[1] Angaftichi lubootaa hogguus, “Dubbiin tun dhugumaan akkasii?” jedhee ti Isxifaanos gaafate.
[2] Isxifaanosiis, “Yaa obboleeyyan koo, isin abbootiin tiyyaas, mee na dhaggeeyfadhaa! Abbaan keenya Abrahaam, odoo biyya Kaaraan hin qubatin dura, Mesophotaamiyatti, Rabbi ulfina gooftummaa isaa tiin itti mullatee,
[3] ‘Biyya tee keeysaa, lammii tee keeysaa hiis bahii tii, gara biyyaan ani si agarsiisutti deemi!’ isaan jedhe.
[4] Hogguus inni biyya Kaldootaa tii bahee, Kaaraan taa'e. Ammaas eega abbaan isaa du'e booddee, Rabbi achii isa godaansisee ti, biyya isin amma keeysa jiraattan tanatti isa dabarse.
[5] Wayta sanitti, Rabbi Abrahaamiif, lafa hanga faana miila namaa takka geeysu illee hin kannine ture, ammoo hogguusitti Abrahaam nama ilmoo hin qabne tahu illee garuu, Rabbi biyyuma san isaaf, isa boodaas asara isaa tiif handhuraa kannuuf, wa'ada galee tiif ture.
[6] Rabbi dubbii tana laalchisuun Abrahaamiin, ‘Joolleen joollee tee tii biyya ambaatti galtee dha tahu, ambiti niis achitti isaan bara dhibba afuriif gabroonfatanii akka malee ni cunqursu.
[7] Ani ammoo saba warra isaan gabrummaatti hojjachiifatu san irratti niin farada; achiin booda isaan biyya sanii bahanii, bakka tanatti anaaf ni sagadu’ jedhee ti ture.
[8] Rabbi hogguus, irbuu dheeyna-qabaa dhaa Abrahaamiif kanne. Akkasitti Abrahaam ilma isaa Yisihaaq, dhalatee guyyaa saddeetitti dheeyna qabe; Yisihaaqiis ilma isaa Yaaqoob, Yaaqoobiis ilmaan isaa kudha lamaan, warra abbootii gosaa tahaniif akkasuma godhan.
[9] “Warri abbootii gosaa tahan sun, Yoseefitti hinaafuun, gara Misratti isa gurguran. Rabbi ammoo isaa wajjiin ture.
[10] Rakkoo isaa hunduma keeysaa isa eewalee ti, fuula Fara'oon mooticha Misraa durattiis fudhatamummaa fi hikmaas ni kanneef; mootichi ammaas bulchaa biyya Misraa tii fi qabeenya mana isaa hundumaa irrattiis wakkiila isa godhate.
[11] Bara san biyya Misraa hundumaa fi Kana'aan irratti abaarii fi rakkina guddaa tu bu'e; abbootiin teenyaas limmata nyaatan arkachuu hin dandeenye.
[12] Ammoo hogguu Yaaqoob biyya Misraa midhaan akka jiru dhagaye, marraa duraa tiif abbootii teenya erge.
[13] Simannaa marraa lammadaatti ammaas, Yoseefuu obboleeyyan isaatitti if mullise, haaskaan Yoseefiis, Fara'oon mooticha birattuu ni beekaman.
[14] Kana booddee Yoseef ergee ti abbaa isaa Yaaqoobii fi firoottan isaa warra hafan mara nama torbaatamii shan yaamsise.
[15] Akkasitti Yaaqoob Misra gadi bu'ee ti achitti aakirame; abbootiin teenyaas akkasumatti achitti dhuman.
[16] Lafeen isaanii tiis Shekem geeyfamanii ti, achitti bakka Abrahaam, joollee Hamoor nama biyya Shekem irraa, meetaan bitee ture sanitti awwaalaman.
[17] “Waytiin Rabbi Abrahaamiif abdii kanne san dhihaachaa dhufnaan, ummanni keenya Misra keeysatti guddatee, lakkooysaaniis hoddomaatee ti ture.
[18] Hangasitti mootiin biraa haarayni Yoseef hin beeyne tokko, ka'ee ti biyya Misraa irratti mootome.
[19] Mootichi sun, shanyii teenya shaaxirummaa dhaan qabee ti, daa'imman isaanii akka lubbuun hin jiraanne alatti akka darban abbootii teenya dirqisiise.
[20] Zamana san keeysa Museen dhalate. Inni Rabbi duratti jaalatamaa dha ture; hanga ji'a sadii takkaaf mana abbaa isaa keeysatti guddifamee ti ture.
