[1] لَرْدُ إِتَلِیَیٜرُو مَارَࢽْ لٜࢽِیٜرُو ࢽِیَ ࢽغُویٜرَࢽِّیَ، بُلُسَّ کُوسُووُ غَدٜ لَآ مُکُّو جُلِیُسْ سُوجِ کُرَ لَا کْوُ سُوجِیَ کَیْسَرّٜرُو کٜسَکُّو؞
[2] مَارَ بْرْࢽِ أَدْرَمِتِیَیٜ لَا بْرْࢽِیَ جَرَرَ ثِدِ أَسِیَیٜیَ جْغَیْرُو ࢽغَیِیٜ لٜىٰیْیٜ؞ ثُرُوࢽْدٜࢽْ کَمْ لَا بْرْࢽِ تَسَلُوࢽِکَ لَرْدُ مَکِدُوࢽِیَیٜ تِرُو أَرِسْتَرْکُسْ ثَࢽِ مبٜجِ؞
[3] وَجْࢽَࢽْجُوَ بْرْࢽِ سِدُوࢽّٜرُو کَدِیٜࢽْدٜیَ، جُلِیُسْ ࢽَࢽّغْلَ بُلُسُّو ࢻْلٜجِیٜ تِیَ کُولْجٜ سَوَوَࢽْجُیٜرُو مْرَدُࢽْجُ غَلْجَرُو لٜىٰࢽُو؞
[4] ࢽَ أَدْࢽْ سَࢻْکَدَیْیٜࢽْدٜیَ، کَرُوَ لٜدُ دَمْسَغَیْدْرُو، کَࢽْجِ کَرُوَ دُࢽُو بَوُووَ ثُکُ کُوِرُسّٜࢽْ غَیْیٜ کُویٜیْیٜ؞
[5] دَجِ کَࢽْجِ لَرْدُ کِلِکِیَیٜیَ بَمْࢻِلِیَیٜیَ کَدُࢽِیٜیَرُو تٜکُدَ ࢻَلِّیٜ کُوࢽِیٜ بْرْࢽِ مِرَ لَرْدُ لِسِیَیٜرُو کَدِیٜ؞
[6] ࢽَدْࢽْ سُوجِ کُرَدْ مَارَ لَا بْرْࢽِ أَلٜکْسَࢽْدَرِیَیٜ لَرْدُ إِتَلِیَیٜرُو لٜجِ ثُوَࢽْدٜ أَࢽْدِیَ ثُرُوࢽْجُرُو سٜسَکُّو؞
[7] کَوُ کَدَرُو یِلَ یِلَیٜࢽْ ࢻُوُࢽِیٜ دُوُوࢽْ، کِیَدِّࢽْ بْرْࢽِ کِࢽِدُسّٜ کَرْࢽْغٜیْیٜ؞ کَرُوَ کُولْسَࢽٜ کْلَ ࢻُوُࢽَّ لٜࢽِیٜوَوُودْ، کَࢽْجِ کَرُوَ دُࢽُو بَوُووَ ثُکُ کْرٜتّٜرُو لٜࢽِیٜ ࢽِیٜ ࢻُوُ بْلَ سَلْمُوࢽِیٜࢽْ دِرِࢽِیٜ کُویٜیْیٜ؞
[8] جَرَرَدَ غَیْیٜیَرُو کِیَدِّࢽْ ࢻُوُرُو لٜࢽِیٜ دُوُوࢽْ، ࢽَ تِرُو دَدُرَمْ ࢽغْلَ مَارَ إِࢽْغِیٜ ثَࢽِ کَرْࢽْ بْرْࢽِ لَسِیَیٜرُو کَدِیٜ؞
[9] بْلَوُرُوࢽْدٜ کَوُ ࢽغْوُ جُوٜ أَسٜمْدْ کُوجْࢽَ ࢽَࢽْغَرُو مَارَࢽْ لٜدُدْ جَوْرُو مَسِوَارُو وَلْیٜࢽُو؞ أَدْ ࢽَࢽْغَرُو بُلُسْ أَمْ تِیَ کَلُّو لٜجَیْیٜ سْمُو کَسّٜ
