[1] وُمَ بُلُسْ وُولُودِ عِیسَى أَلْمَسِیوُیٜ یٜ، کْࢽْغَیَمْبُو وَلْدُرُو بُواْوَدَ یٜ، کَوُرِ کْجِ اللَّهیٜ وُلْدُرُو غَلَادَ یٜ،
[2] کَوُرِ کْجِ دُوُوࢽْ اللَّه کُرٜࢽْ ࢽَوِیَࢽْجُیٜࢽْ کِتَوُوَ دَرَجَالَࢽْ ثِ ثْࢽٜ وَدُ ࢽغُوجْࢽَدْ؞
[3] کَوُرِ کْجِدْ کْلَ تَدَࢽْجُیٜࢽْ، تِ دُوُوࢽْ ࢽَࢻْتُࢽْجُ أَدَمْغْࢽَیٜࢽْ کَدُوُ ࢽَوِ دَاوُدَیٜ،
[4] کُورُو کْلَ رُحُ اللَّهیٜࢽْ کَرْمُولَࢽْ ثِدُࢽْجُ ࢽَࢽْغَرُو کْࢽْدُوُووَرُو تَدَ اللَّهیٜرُو تَبَّثَّاࢽَدْ، تِمَ کْمَࢽْدٜ عِیسَى أَلْمَسِیوُ وُو؞
[5] تِلَمَࢽْ سٜرَّ ࢽَࢽْکْࢽْغَیَمْبَا کِوَࢽْدِیٜ، ثُࢽْجُ ࢽَࢽْغَرُو أَمْسُو ثُرُو کْرْدِیَ سَمَّیٜࢽْ تِیَ کَسَثَّ جَارُو؞
[6] ثُرُوࢽْجَࢽْ ࢽَیِ یٜ جَمَ عِیسَى أَلْمَسِیوُیٜرُو وَلْدُرُو بُواْوَدَ؞
[7] ࢽَیِ دُوُوࢽْ اللَّه ࢽجَرَاࢽَ یٜ، مُمِࢽُّو وَلْدُرُو بُواْࢽْجَࢽَ یٜ بْرْࢽِ رُومْبٜࢽْ دْغَوَّ سَمَّرُو: اللَّه بَوَࢽْدٜیَ کْمَ عِیسَى أَلْمَسِیوُوَ ࢽَیِرُو سٜرَّ ࢽَࢽْلٜوَا ࢽجَدُو!
[8] بُرْوُو سَلَّمِّࢽْ عِیسَى أَلْمَسِیوُیٜࢽْ ࢽَیِ سَمَّ ࢽَࢽْغَرُو اللَّهࢽِیَ وُسٜࢽْکِّ، مَࢽَ کَمْبْرْسٜࢽْدُویٜ دُࢽِیَ ࢽغَلَࢽْ ثَدِدْرُو؞
[9] اللَّه شٜدَمَࢽِ، تِ دُوُوࢽْ رُوࢽِلَࢽْ أَمْبْتْکْکّٜ کَوُرِ کْجِ تَدَࢽْجُیٜیَ مَوُوࢽْکِّدْ، دَدُ بَوُورُو ࢽَیِیَ تَࢽّجَکّٜ
[10] کُلُّمْ مُودُوَ ࢽجَدّْکِّ، کُورُو اللَّهیٜ ثْدِیَ، دَمَ ࢽَࢽْدُورُو لٜدُیٜ ࢻَࢽْدْکُّورُو تِیَ کُورْکِّ؞
[11] ࢽَیِیَ کُرُورُو جَوْرُو رَاکّْࢽَ، کْࢽْجُو سٜرّٜ رُحُ اللَّهیٜࢽْ کَرْوُࢽْدُورُو دُࢽُو ࢽجُومَ لَا ࢽَیِرُو ࢽجَدّْکُّورُو،
[12] وُوتّٜ کَتّٜࢽْدٜࢽْ کَمْبْرْسٜ کَاࢽدُووَ کَکّٜیَیٜࢽْ أَࢽْدِ سَمَّ دُࢽُو ࢻَࢽْدِیُورُو؞
