[1] جَمَࢽْ أَدْࢽْ مَیْ حِرُدُسْ جَمَ عِیسَىٰ غَوُیٜ لَاࢽجَا بَسَرْدُ بَدِجٜ
[2] یَعْࢼُوبَ یَاࢽَ یَحْیـَیٜیَ کَشَغَرْلَࢽْ رُورُو کٜجُو؞
[3] یَوْدِیَ أَدَ ثَرَاࢽَرُو کِرُࢽِّیَ، بِتُرُسْ یٜیَ کِدَ؞ أَدْ سَ سَلَ بُرُودِ یِسْ بَوُووَیٜࢽْ وَکَّیٜࢽُو؞
[4] کِدَࢽِّیَ، کُوسُورُو ثَکّٜ تِیَ غُرٜدُرُو مُکُّو کْوُ دٜوُ سُوجِ دٜوُ دٜوُیٜرُو کٜکُّو؞ ࢽِیَࢽْجُدْ ࢽغَوُو سَلَ لَیَ ࢽجْکَّیِرَمْبٜࢽْ تِیَ ࢻُوُ جَمَیٜࢽْ بُرْوُدُ؞
[5] بِتُرُسَّ کُوسُولَࢽْ رُوجَࢽَ ࢽغَیْ دُوُوࢽْ، جَمَ عِیسَىٰ غَوُدْ تِ ࢽَࢽْغَرُو تَیْ دَجَࢽٜ اللَّهَ لُواْجَیْ کَسَرْغَ؞
[6] یِمْ وَجِیَ مَیْ حِرُدُسْ تِیَ ثُتُّلُوِدْیٜ بُࢽٜࢽْجُوَ بِتُرُسْ کَتّٜ سُوجِ یِࢽْدِیٜࢽْ سَرْغَ یِࢽْدِلَࢽْ تِکّٜرْࢽَ کْࢽْمْ ثْدِ؞ کُورُو ثِࢽَّلَࢽْ کُوسُورَمْ غُرٜدُوُ یٜ مبٜجِ؞
[7] سَدْمَࢽْ مَلَیْیَ کْمَࢽْدٜىٰ لَا غْرٜࢽْجُࢽْ دَجٜ ࢽُرْ سُلُّرُدَ وَسْکٜࢽُو؞ بِتُرُسَّ سِسِلَࢽْ بَکْثٜ ثْسَࢽْغٜ تِرُو: «دُوَࢽْ ثِࢽٜ!» یٜࢽُو؞ سَرْغَوَدْ مُکُّوࢽْجُࢽْ ࢻِیَدَرَ؞
[8] دَجِ مَلَیْیَدْیٜ تِرُو: «کَجْمُࢽْمْ لُࢽٜ، سُࢽُوࢽْمْ یَکّٜ!» یٜࢽُو؞ ࢽغَیْ کِدْࢽِّیَ، وَلْدٜ تِرُو: «بَرْمُسْࢽْمْ لُࢽٜ، وُوَ سْغَیْ!» یٜࢽُو؞
[9] بِتُرُسْ ثُلُوٜ تِیَ غِیَ؞ أَوُو مَلَیْیَدْ ثْدْࢽَدَ جِرٜرُو ࢽغُوجْࢽِّ، وَحَیِ ثُرُیْرُو تْمَیٜࢽُو؞
[10] دَجِ کْوُ غُرٜدُوُ بُرْوُویٜیَ یِࢽْدِیٜیَا کُویٜرَࢽِّیَ، ثِࢽَّ سُیٜ بْرْࢽِدَ وُجِدْرُو کَدِرَ؞ ثِࢽَّدْ کْلَࢽْجُمَࢽْ ࢻْرْمْدٜ ثَلُوٜ لَیْ ࢻَلْ غٜیَ؞ سَدْمَࢽْ مَلَیْیَدْ تِرُو ࢻَتْکٜىٰࢽُو؞
[11] بِتُرُسْ حَࢽْغَلْࢽْجُرُو وَلَّدَࢽِّیَ، کَرْوُࢽْجُࢽْ: «کْرْمَ کْمَࢽْدٜ مَلَیْیَࢽْجُ ثُࢽُودٜ وُوَ مُکُّو مَیْ حِرُدُسّٜیَ ࢽِیَدِوِ جَمَ یَوْدِیَیٜ سَمَّالَࢽْ سُتُّلُوُࢽَدَ جِرٜمَرُو ࢽُوکّْࢽَ؞»
[12] بِتُرُسْ أَدَ أَسُیٜࢽِّیَ، ࢻَدُو مَرْیَمْ یَ یَحْیـَى تِرُو مَرْکُسْ ثَࢽِیٜرُو لٜىٰࢽُو؞ ࢻَدُودْࢽْ أَمْ کَدَ ثَࢻْتَࢽَ اللَّهَ لُواْجَیْ؞
