[1] أَࢻُولُسْ بْرْࢽِ کُورِࢽْتِیٜلَࢽْ دُوُوࢽْ، بُلُسْ ثِدِ کَوْ کَوْوَ کُوجٜ بْرْࢽِ أَࢻِسَیٜرُو کَدِࢽِّیَ، ࢻُوُرَوَ لَآ ࢽَجِیٜ
[2] تَیِرُو: «سَ عِیسَىٰ کَسَدُّوَّدْࢽْ، رُحُ اللَّهیٜ جْمْࢽْجَاࢽَ وَ؟» ثْࢽٜ کِوُورُو؞ تِرُو: «أَعَ، أَࢽْدِ رُحُ اللَّهیٜ مبٜجِمَرُو ࢻَࢽِّیٜࢽْدٜ،» یٜرَ؞
[3] بُلُسّٜ: «کَسَلَ ࢻِ غْلٜ ࢽَیِرُو ࢽجَدُّو؟» ثْࢽٜ کِوُورْࢽِّیَ، تَیِیٜ: «کَسَلَ ࢽَوِ یَحْیـَیٜ،» یٜرَ؞
[4] دَجِ بُلُسّٜ: «ࢽَوِ یَحْیـَى أَمْبُو کَسَلَ تُوَیٜ ثْدّٜ تَیِرُو کَمْ ࢽغَوُوࢽْجُࢽْ إِسِدَ کَسَثَّ جَا ثْࢽِ؞ کَمْدْ تِمَ عِیسَى وُو؞»
[5] أَدَ ࢻَࢽْغٜرَࢽِّیَ، ثُ کْمَ عِیسَیٜࢽْ تَیِرُو کَسَلَ کٜدُّو؞
[6] دَجِ بُلُسْ تَیِرُو مُکُّو غْࢽَیٜىٰࢽِّیَ، رُحُ اللَّهیٜ تَیِرُو جْࢻْثِیٜ تْلَمْبَ غَدٜغَدٜࢽْ مَࢽَجَࢽٜ ࢽَوِࢽَوِ دِیُو بَدِیٜرَ؞
[7] أَمْ أَࢽِ، تَیِ أَلَمَ کُوࢽغوَ مٜوُࢽْ یِࢽْدِࢽْ غَیْ؞
[8] بُلُسْ دَࢽْدَلُّو ࢽغَیٜ کْࢽْدَوُ یَکُّرُو رِدُ بَوُووَرُو کَمْبِوُجٜ کْلَ ࢽُودُو بَرْغَا اللَّهیٜࢽْ جَمَا أَلَمْجٜ کَسَثَّرُو مَجِ؞
[9] أَمَّ لَاࢽجَ کْلَکِبُّ ثَدٜ کَسَتُّ وَجَࢽٜ ࢻُوُ جَمَیٜࢽْ جَوَلْدْرُو رُدُ غْࢽَیٜىٰرَࢽِّیَ، بُلُسْ تَیِیَ کُولْجٜ ࢻُوُرَوَدَ ࢽغُوجٜ لٜجٜ یِمْ ࢽغُسُوࢽْ أَلَمْدُرَمْ کَمْ تِرُو تِرَࢽُسْ ثَࢽِیٜࢽْ تَیِیَ أَلَمْجِ کْرْغَ؞
[10] کْرْوُ یِࢽْدِرُو أَلَمْجِ ࢽغَیْ دُوُوࢽْ، أَمْ ثِدِ أَسِیَیٜࢽْ دَسَاࢽَ سَمَّ مَࢽَ کْمَدْیٜ ࢻَࢽْغٜرَ، یَوْدِیَ یٜࢽْ کَلْ، یَوْدِیَ غْࢽِ یٜࢽْ کَلْ؞
[11] اللَّه مُکُّو بُلُسّٜࢽْ أَوُو جَوْرُو أَجَبَّ أَجَبَّ ثْدٜ
