثُرُوࢽْدُوࢽْ کُلُّمْ دِکّْࢽَدَ ࢽُوࢽُوَّ؞
[19] کِدَ کْمَیٜ رُوکُرَ بَوُووَلَࢽْ دِکّٜ حَرْ سُومَ دِکّْࢽَ، کُورُو یَوْدِیَ لَا وُرُو ثِتِلُو سَدّْࢽَدْرُو لٜیْیَ یٜ یَکّْࢽَ؞
[20] کُورُو ࢽَیِرُو أَوِمَ غْرَࢽْجَغَکّْࢽِرُو أَوِ یَیٜ ࢽَیِرُو ࢻَیْدَا وُلْࢽْجَغَکّٜ ࢻَرْسَمْ یٜࢽْ، ࢻَدُو ࢻَدُو یٜࢽْ أَلَمْࢽْجَکّْࢽَرُو ࢽُوࢽُوَّ؞
[21] أَیْ، وُیٜ یَوْدِیَا أَمْ غْرٜسّٜیَ سَمَّرُو اللَّهرُو وَلْدَ تُوَ ثَدُو کْمَࢽْدٜ عِیسَىٰ مْرْسَجَرُو وُلْغْکّٜ شٜدَࢽْکّْࢽَ یٜرُو ࢽُوࢽُوَّ؞
[22] «أَکُّو کْرْمَ رُحُ اللَّهیٜ وُوَ سَکّٜ جٜرُجَلٜمْبُو لٜکِّ، أَوُو ࢽَدْࢽْ وُوَ سُوَࢽْدِدَ ࢽُوکّْࢽِ،
[23] سَیْ بْرْࢽِ ࢻِࢽْ یَیٜ رُحُ اللَّهیٜ وُرُو کُوسُووَ لٜیْیَ ࢽجَا غُرٜسَیْدَ تَبَّࢽْسِیے کْرْغَ؞
[24] أَدْ یَیٜ رُوࢽِدَ أَوِمَرُو ࢽغُوکّْࢽِ، ࢽَࢽِࢽْ تَمَࢽّجُ بَوُو، سَیْ کِدَ دُوُوࢽْ کْمَ عِیسَى وُرُو سِࢽَ، وُوتّٜ کَوُرِ کْجِ سٜرْ اللَّهیٜ شٜدَدُدَ تُمُوغْکِّیَ بَسْ، رَاکُّو!
[25] «تُو، ࢽَیِ دُوُوࢽْ دَوُࢽْدُولَࢽْ دْغَکّٜ کَوُرِ کْجِ ࢽُودُو بَرْغَا اللَّهیٜ وُلّْکّْࢽَدْ سَمَّ وُوَ غَدٜرُو سُرُوَّوُورُو ࢽُوکّْࢽَ؞
[26] أَدْمَ ࢽَࢽْغَرُو کُ ࢽَیِرُو شٜدَࢽْکِّ، بُ وُࢽْدُࢽْدُویٜمَ کْلَࢽِࢽْ بَوُو،
[27] دَلِلْࢽْجُدْ ࢽِیَ اللَّهیٜ سَمَّا ࢻَلْمَ غْرَࢽْجَغَکّْࢽِرُو وُلْࢽْجَغَکّْࢽَ؞
[28] کْلَࢽْدُووَ بْرِ دُوُوࢽْ کْلَࢽْجُࢽْ رُحُ اللَّهیٜ ࢽَیِیَ سْࢽِیَرُو غَلَࢽْجَࢽَدْ سَمَّا ࢽغْلَرُو رُوࢽُواْ! جَمَ اللَّهَ غَوُرُو کِسْکْࢽُواْ، جَمَ دُوُوࢽْ بُࢽْجُلَࢽْ کَاࢽجُرُو ثْدْࢽَدْ؞
[29] ࢽغَوُو سَࢻْتْکّْࢽَیٜࢽْ، بُلْدُ دِوِ دِوِ ثُرُوࢽْدُورُو ࢽغَسَیٜ بْرِدَ بَسَرْجَیْرُو ࢽُوکّْࢽَ؞
[30] کُورُو ثُرُوࢽْدُومَࢽْ أَمْ لَا ثِجَࢽٜ ࢻُوُرَوَا ࢽغَوُوࢽْجَࢽْ غْرْدُرُو جِرٜدَ کَتُّوُرُو کَلَکْثَیْ؞
[31] أَدْ ࢽَࢽْغَرُو ࢻَادَرُو دْغَیْوُو! سَا یَکُّرُو بُࢽٜیَ کَوْسُوَرُو حَرْ سِمِّࢽْ سِمَلُووَرُو وُࢽْدُࢽْدُویٜمَ سْمُو کَسْتَ کُولّْکّْࢽِدَ تَࢽْغُواْ!
[32] «تُو، کْرْمَ ࢽَیِیَ مُکُّو اللَّهَ مَࢽَࢽْجُ سٜرْ ࢻَࢽْدُویٜیَیٜرُو ࢽجَسَکّْکّْࢽَ، مَࢽَ دُوُوࢽْ رَکْثٜ ࢽَیِیَ إِسَوُرَࢽْجَغَیْ یٜ، ثُرُو أَمْ اللَّه کَاࢽجُرُو ثْدْࢽَ سَمَّیٜࢽْ وَرَسَ ࢽجَدِ یٜدْ؞
[33] رِوُلَّ، بِ دِࢽَرْ، بِ کَجْمُ وُࢽْدُیٜمَا لُوَمّْکّْࢽِ؞
[34] ࢽَیِ کْلَࢽْدُومَ ࢽُوࢽُوَّ، مُکُّوࢽِࢽْ کِدَ دِکّٜ وُوَ أَمْ رُوکُّو لٜࢽِیٜیَیٜ مْرَدُࢽْدٜ غَلْیٜکُّو؞
[35] ثُرُو أَوُو أَࢽِیٜࢽْ ࢽَیِرُو دُولٜ ࢽغْࢽْࢻْتُواْ کِدَ دٜوُو تَلَاوَا بَࢽَࢽُواْرُو ࢻْلٜࢽْجَغَکّْࢽَ؞ مَࢽَ کْمَ عِیسَى تِ کْلَࢽْجُ وُلْجْࢽَدَ تَࢽْغُواْ: ‹ࢽجُومَ مُواْرُو بَرْغَا وُو؞›»
[36] بُلُسْ أَوُو أَࢽِیَ وُلْیٜࢽِّیَ، تُࢽْغُرُمْجٜ تَیِ سَمَّا رُوکُّو مُودُوَ کٜدُو؞
[37] ثٜسِرِیَرُو بُلُسُّو کْرْدَغَࢽٜ لٜوَ کْرَوُویٜ کٜدُّو؞
[38] بُلُسّٜ مَࢽَ وُلْجٜ تِیَ غَدٜرُو ثَرُیْوَوُو ثْࢽَّدْرُو، کَرْوُࢽْجَ جَوْمَرُو کُتَّیٜࢽُو؞ دَجِ تِیَ ࢽَ مَارَدْیٜرُو کٜسَدُّوُو؞