[1] Liv sou orijin Jezi Kris, pitit David, pitit Abraam.
[2] Abraam te papa Izaak. Izaak te papa Jakòb. Jakòb te papa Jida ak frè li yo.
[3] Jida te papa Farès ak Zera. Li te fè yo avèk Tama. Farès te papa Eswòm. Eswòm te papa Aram.
[4] Aram te papa Aminadab. Aminadab te papa Naason. Naason te papa Salmon.
[5] Salmon te papa Bowaz. Li te fè li avèk Raab. Bowaz te papa Obèd. Li te fè li avèk Rit. Obèd te papa Izayi.
[6] Izayi te papa wa David. Wa David te papa Salomon. Li te fè li avèk madanm Iri a.
[7] Salomon te papa Woboam. Woboam te papa Abiya. Abiya te papa Aza.
[8] Aza te papa Jozafa. Jozafa te papa Joram. Joram te papa Ozyas.
[9] Ozyas te papa Jowatam. Jowatam te papa Akaz. Akaz te papa Ezekyas.
[10] Ezekyas te papa Manase. Manase te papa Amon. Amon te papa Jozyas.
[11] Jozyas te papa Jekonya ak frè li yo. Se lè sa a depòtasyon Babilòn nan te fèt.
[12] Kounye a, apre depòtasyon Babilòn nan: Jekonya te papa Salatyèl. Salatyèl te papa Zowobabèl.
[13] Zowobabèl te papa Abiyoud. Abiyoud te papa Elyakim. Elyakim te papa Azò.
[14] Azò te papa Sadòk. Sadòk te papa Akim. Akim te papa Eliyoud.
[15] Eliyoud te papa Eleyaza. Eleyaza te papa Matan. Matan te papa Jakòb.
[16] Jakòb te papa Jozèf ki marye ak Mari, manman Jezi, sila yo rele Kris la.
[17] Donk, sa fè katòz jenerasyon antou, soti sou Abraam rive sou David; katòz jenerasyon ankò, soti sou David rive sou depòtasyon Babilòn nan; epi, katòz jenerasyon, soti sou depòtasyon Babilòn nan rive sou Kris la.
[18] Men kijan Jezi Kris te fèt: Pandan manman li, Mari, te fiyanse avèk Jozèf, anvan menm yo te viv ansanm, twouve, Mari vin ansent grasa Lespri Sen an.
[19] Men, Jozèf, mari li a, te yon nonm ki jis. Li pa t vle avili Mari. Alò, li deside divòse avèk li an kachèt.
[20] Pandan li t ap reflechi sou bagay sa yo, twouve, yon zanj Senyè a parèt sou li, nan yon rèv. Li di: Jozèf, pitit David, pa pè pran Mari lakay ou kòm madanm ou. Paske, se grasa Lespri Sen an l ap pote pitit la.
[21] L ap akouche yon pitit gason, e yo va rele li Jezi. Paske, se li menm ki va sove pèp li a anba peche yo.
[22] Tout sa rive, pou pawòl Senyè a ka akonpli, lè pwofèt la te di:
[23] Gade! Vyèj la ap ansent, epi, L ap akouche, l ap fè yon pitit gason. Yo va rele li Emanyèl. Se yon non ki vle di «Bondye avèk nou.»
[24] Lè Jozèf leve nan dòmi, li fè sa zanj Senyè a te kòmande l fè a. Li pran madanm li lakay li.
[25] Men, li pa t kouche avèk li, pou jis lè Mari akouche premye pitit li a. Se te yon gason. Li rele li Jezi.