[1] Phexiroosii fi Yohannis ummatatti dubbachaa odoo jiranii, luboonni, alaqaan waardiyyaa Beeytal Maqdasii fi ammaas Saduqoonni isaanitti dhufan.
[2] Ergamoonni kanneen, Yesuus du'aa akka ka'ee fi du'aa ka'uuniis akka jirtu, ummata waan barsiisaniif jecha, hedduu dha isaanitti aaran.
[3] Akkasitti isaan lachuu qaqabanii ti, guyyaan waan dhiheef jecha, hanga barihutti mana hidhaatti naqan.
[4] Haa tahuu malee, warra qoowlicha dhagayan keeysaa namoonni hedduun ni amanan; lakkooysi amantootaa warri dhiiraa qoftinuu hanga kuma shanii ti gahe.
[5] Lafti bariinaan, hooggantoonni Yihudootaa tii fi manguddoonni, barsiisoonni seeraa tiis Yerusaaleemitti walitti qabaman.
[6] Isaan wajjiin Haannaas angaftichi lubootaa, Qayyaaffaa, Yohannisii fi Iskindroos, ammaas warri biraa tiis kanneen haaskaa angafoota lubootaa tahaniis keeysa turan.
[7] Warri ergamoota qaqaban sun, hogguu yaa'ii dura isaan dhaaban, “Humna maalii tiin yookiin maqaa eenyuu tiin tana gootan?” jedhanii ti gaafatan.
[8] Phexiroos hogguus Ruuhal Qudusiin guutamee, “Isin shuumoonni biyyaa, manguddoo warri taataniis,
[9] gocha gaarii namticha naafa ture kanaaf godhameef, akkaataa inni itti fayye, nuti arraan tana gaafatamaa yoo jiraanne,
[10] namtichi fayyaa tahee isin dura dhaabbatu kun, maqaa Yesuus Kiristoos nama Naazireetiin, kan isin fanniftaniin, kan Rabbi du'a keeysaa isa kaaseen fayyuu isaa, hundi keeysanuu beekaa! Ummanni Israa'el hundi niis tana haa beeku.
[11] Inni kun dhagicha, isin warri najjaaronni tuffattan, kan ammoo dhagaa mataa utubaa manaa qaceelchu tahee dha.
[12] Najaatni, Yesuus Kiristoos qofaan malee, karaa biraa tokko illeen hin jiru; maqaan biraa, kan ittiin najaa bahuun nu irra jiru, samii gaditti Banii Aadamiif hin kannamne” jedhe.
[13] Warri miseensa yaa'ii sanii tiis, Phexiroosii fi Yohannis ija-jabinaan akkaataa itti dubbatan hogguu caqasan, wara doofaa kanneen qaraatii hin qabne tahuu isaanii hubatanii ti, ajaa'iban; haa tahu malee, jarri kun warra Yesuusiin wajji turan tahuun isaanii ni galteefi.
[14] Namtichi fayye saniis, Phexiroosii fi Yohannis cinaa dhaabbatee daawwachaa waan jiraniif, waanuma jedhanii ittiin morkan dhaban.
[15] Kanaaf yaa'ii keeysaa akka gadi bahan isaan ajajanii ti, ifiif waliin marihatanii,
[16] “Milikkinni beekamaan jarreen kanaan akka godhamee mullifame, namoota Yerusaaleem keeysa jiraatan hunduma biratti beekamaa dha, nutiis kanaan dhara jechuu hin dandeenyuu; eegasuu jarreen kana maal haa goonu?
[17] Dubbiin tun ummata keeysa baballattee akka hin odeeyfamne, maqaa kanaaniis deebi'anii nam tokkotti illee akka hin dubbanne, jabeeysinee ti isaan doorsifna” jedhanii ti walii galan.
[18] Kana booddee ol isaan yaamanii ti, maqaa Yesuusiin gonkumaa akka hin dubbannee fi akka hin barsiifne, isaan ajajan.
[19] Phexiroosii fi Yohannis ammoo, “Ta Rabbii dhagayuu irra, teeysan dhagayuun Rabbi duratti qaceelaa yoo taate, isinummaan mee faradaa!” jedhanii ti isaaniif deebisan.