[12] حَرْ بَتَّ سُو، کَجْمُ سُو تِیَ لٜجَࢽَدَ ثَوُدٜ أَمْ دُوࢽْدِرُو غْࢽَجَغَیْیَ، کَسُوَࢽْجَࢽْ ࢽغَجَیْ، سٜدَࢽْسُو یٜ تَیِلَࢽْ ثَلُوِ؞
[13] یَوْدِیَ سٜدَࢽْ دُدَوُ دَدَجَیْسُو لَا یٜ ثُ کْمَ عِیسَیٜࢽْ سٜدَࢽَّ دُدُ مَجَࢽٜ تَیِرُو: «ثُ عِیسَى کَمْ بُلُسْ مَوُوجِدْیٜࢽْ وُلْࢽْجَغَکِّ، لُوُواْ!» ثَࢽِ؞
[14] رِمَࢽْ کُرَ لَا تِرُو سِبَ ثَࢽِیٜ تَدَوَࢽْجُ تُلُرْ ࢽغَیْ ثَدِ دُوُوࢽْ،
[15] سٜدَࢽْدْیٜ تَیِرُو: «عِیسَدَ ࢽُوکّْࢽَ، بُلُسْ یٜیَ ࢽُوکّْࢽَ، أَمَّ ࢽَیِدْ وُࢽْدُسُو؟» ثْࢽٜ
[16] کَرُوَمَدْ کْلَࢽْجَرُو سْکْتِیٜ دُࢽُوࢽْجَ کُوجٜ ࢽَسَرْجٜ، حَرْ دٜ سُلْ لُورُوَدَ ثَغَسٜ ࢻَدُودْلَࢽْ کٜلُوُو؞
[17] أَمْ بْرْࢽِ أَࢻِسَیٜلَࢽْ دَسَاࢽَ سَمَّ، یَوْدِیَ یٜࢽْ کَلْ، یَوْدِیَ غْࢽِ یٜࢽْ کَلْ، لَوَرْ أَدَ ࢻَࢽْغٜرَࢽِّیَ، تَیِ سَمَّ رِجَࢽٜ ثُ کْمَ عِیسَیٜرُو دَرَجَ کٜدُو؞
[18] أَمْ عِیسَىٰ کَسَثَّࢽَدْیٜ ࢽغْوُࢽْجَ إِسَࢽٜ أَوُو دِوِ دِوِ ثَدْࢽَدَ ࢻُوُ جَمَیٜࢽْ وُلْیٜرَ،
[19] کُورُو أَمْ ࢽغْوُ سَغَوُ ثَدْࢽَدْ یٜ کِتَوُࢽْجَ ثَوُدٜ ثَࢻْثَࢽٜ ࢻُوُ جَمَ سَمَّیٜࢽْ کَࢽُّ کٜتَّ؞ تَمَࢽّجَ إِسَࢻْکٜرَࢽِّیَ، ثُࢽْغُو رِوُلَّیٜ دْوُ ࢻِوُ؞
[20] أَدْغَیْمَ مَࢽَ کْمَیٜ تَتَرْدِیٜ کْࢽْدُوُووَرُو وَلْجِ کْرْغَ؞
[21] ࢽغَوُو أَوُو أَࢽِ وَکَّجَࢽَیٜࢽْ، کْࢽْدُوُو رُحُ اللَّهیٜࢽْ بُلُسْ ࢽِیَ لَرْدُوَ مَکِدُوࢽِیَا أَکَیَایٜࢽْ رٜࢽْمٜ کُوࢽْمٜ جٜرُجَلٜمْبُو لٜدُیٜ ࢽغُوجٜ کْلَࢽْجُرُو: «ࢽغَوُو ࢽَ أَࢽِرُو لٜکّْࢽَیٜࢽْ، سَیْ بْرْࢽِ رُومْبٜ یٜیَ رُکِّیَ!» یٜࢽُو؞
