[1] بْرْࢽِ إِکُوࢽِیَیٜ یٜࢽْ بُلُسَّ بَرْࢽَبَسَّ دَࢽْدَلْ یَوْدِیَیٜرُو ࢽغَسَیٜ مَࢽَ ثَدٜ حَرْ یَوْدِیَا أَمْ غْرٜسّٜیَ کَدَ کَدَمِ عِیسَىٰ کَسَتْکٜرَ؞
[2] أَمَّ یَوْدِیَ کَسَتُّ وَجَࢽَدْ حَࢽْغَلْ کْرْدِیَیٜیَ ثَسَࢽْغٜ ثَسَکّٜ کْرَمِیَدَ ࢽغُکّٜرَ؞
[3] ࢽغَیْ دُوُوࢽْ، کَوُ ࢽغْوُرُو ࢽَࢻْثَࢽٜ رِدُ بَوُووَرُو کْࢽْدُوُو کْمَࢽْدٜىٰࢽْ کَوُرِ کٜدُو؞ کْمَࢽْدٜ یٜ أَلَمَ سُو، أَوُو أَجَبَّ سُو دِیُو تَیِرُو أَمَرْجِیٜ مَࢽَࢽْجُ سٜرْ ࢻَࢽْدُویٜدَ جِرٜرُو تَبَّثِّیے کْرْغَ؞
[4] أَمَّ بْرْࢽِوُدْ یَکْتَࢽٜ لَا یَوْدِیَدَ غٜیَ، لَا یٜ کْࢽْغَیَمْبَدَ غٜیَ؞
[5] دَجِ کْرْدِیَ سُو، یَوْدِیَ سُو ࢻُوُوُࢽْجَا رُوکُّو سَوَرْدَࢽٜ تَیِیَ بَسَرْجَࢽٜ دُوࢽْغُرْ کَوْیٜࢽْ ثٜىٰسِ یٜرَ؞
[6] کْࢽْغَیَمْبَدْ أَدَ ࢻَࢽْغٜرَࢽِّیَ، ثَغَسٜ بْرْࢽِیَ ثِدِ لِکُوࢽِیَیٜ لِسْتْرَا دَرْبٜیَ بْلَمَسْکِیَࢽْجَارُو لٜىٰرَ؞
[7] ࢽَ أَࢽِ یٜࢽْ کَوُرِ کْجِدَ أَمْبُو وُلْیٜىٰرَ؞
[8] بْرْࢽِ لِسْتْرَیٜلَࢽْ کَمْ لَا سِ ثَࢽَا مبٜجِ؞ تْࢽْ تَمْبْࢽَیٜࢽْ تِ ࢽغُرْدِیے، کُورُو ࢽغَلْتٜمَ سِࢽْجُࢽْ لٜجْࢽِّ؞
[9] کَمْدْ مَࢽَ بُلُسّٜیَ کْرْࢽْجِ دُوُوࢽْ، بُلُسْ تِیَ سِمْࢽِࢽْ ثَࢻُّو ثُرٜ کَمْبْرْسٜࢽْجُ ࢽغَدُیٜیَ کِرُࢽِّیَ،
[10] کُواْ سَࢻْثٜ تِرُو: «ثِࢽٜ، سِࢽْمْلَࢽْ ثْکُّو دَࢽٜ!» یٜࢽُو؞ سَدْمَࢽْ کَمْدْ وُࢻْ ثِجٜ دَدَدُ بَدِیٜࢽُو؞
[11] جَمَدْ أَوُو بُلُسْ ثْدْࢽَدَ کٜرُࢽِّیَ، تْلَمْࢽْجَ لِکُوࢽِیَیٜࢽْ کُواْ سَࢻْثَࢽٜ: «أَکُّو أَلَوَ لَا ثَمُࢽُو کَمْبٜࢽْ سَمٜلَࢽْ جْمْسَاࢽَ!» ثَࢽٜ
[12] بَرْࢽَبَسَّ جٜوُسْلَࢽْ بُواْجَࢽٜ بُلُسْ یٜیَ حٜرْمٜسْلَࢽْ بُواْیٜرَ، تِمَ مَࢽَ دِیُومَدْ وُو ࢽَࢽْغَرُو؞
[13] دَجِ رِمَࢽْ جٜوُسّٜ تِ دُوُوࢽْ ࢻَدُو سْࢽْمْࢽْجُیٜ ࢻُوُ بْلَیٜࢽْ دْغَࢽَدْ دَلُووَا ࢻْرٜیَا ࢽغَوُورَمْ بْرْࢽِدْیٜرُو کِوُدُو، تِیَ جَمَدَ رُوکُّو بُ ࢻِدَ دِیُو ثَرَاࢽَ ࢽَࢽْغَرُو؞
[14] أَمَّ کْࢽْغَیَمْبَ بَرْࢽَبَسَّ بُلُسَّدْ أَدَ ࢻَࢽْغٜرَࢽِّیَ، کَلْوُࢽْجَ کَرْجَࢽٜ دْغَلْجَࢽٜ دَوُ جَمَدْیٜرُو ࢽغَسَیٜ کُواْ دُࢽُووَرُو سَࢻْثَࢽٜ
[15] تَیِرُو: «جَمَ، أَوِرُو أَوُو أَࢽِیَ دِوِ؟ أَࢽْدِ یٜ أَمْ ࢽَیِ غَیْ، دِیٜ! کُورُو ࢽَیِرُو کَوُرِ کْجِ وُلْدُوُرُو کَدِیٜ؞ أَوُو بُووُ أَࢽِیَ کُولُّواْ، اللَّه کْࢽْدْغَیْمَ تِ سَمٜیَ ثِدِیَ تٜکُوَ أَوُو ثُرُوࢽْجَࢽْ دَسَاࢽَ سَمَّآ أَلَکْثْࢽَدْرُو تْمْدْغْࢽُواْ!
