[1] ثُرُو جَمَ عِیسَىٰ غَوُ بْرْࢽِ أَࢽْتَکِیَیٜلَࢽْ دَسَاࢽَدْیٜࢽْ ࢽَوِیَا مَلْمْبَا مبٜجِ، تَیِمَ بَرْࢽَبَسْ، سِمَࢽْ تِرُو ثْلْمْ ثَࢽِدْ، لُسِیَسْ بْلَ کُرَࢽٜىٰ، مَࢽَیِ کَمْ مَیْ حِرُدُسَّ غَࢽَࢽْجَࢽْ رُوکُّو ثِجَࢽَ، شَوُلُ؞
[2] أَسٜمْ ثَدَࢽَ کْمَࢽْدٜرُو أَمْبْثَّغَیْ دُوُوࢽْ، رُحُ اللَّهیٜ تَیِرُو: «بَرْࢽَبَسَّ شَوُلُوَا غَلَسْغْࢽُواْ، کِدَ دُوُوࢽْ تِ ࢽَࢽْغَرُو تَیِیَ بُواْکّْࢽَدَ ثَدُو!» یٜࢽُو؞
[3] دَجِ أَسٜمْبَ مُودُوَا ثَدٜ تَیِرُو مُکُّوࢽْجَ غْࢽَیٜىٰرَࢽِّیَ، سَلَمْغٜرَ؞
[4] رُحُ اللَّهیٜ بَرْࢽَبَسَّ شَوُلُوَا ثُࢽُودْࢽَدْرُو، بْلَ سَلُکِیَیٜرُو لٜجَࢽٜ ࢽَدْࢽْ مَارَرُو ࢽغَسَیٜ ثُکُ کُوِرُسّٜرُو لٜىٰرَ؞
[5] بْرْࢽِ سَلَمِسّٜرُو کَدِرَࢽِّیَ، دَࢽْدَلَّ یَوْدِیَیٜࢽْ مَࢽَ اللَّهیٜ جَمَرُو وُلْدُوُ بَدِیٜرَ؞ یَحْیـَى یٜ رُوکُّوࢽْجَࢽْ تَیِرُو بَࢽَجِیے؞
[6] ثُکُدْ سَمَّا رٜجَࢽٜ کُوجَࢽٜ حَرْ بْلَ بَࢻُوسّٜرُو کَدِرَࢽِّیَ، کَمْ لَا سَغَوُمَ ࢽَوِ کَتُّوُیٜ یَوْدِ تِرُو بَرْ إِسَ ثَࢽِیَ ࢽَیٜىٰرَ؞
[7] تِدْ غُومْࢽَدَ رُوکُّو؞ غُومْࢽَدْ حَࢽْغَلَّ ثُࢽْجُ سَرْجِیُسْ بُلُسْ؞ مَࢽَ اللَّهیٜ ࢻَࢽْدُ ثْرَاࢽَ ࢽَࢽْغَرُو، بَرْࢽَبَسَّ شَوُلُوَا بُواْیٜࢽُو؞
[8] أَمَّ بَرْ إِسَ تِرُو أَلِمَسْ یٜ ثَࢽِ مَاࢽَࢽْجُ سَغَوُمَدْ تَیِیَ وَیٜࢽُو، غُومْࢽَدَ کَمْبْرْسٜدْلَࢽْ سُوُورْدُ مَجِ ࢽَࢽْغَرُو؞
[9] دَجِ رُحُ اللَّهیٜ شَوُلُ تِرُو بُلُسْ یٜ ثَࢽِدَ ثَکّٜ تِیَ سِمْࢽِࢽْ ثَࢻُّو ثُرٜ
[10] تِرُو: «ࢽِ تَدَ إِوُلِیسّٜ، جِرٜ وَدَمَ، ࢽَࢽْغَ سُو، جَمْبَ سُو سَمَّلَࢽْ تْمْبْرْمَّدْ، جَوَلْ جِرٜىٰ کْمَࢽْدٜىٰدَ کَتُّوُیٜرُو کَلَکْتُ کُولّْمْبَوُو وَ؟
