[1] Saa'ol amma illee barattoota Gooftaa dhaa doorsisaa isaan ajjeesuuf bookkisaa ti, angafa lubootaa bira dhaqee;
[2] warra xurree Wangeelaa irra jiran yoo arke, dhiiraa fi dhalaas hidhaan hidhee, Yerusaaleem fiduu xalayaa isa dandeeysiftu, manneen sagadaa kanneen Damaasqoo jiranitti akka isaaf barreeysuuf gaafate.
[3] Saa'ol amna isaa tiin Damaasqootti hogguu dhihaate, kunoo, dingatuma ifni samii irraa naannoo isaatti walaqqise.
[4] Inni lafa dhawee ti sagalee, “Saa'ol, yaa Saa'ol, maaliif na ariita?” jettuun dhagaye.
[5] Saa'oliis, “Eenyu ati yaa Gooftaa?” jennaan, sagaleen sun deebiftee ti, “Ani, Yesuusi, kan ati ariitu.
[6] Amma ammoo ka'iitii, magaalaa kana seeni; wanni godhuun si irra jiruus sitti himama” jedheeni.
[7] Ormi isaa wajjiin deemaa turan, usaniituma dhadhaabbachuu malee, waa takka illee dubbachuu hin dandeenye; sagalee dubbattu dhagayuu malees, nama tokko illee hin agarre.
[8] Saa'ol lafaa ka'ee, iji isaa hogguu banamte, humaa arkuu hin dandeenye; kanaaf harka isaa qabanii ti, Damaasqootti isa galchan.
[9] Ammaas hanga guyyaa sadihii ijaan arkuu hin dandeenye; humaa tiis hin nyaanne, niis hin dhuyne.
[10] Barattuun Ananiyaas jedhamu tokko hogguus Damaasqoo dha ture. Gooftaan mullata keysatti, “Ananiyaas!” isaan jennaan, inniis, “Kunoo, asiin jira, yaa Gooftaa!” jedheeni.
[11] Gooftaaniis, “Ka'ii tii, gara karaa sirrii jedhamuu deemii! Nama biyya Xarsees kan maqaan isaa Saa'ol jedhamu tokko, mana Yudaasitti iyyaafadhu; kunoo, inni kadhata irra jira.
[12] Inninuu mullata keeysatti, namtichi Ananiyaas jedhamu tokko dhufee, agartuun isaaf akka deebituuf, harka isaa kan isa irra kaayuu arkee ti jira” jedheeni.
[13] Ananiyaas ammoo, “Yaa Gooftaa, namtichi kun Yerusaaleemitti, kaadamtoota kee akkamitti miidhaa akka ture, waa'ee isaa nama hedduu irraa dhagayee tiin jira.
[14] Asittiis taanaan, warra maqaa kee yaammatan hundumaa qaqqabee hidhuuf, luboota angafoota biraa nama amrii arkatee jiru” jedhee ti deebiseefi.
[15] Gooftaan ammoo, “Deemi, inni meeshaa tiyya, tan ummata saba Israa'el hin tahin duratti, mootota durattii fi, ammaas joollee Israa'el durattiis maqaa kiyya beeysisuuf ani filadhee dha.
[16] Maqaa kiyyaaf jecha hammam takka dararamuun akka isa irra jiru, anaa tu isa agarsiisa” jedheeni.
[17] Akkasitti Ananiyaas ka'ee deemee ti mana san seenee ti, harka isaa mataa Saa'ol irra kaayee, “Yaa obboleeysa koo Saa'ol, Gooftichi, Yesuus inni karaa ati irra dhufte irratti sitti mullate, waa'ee tee anatti himee ti jira; akka agartuun tee siif deebitu, ammaas Ruuhal Qudusiiniis akka guutamtuuf jecha sitti na ergee ti jira” isaan jedhe.
[18] Hogguusuma wanni akka qonyonyaa dhaa ija isaa lamaan irraa bubuunaan, agartuun isaa tiis deebiteefi; waytuma san ka'ee ti cuuphame.
[19] Midhaan nyaannaan ni jajjabaate; barattoota warra Damaasqoo jiran biraas hanga takka ni bubbule.
[20] Saa'ol ammaas hogguusuma manneen sagadaa keeysatti, “Yesuus kun Ilma Rabbii ti” jechaa ti lallabe.
[21] Warri isa dhaggeeyfatan hundinuu ammaas ajaa'ibuu dhaan, “Namtichi kun, kanuma Yerusaaleemitti warra maqaa Yesuus yaammatan turaab godhuuf tattaafachaa turee mitii? Addana illee, isaanuma hidhee luboota warra angafootatti geeysuuf nama dhufe” waliin jedhan.
[22] Saa'ol ammoo caalatti humna arkachaa ti deeme, Yesuus Masiihii tahuu isaa mirkaniin hubachiisaa waan tureef, Yihudoota Damaasqoo jiraatan waanuma jedhan wallaalchise.
