[1] شَوُلُدْ کُوَ یَیٜ ࢻُوُرَوَ کْمَیٜرُو یِکَّدُووَ ࢽجٜجُووَ مَجِیَرُو ࢽَ رِمَࢽْ کُرَیٜرُو لٜجٜ
[2] وُوتِیَ دَࢽْدَلَّ بْرْࢽِ دَمَسّٜلَࢽْ دَسَاࢽَرُو رُوُجَارُو کِوُورُو؞ ࢽِیَࢽْجُدْ ࢽَدْࢽْ أَمْ جَوَلْدَ جَاࢽَ، کوَ یٜࢽْ کَلْ، کَمُ یٜࢽْ کَلْ کِوَࢽْدُووَ، تَیِیَ تِکّٜرْࢽَ جٜرُجَلٜمْبُو کُدُو؞
[3] جَوَلْ ثْدَࢽٜ دَمَسَّ کَرْࢽْجْࢽَ دُوُوࢽْ، سَدْمَࢽْ ࢽُرْ سَمٜلَࢽْ یِیلْجٜ تِیَ دِرِجٜ کْلْیٜࢽُو؞
[4] دَجِ ثِدِرُو بْࢻْ ثُرٜ کُواْ لَا تِرُو: «شَوُلُ، شَوُلُ، أَوِرُو وُوَ بَسَرْسْمِدْ؟» ثْࢽٜ ࢻَࢽْغٜࢽُو؞
[5] «کْمَ، ࢽِ وُࢽْدُ؟» ثْࢽٜ کِوُورْࢽِّیَ، تِیٜ: «وُمَ عِیسَى بَسَرْسْمِدْ وُو؞
[6] ثِࢽٜ بْرْࢽِرُو ࢽغَیٜ، ࢽَدْࢽْ کَمْ لَا ࢽِرُو أَوُو دِمِدَ وُلْࢽْجِیے،» یٜࢽُو؞
[7] أَمْ تِیَ ثَسَدُّوُࢽَدْ غْمْ دَیٜرَ؞ کُواْدَ ࢻَࢽْجَࢽَ دُوُوࢽْ، وُࢽْدُمَا ثَرُࢽِّ؞
[8] شَوُلُ ثِدِࢽْ ثِیٜࢽِّیَ، سِمْࢽْجُ کَادَ یَیٜ، أَوِمَ ثُرُیْوَوُو؞ دَجِ تِیَ جٜجَࢽٜ دَمَسُّو کَسَرْغَوُو؞
[9] کَوُ یَکُّرُو تِ کَمْبُ، کُورُو أَوِمَ جُوُࢽِّ یٜ، ثَࢽِّ یٜ؞
[10] دَمَسْلَࢽْ ࢻُوُرَ لَا أَࢽَࢽِیَ ثَࢽِ مبٜجِ؞ کْمَدْ وَحَیِلَࢽْ تِرُو: «أَࢽَࢽِیَ!» یٜࢽِّیَ، تِیٜ: «أَکُّوࢽِ، کْمَ!» یٜࢽُو؞
[11] کْمَیٜ تِرُو: «ثِࢽٜ لَیْ تِرُو ثْکْ ثَࢽِدْرُو لٜࢽٜ ࢻَدُو یَحُسَیٜࢽْ کَمْ لَا بْرْࢽِ تَرْسُسّٜ شَوُلُ ثَࢽِ کُورٜ! تِدْ مُودُوَ ثْدِ،
[12] کُورُو وَحَیِلَࢽْ کَمْ لَا أَࢽَࢽِیَ ثَࢽِ ࢽغَیٜ سِمْ ثُوَࢽْدُورُو مُکُّو تِرُو غْࢽَجِیے ثُرُࢽَ،» یٜࢽُو؞
[13] أَࢽَࢽِیَ کَلَکْثِیٜ: «کْمَ، کْلَ کَمْ أَدْیٜࢽْ، جِرِ کُتُّ کَدَ جٜرُجَلٜمْࢽِࢽْ مُمِࢽَّࢽْمْبُو ثْدّْࢽَدَ أَمْ ࢽغْوُیٜࢽْ ࢻَکّْࢽَ؞
