[1] Phaawulos karaa isaa itti furee ti magaalaa Derbee tii fi magaalaa Lisxiraa ti dhaqe. Achi Ximotewoos nama jedhamu barattuu tokkoo tu ture; haati isaa Yihudii Wangeelatti amantee dha, abbaan isaa ammoo Giriigii dha.
[2] Amantoota Lisxiraa tii fi Iqooniyuum jiran biratti Ximotewoos maqaa gaarii dhaan kaafama ture.
[3] Phaawulos akka Ximotewoos isaan wajjiin deemu barbaadee ti, dheeyna isa qabsiise. Kanaas wanni godheef, Yihudoonni naannoo san jiran hundinuu, abbaan isaa nama Giriigii tahuu isaa waan beekaniif jecha ture.
[4] Kana booddee isaan karaa bu'anii ti, murtoolee ergamoonninii fi jaarsoliin Yerusaaleemitti irratti walii galan san, mandaroota keeysa dabran hunduma harkaan gayanii ti ammaas akka hojii irraas oolchaniif isaan gorsan.
[5] Waldayoonni kiristaanaa tiis amantitti ni jajjabaatan, lakkooysaaniis guyyuu ni hoddomaa tu turan.
[6] Ruuhal Qudus kutaa biyya Asiyaa keeysatti qoowlicha lallabuu waan isaan dhoorkeef jecha, kutaa biyya Firiigiyaa tii fi Galaatiyaa jidduu dhaan dabran.
[7] Fuullee kutaa biyya Miisiyaa hogguu gayan, kutaa biyya Bitiiniyaa dhaquu dha yaalan. Ruuhaan Yesuus ammoo achi dhaquu isaanitti hin dhiifne.
[8] Kanaaf kutaa biyya Miisiyaa keeysa dabranii ti, Xro'aasitti gadi bu'an.
[9] Phaawulos halkan san keeysa, namticha Maqedooniyaa tokko dhaabbatee, “Maqedooniyaatti as ceehii tii nu gargaari!” jedhee kan isa kadhatu mullatatti arke.
[10] Akkuma inni mullaticha arkeen, Rabbi Wangeela isaaniif akka lallabnuuf nu yaamuu isaa ti, jennee waan fudhanneef jecha, hogguusuma biyya Maqedooniyaatti ceehuuf murteeyfanne.
[11] Magaalaa Xro'aasitti doonii seennee ti, fuullee dhaan Saamotraaqe dheeyne; guyyaa borumtii dhaa tiis magaalaa Ne'apholiisitti dabrine.
[12] Achii ammaas magaalaa Filiphisiiyus geenye; Filiphisiiyus kutaa biyya Maqedooniyaa keeysaa magaalaa guddaa dha ture, qabiyyee warra Roomaa ti turteesi. Nuti magaalaa kana keeysa guyyaa muraasaaf bubbulle.
[13] Guyyaa Sanbataa ammoo karra mandarichaa keeysaa achi ala baanee ti, qarqara lagaa bakka Yihudoonni kadhataaf itti walitti qabaman seenee ti dheeynee ti tetteenyee, dubartoota achitti walitti qabamanitti dubbanne.
[14] Dubartiin uffata hariira gatiin qaalii dhaa gurgurtu, tan magaalaa Tiyaatiraa tii dhufte, ammaas tan amantii warra Yihudootaa tiis fudhatte takkaa tu achi turte; maqaan isii Liidiyaa dha jedhama. Gooftaan gurra qalbii isii baneefii waan tureef, isiin waan Phaawulos dubbate fardeeyfattee ti dhaggeeyfatte.
[15] Isii fi haaskaan isii hundinuu ni cuuphaman; eegasii, “Gooftatti amanuu kiyya yoo fudhattan, mana kiyya koottaa na bira qubadhaa!” jettee ti nu yaamte, akka nuti dheeynuufiis dhiibbaan nu fudhachiifte.
[16] Gaaf tokko nuti bakka kadhataatti odoo deemaa jirruu, wandaqtittii ruuhaa raaga dubbachiisu if keeysaa qabdu takka nutti dhufte; isiin raaga dubbachuu dhaan horii hedduu gooftota isii tiif tan galchiti turte.
[17] Isiin tun, “Namoonni kun kaadamtoota Rabbii Gooytaa ti; karaa najaataa tiis isinitti ni himu” jechaa iyyaa Phaawulosii fi nu duukaa deemti turte.
[18] Akkaataa kanaas guyyaa hedduuf goote. Phaawulos ammoo haala kanaan butamee itti garagalee ti ruuhaanichaan, “Maqaa Yesuus Kiristoosiin akka isii keeysaa baatuun si ajaja!” jedheeni; ruuhaanichi niis za'uma san isii keeysaa bahe.
[19] Gooftoliin wandaqa tanaa ammoo, abdiin horii arkachuun isaanii akka duraa cite hogguu hubatan, Phaawulosii fi Siilaas qabanii ti daddarbaa lafa magaalaa keeysa, fuula warra hooggantootaa ti isaan geeysan.