[10] تَیِرُو: «جَمَ، بْلَوُرُودْ مَارَا کَرٜیَ رُࢽْجَ غْࢽِ، رُوࢽْدٜمَرُو بَࢽَّ سُو، أَسَرْ کُرَ سُو ثُکُّدِرُو رُکِّ؞»
[11] أَمَّ سُوجِ کُرَدْ أَوُو بُلُسْ وُلْجِ یَیٜرُو مَࢽَ کُرَ مَارَ کْرِدُوُیٜیَ کْمَ مَارَمَیٜیَیٜدْمَا أَرْدِجُو؞
[12] ࢽَࢽْغْرِلَࢽْ دَدُرَمْ مَارَیٜ أَدْࢽْ ࢽَࢻْتُدْ کْجِ غْࢽِ ࢽَࢽْغَرُو، أَمْدْیٜ ࢽغْوُࢽْجَ ࢽَدْࢽْ سَࢻْتُیٜ ࢽِیَ ࢽغُویٜرَ؞ یُوجِیَ، ࢻٜࢽِسُّو لٜجَࢽٜ ࢽَدْࢽْ ࢽَࢽْغْرِ کُوجَیْ یٜرَ، ࢻٜࢽِسْدْ دَدُرَمْ مَارَیٜ ثُکُ کْرٜتّٜ أَࢽْمْࢻْدٜیَ یَلَࢻْدٜیَرُو ثِ؞
[13] کَسَمْ لَا أَࢽْمْبٜ ࢻُدُ بَدِیٜࢽِّیَ، مَارَوُدْ أَوُو مَجَیْدَ ثَوَࢽْدْࢽَ ثَࢽٜ سُࢽُ إِࢽْغِلَࢽْ ثَتُّلُوٜ جَرَرَ ثُکُ کْرٜتّٜ جَاࢽٜ لٜىٰرَ؞
[14] أَمَّ سَمْ کِدْࢽِّیَ، کَرُوَ دُࢽُووَ تِرُو کَرُوَ یَلَغْدِمِ ثَࢽِ کَࢽْجِ ثُکُدْیٜࢽْ تَیْ دَجٜ ࢻُجٜ
[15] مَارَدَ دَࢻْ کِدَ؞ کَࢽْجِ کَرُوَدْیٜرُو سُوُورْدُ تِیٜرُو ࢽَࢽْغَرُو، کُولِّیٜ کَرُوَدْ أَࢽْدِیَ سٜیَدُو؞
[16] ثُکُ تْࢽْغْرِ لَا تِرُو کَوْدَ ثَࢽِدْیٜ کَࢽْجِࢽْجُ کَرُوَ غَࢽَ ࢻُلُدْࢽَدْرُو کُویٜیْیٜࢽْدٜیَ، کِیَدِّࢽْ مَارَ غَࢽَدَ کَࢽْجِࢽْدٜرُو غْرْࢽِیٜ
[17] مَارَدْرُو إِسَتَتْکٜىٰیْیٜ، مَارَوُدْ جٜلَࢽْ مَارَ کُرَدَ ثِدِیَ سَمٜࢽَّرُو دِرِجَࢽٜ کْلْجَࢽٜ مِتْ کٜکّٜرُو؞ بَرٜ سِرْتِسْدْرُو غْمْدَغَࢽِّرُو بَتَّ مَارَ جُدَرَمْدَ ثَسَیٜ کُولْجَࢽٜ کَرُوَدْ مَارَدَ تْمْبَلْیٜࢽُو؞
[18] کَرُوَدْ جَوْمَرُو بَࢽْسَیْدْ، دُࢽِیَ وَیٜࢽِّیَ، کَرٜ ثُرُو تٜکُیٜرُو غْࢻْتُوُ بَدِیٜرَ؞
[19] کُورُو یِمْبٜ یَکُّوَ کَرٜ کِدَیٜ مَارَدْیٜیَ مُکُّوࢽْجَمَࢽْ إِࢽْغِدْرُو غْࢻْکٜىٰرَ؞
