[1] Nutiis eega jalaa baanee lafa geenye booddee, biiyti bishaan keeysaa sun Malaaxiyaa tahuu isii ti barre.
[2] Warri biyyaa tiis jaalala hisaaba hin qabne nu agarsiisan; roobni roobee dhaamochi waan tureef jecha, ibidda shidanii ti hunduma keenyaa huu ifitti nu yaaman.
[3] Phaawulos hashumee ba'aa takka hammaaree ibiddatti hogguu naqu, buutiin takka ibidda dheefa qoraan keeysaa baatee ti harka Phaawulos irratti maramte.
[4] Warri hogguu bineensa harka Phaawulos irratti rarra'u arkan, “Namtichi kun nama nama ajjeese tahuu dha qaba; balaa bahar jalaa baanaan illee, haqni dhiigaa kunoo isa gadi hin dhiifne” waliin jedhan.
[5] Phaawulos ammoo bineensa san if irraa ibiddatti gadi hurgufee ti, waa takka illee odoo hin tahin hafe.
[6] Ummanni niis ammuma iitawa, yookiin amma lafa dhawee du'a, jedhanii ti eegan. Ammoo wayta dheeraa eeganii, waa takka illeen isa irra gahuu dhabuu agarraan, yaada isaanii jijjiiranii ti, “Inni waaqa tahe tokko” jedhan.
[7] Hoogganaan biyyaa Phophiliyoos kan jedhamu tokko, ollaa sanii lafa qaba ture; inni mana isaa nu naqee ti guyyaa sadih nu keeysummeeysise.
[8] Gaafas abbaan Phophiliyoos dhukkuba leeydaa tii fi garaa yaasuun qabamee ti ciisa ture. Phaawulos ammoo isa bira dhaqee ti, Rabbi kadhatee fii, ammaas harka isaa mataa isaa irra kaayee ti fayyise.
[9] Kun eega tahe booddee, ummanni hafan kaan, warri dhukkubsatan hundinuu dhufanii ti fayyifaman.
[10] Isaaniis kabajaa guddoo nutti godhanii ti kannaalee hedduus nuuf kannan, hogguu markabaan deemuuf kaanees, waan karaaf nu barbaachise nuuf sinqeeysan.
[11] Ji'a sadih booddee markaba Iskindiriiyaa dhaa, kan manziila gannaa biyya Malaaxiyaa tureen kaanee ti deemne; markabtichi sun bifa lakkuu ilmaan Zeos, waaqa tolfamaa dhaa tahe mataa isaa irraa qaba ture.
[12] Nuti magaalaa Siraakusitti gallee ti guyyaa sadih achi turre.
[13] Achii irraa ammaas naannoynee ti, magaalaa Reegiyos geenye. Guyyaa tokko booda qilleensi kibbaa qilleensawuu jalqabnaan, guyyuma lamadaa magaalaa Photiyooli dhufne.
[14] Magaalaa san keeysattiis jara amantoota tokko agarre; isaaniis torbaan tokko akka isaan bira teenyu nu gaafatan. Oduma akkas jennuu ti magaalaa Roomaatti galle.
[15] Amantoonni magaalaa Roomaa tiis akkuma oduu teenya dhagayaniin, hanga magaalaa Aphiyos, warri kaan ammoo hanga bakka Trees Tabeernee jedhamtu takkaatti nu simachuuf jecha dhufan; Phaawulosiis hogguu isaan arke, Rabbi galateeyfatee ti jajjabaate.
[16] Magaalaa Roomaa hogguu seennees, [abbaan dhibbaaleeysaa warra hidhamoo kanneen harka isaa turan, ajajjuu qubata warra loltutti dabarsee ti kanne], Phaawulos ammoo loltuu isa eegu wajjiin kophaa isaa akka taa'uuf hayyameef.