[16] جَمَࢽْ کُرٜىٰࢽْ جَمَ سَمَّا کُولْجٜ جَوَلْࢽْجَ ثَرَاࢽَا ࢽغُویٜرَ؞
[17] أَدْسُوࢽْ سَوِسُو أَوُو ࢽغْلَ ثْدِدْ شٜدَࢽْجُرُو وَلْجْࢽَ؞ ࢽغَیْمَ سَمٜلَࢽْ إِࢽْغِ ثُدُّرِ، کُورُو ࢽٜمَدَ سَࢽْجُلَࢽْ ࢻَࢽْدُوِ؞ کْمْبُو ࢽجَدٜ کَرْوُࢽْدُو کْجِجِ،» یٜرَ؞
[18] مَࢽَ أَࢽِیَ ثَدِّمَ، کِیَدِّࢽْ جَمَ ثَࢻْکَدَدْرُو بُ ࢻِدَ أَدَ تَیِ ࢽَࢽْغَرُو دِیُو دَࢻْکٜىٰرَ؞
[19] دَجِ یَوْدِیَ لَا بْرْࢽِ أَࢽْتَکِیَیٜیَ إِکُوࢽِیَیٜیَلَࢽْ إِسَࢽٜ جَمَدَ کَاࢽجَرُو کٜدْࢽِّیَ، بُلُسُّو دُوࢽْغُرْ کَوْیٜ غْغْࢻْثَغَࢽٜ ࢽُࢽَ ثَࢽٜ غْرْجَࢽٜ ࢽغَوُو بْلَیٜࢽْ کُولْیٜرَ؞
[20] أَمَّ ࢻُوُرَوَدْ إِسَࢽٜ تِیَ دِرِجَࢽٜ کْلْیٜرَࢽِّیَ، ثِجٜ وَلْدٜ بْرْࢽِدْرُو کْرْغَوُو؞ وَجْࢽَࢽْجُوَ بَرْࢽَبَسَّ رُوکُّو بْرْࢽِ دَرْبٜىٰرُو لٜىٰرَ؞
[21] بُلُسَّ بَرْࢽَبَسَّ کَوُرِ کْجِدَ بْرْࢽِ دَرْبٜىٰلَࢽْ وُلْجَࢽٜ أَمْ کَدَ عِیسَىٰ غَوُرُو وَلْیٜرَࢽِّیَ، بْرْࢽِ لِسْتْرَیٜیَ إِکُوࢽِیَیٜیَ أَࢽْتَکِیَیٜیَرُو وَلَّدَرَ؞
[22] کَرْوُ ࢻُوُرَوَدْیٜرُو دُࢽُو ثَسَکّٜ کَمْبْرْسٜࢽْجَࢽْ ࢻُوُ جَوُورُو کُواْرِ ثَدٜ تَیِرُو: «سَیْ جَوْرُو بُوࢽٜ یَیْیٜیَ دُوُوࢽْ، ࢽُودُو بَرْغَا اللَّهیٜرُو ࢽغَیِیٜ،» یٜرَ؞
[23] ثُرُو جَمَ عِیسَىٰ غَوُ ࢻِیٜ یَیٜࢽْ أَمْوُرَوَ غَلَیٜرَࢽِّیَ، مُودُوَا أَسٜمْبَ ثَدٜ تَیِیَ مُکُّو کْمَ مْرْسَجَࢽَدْیٜرُو کٜسَکُّو؞
[24] دَجِ ثِدِ بِسِدِیَیٜیَ رٜجَࢽٜ کُوجَࢽٜ لَرْدُ بَمْࢻِلِیَیٜرُو لٜىٰرَ؞
[25] بْلَ ࢻْرْغَیٜلَࢽْ کَوُرِدَ وُلْیٜرَࢽِّیَ، بْلَ أَتَّلِیَیٜرُو کُویٜرَ؞
[26] ࢽَدْࢽْ مَارَرُو ࢽغَسَیٜ بْرْࢽِ أَࢽْتَکِیَ ثِدِ سِرِیٜرُو کَدِرَ؞ ثَمَࢽْ بْرْࢽِدْࢽْ عِیسَىٰ غَوُدْ تَیِرُو کِدَ کْرْمَ تُمُوجَاࢽَدْرُو سٜرْ اللَّهیٜ ثَکُّورْࢽَ؞
[27] کَدِرَࢽِّیَ، جَمَ عِیسَىٰ غَوُدَ ثَࢻْثَࢽٜ أَوُو اللَّه تَیِ یِࢽْدِیٜࢽْ ثْدْࢽَ سَمَّا جِرِ کْرْدِیَرُو ثِࢽَّ کَمْبْرْسٜ ࢻَࢽْدُویٜ کَجْغْࢽَآ تَیِرُو وُلْیٜىٰرَ؞
[28] بُلُسَّ بَرْࢽَبَسَّ کَوُ کَدَرُو دَوُ ࢻُوُرَوَدْیٜࢽْ ࢽَࢻْکٜرَ؞