[14] کُورُو ࢽَ أَدْࢽْ کْࢽْدُوُو مُکُّو وُرَوَ رِمَࢽَّیٜࢽْ أَمْ ثُࢽْمْبَ بُواْجَیْمَسُو سَمَّا غٜرُویٜ ثُوَࢽْدْࢽَ؞»
[15] أَمَّ کْمَیٜ تِرُو: «لٜࢽٜ، ࢻُوُ جَمَ کْرْدِیَا مَیْیَا جَمَ إِسْرَاءِیلَیٜیَیٜلَࢽْ ثُࢽِدَ مَوُوجُورُو تِیَ کِدَمَࢽِرُو کْرٜࢽْکّْࢽَ؞
[16] وُ کْلَࢽِ بُوࢽٜ ثُࢽِ ࢽَࢽْغَرُو ثَیْ سَمَّا تِرُو ࢻْلٜغْکِّ،» یٜࢽُو؞
[17] دَجِ أَࢽَࢽِیَ لٜجٜ ࢻَدُودْرُو کْرْغَاࢽِّیَ، شَوُلُرُو مُکُّو غْࢽَجِیٜ تِرُو: «کْرَمِࢽِ شَوُلُ، کْمَ عِیسَى دُوُوࢽْ ࢽِرُو کْلَ جَوَلْ تِلَࢽْ إِسْمَّدْیٜࢽْ ࢻْلٜدْغْࢽَدْ سِمْ ࢻَࢽْدْمٜ رُحُ اللَّهیٜ جْمْࢽْجُوُورُو وُوَ سُࢽُودُو؞»
[18] سَدْمَࢽْ أَوُو لَا کَسْکَسِ بُࢽِیٜ غَیْ سِمْࢽْجُࢽْ ثَسُرٜ سِمْ کِوَࢽْدُو؞ دَجِ ثِجٜ تِرُو کَسَلَ کٜدُّو؞
[19] ࢽغَوُو أَدْیٜࢽْ کْمْبُو جُوٜ دُࢽُو کِوَࢽْدُو؞ شَوُلُ بْرْࢽِ دَمَسّٜلَࢽْ ࢻُوُرَوَدَ رُوکُّو کَوُ غَࢽَرُو ࢽَࢻْکٜࢽِّیَمَ،
[20] دَࢽْدَلْ دَࢽْدَلُّو لٜجٜ عِیسَمَ تَدَ اللَّهیٜدْ وُو ثْࢽٜ کَوُرِࢽْجُ وُلْدُ بَدِیٜࢽُو؞
[21] أَمْ تِیَ ࢻَࢽْجَࢽَ سَمَّ أَجَࢻْثَࢽٜ: «تِمَ غْࢽَ کَمْ جٜرُجَلٜمْࢽِࢽْ أَمْ ثُ أَدَ بُواْجَیْمَسُووَ بَسَرْجِدْ وُو؟ کُورُو تَیِیَ تِکّٜرْࢽَ وُرَوَ رِمَࢽَّیٜرُو ࢽجَدُورُو ࢽَ أَدْرُو إِسْࢽَ، غْࢽَ؟» ثَࢽِ؞
[22] أَمَّ شَوُلُ ثَیٜمَا کُوجْࢽَرُو دُࢽُو ثُوَࢽْدٜ، حَرْ یَوْدِیَ دَمَسْلَࢽْ دَسَاࢽَدْرُو مَࢽَ تِرُو کَلَکْتُوُیٜ کَتْکٜرُو؞ تَبَّتْ عِیسَمَ أَلْمَسِیوُدْ وُورُو تَیِرُو إِسَࢽُوجِیے؞