[22] دَجِ بَࢽَوُࢽْجُیٜ یِࢽْدِ تِمُوتِیَ إٜرَسْتُسَّا لَرْدُ مَکِدُوࢽِیَیٜرُو کِࢽُودُو، أَمَّ تِ کْلَࢽْجُ کَوُ غَࢽَرُو ثِدِ أَسِیَیٜࢽْ ࢽَࢻْکٜࢽُو؞
[23] جَمَࢽْ أَدْࢽْ حَࢽْغَلْسَࢽْغُو کُرَ جَوَلْدْ ࢽَࢽْغَرُو ثِیٜࢽُو؞
[24] رِوُلَّ کَرُومَ لَا تِرُو دِمِتْرِیُسْ ثَࢽِ مبٜجِ؞ تِدْ ࢻَدُو سْࢽْمْ یَ أَرْتِمَسّٜ رِوُلَّࢽْ ثْدَࢽْدٜ سَࢽِیَوُرُو رِوَ غْࢽَغْࢽِ ثُکُّدِ؞
[25] دَجِ سَࢽِیَوُدَ أَمْ کِدَࢽْجَ کَاࢽجَا ثَمُࢽَّا ثَࢻْثٜ تَیِرُو: «جَمَ، سَࢽِیَࢽْدٜ أَدْࢽْ ࢻَࢽْدِࢽْدٜ دِیٜرُو ࢽُوࢽُوَّ؞
[26] رُوٜ ࢻَࢽُّوَّدْ غَیْ، بْرْࢽِ أَࢻِسَیٜ رُࢽْجُࢽْ غْࢽِ، ࢽَ غَࢽَرُو کَجِیَ، أَسِیَ سَمَّࢽْ بُلُسْ أَدْ غُمْکِیَ مُکُّوࢽْ تَغَرْࢽَدْ أَلَوَ جِرٜىٰ غْࢽِ ثْࢽٜ أَمْ ࢽغْوُ مَࢽَࢽْجُ ࢽغُوجَࢽٜ جَوَلَّࢽْ ثَلُوُࢽَ؞
[27] أَدْ ثَکّٜ سَࢽِیَࢽْدٜرُو دِوِ وُلْدُوُ رُࢽْجُ غْࢽِ، حَرْ سْࢽْمْ کُرَ یَ أَرْتِمَسْ تِ دُوُوࢽْ أَمْ أَسِیَیٜ سُو، دُࢽِیَ ࢽغَیٜ سُو سَمَّ أَمْبْثَّغَیْدْیٜ ࢻَࢽّجُ یٜ أَوِمَ غْࢽِرُو وَلْجِ، دَرَجَࢽْجُ یٜ بَوُورُو وَلْجِ،» یٜࢽُو؞
[28] أَدَ ࢻَࢽْغٜرَࢽِّیَ، تَیْ دَجَࢽٜ غْرْغَجَࢽٜ کُواْ سَࢻْثَࢽٜ: «یَ أَرْتِمَسْ أَࢻِسَیٜمَ کُرَ وُو!» ثَࢽِ؞
[29] دَجِ حَࢽْغَلْسَࢽْغُودْ بْرْࢽِ ࢽغَرُو تَتَرْغَادَ؞ جَمَدْ غَیُسَّ أَرِسْتَرْکُسَّ أَمْ لَرْدُ مَکِدُوࢽِیَیٜ بُلُسَّ ثَسَدُّوُࢽَدَ ثَدَࢽٜ کْلَ تِلُوࢽَّ ࢻَرْسَمْبُو غَࢽْغَدَرُو کٜسَدُو؞
[30] بُلُسْ ثُرُو ثَمُّودْیٜرُو ࢽغَوُو ثْرَاࢽَ دُوُوࢽْ، ࢻُوُرَوَدْ تِرُو دَࢻْکٜىٰرَ،
[31] کُورُو ࢻُوُوُ کُرَ کُرَ ثِدِ أَسِیَیٜ لَا تَیِ دُوُوࢽْ سَوَوَࢽْجُدْ تِرُو أَمْ ثَکُّࢽُودٜ بَرٜ ࢻَرْسَمْدْرُو لٜجْࢽِّرُو لُواْیٜرَ؞
