[1] Agriiphaan hogguus Phaawulosiin, “Waa'ee mataa kee tii dubbachuun siif hayyamamee ti jira” jennaan, hogguus Phaawulos harka isaa achi diriirsee falmachutti ka'e.
[2] “Yaa Agriiphaa mootii, arraan tana fuula kee duratti dhihaadhee, waan Yihudoonni ittiin ana kasasan hundumaa irratti falmachuuf, carraa kana arkachuu kiyyaaf ayyaantuu akkaan tahee tiin if lakkaawa.
[3] Keeysumattuu aadaalee Yihudootaa hundumaa fi gaaffiilee jiraniis wal-diddaa takka takkaas akka gaaritti waan beeytuuf jecha, obsaan akka ana caqastuun si kadhadha.
[4] Ijoollummaa kiyya irraa jalqabee ummata kiyya jiddutti, Yerusaaleemittiis akkamitti akkaan jiraadhe, Yihudoonni hundinuu ni beeku.
[5] Warri wayta dheertuuf na beekan fedha qabaannaan, akka aadaa amantii teenyatti, murna amantii leelliftuu warra Fariisotaa tahee, jiraachuu kiyya anaaf ragaa bahuu ni dandayu.
[6] Amma ammoo, sababa abdii Rabbi abbootii teenyaaf kanneef jechaan, kasasamee kunoo as dhaabbadha.
[7] Abdiin tuniis, tanuma shanyiin teenya kudha lamaanuu, arkachuuf jecha, halkanii fi guyyaa fardeeyfatanii Rabbi ibaadaniifi. Aniis kunoo yaa Agriiphaa mootii, abduma tanaaf jechaan Yihudootaan kasasama.
[8] Rabbi warra du'an kaasuun isaa isin tokko illee biratti maaliif waan hin malle tahee lakkaawama?
[9] “Anuu mataan koo, karaa anaaf dandayame hundumaan, maqaa Yesuus nama Naazireet kanaan morkuun akka ana irra jirutti fudhadhee tiin ture.
[10] Yerusaaleem keeysattiis tanumaan gochaa ture. Amriin luboota angafoota irraa arkadheen, ani qulqulloota Kiristoos keeysaa hedduu isaanii mana hidhaatti galchee tiin ture. Tana qofa odoo hin tahin, wayta duuti isaanitti faradamtuus, ani warra isaan irratti walii gale keeysaa tokkoon ture.
[11] Wayta hedduus manneen sagadaa hunduma keeysatti isaan adabuu dhaan, akka isaan amantii isaanii ganan godhuuf yaalaa tiin ture; isaanitti belbelaa, hanga mandaroota ambaatti illee isaan niin reebaan ture.
[12] “Odumaan haaluma kanatti jiruu, amrii fi ajaja luboota angafoota biraa fudhadhee, gara magaalaa Damaasqoo deemaa tiin ture.
[13] Karaa irrattiis yaa mootii, guyyaa waaretti ifni ifa aduu irra caalu samii irraa naannoo tiyyaa fi naannoo warra anaa wajjiin deemanitti walaqqisee tiin arke.
[14] Hundi keenyaa huu lafa dhooyne; afaan Yihudootaa tiiniis sagalee takka, ‘Saa'ol! Saa'ol! Maaliif na ariita? Qara kuchoo irra ejjachuun siif irra hammaata’ tan anaan jettuun dhagaye.
[15] “Aniis ammaas, ‘Yaa Gooftaa, ati eenyu?’ jedhee tiin gaafadhe; Gooftaaniis deebisee, ‘Ani Yesuus, kan ati reebaa jirtuu dha.
[16] Amma ammoo ka'ii tii miila kee tiin dhaabbadhu! Kaadamaa kiyya akka taatuufiin si ramaduuf jecha sitti mulladhe; waan sitti mullifamee fi waaniin ani sitti mullisuuf deemuuf, raga-baatuu dha taata.