[11] أَکُّو کْرْمَ مُکُّو کْمَࢽْدٜىٰ کْلَࢽْمْࢽِࢽْ، کَمْبُرُو وَلّْمٜ کَوُ غَࢽَرُو کْࢽْغَلْ رُمْبَوُو!» یٜࢽُو؞ سَدْمَࢽْ بَࢽْدْغْࢽٜ سُو، دُوُ سُو تِرُو جْࢻْثَغَࢽٜ ࢻُوࢻُومْجٜ جٜدُمَ مَیٜࢽُو؞
[12] غُومْࢽَدْ أَوُو وَکَّجْࢽَ أَدَ کِرُࢽِّیَ، عِیسَىٰ کَسَتْکٜࢽُو، أَلَمْدُ کْلَ کْمَیٜدَ أَجَࢻْثْࢽَ ࢽَࢽْغَرُو؞
[13] دَجِ بُلُسَّ أَمْ تِیَ ثَسَدُّوُࢽَا بْلَ بَࢻُوسّٜࢽْ مَارَرُو ࢽغَسَیٜ بْلَ ࢻْرْغَ لَرْدُ بَمْࢻِلِیَیٜرُو لٜىٰرَ؞ ࢽَدْࢽْ یَحْیـَى تَیِیَ کُولْجٜ جٜرُجَلٜمْبُو وَلَّدَ؞
[14] تَیِدْ ࢻْرْغَیٜࢽْ کُوجَࢽٜ بْرْࢽِ أَࢽْتَکِیَ ثِدِ بِسِدِیَیٜرُو کَدِرَ؞ یِمْ تُسْتُیٜیَ دَࢽْدَلُّو ࢽغَسَیٜ ࢽَࢻْکٜرَ؞
[15] ثُرُو أَتَّوْرَ ࢽَوِ مُوسَیٜیَ کِتَوُوَ ࢽَوِیَیٜیَیٜࢽْ کْرَیٜرَࢽِّیَ، وُرَوَ دَࢽْدَلّٜدْ تَیِرُو: «کْرَمِیَ، مَࢽَ غَلْغَلْدَیٜ لَا جَمَرُو ࢽجْدُّویٜ تَوَّا، وُلُّواْ!» یٜرَ؞
[16] دَجِ بُلُسْ ثِجٜ مُکُّوࢽْجُ سَࢻْثٜ تَیِرُو: «جَمَ إِسْرَاءِیلَیٜیَ ࢽَیِ اللَّه رِدَوُوَ، ࢻَࢽُّواْ!
[17] اللَّه کْمَ جَمَ إِسْرَاءِیلَیٜ کَارِیَࢽْدٜیَ کْرٜجٜ سَ مَسَرْࢽِࢽْ ࢽَࢻْتُ ࢽَࢽْسِکُدُویٜ ثَدِدْࢽْ تَیِیَ إِسَࢽْغْوُجِیٜ دُࢽُووَرُو ثْدٜ مُکُّو کْࢽْدُوُووَلَࢽْ تَیِیَ لَرْدُدْࢽْ کِتُّلُوُو؞
[18] کْلَ حَلْࢽْجَیٜࢽْ کْرْوُ ࢻِدٜوُ غَیْرُو کَرَا دْرِلَࢽْ کَࢽَدِ کِدَ؞
[19] جَمَ غَدٜغَدٜ تُلُرْ لَرْدُ کَࢽْعَࢽَیٜࢽْ سِیٜىٰࢽِّیَ، ثِدِࢽْجَدَ وَرَسَرُو تَیِرُو کَیْࢽُو؞
[20] أَوُو أَࢽِ سَمَّ کْرْوُ یٜرْ دٜوُࢽْ ࢻِوُࢽْ غَیْࢽِࢽْ وَکَّیٜࢽُو؞ «ࢽغَوُو أَدْیٜࢽْ تَیِرُو أَلْکَلِیَ کَیْࢽُو، حَرْ جَمَࢽْ ࢽَوِ سَمَیْلَیٜرُو؞