[32] أَمْ ثَࢻْتَࢽَدْیٜ حَࢽْغَلْࢽْجَ ثِجْࢽَ ࢽَࢽْغَرُو، لَاࢽجَ أَوُو لَا یِلْجَࢽٜ وُلْجَیْ، لَادْ یٜ أَوُو غَدٜ یِلْجَࢽٜ وُلْجَیْ؞ کُورُو ࢽغْوُࢽْجَ أَوِرُو ثَࢻْکَدَرَمَرُو ࢽُوجَࢽِّ؞
[33] دَجِ یَوْدِیَدْ أَلٜکْسَࢽْدَا تْمْبَلْجَغَࢽٜ أَمْ لَا جَمَدْیٜ تِیَ ثَسَکّٜ ࢻُوُرُو کُوجٜ دَیٜࢽِّیَ، مُکُّو سَࢻْثٜ جَمَدْرُو جَوَوِ ثْدِّ یٜࢽُو؞
[34] أَمَّ تِ یَوْدِرُو أَسُیٜرَࢽِّیَ، تَیِ سَمَّ کْلَ تِلُوࢽَّ سَ یِࢽْدِ غَیْرُو یِلْجَیْیَرُو: «یَ أَرْتِمَسْ أَࢻِسَیٜمَ کُرَ وُو!» ثَࢽِ؞
[35] کَکَّدُمَ بْرْࢽِدْیٜ جَمَدَ ثَکّٜ ࢽْمْغٜرَࢽِّیَ، تَیِرُو: «أَمْ بْرْࢽِ أَࢻِسَیٜ، وُࢽْدُ غْلٜ بْرْࢽِ أَࢻِسَیٜ تِمَ غُرٜدُمَ ࢻَدُو یَ أَرْتِمَسْ دَرَجَادْیٜیَ غُمْکِࢽْجُ کَوْیٜ سَمٜلَࢽْ ثُرْࢽَدْیٜیَ ࢽُوجْࢽِّدْ؟
[36] تُو، وُࢽْدُمَ أَوُو أَࢽِیَ رَکْثٜ أَࢽْغْرْجِوَوُودْ، کْدْکْ ࢽَمُّواْ، بَرٜ حَࢽْغَلْ بَوُولَࢽْ أَوِمَ دِوِّ؞
[37] أَمْ أَࢽِیَ ࢽَ أَدْرُو کُدُوَّ، أَمَّ أَوِمَ دِوِ ࢻَدُو یَ أَرْتِمَسّٜࢽْ ثَدْࢽِّ یٜ، تِیَ رَجَࢽِّ یٜ؞
[38] دِمِتْرِیُسَّ سَࢽِیَوُ أَمَࢽْجُوَ کْلَ کَمْ لَایٜࢽْ سُوࢽْجَآ، شَرَرَمْ مٜࢽَّ، أَلْکَلِیَ یٜ مٜࢽَّ؞ کَتّٜࢽْجَࢽْ بُرْوُدَ!
[39] کُورُو مَࢽَࢽْدُو غَدٜ لَا مٜࢽَّا، جَمَ مَجِلِسُّو ثَࢻْتَیْیَ، لَمَرْدَ شَرَجَیْ؞
[40] حَࢽْغَلْ غْࢽَࢽُواْ، أَوُو کُ وَکَّجْࢽَ أَدْ حَࢽْغَلْسَࢽْغُو ثَࢽٜ بُرْوُسَیْیَ، رَࢽْغِیٜ دْلْوُ جُسّْࢽَ ࢻَلْمَ ثَمُّوࢽْدٜ أَدْیٜ یِیٜوَوُو؞»
[41] أَدَ وُلْیٜࢽِّیَ، جَمَدَ سَلَمْغٜࢽُو؞