[23] ࢽغَوُو کَوُ کَدَیٜࢽْ یَوْدِیَدْ سَوَرْدَࢽٜ ࢽِیَ شَوُلُوَ ࢽجٜجُویٜ ࢽغُویٜرَ،
[24] أَمَّ شَوُلُ ࢽِیَࢽْجَدَ ࢻَࢽْغٜࢽُو؞ بُࢽٜیَ کَوْسُوَ تِیَ ࢽجٜجُورُو ثِࢽَّوَ بْرْࢽِیٜدَ غُرٜجَیْ،
[25] أَمَّ بُࢽٜ ࢻُوُرَوَࢽْجُ تِیَ ࢽغُوجَࢽٜ ثُرُو جُواْیٜࢽْ غَرُیٜࢽْ تَلَرْیٜرَ؞
[26] شَوُلُ جٜرُجَلٜمْبُو کَدِࢽِّیَ، ࢻُوُرَوَدْرُو کْلْدُوُرُو مَیٜࢽُو، أَمَّ تَیِ سَمَّ تِیَ رِیٜرَ، دَلِلْࢽْجُدْ تِیَ ࢻُوُرَرُو مْرْسَجَࢽِّ ࢽَࢽْغَرُو؞
[27] دَجِ بَرْࢽَبَسْ تِیَ ࢽَ کْࢽْغَیَمْبَیٜرُو ثُوُدٜ تَیِرُو جِرِ کْلَ جَوَلّٜࢽْ کْمَ تِرُو ࢻْلٜدِیٜ مَࢽَ ثْدّْࢽَ یٜ، کُورُو دَمَسْلَࢽْ رِدُ بَوُووَرُو ثُ عِیسَیٜࢽْ مَࢽَجْࢽَ یٜدَ إِسَࢽُویٜىٰࢽُو؞
[28] سَ أَدْࢽْ شَوُلُ تَیِیَ رُوکُّو جٜرُجَلٜمْࢽِࢽْ لٜࢽْمَرٜ ثَدِ، ثُ کْمَیٜࢽْ رِدُ بَوُووَرُو مَࢽَجِ؞
[29] کُورُو یَوْدِیَ تْلَمْ غْرٜسّٜ جَࢽْدٜجَیْدْرُو مَࢽَ ثْدّٜ کَمْبِوُ ثَدِ، أَمَّ تَیِدْ تِیَ ࢽجٜجُورُو مَجَیْ؞
[30] دَجِ کْرَمِیَدْ أَدَ ࢻَࢽْغٜرَࢽِّیَ، تِیَ بْرْࢽِ کَیْسَرِیَیٜرُو ثَادٜ بْرْࢽِ تَرْسُسّٜرُو جُوَیٜىٰرَ؞
[31] أَدْغَیْمَ جَمَ عِیسَىٰ غَوُ ثِدِ یَحُدِیَیٜیَ غَلِلٜىٰیَ سَمَرِیَیٜیَ سَمَّ دُࢽُووَجَࢽٜ ࢽَࢻْتُ ࢽَࢽْلٜوَیٜ ثَدِ، کُورُو کْمَا رِدَࢽْجَا بَࢽَ رُحُ اللَّهیٜیَلَࢽْ ࢻُوُ جَوُࢽٜ ࢽغْوُجَیْ کَسَرْغَ؞
[32] بِتُرُسْ لَرْدُ سَمَّا دِرِجِ دُوُوࢽْ، ࢽَ مُمِࢽَّ بْلَ لِدَّیٜࢽْ دَسَاࢽَدْ یٜرُو کَدِیُو؞
[33] بْلَدْࢽْ کَمْ لَا ثُࢽْجُ إِࢽِیَسْ تِیࢽْجُ ࢽغَ ࢽُࢽَ کْرْوُ وُسْکُرُو کْلَ بُجِیٜࢽْ بُووَدَ مبٜجِ؞
