[1] بُلُسْ بْرْࢽِ دَرْبٜىٰیَ لِسْتْرَیٜیَرُو لٜىٰࢽُو؞ ࢽَدْࢽْ ࢻُوُرَ لَا ثُࢽْجُ تِمُوتِ مبٜجِ؞ تِ تَدَ کَمُ لَا یَوْدِ عِیسَىٰ غَمَیٜ، أَمَّ بَوَࢽْجُدْ کَمْ لَرْدُ غْرٜسّٜ؞
[2] کْرَمِیَ بْرْࢽِ لِسْتْرَیٜیَ إِکُوࢽِیَیٜیَلَࢽْ دَسَاࢽَدْ تِمُوتِیٜ ࢽغْلَࢽْجُ وُلْجَیْ؞
[3] بُلُسْ تِیَ کَلُّو لٜجَرُو ثْرَیٜ یَوْدِیَ ࢽَ أَࢽِࢽْ دَسَاࢽَ سَمَّ بَوَࢽْجُ کَمْ غْرٜسّٜرُو ࢽُوجَࢽَ ࢽَࢽْغَرُو تِیَ کَجَیٜࢽُو؞
[4] بْرْࢽِ بْرْࢽِرُو لٜجَیْ دُوُوࢽْ، سَوَرِ کْࢽْغَیَمْبَا أَمْوُرَوَا جٜرُجَلٜمْࢽِࢽْ دَسَاࢽَیٜ کَمْجَࢽَدَ تَیِرُو ثَدْࢽٜ جَا یٜرَ؞
[5] أَدْغَیْمَ جَمَ عِیسَىٰ غَوُ کَمْبْرْسٜࢽْجَࢽْ دُࢽُو ثَوَࢽْدٜ یِمْ ࢽغُسُوࢽْ ࢽَࢽّغْوُࢽْجَ تْرْغَیْ کْرْغَ؞
[6] رُحُ اللَّهیٜ بُلُسَّ سِلَسَّرُو ثِدِ أَسِیَیٜلَࢽْ مَࢽَ کْمَیٜ وُلْدُ دَࢻْثْغْࢽَدْ، لَرْدُوَ ࢻِرِجِیَیٜیَ غَلَتِیَیٜیَیٜࢽْ رٜجَࢽٜ کُویٜرَ؞
[7] کَرْࢽْ ثِدِ مِسِیَیٜرُو کَدِرَࢽِّیَ، ثِدِ بِتِࢽِیَیٜرُو لٜدُ مَیٜرَ، أَمَّ رُحُ عِیسَیٜ تَیِرُو أَمَرْجْغْࢽِّ؞
[8] دَجِ ثِدِ مِسِیَیٜࢽْ کُوجَࢽٜ بْرْࢽِ تَرُوَسّٜرُو لٜىٰرَ؞
[9] ثُرُو بُࢽٜىٰࢽْ بُلُسُّو وَحَیِ ࢻْلٜدِیٜ، کَمْ لَا لَرْدُ مَکِدُوࢽِیَیٜ دَادَ تِرُو: «أَرٜ مَکِدُوࢽِیَرُو، أَࢽْدِرُو بَࢽَسَغَࢽٜ!» ثْࢽٜ تِیَ لُواْجِ کِرُو؞
[10] وَحَیِدَ کِرُࢽِّیَمَ، مَکِدُوࢽِیَرُو لٜدُ مَیٜیْیٜ، اللَّه تَیِرُو کَوُرِ کْجِدَ وُلْدُوُرُو بُواْسَࢽَرُو ࢽُوࢽِیٜࢽَ ࢽَࢽْغَرُو؞
[11] دَجِ بْرْࢽِ تَرُوَسّٜࢽْ مَارَرُو ࢽغَیِیٜ ثُکُ سَمُوتْرَکِ ثَࢽِیٜرُو ثْکُّو لٜىٰیْیٜ؞ وَجْࢽَࢽْجُوَ بْرْࢽِ ࢽِیَبُولِسّٜرُو کَدِیٜࢽْدٜیَ،
[12] ࢽَدْࢽْ بْرْࢽِ رُومَࢽْوُیٜ دُوُوࢽْ بْرْࢽِ کُرَ لَرْدُ مَکِدُوࢽِیَیٜ ࢻِلِبِ ثَࢽِدْرُو إِسِیٜ کَوُ غَࢽَرُو ࢽَࢻْکٜیْیٜ؞
[13] یِمْ تُسْتُیٜیَ ࢽغَوُورَمْ بْرْࢽِدْیٜࢽْ لُوِیٜ ثِ بْرْمْبٜ ࢽَ مُودُوَ ثَدِ تْمَࢽِیٜࢽَدْرُو لٜىٰیْیٜ؞ ࢽَࢻْکٜیْیٜࢽْدٜیَ، کَمُوَ ثَࢻْتَࢽَدْرُو مَࢽَدُوُ بَدِیٜیْیٜ؞