[17] Warraan ani itti si erguuf taa'u hundumaa irraa, ummata Israa'el irraa, ammaas saboota qomoo Israa'el hin tahin irraahiis siin eewala.
[18] Dukkana irraa gara ifaatti, humna Sheeyxaanaa jalaahiis gara Rabbitti akka deebi'aniif, ija isaanii banuuf, anatti amananii dilii isaanii tiif oomfii akka arkatanii fi ammaas warra amantiin ana keeysatti qulqulleeyfaman jidduttiis dhaala isaanii haa fudhataniif jechaan si erga’ anaan jedhe.
[19] “Kanaafiis yaa Agriiphaa mootii, ani mullata samii irraa anaaf dhufe jalaa hin dinne.
[20] Jalqaba warra Damaasqootti, itti aansee tiis warra Yerusaaleemitti, kana booddees kutaa Yihudaa hunduma keeysattiis, sabni qomoo Israa'el hin tahiniis, toowbatanii gara Rabbitti deebi'anii, hojii toowbaa dhaan maltu akka hojjatan isaanitti labsee tiin jira.
[21] Kanaaf jecha, Yihudoonni Beeytal Maqdas keeysatti na qabanii wanni na ajjeesuuf barbaadaniif.
[22] Hanga guyyaa arraattiis gargaarsa Rabbii tii niin as gahe, kunoo ammaas haaluma kanattiin xiqqaa fi guddaafiis ragaa bahaa jira. Wanniniin ani jedhuus, waanuma nabiyyoonninii fi Museen ni taha jedhanii dubbatan qofa malee waan biraa tii miti.
[23] Kiristoos dararamuun akka isa irra ture, inni ammaas warra du'an keeysaa kan dura ka'ee tahuu isaa tiif jecha, ifa najaataa ummata Israa'elii fi ammaas saboota qomoo Israa'el hin tahaniifiis akka labsuun ragaan baheef” jedheeni.
[24] Phaawulos falmata isaa asiin hogguu gahe, Fesxoos sagalee guddoo dhaan, “Yaa Phaawulos, qalbiin si zawwaaltee ti jirti; barumsa kee guddaa tu, qalbii tee si zawwaale” jedheeni.
[25] Phaawulos ammoo deebisee, “Yaa kabajamaa Fesxoos, ani qalbiin nan zawwaalle. Wanniniin ani jechaa jiruus dhugaa dha fudhatamaasi.
[26] Agriiphaan mootichi, dubbii tana hundumaa keeysa waan beekuuf, ani akkumaan barbaadetti isatti dubbachuu niin dandaya; wanniniin ani dubbadhu tun hundinuu taanaan, takka illeenuu akka isa bira hin dabarre niin amana; kuniis waan hunxuxa keeysatti godhamee miti.
[27] Yaa Agriiphaa mootii, ergaa nabiyyootaatti ni amantaa? Akka ati amantu anuu niin beeka” jedheeni.
[28] Agriiphaan hogguus Phaawulosiin, “Waytuma gabaabduu tanatti kiristaana ana godhuuf yaadda” jedheeni.
[29] Phaawulos deebisee, “Wayta gabaabduus haa taatu, wayta dheertuus, si qofa odoo hin tahin, warri arra ana dhaggeeyfachaa jiran kun hundinuu, shanshaloota hidhaa kana irraa kan hafe, akkuma kiyya akka tahaniin Rabbi kadhadha” jedheeni.
[30] As irratti mootichi, bulchaan biyyaa tii fi Barniqqeen, ammaas warri isaanii wajjiin yaa'ii irra turaniis ni ka'an.
[31] Hogguu achi irraa yaa'an ammoo, “Namtichi kun du'a yookiin hidhaa waan isatti farachiisu, waan takka illee hin goone” waliin jechaa ti turan.
[32] Agriiphaan as irratti Fesxoosiin, “Namtichi kun ‘Qeesaarittiin iyyadha’ odoo waan hin jedhin tahee, gadi dhiifamuu ni dandaya ture” jedheeni.