[1] وُسٜ، تِیُوࢻَلَسْ! ثُرُو کِتَوُࢽِ بُرْوُویٜدْلَࢽْ کْلَ أَوُو عِیسَى دِیُووَ أَلَمْدُوَ بَدِجْࢽَ سَمَّیٜࢽْ رُوُࢽْغٜىٰکُّو،
[2] حَرْ یِمْ دُوُوࢽْ رُحُ اللَّهیٜࢽْ کْࢽْغَیَمْبَࢽْجُ کْرٜجْࢽَدْرُو وَدَ ثٜ تِیَ سَمٜرُو ثَادْࢽَدْرُو؞
[3] ࢽغَوُو بُوࢽٜ ثَࢽٜ ࢽُࢽَیٜࢽْ، کَوُ ࢻِدٜوُرُو تَیِرُو ࢻْلٜدِیٜ مَࢽَ کْلَ ࢽُودُو بَرْغَا اللَّهیٜࢽْ ثْدِ؞ أَدْغَیْمَ ࢻُدُ کَدَࢽْ تَیِرُو رُووَرُو تَبَّثِّیٜ ࢻْلٜیَادَ؞
[4] عِیسَى کْࢽْغَیَمْبَࢽْجُوَ رُوکُّو دُوُوࢽْ، تَیِرُو وَدَ ثٜ: «بَرٜ جٜرُجَلٜمْلَࢽْ سَࢻْتُوِّ، أَوُو بَوَدْ ࢽجَدِ ثْࢽٜ وُلْࢽْجَغَکّْࢽَدَ غُرٜࢽُواْ!
[5] أَوُووَ یَحْیـَدْ إِࢽْغِلَࢽْ کَسَلَ تُوَیٜ أَمْبُو کِدُّو، أَمَّ کَوُ غَࢽَا رُحُ اللَّهیٜࢽْ کَسَلَ ࢽَیِرُو ࢽجَدِّ،» یٜࢽُو؞
[6] دَجِ تَیِ ࢽَࢽْجُࢽْ ثَࢻْتَࢽَدْیٜ تِرُو: «کْمَ، سَ أَدْࢽْ وَ جَمَ إِسْرَاءِیلَیٜرُو کْرْمَیْدَ کَلَکّْمِ؟» ثَࢽٜ کٜوُورُو؞
[7] عِیسَیٜ تَیِرُو: «یِمْ بِ سَ بَوَدْ کْࢽْدُوُوࢽْجُࢽْ کَدَرْجْࢽَدَ ࢽُودُدْ کَاࢽدُو غْࢽِ؞
[8] أَمَّ سَ رُحُ اللَّهیٜ ࢽَیِرُو جْمْࢽْجَغَیْیَ، کْࢽْدُوُو ࢻَࢽْدُوٜ جٜرُجَلٜمْبَ ثِدِ یَحُدِیَیٜ سَمَّا ثِدِ سَمَرِیَیٜیَ حَرْ ثِ دَجِرَمْ دُࢽِیَیٜیَلَࢽْ شٜدَوُࢽِرُو وَلُّوِ،» یٜࢽُو؞
[9] أَدَ وُلْیٜࢽِّیَ، تِیَ ثَرُیْ ࢽغَیْ دُوُوࢽْ، سَمٜرُو ثَادٜ ࢻُوࢻُووْ لَا کُرُوࢽْجَࢽْ تِیَ کِمُواْ؞
[10] سَمٜ ࢽَ لٜجِدَ ثَرُیْ دُوُوࢽْ، أَکُّو أَمْ یِࢽْدِ کَجْمُ بُلَّ غْرٜࢽْجَࢽْ دَجَࢽٜ
[11] تَیِرُو: «أَمْ ثِدِ غَلِلٜىٰ، أَوِرُو دَࢽُوَّ سَمٜ رُوِدْ؟ عِیسَى کَمْ ࢽَࢽْدُوࢽْ سَمٜرُو ثَمُواْࢽَ أَدْ، جِرِ سَمٜرُو لٜجْࢽَ رُوَّدْ غَیْمَࢽْ وَلْدٜ إِسِ،» یٜرَ؞
[12] دَجِ کْࢽْغَیَمْبَدْ کَوْ دُوُوࢽْ تِرُو کَوْ جَیْتُࢽّٜ ثَࢽِ جٜرُجَلٜمْبَ کَرْࢽْ لٜدُ یِمْ تُسْتُیٜلَࢽْ دْغَࢽَدْࢽْ وَلْدَࢽٜ بْرْࢽِدْرُو کَسَرْغَوُو؞
[13] کَسَرْغَاࢽِّیَ، سُورُو سَمٜىٰ ࢽَ ࢽَࢻْثَࢽَدْرُو غٜوَ؞ تَیِمَ بِتُرُسْ، یَحْیـَى، یَعْࢼُوبَ، أَࢽْدَرَوُسْ، ࢻِلِبُسْ، تُومَ، بَرْتُولُومِ، مَتِیُ، یَعْࢼُوبَ تَدَ أَلْࢻَوُسّٜ، سِمَࢽْ تِرُو لَرْدُࢽْجُ رَوُومَ ثَࢽِ، یَحُسَ تَدَ یَعْࢼُوبَیٜ؞
