[1] ࢽغَوُو أَدْیٜࢽْ عِیسَى کُورُو وَلْدٜ ࢻُوُرَوَࢽْجُرُو ثِ بْرْمْ تِرُو تِبٜرِیَسْ ثَࢽِدْیٜࢽْ ࢻْلٜیَادَ؞ أَکُّو جِرِ تَیِرُو ࢻْلٜدْغْࢽَدْ:
[2] سَدْࢽْ سِمَࢽْ بِتُرُسَّ تُومَ کَمْ تِرُو کَوُ ثَࢽِدَ ࢽَتَࢽِیٜلْ کَمْ کَࢽَ ثِدِ غَلِلٜىٰدَ تَدَوَ جَبَدِیٜیَ ࢻُوُرَ عِیسَیٜ غَدٜ یِࢽْدِیَ رُوکُّو مبٜجِ؞
[3] سِمَࢽْ بِتُرُسّٜ تَیِرُو: «بُࢽِ تَرُو لٜکِّ،» یٜࢽِّیَ، تِرُو: «أَࢽْدِ یٜ ࢽِیَ رُوکُّو لٜࢽِیٜ!» یٜرَ؞ دَجِ ثَلُوٜ مَارَرُو کَسَرْغَوُو، أَمَّ بُࢽٜ أَدْࢽْ أَوِمَ ثَدَࢽِّ؞
[4] دُࢽِیَ وَیٜࢽِّیَ، عِیسَى ثِ بْرْمْدْیٜࢽْ دَیٜࢽُو، أَمَّ ࢻُوُرَوَدْ تِ عِیسَرُو أَسُجَࢽِّ؞
[5] دَجِ عِیسَیٜ تَیِرُو: «تَدَوَ، بُࢽِ تَوَّ وَ؟» ثْࢽٜ کِوُورْࢽِّیَ، تِرُو: «أَعَ،» یٜرَ؞
[6] تَیِرُو: «بُࢽِ تَرَمْدَ کْمْبُورَمْ مَارَدْیٜرُو غْࢻْکْࢽُواْ، ࢻَࢽْدُوِ،» یٜࢽُو؞ غْࢻْکٜىٰرَࢽِّیَ، ࢽَࢽّغْوُ بُࢽِدْیٜدْرُو تُلُوُو تِیٜرُو؞
[7] دَجِ ࢻُوُرَ عِیسَى تِیَ جَوْرُو ثْرَاࢽَدْیٜ بِتُرُسُّو: «تِمَ کْمَدْ وُو!» یٜࢽُو؞ سِمَࢽْ بِتُرُسْ تِ کْمَدْ وُورُو ࢻَࢽْغٜࢽِّیَ، رِࢽْغَدَ ࢽَࢽْغَرُو کَلْوُࢽْجُ لُجٜ سْکْتٜ بْرْمْدْرُو غْࢻْکَادَࢽُو؞
[8] ࢻُوُرَوَ غَࢻْثَࢽَدْ تَیِ ثِ إِࢽْغِیٜࢽْ کُرُوُࢽْ غْࢽِ مٜتْرْ مِیَ غَیْ ࢽَࢽْغَرُو مَارَدْࢽْ تَرَمْ بُࢽِیَدَ غْرْجَࢽٜ کَدِرَ؞
[9] ثِدِرُو جْࢻْکٜرَࢽِّیَ، ࢽَدْࢽْ کَࢽُّ کَࢽْدُوَلّٜ بُࢽِ کْلَࢽْجُࢽْ غْࢽَادَا بُرُودِیَ مبٜجِ کٜرُو؞
[10] عِیسَیٜ تَیِرُو: «بُࢽِ کْرْمَ تَوَّدْیٜ لَاࢽجَ کُدُواْ!» یٜࢽُو؞
[11] دَجِ سِمَࢽْ بِتُرُسْ جُوَࢽٜ بُࢽِ تَرَمْࢽْجَ بُࢽِࢽْ ثَࢻْ ثْمْبْرْࢽَدَ ثِدِرُو غْرْیٜࢽُو؞ ثُرُودْࢽْ بُࢽِ کُرَ کُرَ مِیَࢽْ ࢻِوُࢽْ یَکُّࢽْ مبٜجِ؞ بُࢽِ کَدَ کَدَمِ یَیٜ، بُࢽِ تَرَمْدْ کَرْدْࢽِّ؞
[12] عِیسَیٜ تَیِرُو: «أَرُواْ بُیْوُو!» یٜࢽُو؞ وُࢽْدُࢽْجَمَیٜ تِرُو: «ࢽِ وُࢽْدُ؟» ثْࢽٜ ثُوُورْࢽِّ، تِ کْمَدْرُو أَسُجَࢽَ ࢽَࢽْغَرُو؞
[13] دَجِ عِیسَى إِسٜ بُرُودِدَ ࢽغُوجٜ تَیِرُو کَیْࢽُو، بُࢽِ یٜ ࢽغَیْ؞
[14] عِیسَى کَرْمُولَࢽْ ثِجْࢽَیٜ ࢽغَوُوࢽْ، أَدْمَ یَکُّیٜرُو ࢻُوُرَوَدْرُو ࢻْلٜدُوُࢽْجُدْ وُو؞