[13] کْرَمِیَ، أَدَ ࢽُوࢽُوِیَ، رَاکُّو: کْرْدِیَ لَرْدُوَ غَدٜىٰࢽْ غَیْ، ثُرُوࢽْدُو یٜࢽْ ࢽٜمَ لَا ࢻَࢽْدْکُّورُو ࢽغْوُرُو ࢽِیَ ࢽَࢽْدُورُو لٜدُیٜ ࢽغُوکّْࢽَ، أَمَّ حَرْ کُرُو ࢻَࢽْدْکّٜ لٜکّْࢽِ؞
[14] أَمْ کْلَ ࢻْرْمْغَدَ یٜࢽْ کَلْ، ࢻْرْمْدْࢽِّ یٜࢽْ کَلْ، إِلْمُوُ یٜࢽْ کَلْ، إِلْمُوُ غْࢽِ یٜࢽْ کَلْ، تَیِ سَمَّرُو کَوُرِ کْجِ وُلْدُوُرُو کْلَرُو ࢽغُوکّْࢽَ؞
[15] أَدْمَ ࢽَࢽْغَرُو ࢽَیِ بْرْࢽِ رُومْبٜࢽْ دْغَوَّدْ یٜرُو کَوُرِ کْجِ وُلْدُوُ جَوْرُو رَاکْࢽَدْ؞
[16] کْلَ کَوُرِ کْجِدْیٜࢽْ ࢽَࢽْغُکّْࢽِ، تِمَ کْࢽْدُوُو اللَّهیٜ کَمْ تِیَ کَسَثّْࢽَمَ ࢻِ یَیٜرُو ࢽجْکَّوُو کُدُومَدْ وُو، بُرْوُوࢽْ یَوْدِیَرُو، کُورُو یَوْدِیَ غْࢽِ یٜرُو؞
[17] ثُرُو کَوُرِ کْجِدْیٜࢽْ ࢽَࢽْجِرٜ اللَّهیٜ ࢻْلٜدِ، ࢽَࢽْجِرٜ دُوُوࢽْ کَمْبْرْسٜىٰࢽْ إِسِ یٜ، کَمْبْرْسٜرُو سِمُوجِیے یٜدْ، کِتَوُلَࢽْ رُوُوَدَدْ غَیْ: «کَمْ جِرٜمَدْ کَمْبْرْسٜىٰࢽْ رُووَ دْغَیْ؞»
[18] غْرْغَدُ اللَّهیٜ سَمٜࢽْ کْلَ أَوُو ࢽَࢽْمُمِࢽّٜ غْࢽِ سُو، جِرٜࢽَمْبُ سُو سَمَّ أَمْ جِرٜࢽَمْبُلَࢽْ جِرٜدَ غْرَجَیْدْیٜࢽْ ࢻْلٜدِ،
[19] دَلِلْࢽْجُدْ أَوُو کْلَ اللَّهیٜࢽْ ࢽُودِدْ تَیِرُو ࢻَرَکْ، اللَّه تَیِرُو إِسَࢽُوجْغْࢽَ؞
[20] تْࢽْ دُࢽِیَ أَلَکْتْࢽَیٜࢽْ أَوُووَ اللَّهیٜ تَرُیْوَوُودْ ࢽُووَدَ، أَوُو أَلَکْتْࢽَدْیٜمَࢽْ ࢻٜدٜرُو تَرُیْ ࢽَࢽْغَرُو، تَیِمَ کْࢽْدُوُوࢽْجُ سَوِسُویٜیَ ࢽَࢻْتُࢽْجُ اللَّهیٜیَ وُو؞ أَدْغَیْمَ أَمْدْیٜ دَلِلْࢽْجَ اللَّهَ ࢽُودُࢽَمْبُیٜ بَوُو،
[21] دَلِلْࢽْجُدْ اللَّهَ ࢽُوجَࢽَ یَیٜ، تِرُو دَرَجَ ثَدْࢽِّ بِ تِیَ وُسٜجَࢽِّ، أَمَّ حَࢽْغَلْࢽْجَ یٜ بُووُرُو وَلْجٜ کَرْوُࢽْجَ حَࢽْغَلْ بَوُووَدْ یٜ دُوُوَرُو وَلْجْࢽَ ࢽَࢽْغَرُو؞
[22] حَࢽْغَلْ کْجِیَرُو کْلَࢽْجَا ࢽغُویٜرَ، أَمَّ جُورِیَرُو وَلْجَࢽٜ