[14] کَمُ اللَّه رِدَمَ لَا بَتَّ کِمٜ لَدُومَ بْرْࢽِ تِیَتِرَیٜ تِرُو لِدِیَ ثَࢽِ مَࢽَدَ کْرْࢽْجِ، اللَّه أَوُو بُلُسْ وُلْجِدَ کَسَتُّرُو کَرْوُࢽْجُرُو کٜکُّو؞
[15] تِیَ أَمْ ࢻَࢽّجُیٜیَرُو کَسَلَ کِدِّیٜࢽْدٜیَ، أَࢽْدِیَ لُواْسَࢽٜ: «وُ کْمَا مْرْسَدُمَرُو ࢽغُوسُوَّا، أَرُواْ ࢻَࢽِّࢽْ جْمُّواْ!» ثْࢽٜ أَࢽْدِیَ سَسَکّٜ لٜىٰیْیٜ؞
[16] یِمْ لَا ࢽَ مُودُوَ دِیُویٜدْرُو لٜدُ دِیٜ دُوُوࢽْ، کِرْ لَا کَرُوَمَ إِسٜ أَࢽْدِیَ کَمْسٜىٰرَ؞ سٜدَࢽْدْ تِیَ ثَکّٜ کُرُو ثْدٜ ࢽغَیْࢽِࢽْ کْمَوَࢽْجُرُو وُرِ کَدَ ثُکُّدِ؞
[17] دَجِ بُلُسَّ أَࢽْدِیَا غَ ࢽغْسّٜ کُواْ سَࢻْثٜ: «أَمْ أَࢽِ کَدُࢽُووُ اللَّه کْمَ سَمٜمَیٜ، ࢽَیِرُو جَوَلْ ࢽجْکَّوُو ࢻَࢽْدُویٜدَ وُلْࢽْجَغَیْ،» ثْࢽِ؞
[18] کَوُ کَدَرُو ࢽغَیْ ثْدِدْ، کْلَ بُلُسّٜࢽْ ࢽجْࢽْ ثُلُوٜ سُوُورْدٜ سٜدَࢽْدْرُو: «ثُ عِیسَى أَلْمَسِیوُیٜࢽْ ࢽِرُو وُلْࢽْجْغْکِّ، تِیَ کُولّٜ لُوٜ!» یٜࢽُو؞ سَدْمَࢽْ تِیَ کُولْیٜࢽُو؞
[19] أَمَّ کْمَوَࢽْجُدْ تْمَࢽْجَ وُرِ ࢻَࢽْدُویٜ بَوُورُو وَلْجْࢽَرُو أَسُیٜرَࢽِّیَ، بُلُسَّ سِلَسَّا ثَدَࢽٜ غْرْجَࢽٜ ࢻَرْسَمْبُو ࢽَ ࢻُوُوُیٜرُو کٜسَدُو؞
[20] دَجِ ࢻُوُ أَلْکَلِیَیٜرُو کٜوُدْࢽِّیَ، تَیِرُو: «أَمْ أَࢽِ یَوْدِیَ، بْرْࢽِࢽْدٜرُو ࢻِتْࢽَ ثَوُدِ،
[21] أَدَ دُوُوࢽْ کَسَتُّࢽْجُ بِ غَࢽْجُ وُواْمْ أَࢽْدِ رُومَࢽْوُرُو دَمْسَاࢽَا ثَکَّرَیْ؞»
[22] جَمَدْ یٜ بُلُسَّ سِلَسَّرُو ثَࢻْکَادَرَ؞ دَجِ أَلْکَلِیَدْ کَجْمُ بُلُسَّ سِلَسَّیٜیَ دُࢽُوࢽْ رِࢽْجَࢽٜ وَدَ ثَدٜ کَلَࢽْ بَکّٜرَ؞
[23] ࢽغْوُرُو تَیِیَ بَکّٜرَࢽِّیَ، کُوسُورُو ثَسَکّٜ غُرٜدُمَدْرُو وَدَ ثَدٜ ࢻْرْسْتَیْوَوُورُو رُوجُو یٜرَ؞
[24] وَدَ أَدَ کِوَࢽْدْࢽِّیَ، تَیِیَ ثُرُو کُوسُورَمْبٜࢽْ سُلُّرُ دَرْیٜىٰدْرُو ثَکّٜ سِࢽْجَا دْمْبْلُّو تُیٜىٰࢽُو؞
[25] بُࢽٜ دْرْدُ بُلُسَّ سِلَسَّ مُودُوَ ثَدِ اللَّهرُو أَیْیَ ࢽجُࢽْغُورُویٜ یٜجَغَیْ، کُوسُووُ غَدٜ یٜ تَیِیَ کْرْࢽْجَیْ ࢽغَیْ دُوُوࢽْ،
[26] ثِدِ دَمَ بَوُورُو لُولُوجٜ ࢻْرْدُ کُوسُورَمْدْیٜ مُوجِ بَدِیٜࢽُو؞ سَدْمَࢽْ ثِࢽَّسُو سَمَّ ࢻْرْمْدَࢽٜ سَرْغَ کُوسُووُ سَمَّیٜ وُیْیَدَرَ؞