[21] Hogguu alatti darbame ammoo, intala Fara'oonii tu isa fudhatee, ilma guddifachaa dhaa godhate.
[22] Museen beekumsa warra Misraa hundumaa ni barsiifame; inni dubbittiis taanaan hojittiis, nama jabaa dha ture.
[23] “Umriin dhaan nama bara afurtamaa hogguu tahe, yaada obboleeyyan isaa joolleen Israa'el akkaataa itti jiraatan laaluu jadhuu tu, qalbii isaa keeysa dhufe.
[24] Hogguus isaan keeysaa tokko, nama biyya Misraatiin akka maleetti miidhamaa kan jiru arkee ti, isaaf tumsuudhaan, namticha biyya Misraa san rukutee ajjeese.
[25] Inni akka seehetti, obboleeyyan isaa, Rabbi harka isaa tiin, furmaata isaaniif kannuuf akka isa erge, waan hubatan itti fakkaatee ti ture, isaan ammoo akkanatti isa hin hubanne.
[26] Borumtiis odoo isaan ifii wal lolanii, Museen itti dhufee ti, ‘Yaa jarana, isinuu obboleeyyanii, maaliif wal miitu?’ jechuu dhaan isaan araarsuu dha barbaade.
[27] Namtichi miidhaa ture sun, Muusee if irraa achi darbee ti, ‘Nu irratti ammoo eenyuutu ajajaa fi daanyaa si godhe?
[28] Akkuma kaleeysa namticha biyya Misraa san rukuttee ajjeeftetti, anaas ajjeesuu dha kajeeltee?’ isaan jedhe.
[29] Dubbii tana dhagayuu irratti Museen dheeysee, biyya Miidiyaanitti baqattuu tahee ti jiraate; achittiis ilmaan lama godhate.
[30] “Bara afurtama booddee, huffee gammoojjii Gaara Siinaa biratti tusii qoree tan ibiddi irraa belbelu keeysatti, maleeykaan Rabbii kunoo Museetti mullate.
[31] Museeniis hogguu tana arke waan mullataa tana ajaa'ibee ti, laaluuf itti dhihaannaan, sagalee Gooytaa ti dhagaye,
[32] ‘Ani Rabbii abbootii teetii, Rabbii Abrahaam, kan Yisihaaq, kan Yaaqoobiis’ isaan jedhe. Museen hogguus sodaatee ti hollate, laaluufiis ija hin jabaanne.
[33] Gooytaan hogguus, ‘Bakkiti ati dhaabbattu tun lafa qulqulluu waan taateef jecha, kophee tee if irraa baasi!
[34] Ani miidhaa ummata kiyya, warra Misra jiran irra gahe arkeetiin jira, gururi'a isaaniitiis dhagayeetiin jira, isaan bilisa baasuufiis gadi bu'eetiin jira; ammuma koottu Misrattiin si ergaa’ isaan jedhe.
[35] Museen kun kanuma isaanuu didanii, ‘Eenyuu tu ajajaa fi daanyaas si godhe?’ jedhaniin sani; Rabbi, harka maleeykicha tusii qoree keeysatti itti mullateen, lachuu tuu jechuun, ajajaa fi bilisa-baasaas godhee ti isa erge.
[36] Isa kana kan biyya Misraatii isaan baase. Misrattiis, bahar diimattii fi huffee gammoojjii keeysattiis bara afurtamaaf kan isaan geggeeysee, baasaa fi milikkitaas godhe isuma.
[37] Museen kanuma ummata Israa'eliin, ‘Rabbi akkuma ana kaasetti, obboleeyyan keeysan keeysaa Nabiyyii tokko isiniif ni kaasa’ kan jedhee dha.
[38] Museen kanuma maleeykaan Rabbii Gaara Siinaa gubbatti itti dubbate sani; ammaas abbootiin teenya, warra huffee gammoojjitti walitti qabaman jidduu kan dhaabbate, kan Qoowlii Rabbii Jiraattuu fuudhee nutti dabarsees, isuma.
[39] “Abbootiin teenya ammoo Museef ajajamuu dha didde, isa harka darbanii ti qalbii isaanii keeysatti gara Misratti deebi'uu dha kajeelan.
[40] Isaan hogguus Arooniin, ‘Ka'iitii, waaqayyolii nu qaceelchan nuuf tolchi! Museen biyya Misraa tii nu baase saniis waan tahe hin beeynu’ jedhaniin.