[13] بِتُرُسْ ثِࢽَّ ࢽغَوُورَمْبٜدَ بَکّٜࢽِّیَ، ࢻٜرُو کِدَمَ لَا رُودَ ثَࢽِ کَدُرُو کَدِیُو؞
[14] کُواْ بِتُرُسّٜ أَسُیٜࢽِّیَ، جَوْرُو کْجِ ࢻَࢽْجٜ ثِࢽَّدَ کَجْࢽِّࢽْ ࢽغْرْمْجٜ جَمَدْرُو: «بِتُرُسْ ثِࢽَّࢽْ دَادَ!» یٜࢽُو؞
[15] تَیِیٜ تِرُو: «جُورِࢽْمَّ!» یٜرَ؞ أَمَّ کْلَدْࢽْ دَجٜ ࢽغَیْمَ یٜࢽِّیَ، دَجِ تَیِیٜ: «مَلَیْیَࢽْجُرُو وَلْجِ،» یٜرَ؞
[16] بِتُرُسْدْ بَکْتُ کُولْجْࢽِّ؞ کَیٜرَࢽِّیَ، تِیَ ثَرُࢽٜ أَجَࢻْکٜرَ؞
[17] دَجِ غْمْ ثَدُورُو مُکُّو سَࢻْثٜ تَیِرُو جِرِ کْمَࢽْدٜ تِیَ کُوسُولَࢽْ ثُتُّلُوُࢽَدَ وُلْیٜىٰࢽُو؞ کُورُو وَلْدٜ: «یَعْࢼُوبَا کْرَمِیَدَرُو أَوُو أَࢽِیَ وُلْغْࢽُواْ!» ثْࢽٜ ثُلُوٜ ࢽَ غَدٜرُو لٜىٰࢽُو؞
[18] دُࢽِیَ وَیٜࢽِّیَ، دَوُ سُوجِیَدْیٜࢽْ حَࢽْغَلْسَࢽْغُو غْࢽَغْࢽِ کْلَ أَوِ بِتُرُسَّ ثُوَࢽْدُویٜࢽْ ثِیٜࢽُو؞
[19] مَیْ حِرُدُسْ تِیَ مَجِ ثُوَࢽْدْࢽِّدْ، کُوسُورَمْ غُرٜدُوُدْرُو کُورُو ثْدّٜ وَدَ ثٜ تَیِیَ رُورُو ثٜىٰسُو یٜࢽُو؞ دَجِ مَیْ حِرُدُسْ ثِدِ یَحُدِیَیٜلَࢽْ ثِجٜ بْرْࢽِ کَیْسَرِیَیٜرُو لٜجٜ ࢽَࢻْکٜࢽُو؞
[20] مَیْ حِرُدُسْ أَمْ بْرْࢽِ تِرّٜیَ سِدُوࢽّٜیَرُو جَوْمَرُو غْرْغَجْغْࢽَ؞ تَیِدْ کَرْوُ تِلُووَرُو ࢻُوُࢽْجُرُو إِسَࢽٜ بَࢽَ کُواْࢽَࢽْجُ بِلَسْتُسْ ثَࢽِیٜ کٜوَࢽْدْࢽِّیَ، ࢽَࢻْتُ ࢽَࢽْلٜوَیٜ کٜوُورُو، دَلِلْࢽْجُدْ ثِدِ مَیْیٜدْ ثِدِࢽْجَا أَمْبَجِ ࢽَࢽْغَرُو؞
[21] سَرْدُ کَمْدْغْࢽَدْ کِدْࢽِّیَ، مَیْ حِرُدُسْ کَلْوُࢽْجُ مَیْلَ ثَکّٜ کُرِسْ کْرْمَیْیٜࢽْ ࢽَࢻْثٜ تَیِرُو جَوَوِ کِدُّو؞
[22] جَمَدْ کُواْ سَࢻْکَدَارُو: «کُواْ کَمْبٜ غْࢽِ، أَلَ لَایٜ!» ثَࢽِ؞
[23] اللَّهرُو دَرَجَدَ ثِࢽِّ ࢽَࢽْغَرُو، سَدْمَࢽْ مَلَیْیَ کْمَࢽْدٜىٰ لَا تِیَ بَکّٜࢽُو؞ دَجِ کُرِسُو جَوُࢽٜ رُو کِرْمْبُو؞
[24] مَࢽَ اللَّهیٜدْ ࢻُوُ جُوٜ ثَیٜمَا کُوجْࢽَرُو تَتَرْدِیے کْرْغَ؞
[25] بَرْࢽَبَسَّ شَوُلُوَ کِدَࢽْجَ بَࢽَ کُدُویٜ جٜرُجَلٜمْࢽِࢽْ کٜسٜرْࢽِّیَ، یَحْیـَى تِرُو مَرْکُسْ ثَࢽِدَ ࢽغُوجَࢽٜ وَلَّدَرَ؞