[20] کٜىٰرَ دَمَ بَوُودْرُو کَوُ کَدَرُو کْࢽْغَلْ بِ سِلُّووُ رُیْیٜࢽْدٜ، حَرْ تْمَࢽْدٜ ࢽجْکَّوُویٜ سَمَّا کُولْیٜیْیٜ؞
[21] تُسّْࢽَ کْمْبُو جَوُࢽِّدْ، بُلُسْ دَوُࢽْجَࢽْ دَجٜ تَیِرُو: «جَمَ، ثَ مَࢽَࢽِ بَرٜ ثُکُ کْرٜتّٜ کُولِّیٜࢽْدٜدَ ࢽغُوࢽُوَّا، بَࢽَّا أَسَرَّ أَࢽِ ࢽغَرُو کَࢽِیٜࢽَ؞
[22] أَمَّ کْرْمَ مَرْࢽُواْ، کَرْوُࢽْدُو غٜرُواْ! وُࢽْدُࢽْدُومَ ࢽُیْوَوُو، مَارَدْ رُࢽْجُمَا ࢻُدِّیٜ؞
[23] ࢻَࢽُّواْ، بُࢽٜ أَدْمَࢽْ مَلَیْیَ اللَّه دُوُوࢽْ وُ کَاࢽجُ یٜ، غَکِّ یٜدْیٜ غْرٜࢽِࢽْ دَجٜ
[24] وُرُو: ‹بُلُسْ، بَرٜ رِࢽْمِّ! دُولٜ ࢻُوُ کَیْسَرّٜࢽْ دَࢽْمِ، کُورُو أَکُّو اللَّه ࢽجُࢽُوࢽْجٜ ࢽجَدُّوُووُࢽْمْ سَمَّیٜ رُو ثْکَّیِ،› یٜࢽُو؞
[25] تُو، جَمَ، کَرْوُࢽْدُو غٜرُواْ! وُلْسْغْࢽَدْ غَیْ کَلْکَلُّو وَکَّجِرُو اللَّهَ مْرْسَࢽْکّْࢽَ؞
[26] أَمَّ سَیْ ثُکُ لَارُو غْمْدِییٜیَ،» یٜࢽُو؞
[27] کَوُ مٜوُ دٜرِ کِدْࢽِّیَ، بُࢽٜࢽْجُوَ کَرُوَ دُࢽُووَدْ أَࢽْدِیَ کْلَ تٜکُ أَدَرِیَیٜࢽْ تْمْبَلْدُ ثْدِ دُوُوࢽْ، دْرْدُ یِࢽْدِ غَیْ مَارَوُدْ ثِدِ کَرْࢽِّیٜࢽَرُو تْمَیٜرَ؞
[28] ࢽَࢽْکُرُوُ إِࢽْغِیٜ ࢽغَلْیٜرَࢽِّیَ، ࢽغَࢽْجِ ࢻِࢽْدِ کٜوَࢽْدُو؞ غَࢽَ ࢻُوُجَࢽٜ غَدٜمِࢽُّو ࢽغَلْیٜرَࢽِّیَ، مٜوُ وُرِ کٜوَࢽْدُو؞
[29] مَارَدْ کَوْوَسُورُو غْغْمْدِیرُو رِجَࢽَدْ، سُࢽُ دٜوُ ࢽغَوُو مَارَدْیٜࢽْ إِࢽْغِرُو تَلَرْجَغَࢽٜ وَدُ دُࢽِیَیٜ وَرْیٜرَ؞
[30] دَجِ مَارَوُدْ کْلَࢽْجَ ࢽجْکَّوُورُو غَرِࢽْجَغَࢽٜ ࢻُوُ مَارَدْیٜࢽْ سُࢽُوَ إِࢽْغِرُو تَلَرْجَغَیْ ثَࢽٜ مَارَ غَࢽَدَ إِࢽْغِرُو کُولْدُوُ بَدِیٜرَ؞
[31] بُلُسّٜ سُوجِ کُرَدَ سُوجِیَدَرُو: «مَارَوُ أَࢽِ مَارَدْࢽْ ࢽَࢻْثَیْوَوُووَ، رَࢽْغُوٜ رُوࢽْدُو یِکَّوُوَّوُو!»