[17] Guyyaa sadih booddee Phaawulos hooggantoota Yihudootaa kanneen Rooma keeysa jiraatan walitti yaamsise. Ammaas eega isaan walitti qabaman booda Phaawulos, “Yaa obboleeyyan koo, ani ummata keenya irratti, aadaa abbootii teenyaa irrattiis yakkaan dalage kanumaan hin qabneen, hidhamee Yerusaaleem irraa harka warra Roomaatti dabarfamee tiin kanname.
[18] Warri Roomaa ammoo na xiinxalanii, yakka du'a anatti farachiisu ana irraa dhabnaan, akkasumatti gadi na dhiisuu dha barbaadan.
[19] Warri Yihudootaa ammoo, dubbii tanaan morminaan, Qeesaaritti iyyachuun dirqama anatti tahe; kuniis ummata kiyya waaniin itti kasasu qabaadhee tii miti.
[20] Sababa kanaaf jechaan isin arkee, isinii wajjiin haasawuuf gaafadhe; ani kunoo, abdii Israa'el jechaafiin shanshalata kanaan hidhamee jira” jedhee ti isaanitti dubbate.
[21] Warri inni itti dubbate sun ammoo, “Nuti biyya Yihudaa irraa waa'ee kee ilaalchisee xalayaan nu geeyse hin jirtu; ammaas obboleeyyan achii dhufaniis, waa'ee kee nuuf hin gabaasne, waa takka illee hamtuu tee tiis hin dubbanne.
[22] Haa tahu malee, nuti yaadni ati qabdu maal akka tahe dhagayuu dha barbaanna; waa'ee murna amantii tanaa taanaan ammoo, bakkuma hallettuu akka ittiin morman ni beeyna” isaan jedhan.
[23] Jarri wayta Phaawulos wajjiin beellama godhatanitti, hoddomaatanii ti mana inni taa'u dhufan. Phaawulos ammoo ganamaa kaasee hanga galgalaatti yaada isaa isaaniif ibsuu dhaan, waa'ee Mootummaa Rabbii isaaniif ragaa bahe. Inni Kitaaba Musee tii fi kitaaba nabiyyootaa keeysaa hiis isaan hubachiisuu dhaan, waa'ee Yesuus isaan fudhachiisuu dha yaale.
[24] Akkasitti isaan keeysaa hangi tokko waan Phaawulos dubbate ni fudhatan; warri kaan ammoo hin amanne.
[25] Achi irratti wal dhabanii ti, eega Phaawulos dubbii takkii tana, “Ruuhal Qudus afaan nabi Isaayaasiin abbootii teeysanitti,
[26] ‘Gara ummata kanaa deemii dhaqii akkana jedhiin, dhagayuu ni dhageeysu, ammoo hin hubattan; laaluu ni ilaaltu, ammoo hin agartan.
[27] Qalbiin ummata kanaa hadooddee ti jirti; gurra isaanii tiis cuqqaalanii ti jiru, ija isaanii tiis duruunfatanii ti jiru. Kun silaa tahuu baatee ija isaanii tiin ni arku, gurra isaanii tiiniis ni dhagayu turan; qalbii isaanii tiiniis ni hubatu, gara koo tittiis ni deebi'u turan, aniis isaan niin fayyisaan ture’ jechuun gaari dubbate.
[28] Akkana taanaan, najaatni Rabbii kun, saba qomoo Israa'el hin tahiniif akka dabre beekaa; isaan ammoo ni dhagayu” jedheeni.
[29] [Eega inni tana jedhe booddee, warri Yihudootaa waliin falamaa ti isa biraa deeman.]
[30] Akkasitti Phaawulos bara lama guutuu mana ifiif kireeyfate keeysa jiraatee, warra gara isaa dhufan hundumaa ni simata ture.
[31] Zaahir baasee dhoorkaa takkaan maleetti Mootummaa Rabbii lallabaa, waa'ee Yesuus Kiristoos Gooftichaa tiis ni barsiisa ture.