[1] أَمَّ کَمْ لَا ثُࢽْجُ أَࢽَࢽِیَ کَمُࢽْجُ سَࢻِرَتُوَ رُوکُّو کُلُو ثْلَدٜ
[2] ࢽُودُ کَمُࢽْجُیٜلَࢽْ وُرِدْیٜ لَآ رُوجٜ لَآ ثُوُدٜ مُکُّو کْࢽْغَیَمْبَدْیٜرُو کٜکُّو؞
[3] دَجِ بِتُرُسّٜ تِرُو: «أَࢽَࢽِیَ، أَوِرُو إِوُلِیسَّ کُولّْمٜ کَرْوُࢽْمْبُو ࢽغَیٜ حَرْ رُحُ اللَّهیٜرُو کَتُّوُ کَمْغْمٜ وُرِ کُلُودْیٜ لَآ رُویٜمْ؟
[4] کَوُ لَدْمِدْرُو کُلُودْ کَاࢽْمْ، غْࢽَ؟ کُورُو لَدْمَّیٜ ࢽغَوُوࢽْ، وُرِدْ یٜ مُکُّوࢽْمْࢽِࢽْ، مَرٜ؟ أَوِرُو غْلٜ کَرْوُࢽْمْلَࢽْ ࢽِیَࢽْمٜ أَوُو أَدَ کِدْمْ؟ کَمْبُو غْࢽِ، اللَّهرُو دِیٜ کَتُّوُ کَمْغٜىٰمْ!»
[5] أَࢽَࢽِیَ مَࢽَ أَدَ ࢻَࢽْغٜࢽِّیَمَ، بْࢻْ ثُرٜ کَࢽُو؞ أَمْ لَوَرْ أَدَ ࢻَࢽْجَࢽَدْ سَمَّ جَوْرُو رِیٜرَ؞
[6] دَجِ جَیْرُووَ لَا إِسَࢽٜ کَمِࢽّجُدَ جَکْثَࢽٜ ࢽغُوجَࢽٜ ثَادٜ سِتّْرَیٜرَ؞
[7] سَ یَکُّ غَیْ کُوجْࢽَیٜ ࢽغَوُوࢽْ، کَمُࢽْجُ أَوُو وَکَّجْࢽَدَ ࢽُوجْࢽِّࢽْ کَدِیُو؞
[8] بِتُرُسّٜ تِرُو: «وُلْسْغْࢽٜ، وُرِ أَدْمَرُو وَ کُلُودَ کِلَدُوْ؟» ثْࢽٜ کِوُورْࢽِّیَ، کَمُدْیٜ: «آه، وُرِ أَدْمَرُو،» یٜࢽُو؞
[9] دَجِ بِتُرُسّٜ تِرُو: «أَوِرُو رُحُ کْمَࢽْدٜىٰیَ رِجَࢻْتُرُو ثِتِلُو کِدُوْ؟ أَکُّو أَمْ کوَࢽْمْبَ سِتّْرَجَࢽَدْ ثِࢽَّلَࢽْ، ࢽِ یٜیَ ࢽجَسَدِ!» یٜࢽُو؞
[10] سَدْمَࢽْ ࢻُوُ بِتُرُسّٜࢽْ بْࢻْ ثُرٜ کَࢽُو؞ جَیْرُووَدْ کَسَرْغَاࢽِّیَ، ࢽُࢽَ ࢽَجَغَࢽٜ ثَادٜ غْرٜ کوَࢽْجُیٜࢽْ سِتّْرَیٜرَ؞
[11] جَمَ عِیسَىٰ غَوُدَ أَمْ لَوَرْ أَدَ ࢻَࢽْجَࢽَ سَمَّا جَوْرُو رِیٜرَ؞
[12] کْࢽْغَیَمْبَدْ دَوُ جَمَیٜࢽْ أَلَمَ سُو، أَوُو أَجَبَّ سُو کَدَ ثَدِ؞ کُورُو عِیسَىٰ غَوُدْ سَمَّ ࢽغُرْوُو ࢽَوِ مَیْ سُلَیْمَـٰࢽَیٜࢽْ کَرْوُ تِلُووَرُو ثَࢻْتَیْ؞
[13] أَمَّ ثُرُو أَمْ غَࢻْثَࢽَدْیٜࢽْ وُࢽْدُمَ کُواْرِ ثْدٜ تَیِرُو کْلْدْغْࢽِّ، أَدْ یَیٜ أَمْدْ تَیِرُو دَرَجَ ثَدِ؞
[14] ثَیٜمَا کُوجْࢽَرُو أَمْ کْمَا کَسَثَّࢽَ کوَࢽْ کَمُࢽْ کَدَ کَدَمِ جَمَࢽْجُرُو کْلْدَغَیْ؞
[15] أَدْ ثَکّٜ بْرْࢽِوُ أَمْ دُوࢽْدِ لَیْرُو ثَتُّلُوٜ کْلَ دْغْلْ سُو، بُجِ سُویٜࢽْ غْࢽَجَیْ؞ ࢽغَیْمَ بِتُرُسْ کُوجِیَ، وَࢽٜىٰ کَوْدِࢽْجُ أَمْ أَࢽِیٜ لَاࢽجَا جَکْثِ؞