[20] “Nuti ammoo waan ifii agarree fi dhageenye odeeysuu dhiisuu hin dandeenyu” jedhaniin.
[21] Yaa'ichi dabalee eega isaan dinniine booda gadi isaan dhiise; namoonni hundinuu waan godhame saniif jecha Rabbiif hamdii dhiheeysaa waan turaniif, ergamoota san adabuuf karaa itti dhaban.
[22] Namtichi mu'ujizaan fayyinaa godhamteef sun, nama umriin bara afurtama dabre ture.
[23] Phexiroosii fi Yohannis akkuma gadi dhiifamaniin, gara saahibban isaaniititti dhaqanii ti, luboonni warri angafoonninii fi manguddoonni waan isaaniin jedhan isaanitti himan.
[24] Isaaniis hogguu tana dhagayan, hundinuu bakka takkaa sagalee isaanii ol fudhatanii ti, Rabbi kadhaa, “Yaa Gooytaa, ati kan samii fi dachii, bahariis, isaan kanneen keeysa waan jiran hundumaa kan uumte.
[25] Ruuhal Qudusiin afaan gabricha kee Daawwid, abbaa keenyaa tiin, ‘Sabni qomoo Israa'el hin tahin maaliif finiinu? Sabni hundi niis faayda-malii maaliif yaadu?
[26] Mootoonni addunyaa lolaaf qindaawan, alaqoonni niis Gooytichaa fi Masiihii isaa irratti ka'uuf bakka-takkaa irratti wal gayan’ jette.
[27] “Eeyye, dhugumaani magaalaa kana keeysatti, Herodisii fi Phonxos Philaaxos, saba qomoo Israa'el hin tahinii fi ammaas ummata Israa'elii wajjiin, kaadamaa kee qulqulluu, Yesuus ati muudde irratti, daba marihatan.
[28] Tanaani, waanuma ati humna tee tii fi fedha kee tiin akka tahaniif duraan herreydee murtoo gootee turte raawwatan.
[29] Ammaas yaa Gooytaa, doorsisa isaanii ilaali, kaadamtoonni kee tiis sodaa takkaan maletti, Qoowlii tee akka dubbataniif, ija-jabummaa kanniif!
[30] Maqaa Yesuus kaadamaa kee qulqullichaa tiin dhukkubsattoota fayyisuuf, milikkitaa fi baasa adda addaa tiis godhuuf, irree tee diriirsi!” jedhan.
[31] Hogguu isaan kadhata kana afaanii fixatan bakkiti isaan itti walitti qabaman ni sossoote. Hundi isaanii tiis Ruuhal Qudusiin guutamanii, Qoowlii Rabbii ija-jabummaa dhaan dubbachaa ti turan.
[32] Namoonni amanan hundinuu, warra garaa tokkoo tii fi yaada tokkoo ti turan. Isaan keeysaa tokko illeen, waanuma ifii qabanii nuu, kun kiyya hin jenne; haa tahu malee, waan qaban hundumaa wajjumaan qabaachu turan.
[33] Ergamoonni niis qiwwaa guddoo dhaani du'aa ka'uu Gooftaa Yesuusiif ragaa bahan; ni'imaan guddooniis hunduma isaanii irra turte.
[34] Namni tokko illeen isaan keeysaa waa dhabee hin rakkanne, lafa yookiin mana warri qaban hundinuu, gurguranii horii isaa tiis ni fidu turan.
[35] Horii fidanii tiis, miila ergamootaa dura kaahu; nama hundumaa fuu matumatti, akkuma isa barbaachisetti ni hiru turan.
[36] Warra Leewii keeysaa, namticha Yoseef jedhamu kan biyya Qophroositti dhalate tokkoo tu ture; ergamoonni “Baarnaabaas” jedhanii ti isa moggaasan; hiikkaan isaa tiis “Ilma jajjabeeysu” jechuu dha.
[37] Namtichi kun araddaa qabu gurguree ti, horii isaa fidee, miila ergamootaa dura kaaye.