[20] Ergamoota san hogguu ajajjuu warra Roomaa duratti dhiheeysan, “Jarreen kanneen magaalaa keenya raasaa ti jiru, isaan Yihudoota.
[21] Aadaa nuti warri Roomaa fudhachuu fi ittiin hojjachuuniis nuuf hin taane nu barsiisaa jiru” jedhaniin.
[22] As irratti namoonni hedduun Phaawulosii fi Siilaasiin mormuuf jara kanatti dabalaman; hooggantoonni warra Roomaa suniis uffata isaanii irratti tarsaasanii ti, ulee dhaan akka tumaniif ajajan.
[23] Rukuttaa hedduu dhaaniis eega isaan tumsiisan booddee, mana hidhaatti isaan galchisiisan; achittiis jabeeysee akka isaan eeguuf jecha, waardiyyaa mana hidhaa tiis ni ajajan.
[24] Eeyduun suniis ajaja kana fudhatee, deeraa mana hidhaa keeysaatti isaan galchee ti, miila isaanii tiis gadhooggaa jajjabaa lama jiddutti jabeeysee ti hidhe.
[25] Haa tahu malee ammoo, halkan keeysa toora waarii dhaa, Phaawulosii fi Siilaas Rabbi kadhachaa ammaas faarfachaa ti turan; warri hidhamooniis ammaas isaan caqasaa ti turan.
[26] Dingatuma hanga bu'urri mana hidhaa roora'utti, sossooha dachii guddaa tu tahe; hogguusuma balbaloonni mana hidhaa hundinuu ni banaman, hidhaan warra hidhaman hundumaa irraa ni hiikaman.
[27] Namtichi mana hidhaa eegu sun hirriibaa dammaqee, balbaloonni mana hidhaa banamuu isaanii hogguu arke, warri hidhaman waan bahan seehe; kanaaf habalee isaa luqqifatee ti if ajjeesuu barbaade.
[28] Phaawulos ammoo sagalee guddoo dhaan, “Humaa if hin godhin! Nuti hundinuu kunoo, as jirra” jedhee ti itti iyye.
[29] Namtichi mana hidhaa eegu sun ibsaa yaammatee ti, fiigee ol seenee, hollachaa miila Phaawulosii fi Siilaas irratti kufe.
[30] Ammaas gadi isaan baasee ti, “Yaa gooftolii koo, najaa bahuuf maal godhuu tu ana irra jira?” jedhee ti isaan gaafate.
[31] Isaaniis, “Gooftaa Yesuus Kiristoositti amanii, najaa dha baata, sii fi haaskaan kee tiis najaa dha baatu” jedhanii ti deebisaniif.
[32] Isaaniis ammaas Qoowlii Gooytichaa, namticha sanittii fi ammaas warra mana isaa keeysa turan hundumatti ni himan.
[33] Halkan za'uma san keeysatti isaan if wajjiin fuudhee ti madaa isaanii irraa dhiqe; akkasitti waytuma san haaskaa isaa hundumaan wajjiin cuuphame.
[34] Phaawulosii fi Siilaasiis, mana isaa geeysee ti, nyaata isaaniif dhiheeysise; isaa fi haaskaan isaa hundinuu, waan Rabbitti amananiif jecha, hedduu dha gammadan.
[35] Lafti bariinaan ajajjoonni warra Roomaa, “Jara san gadi dhiisi!” jedhanii ti namticha mana hidhaa eegutti dhaamsa ergan.
[36] As irratti namtichi, “Ajajjoonni warra Roomaa akka gadi dhiifamtaniif nutti erganii ti jiru; kanaaf amma gadi bahaa tii, karaa keeysan nagayaan deemaa!” jedhee ti Phaawulositti hime.
[37] Phaawulos ammoo, “Jarri kun nuti warra abbaa biyyummaa Roomaa qaban taanee odoo jirruu, firdiin maletti zaahiritti nu tumanii ti mana hidhaatti nu galchan; amma ammoo dhooysatti gadi nu baasuu? Kun hin tahuu, ammoo isaanummaan ifumaa dhufanii asii nu haa baasanii” jedhe.
[38] Foolisoonni ergamaniis, dubbii tana ajajjoota warra Roomaatti gabaasan; ajajjoonni warra Roomaa Phaawulosii fi Siilaas warra abbaa biyyummaa Roomaa qaban tahuu isaanii hogguu dhagayan, ni sodaatan.
[39] Akkasitti dhufanii ti isaan sossobanii ti, mana hidhaa tii gadi baasanii ti, magaalaa isaanii keeysaa akka bahan isaan kadhatan.
[40] Phaawulosii fi Siilaas mana hidhaa tii eega bahan booddee, mana Liidiyaa ti dhaqan; obboleeyyaniis arkanii, qoowlii nama jajjabeeysituun isaan gorsanii ti achii deeman.