[21] دَجِ مَیْ کٜوُورْࢽِّیَ، اللَّه تَیِرُو شَوُلُ تَدَ کِسّٜ جِرِ بِلِیَمِࢽُیٜدَ ثٜ کْرْوُ ࢻِدٜوُرُو تَیِیَ کِࢽُودُو؞
[22] دَجِ تِیَ سْلْیٜࢽِّیَ، ࢽَوِ دَاوُدَا مَیْرُو غَلَجٜ کْلَࢽْجُࢽْ شٜدَجٜ: ‹دَاوُدَ تَدَ یِسَیْیٜیَ ࢻَࢽْدْکّْࢽَ، تِمَ کَمْ کَرْوُࢽِ ثْرَاࢽَدْ وُو، أَوُو رَاکّْࢽَ سَمَّا ثْدِ،› یٜࢽُو؞
[23] وَدُ ࢽغُوجْࢽَدْ غَیْ، اللَّه کَدُوُ کَمْ أَدْیٜࢽْ جَمَ إِسْرَاءِیلَیٜرُو ࢽجْکَّیِمَ کِسَࢽْغُو؞ تِمَ عِیسَى وُو؞
[24] کَوُ إِسِدْرُو، ࢽَوِ یَحْیـَى جَمَ إِسْرَاءِیلَیٜ سَمَّرُو کَوُرِ کَسَلَ تُوَیٜ مَوُویٜىٰࢽُو؞
[25] کِدَࢽْجُ ࢽجٜرُو ثْدِ دُوُوࢽْ، تِیٜ: ‹وُࢽْدُرُو وُوَ ࢽغُوسٜوْ؟ وُ غْࢽِ تِ وُو! ࢽُوࢽُواْ، تِ دُوُوࢽْ جٜ سُࢽُوࢽْجُیٜ وُیْدُمَ تِکّْࢽِدْ ࢽغَوُوࢽِࢽْ إِسِ،› یٜࢽُو؞
[26] «کْرَمِیَࢽِ، ࢽَیِ کَدُوُ ࢽَوِ إِبْرَاهِیمْبٜیَ ࢽَیِ اللَّه رِدَوُوَ، ࢻَࢽُّواْ! أَࢽْدِمَرُو اللَّه کَوُرِ ࢽجْکَّوُو ࢻَࢽْدُویٜ أَدَ إِسَࢽُوسٜىٰرَ؞
[27] أَمْ جٜرُجَلٜمْࢽِࢽْ دَسَاࢽَا أَمْوُرَوَࢽْجَا عِیسَىٰ ࢽجْکَّیِمَدْرُو أَسُجَࢽِّ، مَࢽَ ࢽَوِیَیٜ یِمْ تُسْتُیٜ ࢻِࢽْ یَیٜ دَࢽْدَلْࢽِࢽْ کْرَجَیْدْ یٜیَ أَسُجَࢽِّ؞ أَدْ ࢽَࢽْغَرُو تِرُو شَرَ کَرْمُویٜ ثَدّٜ ࢽغَیْࢽِࢽْ ثَسَکّٜ أَوُووَ ࢽَوِیَ أَࢽِ وُلْجَࢽَدْ وَکَّیٜرَ؞
[28] أَیَوْ رُورُو ࢽجٜجُویٜ تِلَࢽْ ثَوَࢽْدْࢽِّ یَیٜ، غُومْࢽَ بِلَتُسَّ لُواْجَࢽٜ تِیَ ثٜجُو یٜرَ؞
[29] دَجِ أَوُو کْلَࢽْجُࢽْ رُوُوَدَ سَمَّا ثَدٜ کٜسٜرْࢽِّیَ، تِیَ کْسْکَدْࢽْ ثَسَیٜ ثُرُو کَوْرِیٜࢽْ غْࢽَیٜرَ؞
[30] أَمَّ اللَّه تِیَ کَرْمُولَࢽْ ثْسَࢽْغٜ