[15] غٜوُࢽِّیَ، عِیسَیٜ سِمَࢽْ بِتُرُسُّو: «سِمَࢽْ تَدَ یَحْیـَیٜ، تَیِ أَࢽِیَ کُوجْࢽَرُو وُوَ سْرَامَّ وَ؟» ثْࢽٜ کِوُورُو؞ بِتُرُسّٜ تِرُو: «آه، کْمَ؞ ࢽِیَ ࢽجْرَاکّْࢽَرُو ࢽُوࢽْمَّ،» یٜࢽُو؞ عِیسَیٜ تِرُو: «دِمِیَࢽِیَ أَمْبَࢽٜ!» یٜࢽُو؞
[16] کُورُو عِیسَى کْࢽْیِࢽْدِیٜرُو تِرُو: «سِمَࢽْ تَدَ یَحْیـَیٜ، سْرَامَّ وَ؟» ثْࢽٜ کِوُورُو؞ تِیٜ: «آه، کْمَ؞ ࢽِیَ ࢽجْرَاکّْࢽَرُو ࢽُوࢽْمَّ،» یٜࢽُو؞ عِیسَیٜ: «دِمِیَࢽِرُو کِسْکْࢽٜ!» یٜࢽُو؞
[17] کُورُو عِیسَى کْࢽْیَکُّیٜرُو تِرُو: «سِمَࢽْ تَدَ یَحْیـَیٜ، سْرَامَّ وَ؟» ثْࢽٜ کِوُورْࢽِّیَ، بِتُرُسّٜ کَرْوُ کُتَّیٜࢽُو، عِیسَى کْࢽْیَکُّیٜرُو تِرُو: «سْرَامَّ وَ؟» ثْࢽَّ ࢽَࢽْغَرُو؞ تِیٜ: «کْمَ، ࢽِ أَوِ یَیٜ ࢽُوࢽْمَّ، ࢽِیَ ࢽجْرَاکّْࢽَرُو ࢽُوࢽْمَّ،» یٜࢽِّیَ، عِیسَیٜ تِرُو: «دِمِیَࢽِیَ أَمْبَࢽٜ!
[18] جِرٜمَرُو ࢽِرُو وُلْࢽْجْغْکِّ، غَࢽَࢽْمْلَࢽْ ࢽِ کْلَࢽْمْبُو کَلْوُ لُغْمٜ ࢽَ رَامَّرُو لٜࢽْمِ؞ أَمَّ کِیَرِࢽْمِیَ، مُکُّو سَغْمٜ کَمْ غَدٜ کَلْوُ لُࢽْجِیٜ ࢽَ رَامِّرُو ࢽجَدِ،» یٜࢽُو؞
[19] عِیسَى أَدَ وُلْدُࢽْجُدْ، کَرْمُو جِرِ ࢻِیٜࢽْ بِتُرُسْ دَرَجَ اللَّهرُو ثِدَ تِرُو ࢻْلٜیٜىٰࢽُو؞ أَدَ وُلْیٜࢽِّیَ، عِیسَیٜ تِرُو: «وُوَ سْغَیْ!» یٜࢽُو؞
[20] بِتُرُسْ سُوُورْغَدَࢽِّیَ، ࢻُوُرَ عِیسَى جَوْرُو ثْرَاࢽَدْ تَیِیَ جْغَیْ کِرُو، تِ دُوُوࢽْ سَ مَسْࢽَ ثَدِدْࢽْ کَرْࢽْجٜ عِیسَرُو: «کْمَ، وُࢽْدُ ࢽِیَ سْرْࢽّجِیے؟» ثْࢽٜ ثُوُورْࢽَدْ؞
[21] بِتُرُسْ تِیَ کِرُࢽِّیَ، عِیسَرُو: «کْمَ، تِ أَدْ یٜ ࢽدَ؟» یٜࢽُو؞
[22] عِیسَیٜ تِرُو: «کَوُ وَلْدْکّٜ إِسْکِّرُو رُووَ دْغَرُو رَاکّْࢽَا، أَوِ لَمْبُوࢽْمْ؟ ࢽِ وُوَ سْغَیْ!» یٜࢽُو؞
[23] أَدْمَ ࢽَࢽْغَرُو لَوَرْ ࢻُوُرَ أَدْ ࢽُیْوَوُویٜ کْرَمِیَدْرُو تَتَرْغَادَ؞ أَدْ یَیٜ عِیسَیٜ بِتُرُسُّو کَمْدْ ࢽُیْوَوُو ثْࢽِّ، أَمَّ تِیٜ: «کَوُ وَلْدْکّٜ إِسْکِّرُو رُووَ دْغَرُو رَاکّْࢽَا، أَوِ لَمْبُوࢽْمْ؟» ثْࢽَّدْ؞
[24] ࢻُوُرَ أَدْمَ کَمْ کْلَ أَوُو أَࢽِیٜࢽْ شٜدَ ثٜ کِتَوُلَࢽْ رُوُجْࢽَدْ وُو؞ کُورُو شٜدَࢽْجُ جِرٜرُو ࢽُوࢽِیٜࢽَ؞
[25] أَوُو غَدٜ کَدَ عِیسَى ثْدْࢽَ یٜ مبٜجِ؞ ثَ ࢻَلْ ࢻَلّٜࢽْ رُوُجَیْیَ، تْمَکّْࢽَ دُࢽِیَمَ رَکْثٜ کِتَوُوَ رُوُدْࢽَدَ ࢽغُوجِوَوُو؞