[27] غُرٜدُمَدْ کْࢽْمْࢽِࢽْ ثِجٜ ثِࢽَّ سَمَّ کَادَ کِرُࢽِّیَ، کُوسُووُ ࢽغَ ثَغَسْࢽَ ثْࢽٜ کْلَࢽْجُ ࢽجٜجُورُو کَشَغَرْ ࢻِتْکٜࢽُو؞
[28] أَمَّ بُلُسْ کُواْ سَࢻْثٜ: «بَرٜ کْلَࢽْمْ لُورُࢽْمِّ! أَࢽْدِ سَمَّ مٜࢽَّ،» یٜࢽُو؞
[29] غُرٜدُمَدْ ࢻَتْلَ ثُوُورٜ غَࢽْغَدَرُو ࢽغَیٜ لُولُوجِیَرُو ࢻُوُ بُلُسَّ سِلَسَّیٜࢽْ تُࢽْغُرُمْجٜ ࢽغُیٜࢽُو؞
[30] تَیِیَ دٜیَرُو ثُتُّلُوٜ: «مَلْمْبَ، أَوِ دِکّٜ ࢽجْکَّوُو ࢻَࢽْدْکِّ؟» ثْࢽٜ کِوُورْࢽِّیَ،
[31] تِرُو: «کْمَ عِیسَىٰ مْرْسَࢽٜ، ࢽِیَ أَمْ ࢻَࢽّْمْبٜ سَمَّا ࢽجْکَّوُو ࢻَࢽْدُوِ،» یٜرَ؞
[32] دَجِ تِیَ أَمْ ࢻَࢽّجُیٜ سَمَّارُو کَوُرِ کْمَیٜیَ وُلْیٜىٰرَ؞
[33] بُࢽٜ سَ أَدْمَࢽْ تَیِیَ ثَدٜ تُࢽُوࢽْجَسُو تُلْیٜࢽُو؞ تُلْیٜࢽِّیَمَ، بُلُسَّ سِلَسَّدْ تِیَ أَمْ ࢻَࢽّجُیٜ سَمَّارُو کَسَلَ کٜدُّو؞
[34] تَیِیَ ࢻَࢽّجُرُو کِوُدْࢽِّیَ، مَسْࢽَ تَیِرُو کَیْࢽُو، کُورُو اللَّهَ مْرْسَجْࢽَ ࢽَࢽْغَرُو تِیَ أَمْ ࢻَࢽّجُیٜیَیٜ کَرْوُࢽْجَ جَوْرُو کْجِیٜࢽُو؞
[35] دُࢽِیَ وَیٜࢽِّیَ، أَلْکَلِیَدْ سُوجِیَ ثَࢽُودٜ: «أَمْ أَࢽِیَ کُولّٜ لٜجَ!» یٜرَ؞
[36] دَجِ غُرٜدُمَدْ مَࢽَ أَࢽِیَ بُلُسُّو وُلْجِیٜ تِرُو: «أَلْکَلِیَیٜ ࢽَیِیَ کُولْࢽْجَکُّو ثَࢽَّ؞ أَدْ ࢽَࢽْغَرُو لُوُواْ، کْلٜوَࢽْ لٜࢽُواْ!» یٜࢽُو؞
[37] أَمَّ بُلُسّٜ تَیِرُو: «أَ! أَࢽْدِ رُومَࢽْوُ دُوُوࢽْ، شَرَ سَدّْࢽِّࢽْ ࢻُوُ جَمَیٜࢽْ بَࢽْسَࢽٜ کُوسُورُو سٜسَکُّو! کْرْمَ أَسْرْلَࢽْ أَࢽْدِیَ کُولْدُ مَجَیْ وَ؟ سُوَࢽَ! تَیِ کْلَࢽْجَمَ إِسَ کُولْسَ!» یٜࢽِّیَ،
[38] سُوجِیَدْ وَلْدَࢽٜ أَلْکَلِیَدْرُو مَࢽَ بُلُسّٜدَ وُلْیٜىٰرَ؞ أَلْکَلِیَدْ یٜ بُلُسَّ سِلَسَّا رُومَࢽْوُرُو ࢻَࢽْغٜرَࢽِّیَ، رِجَࢽٜ
[39] إِسَࢽٜ ࢽَࢽْجَࢽْ غَوَرَ ثَوُورٜ کُوسُولَࢽْ ثَتُّلُوٜ تَیِیَ لُواْجَࢽٜ بْرْࢽِدْࢽْ ثَلُوُو یٜرَ؞
[40] بُلُسَّ سِلَسَّ کُوسُولَࢽْ کٜلُوُࢽِّیَ، ࢻَدُو لِدِیَیٜرُو لٜىٰرَ؞ ࢽَدْࢽْ کْرَمِیَا تَدٜ تَیِرُو کُواْرِ ثَدٜ سَࢻْکَدَرَ؞