[31] کَوُ کَدَرُو عِیسَى أَمْ ثِدِ غَلِلٜىٰلَࢽْ جٜرُجَلٜمْبُو تِیَ ثَسَدُّوُࢽَدْرُو ࢻْلٜیَادَ؞ تَیِ یٜ کْرْمَ جَمَرُو شٜدَوُ؞
[32] أَࢽْدِ یٜ ࢽَیِرُو کَوُرِ کْجِ وَدُ دُوُوࢽْ اللَّه کَارِیَࢽْدٜرُو ࢽغُوجْغْࢽَدْیٜ وُلْࢽْجَغَیْیٜ؞
[33] کْرْمَ اللَّه أَࢽْدِ کَدُوُࢽْجَدْرُو عِیسَىٰ کَرْمُولَࢽْ سَࢽْغُویٜࢽْ وَدُ أَدَ سَدّْࢽَ؞ کِتَوُ جَوُرَیٜ سُرَ یِࢽْدِیٜࢽْ رُوُوَدَدْ غَیْ: ‹ࢽِ تَدَࢽِ، کُ بَوَࢽْمْبُو وَلّْکّْࢽَ!›
[34] «تِیَ کَرْمُولَࢽْ ثْسَࢽْغٜ تْمَّرُو وَلْدٜ ࢽجْࢻْثِوَوُودْ، اللَّهیٜ ࢽغَیْ ثْࢽَّ: ‹بَرْغَ دُوُوࢽْ دَاوُدَرُو وَدُرُو ࢽغُوغْکّٜ تَبَّتْکْکّْࢽَدَ ࢽَیِرُو دْمْࢽْجَغَکِّ؞›
[35] کُورُو جَوُرَلَࢽْ سُرَ غَدٜࢽْ تِیٜ: ‹تِ تَیِرْࢽْمْدَ یَکّْمٜ ࢽجْࢻْثِوَوُو،› ثْࢽَّ؞
[36] تُو، تِ ࢽَوِ دَاوُدَدْ جَمَࢽّجُࢽْ کِدَ اللَّه تِرُو کَدَرْجْغْࢽَدَ ثْدٜ تُمُویٜىٰࢽِّیَ، رُو ثْرْمْبٜ غْرٜ کَارِࢽْجُسُویٜࢽْ سِتّْرَجَࢽٜ کَمِࢽّجُ ࢽجْࢻْکٜࢽُو؞
[37] أَمَّ تِ اللَّه ثْسَࢽْغْࢽَدْ تْمَّرُو ࢽجْࢻْثْࢽِّ؞
[38] «کْرَمِیَࢽِ، أَدَ ࢽغْلَرُو ࢽُوࢽُواْ! کَمْ أَدْیٜࢽْ کَوُرِ غَوَرَ بِوُوَࢽْدُویٜ ࢽَیِرُو ࢽجَدِّیٜࢽَ؞
[39] تِلَمَࢽْ دِیٜ کَمْ تِیَ کَسَثّْࢽَمَدْ غَوَرَ بِوُیٜ دُوُوࢽْ وَدَ أَتَّوْرَ ࢽَوِ مُوسَیٜ غَوِلَࢽْ رَࢽْغُوٜ ࢻَࢽْدُوَّوُودَ ثُوَࢽْدٜ جِرٜمَرُو وَلْجِ؞
[40] أَدْ ࢽَࢽْغَرُو حَࢽْغَلْ غْࢽَࢽُواْ! بَرٜ کُولُّوٜ أَوُو کِتَوُوَ ࢽَوِیَیٜࢽْ رُوُوَدَدْ ࢽَیِرُو وَکَّࢽْجَغَࢽِّ:
[41] ‹ࢽَیِ رُدُ غْࢽَدُوُمَسُودْ، رُیْوُو! أَجَمُّواْ، ࢽُیْوُو! دَلِلْࢽْجُدْ کْࢽْدُو لَا جَمَࢽّدُوࢽْ دِکِّ، کْࢽْدُو دُوُوࢽْ کَمْ لَا وُلْࢽْجَاࢽَمَࢽْ، یَسَرَوَّوُو!›»