[16] أَمْ کَدَ یٜ بْلَمَسْکِیَ جٜرُجَلٜمْبٜࢽْ إِسَࢽٜ أَمْࢽْجَ دُوࢽْدِیَ کَرُوَمَسُووَا ثَوُدٜ تَیِ سَمَّ ࢽَࢽْلٜوَ ثَوَࢽْدِ؞
[17] دَجِ رِمَࢽْ کُرَا أَمْ ࢽغَوُوࢽْجُیٜ کْوُ سَدُسِیَیٜیَ ࢽَࢽْدْرِ تَیِیَ کٜکْ ثْدَࢽَ دُوُوࢽْ ثِجَࢽٜ
[18] کْࢽْغَیَمْبَدَ مُکُّوࢽْ ثَدَࢽٜ کُوسُورُو کٜسَکُّو؞
[19] أَمَّ بُࢽٜ مَلَیْیَ کْمَࢽْدٜىٰ لَا ثِࢽَّ کُوسُورَمْبٜدَ کَجٜ کْࢽْغَیَمْبَدَ ثُتُّلُوٜ تَیِرُو:
[20] «لٜࢽُواْ، ࢻَدُو اللَّهیٜࢽْ دَࢽُواْ، جَمَرُو کَوُرِ رُو ࢻَࢽْدُو أَدْیٜ مَࢽَࢽْجُ سَمَّا وُلْغْࢽُواْ!» یٜࢽُو؞
[21] أَدَ ࢻَࢽْغٜرَࢽِّیَ، سُوَ لْࢻْ ࢻَدُو اللَّهیٜرُو ࢽغَسَیٜ أَلَمْدُ بَدِیٜرَ؞ رِمَࢽْ کُرَا أَمْ ࢽغَوُوࢽْجُیٜیَ مَجِلِسُّو کَدِرَࢽِّیَ، مَجِلِسْوُوَ أَمْوُرَوَ جَمَ إِسْرَاءِیلَیٜ سَمَّآ ثَࢻْثَࢽٜ کْࢽْغَیَمْبَدَ کُدُورُو غُرٜدُوُ ࢻَدُو اللَّهیٜیَ کُوسُورَمْبُو کٜࢽُودُو؞
[22] أَمَّ غُرٜدُوُدْ لٜىٰرَࢽِّیَ، تَیِیَ ࢽَجَغَࢽِّ؞ دَجِ وَلْدَࢽٜ لَوَرْ ثَوُدٜ
[23] مَجِلِسْوُدْرُو: «کُوسُورَمْدْ یٜ کْرْࢻْ جَکَّدَ، غُرٜدُوُدْ یٜ ثِࢽَّلَࢽْ دَادَ ࢽَیٜىٰیْیٜ؞ أَمَّ کَیٜیْیٜࢽْدٜیَ، ثُرُوࢽْ وُࢽْدُمَا ࢻَࢽْدِیٜࢽْدٜ!» یٜرَ؞
[24] کُرَ غُرٜدُوُ ࢻَدُو اللَّهیٜیَ وُرَوَ رِمَࢽَّیٜیَ أَدَ ࢻَࢽْغٜرَࢽِّیَ، کْلَ تَیِیٜࢽْ أَوِ وَکَّجِرُو حَࢽْغَلْࢽْجَ ثَا ثِجْࢽَ دُوُوࢽْ،
[25] کَمْ لَا إِسٜ تَیِرُو: «أَکُّو أَمْ کُوسُورُو یَکُّوَّدْ ࢻَدُو اللَّهیٜࢽْ دَادَ جَمَدَ أَلَمْدُ ثَدِ،» یٜࢽُو؞
[26] دَجِ کُرَ غُرٜدُوُ ࢻَدُو اللَّهیٜدْ سُوجِیَࢽْجُوَ لٜجَࢽٜ تَیِیَ کٜوُدُو، أَمَّ دُࢽُودُࢽُوࢽْ غْࢽِ، دَلِلْࢽْجُدْ جَمَا رِجَࢽَ بَرٜ تَیِرُو کَوْ غْغْࢻْثَغَࢽٜ ثٜىٰسْࢽِّرُو؞
[27] تَیِیَ کٜوُدْࢽِّیَ، ࢻُوُ مَجِلِسْوُیٜرُو ثَسَکّٜ دَجَࢽٜ رِمَࢽْ کُرَدْ تَیِیَ کُورُو بَدِیٜࢽُو؞
[28] تَیِرُو: «ࢽغْلَمَرُو ࢽَیِرُو ثُ أَدْلَࢽْ أَلَمْدُ دَمْࢽْجَغَیْیٜࢽَ، غْࢽَ؟ أَکُّو أَلَمْدُࢽْدُو جٜرُجَلٜمْ سَمَّرُو تَتَرْغْوَّ، کُورُو بُ کَمْ أَدْیٜ أَࢽْدِرُو غْرْدُوُ مَࢽُوِ!»