[41] Ammaas isaan wayta san waan jabbii fakkaa tu tolchanii ti, waaqa tolfamaa sanaafiis aarsaa dha dhiheeysan; hojii harka isaanittiis ni gammadan.
[42] Rabbi ammoo isaanitti dallanee ti, urjoota samii keeysaa tiif akka sagadaniif dabarsee ti isaan kanne. Barreeyfamni kitaaba nabiyyootaa akkana jedha, ‘Yaa ummata Israa'el, bara afurtama huffee gammoojjii san keeysatti horii qalmaa tii fi aarsaa, anaaf dhiheeysitanii ti jirtuu?
[43] Kunoo isin dukkaana Molookii fi urjicha waaqa keeysanii Reefaan kan jedhamuu ti baadhattan; isin isaaniif sagaduuf waaqayyolii tolfamaa tolfattan; kanaafiin aniis isin buqqaasee, Baabiloonii achi isin dabarsa’.
[44] “Abbootiin teenya lafa huffee gammoojjii keeysatti dukkaana ragaa dhaa if biraa ni qabu turan; inni niis akkaatuma Rabbiin Museetti fakkii agarsiisee, akkanatti qopheeysi jedhee itti hime sanitti, kan hojjatame ture.
[45] Abbootiin teenya faraqumatti itti dabranii dukkaanticha fudhatanii ti, Iyyaasuudhaa wajjiin biyya saboota warra Rabbi isaan duraa yaasee baasetti galan; dukkaanni niis hanga bara Daawwiditti isaanuma jidduu dha ture.
[46] Daawwid hogguus Rabbi duratti fudhatama arkatee ti, Rabbii Yaaqoobiif mana ijaaruuf hayyama gaafate.
[47] Haa tahuu malee, namtichi Rabbiif mana ijaare Solomoon ture.
[48] “Tahu illee Rabbiin hundumaa ol tahe, manneen harka namaa tiin hojjataman keeysa hin jiraatu. Nabiyyichinuu akkuma jedhetti,
[49] ‘Bantiin samii dhaa arshii tiyya, dachiiniis ejjata faanta miila kiyyaa ti. Manuma akkami anaaf ijaartu ree? Yookiin bakkiti boqonnaa tiyyaa tami?
[50] Isaan kanneen hundumaa harka kiyyaa tu hojjatee mitii? jedha Gooytaan’.
[51] “Isin yaa mata-jabeeyyii, warra qalbiin jaahilaa, gurri keeysaniis jaahilaa; akkuma abbootiin teeysan gochaa turan sanitti, isiniis wayta hundumaa Ruuhal Qudus jalaa diddu.
[52] Nabiyyoota keeysaa ammoo kan abbootiin teeysan hin arihatin ni jiraa? Inni qaceelaan sun dhufa jira jedhanii, warra raajii dubbatan ajjeesanii ti jiru; inni niis kanuma isin amma dabarsitanii kannitan, isuma isin ajjeeftaniisi.
[53] Isinuma warra seera akka maleeykoonni Rabbii isinitti kannanitti fudhattanii tu, ammoo eeguu dide” jedhe.
[54] Isaan kana hundumaa dhageenyaan, aaraan finiinanii ti ilkaan waliin qaran!
[55] Isxifaanos ammoo Ruuhal Qudusiin guutamee, ija itti dhaabee samii keeysa ol laalee, durrii ulfina Rabbii, Yesuusiis harka mirga Rabbii tiin dhaabbatee arkee ti,
[56] “Kunoo, ani bantiiwwan samii banamanii, Ilmi Namaa tiis gara harka mirga Rabbii dhaabbatee tiin arka” jedhe.
[57] Isaan ammoo gurra cuqqaallatanii, qooqa guddaa dhaan itti goohanii ti, bakka-takkaa itti fiigan.
[58] Magaalaa keeysaa daddarbaan gadi isa baasanii ti, dhagaa dhaan rukutan; warri raga-baatuuniis uffata isaanii miila dargaggeeysa Saa'ol jedhamu tokkoo jala kaayatanii ti turan.
[59] Oduma isaan dhagaa dhaan isa rukutaa jiranii ti, Isxifaanos, “Yaa Gooftaa Yesuus, ruhii tiyya fudhadhu!” jedhee ti kadhata godhe.
[60] Jilbiiffatee sagalee guddoo dhaaniis, “Yaa Gooytaa, dilii tana isaanitti hin lakkaawin!” jedhee ti iyye; akkuma tana jedheeni hirriiba kute.