[42] بُلُسَّ بَرْࢽَبَسَّ دَࢽْدَلْࢽِࢽْ لُوُو ثَدِ دُوُوࢽْ، أَمْدْ یِمْ تُسْتُیٜ ࢻُوُیٜࢽْ أَوُو أَࢽِیَ تَیِرُو وُلْجَارُو لُواْیٜرَ؞
[43] جَمَدْ سَࢻْکَدَرَࢽِّیَ، یَوْدِیَا أَدِࢽْوُ یَوْدِیَرُو وَلْجَࢽَا کَدَ بُلُسَّ بَرْࢽَبَسَّا غٜیَ؞ تَیِ یٜ تَیِرُو غَلَ ثَدّٜ ثُرُو سٜرْ اللَّهیٜࢽْ دَسَا یٜرَ؞
[44] یِمْ تُسْتُیٜ دِرِجٜ کَدِࢽِّیَ، بْرْࢽِوُدْیٜ ࢽغْوُࢽْجَ کَوُرِ کْمَࢽْدٜىٰیَ ࢻَࢽْدُرُو ثَࢻْکَدَرَ؞
[45] یَوْدِیَدْ جَمَ کَدَ کَدَمِدَ کٜرُࢽِّیَ، ࢽَࢽْدْرِ تَیِیَ ثْدَࢽٜ أَوُو بُلُسْ وُلْجِدَ کَمْبِوُجَࢽٜ تِیَ رَرَیٜرَ؞
[46] أَمَّ بُلُسَّ بَرْࢽَبَسَّ رِدُ بَوُووَرُو تَیِرُو: «بُرْوُوࢽْ ࢽَیِرُو مَࢽَ اللَّهیٜ ࢽجْدُّودْ وَجِࢻْثُو، أَمَّ تِیَ وَࢽُوٜ مَرْتَوَ رُو سَوِسُویٜ ࢻَࢽْدُویٜ یِتُّوِّرُو ࢽَیِ کْلَࢽْدُووَ ࢽغُوࢽُوَّدْرُو، أَکُّو کَࢽْجِ کْرْدِیَیٜرُو سُوُورْدِیٜ!
[47] أَکُّو وَدَ کْمَࢽْدٜ سَدْࢽَدْ: ‹ࢽِیَ کْرْدِیَرُو ࢽُرْ ࢽجُکُّدُومَرُو ࢽجْدْکّْࢽَ، دَجِرَمْ دُࢽِیَیٜرُو ࢽجْکَّوُو یَدْمِرُو؞›»
[48] کْرْدِیَدْ أَدَ ࢻَࢽْغٜرَࢽِّیَ، کْجِࢽْجُ ࢻَࢽْجَࢽٜ مَࢽَ کْمَࢽْدٜىٰرُو دَرَجَ ࢽجُو بَدِیٜرَ؞ أَمْ دُوُوࢽْ اللَّه تَیِیَ رُو سَوِسُویٜ کَدَرْجْغْࢽَ سَمَّ کَسَتْکٜرَ؞
[49] مَࢽَ کْمَࢽْدٜىٰ ثِدِدْ ࢽغَرُو تَتَرْغَادَ؞
[50] أَمَّ یَوْدِیَدْ حَࢽْغَلْ کَمُوَ دَرَجَا اللَّه رِدَوُوَ ࢻُوُوُ بْرْࢽِدْیٜیَیٜ ثَسَࢽْغٜ بُلُسَّ بَرْࢽَبَسَّا بَسَرْجَࢽٜ تَیِیَ ثِدِࢽْجَࢽْ دُیٜرَ؞
[51] دَجِ بُلُسَّ بَرْࢽَبَسَّ تَیِرُو کَتِّ سِࢽْجَیٜ کَغَکْثَࢽٜ بْرْࢽِ إِکُوࢽِیَیٜرُو لٜىٰرَ؞
[52] ࢻُوُرَوَدْ کَرْوُࢽْجَ جَوْرُو کْجِ یٜ، رُحُ اللَّهیٜ تَیِلَࢽْ کْرْغَ یٜ؞