[23] دَرَجَ اللَّه تْمَّرُو ࢽُیْوَوُویٜدَ غُمْکِیَ أَدَمْغْࢽَ سُو، ࢽغُدُووَ سُو، لْمَࢽَّ سِ دٜوُوَ سُو، ࢽغَࢽْجِࢽْ غْرْدَوُ سُویٜ ثَمُࢽُولَࢽْ ࢻَلْیٜرَ؞
[24] أَدْ ࢽَࢽْغَرُو مَࢽْغَرْ دِوِ کَرْوُࢽْجَیٜࢽْ اللَّه تَیِیَ ثُرُو تَیِرْࢽَمْبُیٜࢽْ کُولْجٜ تِیࢽْجَࢽْ ࢻَیْدَدَࢽٜ أَوُو ࢽَࢽْغُوَ کَتّٜࢽْجَࢽْ کٜدُو؞
[25] جِرٜ اللَّهیٜدَ کَتُّوُلَࢽْ ࢻَلْجَࢽٜ أَلَکْتُمَ یَیٜرُو أَوُو أَلَکْتْࢽَرُو أَمْبْثَّغَࢽٜ سُجَدَ کٜدُّو؞ اللَّه أَلَکْتُمَدْمَرُو حَرْ أَبَدَرُو ࢽجُࢽْغُورُو تِیُو! أَمِࢽْ؞
[26] أَدْمَرُو اللَّه تَیِیَ ثُرُو جَرَوَ ࢽَࢽْغُوَیٜࢽْ کُولْیٜࢽُو؞ کَمُوَࢽْجَ کْࢽْدُو کَلْکَلْدَ أَوُو کَلْکَلْ غْࢽِلَࢽْ ࢻَلْیٜرَ،
[27] کُورُو جِرِ أَدْغَیْࢽِࢽْ کُوࢽغوَوَ یٜ کَمُوَا کْࢽْدُو کَلْکَلْ کُولْجَࢽٜ مْرَدُ کَمَࢽْجَیٜ جَوْرُو ثَدَࢽٜ کَتّٜ کُوࢽغوَوَیٜࢽْ أَوُو ࢽَࢽْغُوَ ثَدٜ أَجَوُ جَوَلَّࢽْ لُوُوࢽْجَیٜ وَجِࢻْثْࢽَدْ کْلَࢽْجَرُو کِکُّرُو؞
[28] اللَّهَ ࢽُودُدَ أَوُو ࢽغْلَرُو ࢽغُودُرُو وَجَࢽَ ࢽَࢽْغَرُو، اللَّه تَیِیَ حَࢽْغَلْ یٜسْکَدَرُو أَوُو جُسّْࢽِّ ثَدُورُو کُولْیٜىٰࢽُو؞
[29] کَرْوُࢽْجَدْ جِرٜࢽَمْبُ سُو، ࢽَࢽْکْلَدُو سُو، مَࢽْغَرْ دِوِ سُو، ࢽِیَدِوِ سُو سَمَّ یٜࢽْ ثْمْبْرْࢽَ، مَࢽْدْࢽَ سُو، کَمْ ࢽجٜجُو سُو، لَوَلَ سُو، ثُرُویِࢽْدِ سُو، أَوُو دِوِ دِوِ سُو یٜࢽْ رَࢻْکَدَ؞ تَیِ تَرْوَوُ،
[30] ࢽغَدَرْوُ، کْلَدُووَ اللَّهیٜ، أَمْ جَوْ، رُوکُرَوُ، کْلَ ࢻْلٜدُوُ، دِوِ دِیُورُو مَسْکُ، أَمْوُرَوَࢽْجَا غَࢽَمْبُوُ،
[31] حَࢽْغَلْࢽْجَ بَوُو، ࢽَࢽْعَدَلْ سُو، کْرَوُو سُو، کَࢽْجِمَرِ سُو یٜ بَوُو؞
[32] شَرَ اللَّهیٜ دُوُوࢽْ أَمْ کْࢽْدُو أَࢽِسُو غَیْ ثَدِمَدْرُو وُواْمْ کَرْمُویٜ وَجِࢻْثْغْࢽَدَ دَمْ ࢽُوجَࢽَ یَیٜ، تَیِ رُࢽْجُوَ غْࢽِ ثَدِ، کُورُو أَمْ ثَدِدْ یٜیَ أَرْدِجَیْ؞