[34] بِتُرُسّٜ تِرُو: «إِࢽِیَسْ، عِیسَى أَلْمَسِیوُ ࢽِیَ إِسَࢽْغَࢽْجْغْࢽَ؞ ثِࢽٜ بُجِࢽْمْ کْرِࢽٜ!» یٜࢽُو؞ سَدْمَࢽْ إِࢽِیَسْ وُࢻْ ثِیٜࢽُو؞
[35] أَمْ سَمَّ بْلَ لِدَّیٜیَ ࢻَیَ سَرُوࢽّٜیَلَࢽْ دَسَاࢽَدْ إِࢽِیَسَّ کٜرُࢽِّیَ، کْمَا غَوُرُو وَلْیٜرَ؞
[36] بْرْࢽِ یَࢻَیٜلَࢽْ ࢻُوُرَ لَا کَمُیٜ تَبِتَ ثَࢽِ مبٜجِ، تْلَمْ غْرٜسّٜلَࢽْ ثُࢽْجُ دُوکَسْ؞ سُرُّو سٜرْ ࢽغْوُ ثْدِ یٜ، تَلَاوَا بَࢽَجِیے یٜ؞
[37] یِمْ أَࢽِࢽْ کَسُوَ لَا تِیَ ثْدَࢽٜ بَوُویٜࢽُو؞ تِیَ کَسَلْیٜرَࢽِّیَ، ثُرُو سُورُو سَمٜىٰࢽْ غْࢽَیٜرَ؞
[38] بْلَ لِدَّیٜدْ کَرْࢽْ بْرْࢽِ یَࢻَیٜلَࢽْ ࢽَࢽْغَرُو، کُورُو ࢻُوُرَوَدْ بِتُرُسْ بْلَدْࢽْ مبٜجِرُو ࢻَࢽْغٜرَࢽِّیَ، أَمْ یِࢽْدِ جُوَجَغَࢽٜ تِیَ لُواْجَࢽٜ: «ࢽَࢽْدٜرُو دُوَࢽْ أَرٜ!» یٜرَ؞
[39] دَجِ بِتُرُسْ ثِجٜ تَیِیَ رُوکُّو لٜىٰرَ؞ کَدِرَࢽِّیَ، تِیَ سُورُو سَمٜىٰدْرُو کٜسَدُو؞ کَمُوَ کوَ ࢻَثَّاࢽَا سَمَّ ثٜسِرِیَرُو غْرٜࢽْجُࢽْ دَجَࢽٜ تِرُو کَلْوُ سُو، غْمَجٜ سُو دُوکَسْ سَ تَیِیَ رُوکُّودْلَࢽْ ثُدُدْࢽَا ࢻْࢻْلٜجَغَیْ؞
[40] بِتُرُسْ جَمَدَ ࢽغِمْدْࢽْ ثُتُّلُوٜ تُࢽْغُرُمْجٜ مُودُوَ کِدُو؞ دَجِ کَمِࢽْدْرُو سُوُورْدِیٜ: «تَبِتَ، ثِࢽٜ!» یٜࢽُو؞ سِمْ کَجٜ بِتُرُسَّ کِرُࢽِّیَ، ثِجٜ ࢽَࢻْکٜࢽُو؞
[41] بِتُرُسْ مُکُّویٜࢽْ تِیَ ثْدَࢽٜ کِسَࢽْغُو؞ دَجِ کَمُوَ کوَ ࢻَثَّاࢽَادْ سُو، مُمِࢽَّ غَدٜدْ سُووَ بُواْجٜ تِیَ رُوࢽْجُوَ تَیِرُو کَلَکّٜىٰࢽُو؞
[42] لَوَرْ أَدْ بْرْࢽِ یَࢻَیٜ ࢽغَرُو تَتَرْدِیٜ أَمْ ࢽغْوُ کْمَا کَسَتْکٜرَ؞
[43] دَجِ بِتُرُسْ بْرْࢽِدْࢽْ ࢻَدُو مْࢽْدْلْمَ لَا تِرُو سِمَࢽْ ثَࢽِدْیٜࢽْ جْࢻْثٜ کَوُ کَدَرُو ࢽَࢻْکٜࢽُو؞