[1] یِمْ أَࢽِࢽْ ࢽَࢽّغْوُ ࢻُوُرَوَدْیٜ تْرْغَیْ دُوُوࢽْ، ثُرُوࢽْجَࢽْ أَمْ تْلَمْ غْرٜسّٜ مَࢽَجَیْدْ کَمُوَࢽْجَ کوَ ࢻَثّْغْࢽَا دَغَرْ وَجِسُویٜࢽْ ثْࢻْثَغَیْ ثَࢽٜ کْلَ أَمْ تْلَمْ یَوْدِیَیٜ مَࢽَجَیْدْیٜࢽْ کٜسِرُو؞
[2] کْࢽْغَیَمْبَ مٜوُࢽْ یِࢽْدِࢽْدْ ࢻُوُرَوَ سَمَّا ثَࢻْکٜرَࢽِّیَ، تَیِرُو: «مَࢽَ اللَّهیٜ وُلْدُ کُولّْمٜ دَغَرْ کْمْبُویٜرُو کِسْتُوُدْ أَࢽْدِرُو جُسّْࢽِّ؞
[3] أَدْ ࢽَࢽْغَرُو، کْرَمِیَࢽْدٜ، ثُرُوࢽْدُوࢽْ أَمْ رَشِدُ، أَمَࢽَّ، رُحُ اللَّهیٜیَ تُلُرْ کْرٜࢽُواْ، کِدَ أَدَ مُکُّوࢽْجَرُو یَکِّیُو،
[4] أَࢽْدِ یٜ مُودُوَا کِدَࢽْدٜ کَوُرِ اللَّهیٜ وُلْدُوَلَࢽْ ࢻُوُ بُیْیٜ،» یٜرَ؞
[5] جَمَ ثَࢻْتَࢽَ سَمَّ أَوُو وُلْجَࢽَدْیٜ کْجِࢽْجُ ࢻَࢽْجَࢽٜ، دَجِ إِسْتِࢻَࢽُسْ کَمْ جَوْرُو کَمْبْرْسٜیَ کُورُو رُحُ اللَّهیٜیَ، ࢻِلِبُسْ، بُرُوکُورُسْ، ࢽِکَࢽُورْ، تِمُوࢽْ، بَرْمِࢽَسْ، ࢽِکُولَسْ کَمْ بْرْࢽِ أَࢽْتَکِیَیٜ ࢻْرْدُࢽْجُ کْرْدِ دُوُوࢽْ یَوْدِرُو وَلْجْࢽَدَ کْرٜىٰرَ؞
[6] دَجِ تَیِیَ ࢻُوُ کْࢽْغَیَمْبَیٜرُو ثَوُدٜ مُودُوَ ثَدٜ تَیِرُو مُکُّو غْࢽَیٜىٰرَ؞
[7] مَࢽَ اللَّهیٜ ثَیٜیَ کُوجْࢽَرُو تَتَرْدٜ ࢻُوُرَوَدْ جٜرُجَلٜمْࢽِࢽْ جَوْرُو ࢽغْوُجَࢽٜ، کُورُو رِمَࢽَّ کَدَ یٜ کَمْبْرْسٜدَ کَسَتْکٜرَ؞
[8] إِسْتِࢻَࢽُسْدْ جَوْرُو سٜرَّ کْࢽْدُوُووَا أَوُو أَجَبَّ سُو، أَلَمَ سُو کَدَ دَوُ جَمَیٜࢽْ ثْدِ؞
[9] دَجِ یَوْدِیَ لَا دَࢽْدَلْ تِرُو کَرٜیَوَ ࢽَࢽْکَمْ کْلَیٜ ثَوَࢽْدْࢽَ ثَࢽِدْیٜ إِسْتِࢻَࢽُسَّ کَمْبِوُدُ بَدِیٜرَ؞ أَمْ أَࢽِیٜ لَاࢽجَ بْلَ کُرَࢽٜىٰیَ بْرْࢽِ أَلٜکْسَࢽْدَرِیَیٜیَ، لَاࢽجَ یٜ ثِدِ کِلِکِیَیٜیَ أَسِیَیٜیَ؞
[10] أَمَّ ࢽَࢽْرَشِدُوَ رُحُوَلَࢽْ مَࢽَجِ ࢽَࢽْغَرُو رَکْثَࢽٜ تِیَ یَࢻْثَغَیْوَوُو؞
[11] دَجِ أَمْ لَآ أَسْرْلَࢽْ ثَسَکّٜ تَیِیٜ: «إِسْتِࢻَࢽُسْ ࢽَوِ مُوسَىٰ اللَّهَا بَسِّ ࢻَࢽِّیٜࢽَ!» ثَࢽٜ
[12] جَمَا أَمْوُرَوَا مَلْمْبَ أَتَّوْرَیٜیَیٜ حَࢽْغَلْ کٜسَࢽْغُو؞ دَجِ إِسَࢽٜ تِیَ دُࢽُودُࢽُوࢽْ ثَدَࢽٜ مَجِلِسُّو کٜسَدُو؞
[13] شٜدَوُ کَتُّوُیٜ یٜیَ ثَوُدٜ تَیِیٜ: «کَمْ أَدْ دَدُ بَوُورُو مَࢽَ کُتُّ کُتُّ کْلَ ࢽَ تَیِرْ أَدَ أَتَّوْرَایٜࢽْ ثْدِ؞
[14] تِیٜ عِیسَى کَمْ ࢽَجَرَتّٜدْ ࢽَ أَدَ وُرْجٜ أَدَ ࢽَوِ مُوسَى سَدْࢽَدَ ࢻَلْجِ ثْࢽٜ ࢻَࢽِّیٜࢽَ،» یٜرَ؞
[15] تَیِ مَجِلِسْلَࢽْ ࢽَࢻْکَدَ سَمَّ سِمْࢽِࢽْ إِسْتِࢻَࢽُسَّ ثَࢻُّو کٜرُࢽِّیَ، ࢻْکَّࢽْجُدَ ࢻْکَّ مَلَیْیَیٜ غَیْرُو کٜرُو؞