[29] أَمَّ بِتُرُسَّ کْࢽْغَیَمْبَ غَدٜدَیٜ تَیِرُو: «کَمْ غْࢽِ، اللَّهَ غَ أَࢽْدِرُو وَجِمْسَا!
[30] اللَّه کْمَ کَارِیَࢽْدٜىٰدْ عِیسَى کَمْ دُوُوࢽْ کْسْکَرُو جَاوٜ یٜجُوَّدَ کَرْمُولَࢽْ ثْسَࢽْغٜ
[31] کْمْبُورَمْࢽْجُلَࢽْ سَࢻْثٜ جَمَ إِسْرَاءِیلَیٜ تُوَ ثَدُو بِوُࢽْجَ ثِࢽْجُورُو تِیَ مَیْ یٜ، ࢽجْکَّیِمَ یٜرُو کِدُو؞
[32] کْلَ لَمَرْ أَࢽِیٜࢽْ أَࢽْدِ یٜ شٜدَوُ، رُحُ دُوُوࢽْ اللَّه أَمْ تِیَ جَاࢽَرُو ثِࢽَدْ یٜ شٜدَمَ،» یٜرَ؞
[33] مَجِلِسْوُدْ أَدَ ࢻَࢽْغٜرَࢽِّیَ، جَوْرُو غْرْغَجَࢽٜ تَیِیَ ࢽجٜجُورُو مَیٜرَ؞
[34] أَمَّ ࢻَرِسَ لَا ثُࢽْجُ غَمَلِیٜلْ غُوࢽِ أَتَّوْرَیٜ جَمَ سَمَّ تِرُو دَرَجَ ثَدْࢽَدْ دَوُ مَجِلِسّٜࢽْ ثِجٜ وَدَ ثٜ أَمْدَ سَ غَࢽَرُو ثَتُّلُوُو یٜࢽُو؞
[35] دَجِ مَجِلِسْوُدْرُو: «جَمَ إِسْرَاءِیلَیٜ، أَوُو أَمْ أَࢽِرُو یِدُّوِدْرُو حَࢽْغَلْ غْࢽَࢽُواْ!
[36] تُسّْࢽِّࢽْ تَوْدَسْ إِسٜ کْلَࢽْجُوَ کَمْ لَارُو ࢽغُوجٜ أَمْ یٜرْ دٜوُ غَیْ ࢽغَوُوࢽْجُرُو کَسَرْغَوُو؞ أَمَّ أَوِمَرُو وَلْجْࢽِّ، تِیَ رُورُو ثٜىٰسٜ أَمْ تِرُو کْلْدَاࢽَ سَمَّ تَتَرْغَدَرَ؞
[37] ࢽغَوُو تِیٜࢽْ یَحُسَ کَمْ غَلِلٜىٰ جَمَࢽْ کُومْ جَمَیٜࢽْ إِسٜ أَمْ لَآ ثَکّٜ ࢽغَوُوࢽْجُ غٜیَ؞ أَمَّ تِ یٜ بَوُوجٜ أَمْ تِیَ جَاࢽَ سَمَّ تَتَرْغَدَرَ؞
[38] تُو، ࢽَیِرُو وُلْࢽْجَغَکِّ، بَرٜ أَمْ أَࢽِرُو سُوُولْدُوِّ، کُولُّواْ لٜجَ! ࢽِیَ أَدْ بِ کْࢽْدُو أَدْ کَمْبٜࢽْ کَدِیُووَ، بَوُورُو وَلْجِ؞
[39] أَمَّ اللَّهیٜࢽْ کَدِیُووَ، تَیِیَ رَࢽْغُوَّوُو؞ بَرٜ دُوُࢽْوُ اللَّهیٜرُو وَلُّوِّ،» یٜࢽُو؞ مَجِلِسْوُدْ غَلَ غَمَلِیٜلّٜدَ ࢽغُوجَࢽٜ
[40] کْࢽْغَیَمْبَدَ بُواْیٜرَࢽِّیَ، تَیِیَ بَبَکْثَࢽٜ وَدَ ثَدٜ بَرٜ ثُ عِیسَیٜࢽْ مَࢽَجَࢽِّ ثَࢽٜ تَیِیَ کُولْجَࢽٜ لٜىٰرَ؞
[41] مَجِلِسْدْࢽْ سَࢻْکَدَرَࢽِّیَ، اللَّه تَیِرُو کْلَ ثُ عِیسَیٜࢽْ مَرْتَوَ ࢽَࢽْغُ ࢽجَیٜ ثِࢽَرُو کَرْوُࢽْجَ کْجِیٜࢽُو؞
[42] یِمْ ࢽغُسُوࢽْ ࢻَدُو اللَّهیٜࢽْ کَلْ، ࢻَدُو ࢻَدُولَࢽْ کَلْ، کَوُرِ کْجِ جَمَرُو عِیسَدْ تِمَ أَلْمَسِیوُ وُورُو وُلْجَغَࢽٜ أَلَمْجَیْ کَسَرْغَ؞