[32] دَجِ سُوجِیَدْ جٜ مَارَ غَࢽَیٜدَ کَمْجَࢽٜ کُولْجَࢽٜ کِکُّرُو؞
[33] ࢻَجَرْ بُلُسْ کْمْبُو جَوُورُو تَیِ سَمَّا لُواْجٜ: «أَکُّو کُ کَوُࢽْدُو مٜوُ دٜرِ أَوِمَ بُوِّ أَوُو وَکَّجِ غُرٜࢽُوِدْ!
[34] تُو، لُواْࢽْجَکّْࢽَ، ࢽَࢽْلٜوَࢽْدُورُو بُیْوُو! أَیْ، کَࢽْدُرِ کْلَ وُࢽْدُࢽْدُویٜمَ ࢻَثِّیوَوُو؞»
[35] أَدَ وُلْیٜࢽِّیَ، بُلُسْ بُرُودِ ࢽغُوجٜ ࢻُوُ تَیِ سَمَّیٜࢽْ اللَّهرُو أَرْدِجٜ ࢻْسَکْثٜ ࢽغْرُو بَدِیٜࢽُو؞
[36] دَجِ تَیِ سَمَّ یٜ دُࢽُو ثَوَࢽْدٜ غٜوُو؞
[37] ثُرُو مَارَدْیٜࢽْ أَࢽْدِ أَمْ یٜرْ یِࢽْدِࢽْ ࢻِتُلُرْࢽِࢽْ لُکُّو أَرَکُّࢽْ؞
[38] جَوُࢽٜ کُلْیٜرَࢽِّیَ، مَارَدْ کَمْبُویْجُورُو أَلْغَمَدَ تٜکُرُو ࢻِیٜىٰرَ؞
[39] دُࢽِیَ وَیٜࢽِّیَ، مَارَوُدْ ثِدِدَ ࢽُوجَࢽِّ، أَمَّ ثِ بْرْمْبٜ ࢽَ لَا کَتِّیَ کٜرُو؞ رَکْثَیْیَ، مَارَدَ ࢽَدْرُو ࢽجَدُورُو مَجَیْ یٜرَ؞
[40] دَجِ سُࢽُوَدَ سُوُثَّࢽٜ تٜکُࢽْ کُولْیٜرَ؞ سَدْمَࢽْ جٜ کْرِدُرَمْسُودَ رُوجْࢽَا وُیْجَࢽٜ بَتَّ مَارَ جُدَرَمْدَ کَرُوَرُو ثَسَࢽْغِیٜ ࢽَ کَتِّیَدْرُو غْرْدُ بَدِیٜرَ؞
[41] أَمَّ ࢽَ لَا إِࢽْغِ کُرُوُ غْࢽِرُو إِسَࢽٜ مَارَدَ ثِدِرُو غْمْغٜرَࢽِّیَ، ࢻُوُࢽْجُدْ کَکْ دَجٜ، ࢽغَوُوࢽْجُدْ یٜ دُࢽُو تْمْبَرِیَیٜ ثَکّٜ ࢽَࢽَمْدُ بَدِیٜࢽُو؞
[42] بَرٜ وُࢽْدُࢽْجَمَ کَمْبِ ثْدٜ ࢽغْرْمْجْࢽِّرُو، سُوجِیَدْ کُوسُووُ سَمَّا ࢽجٜجُورُو ࢽِیَ ࢽغُویٜرَ؞
[43] أَمَّ کُرَࢽْجَدْ بُلُسَّ ࢽجْکَّوُو ثْرَاࢽَ ࢽَࢽْغَرُو، تَیِرُو أَوُو ࢽِیَجَࢽَدَ دَࢻْکٜىٰࢽُو؞ أَمْ کَمْبِ ࢽُوجَࢽَدْرُو وَدَ ثٜ بُرْوُوࢽْ سْکْتَ إِࢽْغِرُو غْࢻْتَا کَمْبِ ثَدُو ثِ تٜکُیٜرُو لٜجَ ثْࢽٜ
[44] أَمْ غَدٜدْ یٜ کَتَکُو سُو، ࢽجُوࢽْغُو مَارَیٜ سُویٜࢽْ کْلَࢽْ لٜجَ یٜࢽُو؞ أَدْغَیْࢽِࢽْ وُࢽْدُ یَیٜ کْلٜوَ سَلَیْࢽِࢽْ ثِ تٜکُیٜرُو کَدِیُو؞