[23] Guyyaa hedduun booddee, Yihudoonni walitti qabamanii ti isa ajjeesuuf marihatan.
[24] Mariin isaanii tun ammoo, Saa'ol bira geeyse; isaan ammoo isa ajjeesuuf, halkanii fi guyyaa karroota mandarichaa ni eegu turan.
[25] Barattoonni isaa ammoo gaaf tokko halkan keeysa isa fuudhanii, zambiila keeysa kaayanii ti, gidaara darbii gubbaa dhaan gadi isa buusan.
[26] Saa'ol hogguu Yerusaaleem dhaqe, bartootatti ida'amuuf tattaafate; isaan ammoo akka inni dhugumaan barattuu tahe waan hin amaniniif jecha, hundi isaanii tuu isa sodaachaa ti turan.
[27] Baarnaabaas ammoo fuudhee ti ergamootatti isa geeysee; karaa irratti akkaataa inni Gooftaa itti arke, Gooftaaniis akkamitti akka isatti dubbate isaaniif ibse; Damaasqootti ammaas Saa'ol akkamitti ija-jabinaan maqaa Yesuusiin akka dubbate, isaanitti hime.
[28] Saa'ol isaanii wajjiin Yerusaaleem keeysa hanga takka bubbulee ti, maqaa Gooftaa Yesuusiin ija-jabinaan lallabe.
[29] Warra Yihudoota kanneen afaan Giriigii dubbatanii wajjiiniis haasawee, isaaniiniis falamaa ti ture; isaan ammoo isa ajjeesuu kajeelan.
[30] Obboleeyyan ammoo tana hubannaan, Qiisaariyaatti gadi isa fidanii ti, gara Xarseesitti ergan.
[31] Akkasitti waldayan amantootaa tan biyya Yihudaa, Galiilaa fi Samaariyaa hundumaa keeysa jirtu nagaya arkattee ti turte; sodaa Gooftatti jiraachaa, gargaarsa Ruuhal Qudusiiniis lakkooysaan hoddomaachaa jajjabaachaa ti turte.
[32] Phexiroos isaan keeysa bakka hundumaa ni naannawa ture; wayta takka ammaas amantoota magaalaa Liidaa keeysa jiraatan laaluuf gadi bu'e.
[33] Achittiis namticha maqaan isaa Eneyaas jedhamu tokko, kan qaamni isaa laamshawee, bara saddeet guutuu siree irraa gadi hin bu'in qunname.
[34] Phexiroosiis, “Yaa Eneyaas, Yesuus Kiristoos si fayyisaa, ka'ii tii siree tee qopheeysi!” isaan jedhe; hogguusuma Eneyaasis ka'e.
[35] Namoonni Liidaa fi Saaron keeysa jiraatan hundinuu namticha arkanii ti, Gooftatti amanan.
[36] Magaalaa Yophee keeysa barattuu Xaabitaa jedhamtu takkaa tu ture; maqaan isii afaan Giriigitti “Dorkaas” jedhama, hiikkaan isaa tiis, Kuruphee jechuu dha. Isiin tun wayta hundumaa hojii gaarii hojjachuu fi hiyyeeysa gargaaruu irratti dabarsiti turte.
[37] Jidduma san dhukkubsattee duunaan, reefka isii dhiqanii ti mana qallaa keeysa ciibsan.
[38] Liidaan Yopheetti dhihoo dha turte; barattoonni, Phexiroos achi akka jiru dhageenyaan, “Hadaraa ammuma dafii nu bira gahi!” jedhanii ti yaamsisuuf nama lama itti ergan.
[39] Phexiroosiis ka'ee ti isaanii wajjiin deeme; akkuma achi gaheen mana qallaa irraatti isa ol baasan. Gursummeeyyiin hundinuu isaan marsanii ti booyaa, uffata jalaa fi gubaan uffatan kanneen odoo Kurupheen fayyaa dhaa isaaniif hojjatte, isa ni agarsiisu turan.
[40] Phexiroos ammoo hunduma isaanii ala baasee ti, ifii jilbiiffatee kadhate; eegas gara reefkaatti garagalee ti, “Xaabitaa, ka'i!” jedheeni. Isiiniis ija isii banattee, Phexiroos hogguu agarte ol godhattee ti teeyse.
[41] Phexiroos harka isaa tiin isii qabee ti ol kaase; kana booddee amantootaa fi gursummeeyyii yaamee ti isii dhaa isaan jidduu dhaabe.
[42] Dubbiin tuniis Yophee hunduma keeysa wal geeysee ti beekamte, namoonni hedduuniis Gooftatti amanan.
[43] Phexiroosiis Yophee keeysa namticha Simoon jedhamu kan gogaa duugu tokko wajjiin guyyaa hedduu dha ture.