[14] تَیِ أَࢽِ سَمَّ کَمُوَدَ مَرْیَمْ یَ عِیسَیٜیَ یَࢽْجُغْࢽَسُووَ رُوکُّو کَرْوُ تِلُووَرُو مُودُوَ ثَدِ کَسَرْغَ؞
[15] یِمْ أَࢽِࢽْ کْرَمِیَ عِیسَىٰ غَوُدْیٜ ࢽَࢽّغْوُࢽْجَ أَلَمَ مِیَࢽْ ࢻِࢽْدِࢽْ غَیْ دُوُوࢽْ، بِتُرُسْ دَوُࢽْجَࢽْ دَجٜ تَیِرُو:
[16] «کْرَمِیَ، مَࢽَ دُوُوࢽْ رُحُ اللَّهیٜ کُرٜࢽْ ثِ ࢽَوِ دَاوُدَیٜࢽْ کْلَ یَحُسَ جٜدُمَ أَمْ عِیسَىٰ ثَدَࢽَیٜدْیٜࢽْ ثْدٜ کِتَوُلَࢽْ رُوُوَدَدْ سَیْ وَکَّجِیَ؞
[17] یَحُسَدْ کْࢽْغَیَمْ دَوُࢽْدٜࢽْ کْرْغَ، تِ یٜ ࢽُوَࢽْجُ کِدَࢽْدٜدْࢽْ ثُوَࢽْدْࢽَ؞
[18] ثَلَࢽْ کَمْ أَدْ أَلْوَسِ جِرٜࢽَمْبُیٜلَࢽْ کُلُو ثِوٜ ࢻْدْرْیٜرُو ثُرٜ ثُرُوࢽْجُ ࢻَلْدٜ کَلْمْࢽْجُ سَمَّ ࢻِیَدَ؞
[19] أَمْ جٜرُجَلٜمْبٜ سَمَّ لَمَرْ أَدَ ࢻَࢽْغٜرَࢽِّیَ، تْلَمْࢽْجَلَࢽْ کُلُو أَدَ أَکٜلْدَمَلَࢽْ بُواْیٜرَ، مَاࢽَࢽْجُدْ کُلُو بُیٜ؞
[20] أَوُووَ کِتَوُ جَوُرَیٜلَࢽْ رُوُوَدَ: ‹ࢻَࢽّجُ دٜ سُلْ ࢽَࢻْثُو، بَرٜ وُࢽْدُمَ ثُرُوࢽْجُࢽْ دْغَࢽِّ،› کُورُو ‹کَالَࢽْجُدَ کَمْ غَدٜرُو ثَدُو؞›
[21] «أَدْ ࢽَࢽْغَرُو دُولٜ ثُرُو أَمْ أَࢽْدِیَ رُوکُّو کْرْغَیْیٜدْیٜࢽْ سَ کْمَ عِیسَى دَوُࢽْدٜࢽْ دْغَࢽَ سَمَّࢽْ،
[22] کَسَلَ یَحْیـَیٜلَࢽْ تَیْ حَرْ یِمْ عِیسَىٰ ࢽَࢽْدٜࢽْ ثَمُواْࢽَدْرُو کُدٜرُو، ࢻَلْࢽْجَ أَࢽْدِرُو کْلْدُوُو، تِ یٜ شٜدَمَ کَرْمُولَࢽْ ثِدُ عِیسَیٜرُو وَلْجُو،» یٜࢽُو؞
[23] أَمْ یِࢽْدِ کٜسَࢽْغْرَ، تَیِمَ یُوسُࢻُ کَمْ دُوُوࢽْ تِیَ بَرْسَبَسْلَࢽْ بُواْجَیْ کُورُو تِرُو جُسْتُسْ ثَࢽِدَ مَتِیَسَّ؞
[24] دَجِ تَیِ سَمَّ مُودُوَ ثَدٜ: «کْمَ، ࢽِ کَرْوُ أَمْ سَمَّیٜ ࢽُودُمَدْ، تَیِ یِࢽْدِ أَࢽِلَࢽْ کَمْ کْرٜࢽْمَّدَ إِسَࢽُوسَغَࢽٜ
[25] ࢽُوَࢽْجُ کِدَ ࢽَࢽْکْࢽْغَیَمْ أَدْیٜࢽْ ثُوَࢽْدُو، کِدَ دُوُوࢽْ یَحُسَ ࢽَࢽْجُ کَدَرْغْمَّرُو لٜجُورُو کُولْجْࢽَدْ،» یٜرَ؞
[26] وَلَوَلَ کٜدْࢽِّیَ، کْلَ مَتِیَسّٜرُو کِکُّرُو؞ دَجِ تِیَ کْࢽْغَیَمْبَ مٜوُࢽْ تِلُوࢽْدْرُو کْلْیٜىٰرَ؞